te Mesia tei ti’afa’ahou ’e tāna mau ’āpōsetolo

Te Mesia ’e te mau ’āpōsetolo, nā Del Parson

30 nō Māti–12 nō ’Ēperēra

Pāsa

Pāsa : « E ti’afa’ahou mai ai ’oia mai te pohe mai ma te ora »

I te mau mahana nā mua atu ē sābati Pāsa atu ai, e nehenehe e rōtahi i tā ’outou iho tuatāpapara’a pāpa’ira’a mo’a ’e tā te ’utuāfare ato’a i ni’a i te fa’a’itera’a pāpū pūai o te Buka a Moromona nō te ora, te pohe, te ti’afa’ahoura’a ’e te mana tāra’ehara a Iesu Mesia.

Pāpa’i i te mau mana’o e tae mai

’Ua itoito maita’i te mau ’āpōsetolo tahito i roto i tō rātou ’itera’a pāpū nō Iesu Mesia ’e tōna ti’afa’ahoura’a. E rave rahi milioni ta’ata e ti’aturi nei ia Iesu Mesia ’e ma te tūtava ’ia pe’e iāna maoti tā rātou mau parau i roto i te Bibilia. Teie rā, e uiui paha tō vetahi mana’o ē, mai te peu pa’i ’o Iesu Mesia te Fa’aora o te ao tā’āto’a nei, nō te aha ïa tōna mau ’ite, e pupu ta’ata iti noa i roto i te hō’ē ārea na’ina’i ?

’Ua riro te Buka a Moromona te tahi fa’ahou ’ite e ha’apāpū nei ē, ’o Iesu Mesia te Fa’aora o te ao, « ’o tē fa’a’ite iāna iho i te mau fenua ato’a ra » (’api upo’o parau o te Buka a Moromona) ’e ’o tē pūpū nei i te fa’aorara’a i te mau ta’ata ato’a e haere mai iāna ra. Hau atu, tē ha’apāpū ato’a nei teie ’ite piti e aha te fa’aorara’a. Terā te tumu Nephi, Iakoba, Moromona ’e te mau peropheta ato’a i ha’a « ma te itoito ’ia ’ō’oti i teie nei mau parau i ni’a i te mau ’api »—nō te fa’a’ite i te mau u’i nō ananahi ē, « i ’ite [rātou] i te Mesia, ’e tei ia [rātou] ho’i te tīa’ira’a i tōna ra hanahana » (Iakoba 4:3–4). I teie tau Pāsa, e feruri i te mau ’itera’a pāpū i roto i te Buka a Moromona e parau nei ē, nō te tā’āto’ara’a ’e nō te ta’ata hō’ē te mana o te tāra’ehara a te Mesia—nō te fa’aora i te ao tā’āto’a nei ’e nō te fa’aora ia ’outou.

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

2 Nephi 9:6–15, 22 ; Alama 11:41–45 ; 40:21–23 ; 3 Nephi 26:4–5

Maoti te ti’afa’ahoura’a o Iesu Mesia, e ti’afa’ahou mai te mau ta’ata ato’a.

E peu i te tau Pāsa, ’ia feruri i te ti’afa’ahoura’a o Iesu Mesia, e aha mau rā te aura’a o te ta’ata ’ia ti’afa’ahou ? E aha te nehenehe e ’apo mai nō ni’a i te ti’afa’ahoura’a i roto i te Buka a Moromona ? Penei a’e i roto i tā ’oe ha’apa’ora’a i te Pāsa e nehenehe tā ’oe e tāpura i te mau parau mau nō ni’a i te ti’afa’ahoura’a e ’itehia ia ’oe i roto i te 2 Nephi 9:6–15, 22 ; Alama 11:41–45 ; 40:21–23 ; ’e te 3 Nephi 26:4–5. E nehenehe ato’a tā ’oe e pāpa’i nō te aha tē mana’o ra ’oe ē, e mea faufa’a ’ia ’ite i te reira mau parau mau ato’a ?

E ’ite paha ’oe ē, pinepine te mau parau mau nō ni’a i te ti’afa’ahoura’a e ha’api’ihia ’ei tū’atira’a i te mau parau mau nō te ha’avāra’a hope’a. ’A feruri e aha tā te reira e ha’api’i nei ia ’oe nō ni’a i te faufa’a o te ti’afa’ahoura’a i roto i te fa’anahora’a nō te fa’aorara’a ?

Hi’o ato’a Luka 24:36–43 ; Te Mau ’Ohipa 24:15 ; 1 Korinetia 15:12–23.

Mosia 3:7 ; 15:5–9 ; Alama 7:11–13

’Ua rave Iesu Mesia i ni’a iāna iho i tā’u mau hara, mau māuiui ’e mau paruparu.

Tē ha’api’i pāpū nei te Bibilia ē, ’ua ’aufau Iesu Mesia nō tā tātou mau hara. I teienei rā, tē fa’ananea fa’ahou nei te Buka a Moromona i tō tātou māramaramara’a i te tusia a te Mesia ’e i tōna mamae nā roto i te mau rāve’a faufa’a rahi. E nehenehe tā ’oe e ’ite i te tahi mau ha’api’ira’a i roto i te Mosia 3:7 ; 15:5–9 ; ’e te Alama 7:11–13. I muri mai i tei tai’ora’a i teie mau ’īrava, e nehenehe e pāpa’i i tā ’oe e ’ite mai i roto i te hō’ē tāpura mai teie i muri nei :

E aha tā te Fa’aora i mamae ?	Nō te aha ’oia i mamae ai ?	E aha te aura’a o te reira nō’u ?
E aha tā te Fa’aora i mamae ?	Nō te aha ’oia i mamae ai ?	E aha te aura’a o te reira nō’u ?

Hi’o ato’a Isaia 53 ; Hebera 4:14–16.

tē pure ra te Mesia i roto i te ’ō nō Getesemane

Getesemane, nā Michael T. Malm

Mosia 5:1–2 ; 27:8–28 ; Alama 15:3–12 ; 24:7–19

Tē tāmā nei te tāra’ehara a Iesu Mesia iā’u ’e tē tauturu ato’a nei ’ia ha’amaita’i iā’u.

E ti’a ’ia parau ē, i te hō’ē pae rahi, e fa’ati’ara’a te Buka a Moromona nō te hō’ē nūna’a tei taui maoti te tāra’ehara a Iesu Mesia. Inaha, vetahi o rātou, e mau ta’ata ïa tei rave i te mau hara rahi ’e tei riro roa ato’a ’ei mau ’enemi nō te nūna’a o te Atua hou te mana o te Fa’aora i ’ohipa ai i roto ia rātou i te hō’ē tauira’a pūai mai te au i tō rātou fa’aro’o iāna. E nehenehe e tai’o i te tahi o teie mau ’ohipa i roto i te Mosia 5:1–2 ; 27:8–28 ; ’e te Alama 15:3–12 ; 24:7–19 ; tē vai nei paha te tahi atu mau hi’ora’a tā ’oe e mana’o ra. E aha te tū’atira’a tā ’oe e ’ite ra i roto i teie mau ’ohipa ato’a ? E aha te mau ’ohipa ta’a ’ē tā ’oe e ’ite ra ? E aha tā teie mau fa’ati’ara’a e ha’api’i nei nō ni’a i te huru te tāra’ehara a te Fa’aora e nehenehe e taui ia ’oe ?

Hi’o ato’a Alama 5:6–14 ; 13:11–12 ; 18 ; 19:1–16 ; 22:1–26 ; 36:16–21 ; Etera 12:27 ; Moroni 10:32–33.

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia fa’ahanahana ’outou i te Pāsa ’e tō ’outou ’utuāfare, ’a hi’o i te mau rāve’a nō te ha’api’i ’āmui nō ni’a i te Fa’aora ’e tāna tāra’ehara, ’e tae noa atu te Ti’a-fa’ahou-ra’a. Teie te tahi mau mana’o.

3 Nephi 11 ; 17

’Ua ’ite te tahi mau ’utuāfare ē, e mea au ’ia tuatāpapa ta’a ’ē i te fa’ati’ara’a nō te tere o te Fa’aora tei ti’afa’ahou i Amerika i te tau nō te Pāsa. Fa’aitoito i te mau melo o te ’utuāfare ’ia feruri ’āhani nā rātou i tāpe’a i tōna mau puta (hi’o 3 Nephi 11:14–15) ’aore rā ’āhani ’o rātou hō’ē o te mau tamari’i tāna i ha’amaita’i (hi’o 3 Nephi 17:21). Mea nāhea te reira fa’ati’ara’a e fa’ahōhonu ai i tō tātou māuruuru nō te ti’afa’ahoura’a o te Fa’aora ? ’Ua ’āpitihia te hō’ē pēnī e fa’ahōho’a i te reira fa’ati’ara’a ; tē vai atu ra tē nehenehe e ’itehia i ni’a ia ChurchofJesusChrist.org. E au ato’a paha te mau melo o te ’utuāfare e pāpa’i i tō rātou iho hōho’a nō te mea tā rātou e tai’o ra.

Mau a’ora’a i te ’āmuira’a rahi

I roto e rave rahi vāhi nā te ao nei, e riro te ’āmuira’a rahi nō ’eperēra i te fa’atupuhia i te hope’a hepetoma nā mua atu i te Pāsa. Penei a’e e tauturu te fa’aro’ora’a i te mau a’ora’a o te ’āmuira’a ’ia rōtahi te ’utuāfare i ni’a i te Fa’aora i teie Pāsa. ’Ei hi’ora’a, e ti’a ia ’outou ’ia ani i te mau melo o te ’utuāfare ’ia fa’aro’o i te mau a’ora’a o te ’āmuira’a ’o fa’a’ite pāpū nei nō Iesu Mesia ’e tōna ti’afa’ahoura’a—nā roto mai iho ā rā i te mau ’āpōsetolo, rātou te mau ’ite ta’a ’ē nō Iesu Mesia. I muri iho, e nehenehe tā ’outou e hi’o ’āmui i te reira mau a’ora’a ma te hi’o mai i te mau ha’api’ira’a e ha’apūai i tō ’outou ’itera’a pāpū nō te Fa’aora.

« Te Mesia Ora : Te ’Itera’a Pāpū o te mau ’Āpōsetolo »

’Ei ’utuāfare, ’a tai’o i « Te Mesia Ora : Te ’Itera’a Pāpū o te mau ’Āpōsetolo » (Ensign ’aore rā Liahona, Mē 2017, ’api tāpo’i nō mua ; hi’o ato’a ChurchofJesusChrist.org), ’e ’a ani i te melo tāta’itahi o te ’utuāfare ’ia mā’iti i te hō’ē poro’i nō Pāsa i roto i teie ’itera’a pāpū nō te fa’a’ite ia vetahi ’ē. ’Ei hi’ora’a, e nehenehe tā ’outou e hāmani i te hō’ē hōho’a nō te pia i ni’a i te mau rāve’a tūreiara’a sōtiare, ’aore rā i ni’a i te ’ūputa mua ’aore rā i ni’a i te hō’ē ha’amāramarama.

Videos : Mau ’ite ta’a ’ē nō te Mesia

Tē vai ra i ni’a ia ChurchofJesusChrist.org ’e te Vaira’a buka ’evanelia i te hō’ē pu’e video tei pi’ihia Mau ’ite ta’a ’ē nō te Mesia. Tei roto te mau video nō te melo tāta’itahi o te Peresidenira’a Mātāmua ’e o te pupu nō te Tino ’Ahuru Ma Piti ’āpōsetolo e hōro’a nei i tō rātou ’itera’a pāpū. E nehenehe te ’utuāfare e māta’ita’i hō’ē ’aore rā hau atu o teie mau video ’e e paraparau i muri iho i te mea tā te reira e ha’api’i nei nō ni’a i te mea tā te Fa’aora i rave nō tātou.

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i tā tātou ha’api’ira’a

’A ora i te ’evanelia a Iesu Mesia Te mea hau roa atu i te faufa’a ’o tā ’outou e nehenehe e rave ’ei metua ’o te orara’a ïa i te ’evanelia ma tō ’outou ’ā’au ato’a. ’O teie te rāve’a maita’i roa a’e nō te fāna’o i te hoara’a o te Vārua Maita’i. ’Aita i tītauhia ia ’outou ’ia riro ’ei ta’ata maita’i roa, ’ia tāmata tāmau noa rā ’outou ’ia rave i te maita’i roa a’e e noa’a ia ’outou ma te ’imi i te fa’a’orera’a hara nā roto i te tāra’ehara a te Fa’aora. (Hi’o Ha’api’ira’a mai tā te Fa’aora, 13–14.)

te fāri’ira’a te Mesia i te mau ’āti Nephi

Fa’ahōho’ara’a nō te Mesia ’e te mau ’āti Nephi, nā Ben Sowards