Abinataai Imatan te Uea are Noa, iroun Andrew Bosley

Meei 4–10

Motiaea 11–17

“Te Oota … Ae Aki Kona ni Karooaki”

Iangoia ao tataro n ataia bwa ko na kanga ni kabongana karakinan Abinataai ao ana reirei ni Motiaea 11–17 ni buokiia ataei ake ko reireiniia. Korea am namakin ake ko karekei.

Korea Am Namakin

Kaunga te Tibwatibwa

Kariaia ataei bwa a na tibwauaia bwa tera ae ataia ni karakinan Abinataai ao te Uea are Noa. Te tamnei n te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao te Utu e na ibuobuoki.

Reireia te Reirei: Ataei aika a Uarereke

Motiaea 11–13; 17

I kona n tei ibukin te koaua, e ngae ngkana I tei n tii ngai.

A uaia n ninikoria Abinataai ao Aramwa n tei ibukin te koaua. Ko na kanga ni kabongana te karaki aei ni karikirakea te ninikoria irouia ataei inanon te tai are a na tauraoi n tei ibukin aia koaua?

Waaki ni kakukurei aika a Kona ni karaoaki

• Manga noora rongorongon Abinataai, te Uea are Noa, ao Aramwa are e kuneaki n Motiaea 11–13 ao 17. Ko na bae ni kabonganaa “Mwakoro 14: Abinataai ao te Uea are Noa” (Karaki man Ana Boki Moomon, 38–42, ke te witeo are e irekereke ma ngaia iaon ChurchofJesusChrist.org). Kaoiia ataei bwa a na karaoa te kaotioti n te rongorongo aei, n anganiia aia tai n riki ni katotonga te aomata temanna ke manga temanna riki.

• Mwaati n aki nakonako ma ataei n te tai are anenea te anene ae e kaungaa te ninikoria, n aron “I Will Be Valiant” (Aia Boki n Anene Ataei, 162). Ni kabane wareka taekan te anene, ao buokiia ataei bwa a na ataia bwa tera ae e kakaraoia te aomata ae e aki mamaku ke ae e ninikoria. Rinei tabeua kiibu man Motiaea 11–13 ao 17 bwa a na warekaki nakoia ataei ni kaotia bwa e kanga Abinataai ao Aramwa n aki mamaku (ibukin te katooto, taraa Motiaea 13:1–4, 9).

Motiaea 12:33–36; 13:11–24

N na riai n ongotaeka n Tua ake Tebwina.

Ana ibonga te Uea are Noa a ataa te tua ma a rawa ni kan iria. Ana taeka Abinataai e kona ni buokiia ataei ni kamataata kakawakin te ongotaeka nakon te tua.

Waaki ni Kakukurei aika a Kona ni Karaoaki

• Kaoiia ataei bwa a na wareware nakon 10. Ke anganiia 10 te moti ni beeba ae te ware iaona ao tuangiia bwa a na karinani raoi. Kabwarabwaraa bwa Tamara are i Karawa e anganiira Tua ake Tebwina ni buokiira bwa ti na okiria ni maeka ma ngaia. Buokiia ataei n atongnga ma ngkoe tabeua Tua ake Tebwina man Motiaea 12:33–36 ao 13:11–24.

• Kaota tamnein Mote ma Tua ake Tebwina (n aron Te Boki n Tamnei n te Euangkerio, nambwa. 14), ao kabwarabwaraa teutana bwa e kanga Mote ni karekea te tua mai iroun te Atua (taraa Te Otinako 19-20). Ngkanne kaota tamnein Abinataai (taraa te kabwarabwara n te wiiki aei n Nakomai, Iriira—Ibukiia Aomata n Tatabemaniia ao Utu), ao tuangiia ataei bwa Abinataai e kauringa te Uea are Noa ao ana ibonga ibukin Tua ake Tebwina. Rinei tabeua tua man Motiaea 12:33–36 ao 13:11–24 are ko taku bwa ana rangi ni kakawaki ibukiia ataei ake ko reireiniia, ao marooro ma ngaiia ibukin te kakabwaia are e na reke man te ongotaeka nakon tuua aikanne.

• Baane anenea te anene ibukin te tua, n aron “Keep the Commandments” (Aia Boki n Anene Ataei, 146). Bukin tera ti kawakin taian tua?

Motiaea 14:5; 15:7–9

A ninikoria burabeti ni kakoaua ibukin Iesu Kristo.

Abinataai e reireina te Uea are Noa ao tabeman riki ibukin Iesu Kristo, e ngae ngke e rangi ni kamamate. E na kanga rongorongon Abinataai ni kakorakorai aia koaua ataei iroun te burabeti?

Waaki ni Kakukurei aika a Kona ni Karaoaki

• Tibwauai ma ataei tabeua bwaai are e reirei iaona Abinataai ibukin Iesu Kristo ni Motiaea 14:5 and 15:7–9. Buokiia ataei bwa a na ataia ae Abinataai e tangira te Uea are Noa ao ana botanaomata bwa a na iriira Iesu bwa a aonga ni kukurei. N ara bong, a reireiniira burabeti aika maiu ibukin te Tia Kamaiu. Wareka te rongorongo teuana ae taekinaki n te maungatabu ni kabuta, ke kaota te tamnei ae uarereke n te witeo iaon temanna te burabeti ae maiu ngke e kaota ana koaua iaon Iesu Kristo (te katooto, taraa te “Special Witnesses of Christ” witeo iaon ChurchofJesusChrist.org).

• Kaota ke korea tamnein te tiein, te karabuti, ao te ai. Reireiniia ataei bwa Abinataai e kukurei bwa e na kabaeaki, karinaki n te karabuti, ao ni kabuekaki naba n te ai ni tibwaan ana koaua ibukin Iesu Kristo. E ngae ngkana tao ti na aki rinanoi taian kaangaanga aikai, ti na kanga n rang n ninikoria n aiaron Abinataai n tibwaua ara koaua n ara taeka ao ara rinerine?

Reireia te Reirei: Ataei aika a Ikawai

Motiaea 11:-13; 17

I kona n tei i bukin te Koaua, e ngae ngkana I tei n tii ngai.

Ko na kanga ni katauraoiia ataei ake ko reireiniia ni rangi n ninikoria n tei ibukin te eeti, e ngae ngkana a na karaoia n tii ngaiia?

Waaki ni kakukurei aika a Kona ni Karaoaki

• Kaoiia ataei bwa a na korea tamnein mwakoron nako rongorongon Abinataai, te Uea are Noa, ao Aramwa aika kakaokoro are e kuneaki n Motiaea 11–13 ao 17. Buokiia bwa a na kabongana aia tamnei ni manga karakina te karaki, ke ni kabongana “Mwakoro 14: Abinataai ao te Uea are Noa” (karaki man Ana Boki Moomon, 38–42, ke te witeo are irekereke ma ngaia iaon ChurchofJesusChrist.org). A kanga Abinataai ao Aramwa i bon irouiia n tei ibukin te eeti? Bukin tera te Uea are Noa e aki tei ibukin te eeti? (taraa Motiaea 17:11–12). Buokiia ataei ni iangoa te tai are ngke a tei ibukin te eeti.

• Buokiia ataei bwa a na iangoa te bwai ae riki ae aongkoa a na kona iai n tei ibukin te eeti, ao kaoiia bwa a na karaoa te kaotioti are a na rinanon te bwai are e riki anne. Te katooto, tera ae a na karaoia ngkana iai temanna ae e kataia ni kairiia bwa a na mataku n te tamnei ae e aki raoiroi ke raoraoia a rawa ni kaira temanna n takakaro irarikiia?

• Kaota te witeo “Dare to Stand Alone” (ChurchofJesusChrist.org). E kanga Beretittenti Thomas  S. Monson n riki bwa ai aron Abinataai?

Motiaea 12:33–36; 13:11–24

N na riai n ongotaeka nakon Tua ake Tebwina.

Abinataai e reireina te Uea are Noa ao ana ibonga aika a buakaka n taekan Tua ake Tebwina. A mataata ataei ake ko reireiniia bwa bukin tera ti riai n tangiria ao n ongotaeka nakon ana tua te Atua?

Waaki ni Kakukurei aika a Kona ni Karaoaki

• Anga te mwioko nakoia ataei n tatabemaniia bwa a na wareka teuana te tua ni Motiaea 12:35 ao 13:11–24. Buokiia ataei bwa a na iangoi anga aika mwaiti ni buokiia i bon irouia n uringa te tua (n aron mwakoro n taeka ae titebo tangiia, karaoan te mwakuri, ke kauarerekean te taeka). Te anene “The Commandments” (Aia Boki n Anene Ataei, 112) e kona n ibuobuoki naba. Anganiia ataei te moti ni beewa are e a tia ni koreaki bwa katotongan te aati, ao kaoiia bwa a na korea teuana ke e raka riki iaon te aati anne Tua ake Tebwina inanoia (taraa Motiaea 13:11)—tao teuana are a namakinna bwa a na kataia n ongeaba nako iai.

• Baane anenea te anene ibukin te tua, n aron ae “Keep the Commandments” (Aia Boki n Anene Ataei, 146). Tera te kakabwaia ae e reke man kawakinan te tua?

Koroboki aika a tabu a reireiniira ana tua te Atua.

Motiaea 14:6; 16:4–9

Ngkana I bure, I riki ni bua; ma ibukin Iesu Kristo, I kona ni manga kuneaki.

N reirei ibukin Iesu Kristo, Abinataai e taekina te burabeti are Itaia, are e kabotauiira ma tiibu aika bua. Ko na kanga ni kabongana te kabotau aei n reireiniia ataei ibukin te tia Kamaiu?

Waaki ni Kakukurei aika a Kona ni Karaoaki

• Kaoiia ataei bwa a na tibwaua te tai ae e riki nakoia ngke e bua aia bwai ke bon ngaiia ngke a bua. Tera ae a namakinna? Tera ae a karaoia? Baane wareka Motiaea 14:6 ao 16:4–9. Ti kanga n taai tabetai ti riki ni “bua” mai iroun te Atua? E kanga Iesu Kristo ni buokiira bwa ti na oki?

• Kaoiia ataei bwa a na iangoa te nanai n tiibu. Tera tabeua bukina ae e na bua temanna te tiibu? Korei ni karinani aia reke iaon te burakibooti. Ti kanga n riki n aekakiia tiibu ake a kararoaia? E na kanga ana namakin Tamara are i Karawa ngkana tia “kuneaki” rinanon te rairannano ao Ana Mwakuri ni Kamaiu te Tia Kamaiu? (taraa RB 18:10–13). Tibwaua am koaua ibukin te Tia Kamaiu ao te rairannano.

Kaungaa te Kamatebwai n te Mweenga

Kaoiia ataei bwa a na tuangiia kaiin aia utu bwa a na tibwaua te bwai are a tia n rinanona are a tei iai ibukin te koaua, ke kaungaia ataei bwa a na tibwaua te bwai are a tia n rinanona.

Kanakoraoan Ara Anga reirei

Kaokiokan te bwai teuana bon kingin te kamatebwai. A na rangi ni buokaki ataei man ongoraeakinan te reirei n te euangkerio ke karaoan te waaki ni kakukurei ngkana e karakaaki karaoana nakon ae tii te taina. Kataia manga karaoi waaki ni kakukurei n aanga aika a bati.