“Meei 4–10. Motiaea 11–17: ‘Te Ota … Ae Aki Kona ni Karooaki,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Meei 4–10. Motiaea 11–17,” Nakomai, Iriirai—Ibukiia Aomata n Tatabemaniia ao Utu: 2020
Abinataai Imatan te Uea Noa, iroun Andrew Bosley
Meei 4–10
Motiaea 11–17
“Te Ota … Ae Aki Kona ni Karooaki”
Ana taeka Abinataai e karika te bitaki ae moan te korakora inanon temanna mai ibuakoia ana aomata te Uea Noa ae tararuaia (taraa Motiaea 17:2–4). Wareka Motiaea 11–17 ma te tataro inanom bwa ko na karekei namakin bwa ko na kanga ni bitaki.
Koroi Am Iango
Te ai ae korakora e kona n riki man te mwakaro n ai. Bon ti Abinataai te mwaane ae kaitaraa korakoran mwaakan te uea ma ana aomata aika e tararuaia. Aki butimwaeaki ana taeka irouia aomata aika mwaiti, ao e kabureaki ni uaa matena. E ngae n anne ana kakoaua iroun Iesu Kristo, are bon te “ota … ae aki kona ni karooaki” (Motiaea 16:9), e anaa nanon te kairake n ibonga ae Aramwa. Ao te mwaiti ae uarereke nrairaki e karaurau n rikirake ngke e uotiia aika mwaiti riki Aramwa bwa ana rairi nanoia ao n onimakina Iesu Kristo. Te ai are e tiringa Abinataai e moanna ni bua, ma te anainano n te onimaki are e kariki mai iai ana taeka e na iai mwiina ae akea tokina iaoia Nibwaite—ao iaoia naake a wareki ana taeka n te bong aei. Angiia mai ibuakora ti na aki kona ni kaitara ma te bwai ae karaoia Abinataai ibukin ara kakoaua, ma iai ara tai ni kabane ngkana ti ira Iesu Kristo bon katakin nanora ao ara onimaki. Tao kamatebwaiakan ana kakoaua Abinataai e na kakorakora te kakoaua ao te nano inanom naba.
Iango ibukin Am Kamatebwai ni Booki Aika Tabu
I kona ni kamanoi koaua, riki ngkana ti ngai te aomata ae I karaoia.
Iangoia bwa e na kanga te barannano nn riki ibukin Abinataai n takaruaan te rairannano nakoia botanaomata ake a taraa n aki kan ongo ni biti kawaia ae bure. E totokoaki ana rongorongo ni kaokiokaki. E ngae n anne e aki kona Abinataai ni katoka tataekinan te euangkerio.
Ningai ae ko a tia n namakinna ae kanga ko tei n ti ngkoe ni kamanoa te koaua? Ngkana ko wareka Motiaea 11–13 ao 17, tera ae ko reiakinna ae na kona ni buokiko n tauraoi ngkana e kainnanoiko te Uea n teirake ibukin Ana euangkerio? Tera riki reirei aika ko reiakin man ana banna ni katooto Abinataai?
I kainnanoia ni kamwakura nanou nakon ataakin ana taeka te Atua.
Ana ibonga te Uea Noa a taneiai ma ana taeka te Atua—a kona n taekin taekan booki aika tabu ao n tangiria n anga reirei iaon tuua. Ma tuua aikanne a “tuai matenano [inanoia],” ao a tuai n anga [nanoia] bwa ana kaotaaki” (Motiaea 13:11; 12:27). Ao n tokina, e teimatoa maiuia n aki bitaki.
Ngkana ko wareka Motiaea 12:19–30, iangoia bwa tera ae nanonaki ni karaoan nanom nakon atakin ana taeka te Atua. Te bwai aio e kaungako bwa ko na karaoi bitaki n te kawai ae ko ira iai reiakinan te euangkerio?
Te Uea e na kamatoaia Ana toro n Ana mwakuri.
N te anga teuana, ana taneiai Abinataai e anga katooto aika mwaiti bwa e kanga te Uea ni boutokaia Ana toro—ko kona ni kunei aekaki ni katooto tabeua aikanne inanon Motiaea 13:1–9. Ni kaitaraana, te Uea e kariaia naba Abinataai bwa e na bwainikirinaki, kabureaki, ao n tiringaki ibukin ana kakoaua. Tera ae ko kunea inanon kiibu aikai are kaotia bwa e onimakina te Uea Abinataai? E kanga ana katooto Abinataai n roota aron te kawai are ko iangoa iai am wewete ao tabem?
E korakai Iesu Kristo ibukiu.
Te Uea Noa ao ana ibonga a kakoaua ae e roko te kamaiuaki rinanon ana tua Mote. E tangiria Abinataai bwa ana ataia ae te kamaiuaki e roko rinanon te Mesia, Iesu Kristo. Inanon Motiaea 14–15, kinai taeka ao kiibu aika a kabwarabwara te Tia Kamaiu ao tera te bwai ae E karawawataaki iai ibukim. Tera kiibu aika a buokiko ni kakorakora am tangira ao am kakaitau nako Ina?
E kanga Iesu Kristo n riki bwa te Tama ao te Nati?
A kona kiibu aikai n tabetai ni kananououa bukina bwa e kona n taraa n ae e reirei Abinataai bwa te Tama are i Karawa ao Iesu Kristo bon aomata aika ti tebo, ma ti ataia bwa bon Aomata aika kakakokoro. Tera ae nanonna Abinataai? E reirei bwa te Atua te Nati—Iehova—e na riki bwa te Tia Kabooi Maiura (taraa Motiaea 15:1), e maiu n te rabwata, e riki bwa mwakoron te aomata ao mwakoron te Atua (kiibu 2–3). E kabanea nanona ni kabane nakon ana kantaninga te Atua te Tama (kiibu 5–9). Ibukin aei, Iesu Kristo bon Natin te Atua ao te tia tei ibukin te Atua te Tama ae kororaoi n te aonaaba (taraa Ioane 14:6–10).
E reitianako Abinataai man kabwarabwarakin ae Iesu Kristo bon te Tama naba n te kantaninga are ngkana ti butimwaea kaboan maiura Irouna, ti na riki bwa “kanoana” (Motiaea 15:11–12). E nanonaki aei, ti na riki ni manga bungiaki n tamneira Rinanona (taraa Motiaea 5:7).
Taraa naba Ioane 5:25–27; 8:28–29; 17:20–23; “Te Tama ao te Nati,” Ensign, Eberi. 2002, 12–18.
Iango ibukin Kamatebwai ni Booki Aika Tabu ao Bootakin te Utu n te Tairiki
Ngkana ko wareki booki aika tabu ma am utu, e kona te Tamnei ni buokiko n atai reirei aika ko na kamataatai ao ni maroroakin n te aro bwa ko na buoki kainnanoia am utu. Aikai tabeua iango.
Motiaea 11–13; 17
Abinataai ao Aramwa bon banna ni katooto aika kairaki mai ieta n teimatoa ni karinerine nakon te koaua, e ngae ngke e ribaaki karaoakina. A kona kain am utu ni kaitara ma aia anainano aomata ni butimwaai aia kainibaire. Tera ae a kona n reiakinna mairoun Abinataai ao Aramwa iaon kamanoan te koaua? Te mwakuri ni korotamnei are e kairaki ma te kabwarabwara aei e kona ni buoka am utu n iangoa te rongorongo aei. Imwiin kamatebwaiakan mwakoro aikai, iangoia ni karaoia n te kaotioti kaangaanga aika ririki n te maiu aei bwa aonga kain am utu n taneiai ni kaeka nakon anainano ni butimwaai aia kainibaire. Ke ko kona n tibwauaia ma ngaia n tatabemaniia nako atatai aika ko a tia ni karekei man teim ibukin te koaua.
Motiaea 12:33–37; 13:11–24
Tera ae nanonaki ni karekean ana tua te Atua “bwa ana koreaki [inanora]”? (Motiaea 13:11). Tao ko kona ni koroi tabeua iango (ke koroi tamnein am iango) iaon te beeba ae bubura ae korea tamnein te buroo. Bukin tera a kakawaki tuua nakoira? Ti na kanga ni kona ni koroi inanora?
Kamatebwaian booki aika tabu e kona ni buokiira ni koroi tuua inanora.
Motiaea 14
N te mwakoro aei kam na kona ni kunei tabeua taeka ao kiibu ake a kabwarabwara taekan Iesu Kristo. Tao ana kona am utu ni koroi ngkana kam kunei. A kanga aron aia namakin kaain te utu ibukin te Tia Kamaiu ngkana ti kamatebwai taeka ao kiibu aikai?
Motiaea 15:26–27; 16:1–13
A kabwarabwaraaki ni kiibu aikai te bwai ae na riki nakoia natin te Atua ngkana Iesu e “tuai roko iaon te aonaaba” (Motiaea 16:6) ke ngkana aki Iria. Tera bwaai aika tamaroa aika a tia n riki bukina bwa E roko ao e karaoa te mwakuri ni kamaiu ibukin ara bure? Taraa naba te Witeo “Bukin Tera Ti Kainnanoa te Tia Kamaiu” (ChurchofJesusChrist.org).
Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Kanakoraoan Ara Anga reirei
Kabonganai karaki ma katooto n reirei taekan te euangkerio. E aki toki te Tia Kamaiu n reirei reirein te euangkerio ni kabonganai karaki ao taeka ni kaikonaki. Iangoi katooto ao karaki man oin maium are e na kona ni karika reirein te euangkerio bwa e na kakaongora ibukiia am utu (taraa Te Reirei n Ana Kawai te Uea, 22).
E a Oota Ubuna n te Raneanea, iroun Jeremy Winborg