“Eberi 27–Meei 3. Motiaea 7–10: ‘Ni korakoran te Uea,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon (2020)
“Eberi 27–Meei 3. Motiaea 7–10,” Nakomai, Iriirai—Ibukia Aomata n Tatabemania ao utu: 2020
Minerva K. Teichert (1888-1976), Ammon i matan te Uea Rimwaai, 1949-1951, te oera iaon te mitionaite, 35 15/16 x 48 intiti. Brigham Young University Museum of Art, 1969.
Eberi 27–Meei 3
Motiaea 7–10
“Ni Korakoran te Uea”
Ao ngkana ko wareware, te Tamnei e na uota nakon ami iango mwakoro ni kibuntaeka ao rongorongo. Koreia bwa tera ae ko namakinna n taian rongorongo akanne ae a uaana nakoim.
Korea Am Namakin
N tai are a kukurei ana aomata te Uea ae Motiaea iai te “rau ae maan” i Taraemera (Motiaea 7:1), a oki rikaaki aia iango nakoia kurubu ni Nibwaite; are n ririki aika mwaiti mai imwaina a mwananga nako ni maeka n aban Riaai-Nibwaai. E a nako te roro teuana ma te roro , ao ana aomata Motiae a tuai man ongo mai irouia. Ngaia are Motiaea e tuanga Amon bwa e na kaira te kurubu ni kakae ni kakaeia Nibwaite ake a tia ni mwananga nako. Te kurubu ni kakaae a kunea bwa Nibwaite, “ibukin te buakaka” (Motiaea 7:24), a bon tautoronaki irouia Reimwanaite. Ma n rokoia Amon ao tarina, n te tai ae tawe e a reke aia kaantaninga ibukin te kainaomataaki.
N tabetai titebo ngaira ma Nibwaite ake a tautoronaki, ti maraki ibukin ara bure, ao n aki kakoaua bwa e na manga reke riki te rau iroura. N tabetai, ti titebo ngaira ma Amon, n namakina te kairaki ni keiaki ni buokiia tabemwaang ao ni bon tokina ti kunea bwa ara kekeiaki a kaungaia bwa ana “tabeki atuu[ia], ao ni kimwareirei, ao ni kawenea [aia] onimaki iroun te Atua” (Motiaea 7:19). Ko na aki tabe bwa tao tera ae ti rinanona, ti bon bane ni kainnanoa te rairannano ao n “rairaki nakon te Uea ma te nano ae koaua,”ma te onimaki bwa “e na … kamaiu[ra]” (Motiaea 7:33).
Iango ibukin Kamatebwaian Koroboki aika Tabu ae Onoti
Ngkana I rairaki nakon te Uea, I Onimakinna, ao I beku Ibukina, E na kamaiuai.
Ni kaitiboona ma Amon, are bon ngaia te Nibwaite mai Taraemera, e anganaki te Uea ae Rimwaai teutana te kaantaninga, ao e tangiria n uota te kaantaninga anne nakoia ana botanaomata. Ao ngkana ko wareka Motiaea 7:14-33, taraia bwa tera ae taekinna Rimwaai nakoia ana botanaomata ni kaungaia, bwa a na kakorakora aia onimaki, ao n anganiia te kaantaninga bwa e na buokiia te Atua. E ngae ngke ko aki irekereke n ai aron te bure are a rinanona ana botanaomata Rimwaai, e na kanga aron ana taeka ni buokiko bwa ko aonga n rairaki nakon te Uea? Ko ko na nooria, n te katooto, bwa E kauringiia ana botanaomata Rimwaai rongorongoia ngkoa aika kaota kainaomatakiia iroun te Atua (tarai kiibu 18-20). A na kanga rongorongo aikai, ai uana naba ma tabeua rongorongo ke taneiai ae onoti, ni buokiko n onimakina te Atua?
Tera bwaatua aika 24 mwaitina ake a kuneaki irouia ana botanaomata Rimwaai?
E ngae ngke te kurubu ae uarereke man ana botanaomata Rimwaai aki tokanikai n aia kakae ibukin te aba are Taraemera, a kunei 24 bwaatua aika koora ma koroboki aika a koreaki n te taetae n ianena. Bwaatua aikai, ake a rairaki iroun te Uea ae Motiaea, a karakina te botanaomata ae kinaaki ae taian Iaretaite, ake a roko nakon te aba ni berita man te Taua ae Bwabera ao ake a manga kamaunaaki n tokin te tai (taara Motiaea 28:11-19). Imwina e karaoa te kakimototo Moronaai ni bwaatua aikai (taara Ita 1:1-2), are e riki bwa ana boki Ita. Taraia ni Motiaea 28:18 aron korakoran te rekooti aei iaoia ana botanaomata Motiaea.
Te Uea e katauraoiia burabeti, taan mamata, ao taan kaotioti ni buokiia aomata.
Ngke e ongo Rimwaai ana koaua Amon bwa te Uea e a tia n kateirakea te tia mamata, e kimwareirei, ao e anga ana kaitau nakon te Atua” (Motiaea 8:19). E aera ngke iroum e namakina aei? Tera ae ko reikinna ibukin te tia mamata man ana taeka Amon Motiaea 8:13–19? Ni boong aikai, “te Moan Beretitentii ao te Kauntira n te Tengaun ma Uoman a tia ni kamatoaaki bwa burabeti, taan mamata, ao taan kaotioti” (Bible Dictionary, “Seer”). Nningai te kabanea n tai ae ko iangoia raoi bwa te kakabwaia n aron rekeia burabeti, taan mamata, ao taan kaotioti iaon te aba? Tao ko kona ni koreia bwa a kanga burabeti, taan mamata, ao taan kaotioti aika a tia n riki bwa “te kabwaia ae korakora” nakoim (Motiaea 8:18).
Te burabeta ae Iotebwa Timiti bon te tia mamata ae korakora ae e tei bwa ngaia atuun boong aikai (taraa R&B 21:1; 124:125; Joseph Smith—History 1:62). E na kanga ni kaota bannan te tia mamata n ana beku ni kaineti ma ana kabwarabwara Amon?
I kona ni kaitarai kawenakoau “ni korakoran te Uea.”
E anga ana taeka Tinebi bwa e a tia ni karaoi kairua. E nang riao n taai tabetai, ao e a tia ni kamenaia ana botanaomata—-aia bakatibu ana botanaomata Rimwaai—-n te kaangaanga ae matoatoa man karaoan te booraraoi ae aki wanawana ma te Uea ae Reimwan. Ma imwina, e nako ni buaka ni kaitaraia Reimwanaite, e buokiia ana botanaomata ni kaitarai kakaewenako ma te onimaki. N am tai ni wareka Motiaea 9-10, taraia bwa tera ae a karaoia ana botanaomata Tinebi ni kaota aron aia onimaki. E kanga ni kakorakoraia te Atua? Tera ngke iroum ae nanonaki n te waakirake “ni korakoran te Uea”? (Motiaea 9:17; 10:10–11).
Au rinerine e kona n rootiia rooro nako.
Ni kaineti ma Motiaea 10:11-17, e kanga aia mwakuri ao kateia aia bakatibu Reimwanaite n totokoia Reimwanaite man ataakin te koaua? E kanga aia rinerine aia bakatibu Reimwanaite n rootiia rooro n tai aika a na roko? Iangoia aomata ake a na rootaki man am koaua ao am rinerine; tera ae ko na karaoia ni buokiia bwa a na kabwanina riki aia onimaki iroun Kristo?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Motiaea 7:19–20
Taraa te katooto ae mwaneweia Rimwaai bwa e aonga n kaungaia ana botanaomata bwa a na onimaki. Tera te katooto man koroboki aika tabu aika a kaungaira bwa ti na “katuka ara onimaki iroun te Atua”? Tera ae nanonaki ni katuka ara onimaki iroun te Atua? (taraa naba Motiaea 9:17; 10:19). Tera karakinan oini maiura ke maiuia ara bakatibu ngkoa aika ti kona n tibwauai ni kaungaa riki aron katukan te onimaki ae korakora iroun te Atua?
Motiaea 7:26–27
Tera ae ti reiakinna iaon taekan te Tia Kamaiu man kiibu aikai? (taraa naba R&B 130:22). Bukin tera ti karabwarabwa n ataakin baikai?
Motiaea 8:13–18
Ni buokiia kain te utu ni mataata bwa tera te tia mamata, tao ko kona ni kaota nakoia tamnein bwaai ni mwakuri aika a buokiira n noori bwaai ake tao ti aki konai n noori n tii matara, n aron te bwainokurati, te teretikoubi, ke te mwaaikorotikoubi. A kanga bwaai ni mwakuri aikai n titebo ma te tia mamata? (taraa Motiaea 6:35–36). Tera ae a kona n nooria taan mamata aika ti aki kona ngaira n noori? Tera kakoaua aika iai iroura bwa Iotebwa Timiti bon te tia mamata?
Ko kona ni kaoti tamneia ara burabeti, taan mamata, ke taan kaotioti aika a maiu ao titirakiniia ami utu bwa tera aia atatai ibukiia. Ti na kanga n iririi?
Motiaea 9;14-18; 10;1-10
N te tai are a buaka iai Reimwanaite, a bon tauraoi ana botanaomata Tinebi n te aro n rabwata ao n te aro n tamnei. Tera ae ti kona n reiakinna iroun Tinebi ao ana botanaomata ibukin te katauraoi ibukin kakaewenakoaia?
Ibukin riki iango ibukin reiakinaia ataei, taraa te kabwarabwara n te wiiki aei inanon Nakomai, Iriirai—Ibukin te Moanrinan.
Katanakoraoan te Kamatebwai ae Onoti
Ukera oin am atatai. Te kaota n iango n te kabwarabwara aei e kaoti kiibu ao reirei aika ko na katurui ami iango iaona, ma aio e na riai n aki kauarerekea am kamatebwai. Ko kona n ringaki ni ikibu ke ni kunei reirei aika aki mwaneweaki ikai. Kaoa te Tamnei bwa e na kairiko.
Te Kaotioti nakon Iotebwa Timiti, iroun Clark Kelley Price