« 13–19 nō ’Ēperēra. Mosia 1–3 : ‘’Ia ’ī rātou i te aroha i te Atua ’e i te ta’ata ato’a ra ho’i’ », Mai, pe’e mai—nō te Paraimere : Buka a Moromona 2020 (2020)
« 13–19 nō ’Ēperēra. Mosia 1–3 », Mai, pe’e mai—nō te Paraimere : 2020
Minerva K. Teichert (1888–1976), Te a’ora’a aroha a te ari’i Beniamina, 1935, oil on masonite, 36 x 48 inches. Brigham Young University of Art
13–19 nō ’Ēperēra
Mosia 1–3
« ’Ia ’ī rātou i te aroha i te Atua ’e i te ta’ata ato’a ra ho’i »
’A tai’o ai ’outou i te Mosia 1–3, ’e pure nō te ’ite nāhea ’outou i te tauturu i te mau tamari’i tā ’outou e ha’api’i ra ’ia hāro’aro’a i te faufa’a o te mau parau mau tā te ari’i Beniamina i ha’api’i. Pāpa’i i te mau mana’o e tae mai nā roto mai i te Vārua Maita’i.
Pāpa’i i te mau mana’o e tae mai
Titau i te mana’o
Fa’a’ite i te hōho’a o te ari’i Beniamina e ha’api’i ra i roto i te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare. Ani i te mau tamari’i ’ia fa’a’ite mai e aha tā rātou i ’ite nō ni’a i teie hōho’a.
Ha’api’i i te ha’api’ira’a tumu : Mau tamari’i ’āpī
’Ia tāvini au i te ta’ata, tē tāvini ato’a ra vau i te Atua.
E aha tā ’outou e rave nō te tauturu i te mau tamari’i ’ia hāro’aro’a ē, te tāvinira’a ia vetahi ’ē, ’o te hō’ē ato’a ïa rāve’a nō te tāvini i te Atua ?
Mau ’ohipa e nehenehe e rave
-
Vaiiho i te mau tamari’i te tahi i muri mai i te tahi ’ia ’ō’omo i te hō’ē hei, (tē vai ra hō’ē hōho’a i roto i te ’api ’ohipara’a o teie hepetoma) ’e ma te ti’ara’a i ni’a i te hō’ē pārahira’a ’e ’ia fa’ahua ’o te ari’i Beniamina rātou. E nehenehe rātou e rave i te reira ’a fa’a’ite ai ’outou i te tahi mau mea tā te ari’i Beniamina i ha’api’i i tōna mau nuna’a, ’o tē ’itehia i roto i te Mosia 2–3. Hi’o ato’a i te « Pene 12 : Te ari’i Beniamina » (Mau ’ā’amu o te Buka a Moromona, 32–35, ’e ’aore rā te video tano i ni’a ChurchofJesusChrist.org.)
-
Ani i te mau tamari’i ’ia fa’ahiti fa’ahou i te pereota i muri nei, te tahi ta’o i te taime hō’ē ma te tūpa’i i te rima ’e o ’outou nō te tuha’a ta’o tāta’itahi : « ’A tāvini ai ’outou i te ta’ata nei, tē tāvini ra ïa ’outou i tō ’outou Atua ra » (Mosia 2:17). Fa’ahiti fa’ahou i te reira ē tae roa atu ’ua mau i te mau tamari’i te tahi ’e ’aore rā, te tā’āto’ara’a o te mau ta’o. E fa’a’ite pāpū ē, ’ia tauturu ana’e tātou ia vetahi ’ē, tē tauturu ato’a ra ïa tātou i te Metua i te Ao ra ’e ia Iesu ma te fa’a’oa’oa ia rāua. E ani i te mau tamariʼi ʼia faʼaʼite mai i te mau rāveʼa e nehenehe rātou e tauturu ia vetahi ʼē.
-
Tauturu i te mau tamari’i ’ia rēni i tō rātou rima i ni’a i te hō’ē ’api parau ’e ’ia pāpa’i hōho’a i te hō’ē mea tā rātou e nehenehe e rave nō te tāvini i tō rātou ’utuāfare. Hīmene ʼāmui i te hōʼē hīmene nō niʼa i te tāviniraʼa, « Nous aidons tous avec joie » Chants pour les enfants, 108).
’Ua ha’api’i te ari’i Beniamina ē, e nehenehe tātou e tāvini i te Atua nā roto i te tāvinira’a ia vetahi ’ē.
Nō ’ō mai tō’u mau ha’amaita’ira’a ato’a i te Metua i te Ao ra ra.
’A ’ite ai te mau tamari’i ē ’o te Atua te tumu nō tō rātou mau ha’amaita’ira’a ato’a, e fa’aha’eha’a rātou ia rātou ’e e māuruuru ho’i.
Mau ’ohipa e nehenehe e rave
-
E fa’ata’a ē, ’ua ha’api’i te ari’i Beniamina ē, nō ’ō mai tō tātou mau ha’amaita’ira’a ato’a i te Metua i te Ao ra. E ani i te mau tamari’i ’ia fa’aro’o i te hō’ē ha’amaita’ira’a tā te Metua i te Ao ra i hōro’a mai ia tātou ’a tai’o ai ’outou i te Mosia 2:21. E aha te tahi atu mau ha’amaita’ira’a tā te Metua i te Ao ra i hōro’a mai ia tātou ? Nāhea tātou i te fa’a’ite ē, ’ua māuruuru tātou nō teie mau mea ? (hi’o Mosia 2:22).
-
E ha’uti i te hō’ē ha’uti i reira te mau tamari’i e hōro’a fa’a’ohu ai i te hō’ē tauiha’a ’a hīmene ai i te hō’ē hīmene nō ni’a i te ’ā’au mēhara ’e ’aore rā, ’a fa’aro’o ai rātou i te reira (hi’o « Gratitude » i roto i te fa’ahorora’a parau tumu o te Children’s Songbook). E fa’aea i te hīmene ’e ’aore rā, e tāpe’a i te pehe i te tahi taime, ’e e ani i te tamari’i e tāpe’a ra i te tauiha’a ’ia fa’a’ite mai i te hō’ē ha’amaita’ira’a tāna e māuruuru nei.
Tē tiʼaturi nei au ia Iesu Mesia.
’Ua parau te hō’ē melahi i te ari’i Beniamina i te mau parau mau faufa’a rahi nō ni’a i te orara’a ’e i te tau tāvinira’a a Iesu Mesia. E ’imi i roto i teie mau ’īrava i te mau parau mau nō ni’a ia Iesu ’o tā ’outou e mana’o ra ē, e mea faufa’a nō te mau tamari’i ’ia ha’api’i mai.
Mau ’ohipa e nehenehe e rave
-
Fa’a’ite i te mau hōho’a o te tahi mau ’ohipa i tupu i fa’ahitihia i roto i te Mosia 3:5–10 (hi’o, ’ei hi’ora’a, te Vaira’a hōho’a ’evanelia, mau nūmera 30, 41, 42, 57, 59). E ani i te mau tamari’i e aha te ’ohipa e tupu nei i roto i te mau hōho’a, ’e e tauturu ia rātou mai te mea e hina’arohia. Tai’o marū noa i te Mosia 3:5–10, ’e e ani i te mau tamari’i ’ia ’āfa’i i tō rātou rima i ni’a ’ia tai’o ana’e ’outou nō ni’a i te hō’ē mea i roto i te hō’ē o te mau hōho’a. E ani i te mau tamari’i ’ia fa’a’ite mai i te tahi atu mau mea tā rātou i ’ite ē, ’ua rave Iesu i te tau ’a ora ai ’oia i te fenua nei.
-
Pāpa’i hōho’a i te mahana i te pae ni’a o te tāpura ’ere’ere nō te fa’ahōho’a i te ra’i. Pāpa’i hōho’a i te mau ’ē’a e rave rahi e arata’i i te mau vāhi rau ’ati a’e te tāpura ’ere’ere, terā rā hō’ē ana’e ’ē’a e haere atu i te ra’i. Ani i te mau tamari’i ’ia ’imi i taua ’ē’a ra, ’e e tu’u i te hōho’a o Iesu i ni’a iho. Tai’o i te Mosia 3:17, ’e e fa’a’ite pāpū ē, te pe’era’a ia Iesu Mesia, ’o te reira ana’e te ’ē’a nō te ho’i atu i te Metua i te Ao ra ra.
Ha’api’i i te ha’api’ira’a tumu : Mau tamari’i pa’ari
’Ia tāvini ana’e au ia vetahi ’ē, tē tāvini ato’a ra ïa vau i te Atua.
Nāhea e ti’a ai ia ’outou ’ia tauturu i te mau tamari’i ’ia ha’api’i mai, nā roto mai i te hi’ora’a o te ari’i Beniamina ?
Mau ’ohipa e nehenehe e rave
-
Fa’a’ite i te mau tamari’i i te hō’ē hōho’a o te ari’i Beniamina e ha’api’i ra i tōna nuna’a (hi’o te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare ’e ’aore rā Vaira’a hōho’a ’evanelia, no. 74). Tauturu i te mau tamari’i ’ia ’imi i roto i te Mosia 2:11–18 nō te ’ite mai e aha tā te ari’i Beniamina i rave nō te tāvini. Nō te aha ’oia i tāvini ai i tōna nuna’a ? Nō te aha tātou e tāvini ai te tahi ’e te tahi ?
-
Pāpa’i i ni’a i te tāpura ’ere’ere i te mau pereota nō roto mai i te Mosia 2:16–17 ma te ha’amo’e i te tahi mau ta’o. E ani i te mau tamari’i ’ia ’imi i roto i te mau pāpa’ira’a mo’a i te mau ta’o i mo’e. E ani ia rātou ’ia fa’ata’a mai e aha te aura’a teie mau ’īrava nō rātou. E ani ia rātou ’ia fa’a’ite mai i te tahi mau ’itera’a ’a tāvini ai vetahi ’ē ia rātou ’e ’aore rā, ’a tāvini ai rātou ia vetahi ’ē. E aha tā teie mau ’itera’a i fa’atupu i roto ia rātou ?
-
Hōro’a i te mau tamari’i i te mau tuha’a ’api parau nō te pāpa’i i te mau rāve’a e nehenehe rātou e tāvini i te mau melo o tō rātou ’utuāfare, ’e e hōro’a i te tamari’i tāta’itahi i te hō’ē pū’ohu nō te tu’u i te mau ’api parau i roto. E fa’aitoito i te mau tamari’i ’ia rave hō’ē tuha’a ’āpī parau i roto i te pū’ohu i te mahana hō’ē ’e ’ia rave i taua ’ohipa tāvinira’a ra nō te hō’ē ta’ata.
’Eiaha vau e fa’ateitei iā’u nō ta’u tāvinira’a ’e ta’u mau ’ohipa maita’i.
E feruri nāhea ’outou i te tauturu i te mau tamari’i tā ’outou e ha’api’i ra ’ia hāro’aro’a ē, e ti’a i tā tātou tāvinira’a ’ia fa’auruhia nā roto i tō tātou here ia vetahi ’ē ’e i te Atua.
Mau ’ohipa e nehenehe e rave
-
E ani i te mau tamari’i ’ia fa’a’ite mai nāhea rātou ’ia tātara mai i te ta’o ra fa’ateitei ’e ’aore rā e tauturu ia rātou ’ia ’imi i te tātarara’a i roto i te fa’atoro parau. Tauturu ia rātou ’ia ’imi Mosia 2:15–24, nō te ’ite mai i te mau tumu nō te aha te ari’i Beniamina i ’ore ai i fa’ateitei iāna nō tāna tāvinira’a ia vetahi ’ē. Nō te aha e tiʼa ia tātou ’ia tāvini ia vetahi ʼē ? ’Ia oti te mau tamari’i i te fa’a’ite mai i tō rātou mana’o, e tauturu ia rātou ’ia hāro’aro’a ē, e ti’a ia tātou ’ia ’imi ’ia tāvini ia vetahi ’ē, nō te mea tē here nei tātou ia rātou ’e i te Atua, ’eiaha nō te fa’a’ite ē, e mea maita’i tātou i ni’a ia vetahi ’ē.
-
E ani i te mau tamari’i ’ia fa’a’ite mai i te mau huru hi’ora’a e fa’ateitei ai te hō’ē ta’ata iāna ’e ’aore rā, e fa’atietie iāna nō te hō’ē ’ohipa. Nō te aha e mea hape ’ia fa’ateitei i roto i taua mau hi’ora’a ra ? Ani ia rātou ’ia fa’a’ohipa i te a’o i roto i te a’ora’a a te ari’i Beniamina, i roto i te Mosia 2:15–24, nō te tauturu i tā rātou mau pāhonora’a.
’Ua tāmā Iesu Mesia iā’u i te hara ’e ’ua tauturu iā’u ’ia riro ’ei ta’ata mo’a.
Nō te rirora’a mai tō tātou Metua i te Ao ra, tītauhia ia tātou ’ia hau atu i te māra’a i tā tātou mau hara—tītauhia ’ia taui tō tātou ’ā’au. Mai tā te ari’i Beniamina i ha’api’i, tītauhia ia tātou ’ia upo’oti’a i ni’a i tō tātou mau hina’aro ’ī’ino ’e ’ia riro ’ei feiā mo’a nā roto i te tāra’ehara a te Fa’aora.
Mau ’ohipa e nehenehe e rave
-
Pāpa’i hōho’a e piti ta’ata i ni’a i te tāpura ’ere’ere—hō’ē e fa’ahōho’a i « te ta’ata tino nei » ’e te tahi e fa’ahōho’a i te « ta’ata mo’a ». (E tītauhia paha ’ia tātara ’outou i te aura’a o teie nā ta’o.) Tai’o ’āmui i te Mosia 3:19, ’e e ani i te mau tamari’i ’ia ’imi i te mau tauira’a e tītauhia i te ta’ata tino nei ’ia rave nō te riro ’ei ta’ata mo’a. E aha te tahi atu mau ta’o ’e mau pereota e hina’arohia e te mau tamari’i nō te tauturu ’ia hāro’aro’a ?
-
’Ua tauturu a’ena ānei te mau tamari’i tā ’outou e ha’api’i ra i tō rātou mau metua ’ia fa’aineine i te mā’a ma te fa’a’ohipa i te hō’ē parau hāmanira’a mā’a ? Mai te mea ē, ’ē, e nehenehe ’outou e ani ia rātou ’ia fa’a’ohipa i te Mosia 3:19 nō te hāmani i te hō’ē « parau hāmanira’a mā’a » nāhea e ti’a ai ia tātou ’ia riro mai ia Iesu Mesia. Nō te aha te tāra’ehara a Iesu Mesia i riro ai ’ei « tuha’a mā’a » faufa’a roa a’e ?
Fa’aitoito i te ha’api’ira’a mai i te fare
Ani i te mau tamari’i ’ia fa’a’ohipa i te ’api ’ohipara’a o teie hepetoma nō te fa’a’ite i tō rātou ’utuāfare ’e ’aore rā, te mau hoa nāhea rātou i te pe’e i te hi’ora’a o te ari’i Beniamina ’e ’ia tāvini ia vetahi ’ē.
Ha’amaita’ira’a i tā tātou ha’api’ira’a
E fāna’o te mau tamari’i nā roto i te tāpiti-noa-ra’a. ’Eiaha e mata’u i te nā ni’a-fa’ahou-noa-ra’a te mau ’ohipara’a e rave rahi taime, nō te mau tamari’i ’āpī iho ā rā. E tauturu te tāpiti-noa-ra’a i te mau tamari’i ’ia ha’amana’o i te mea tā rātou i ha’api’i mai.