“Meei 25–31. Motiaea 29–Aramwa 4: ‘A Teimatoa man Aki Kamwaingaki,’” Nakomai, Iriirai—Ibukin te Moanrinan: Ana Boki Moomon 2020 (2020)
“Meei 25–31. Motiaea 29–Aramwa 4,” Nakomai, Iriirai—Ibukin te Moanrinan 2020
Aramwa te Ataei e Kabwarabwara, iroun Gary L. Kapp
Meei 25–31
Motiaea 29–Aramwa 4
“A Teimatoa man Aki Kamwaingaki”
Ataei ake ko reireiniia a kona n reiakina ae mwaiti n am kiraati, ma a na reiakina ae mwaiti riki ngkana a karikirakea te anua ni kamatebwai ni koroboki aika tabu ni mweengaia. Iangoia ko na kanga ni kaunga ao ni boutoka reiakinan te euangkerio inanon te mweenga.
Korea am namakin
Kaungaa te Tibwatibwa
Kaoiia ataei bwa a na tekateka iaon te timanti n te mronron, ao karabinoa te booro nakon temanna mai ibuakoia. Tuanga te ataei anne bwa e na tibwaua te bwai are teuanne ke neienne e a tibwa tia n reiakinna n taekan te euangkerio ni mweengana ke n te Moanrinan. Imwiina kaoa te ataei anne bwa e na karabinoa te booro nakon temanna. Kaokiokia ni karokoa a bane n reke aia tai n tibwatibwa ataei.
Reirei te Reirei: Ataei aika a Uarereke
Ngkai kain te Ekaretia, I riai n tangiriia ao ni beku ibukiia tabeman.
Ko kona n aki tuangiia ataei taekan ana reirei Neooa, ma a kona n reiakinaki riki ataei n ataia bwa n te Ekaretia ti beku ibukina ti tangiriia tabeman, tiaki ibukina bwa ti aonga ni kaubwai ke ni kinaaki.
Waaki ni Kakukurei aika a Kona ni Karaoaki
-
Tibwauaia ma ataei, n taekana ae beebete, karakinan Aramwa ao Neooa (taraa Aramwa 1; “Mwakoro 20: Aramwa ao Neooa,” Karaki man Ana Boki Moomon, 54–55, ke te witeo ae irekereke ma ngaia iaon ChurchofJesusChrist.org). Kabwarabwaraa bwa e ngae ngke naake a iriira Neooa a iowawaa nakoia kain te Ekaretia, angiia kain te Ekaretia a teimatoa n akoi ao n tangira.
-
Wareka Aramwa 1:30 nakoia ataei, ao buokiia bwa a na oota bwa aomata n te EkaretIa a tibwauai aia bwai ma aomata ake a kainnanoa te ibuobuoki. Buokiia ataei bwa a na iangoi bwaai ake a kona n tibwai ao aomata ake a kona n tibwaia ma ngaia. Kaungaia ataei bwa a na korei tamnein aia iango.
-
Ikotaki anenea te kuna ae taekan te tangira ao te ibuobuoki, n aron “Kindness Begins with Me” (Aia Boki n Anene Ataei, 145), ao buokiia ataei n iangoa aia kai are a na kanakoa ma kunaia.
Te Atua e na bon kaekai au tataro.
Ngke Aramwa ao Nibwaite a namakina “te maaku ae korakora” (Aramwa 2:23), a tataro ibukin te ibuobuoki ao a kakorakoraaki. Buokiia ataei bwa a na reireiaki man aia banna ni katooto.
Waaki ni Kakukurei aika a Kona ni Karaoaki
-
Kabonganai tamnei n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu ke inanon “Mwakoro 21: Ameritinaite” (Karaki man Ana Boki Moomon, 56–57, ke witeo ae irekereke ma ngaia iaon ChurchofJesusChrist.org), tuangiia ataei aroia Nibwaite ni karekea korakoraia ni kakonakiia Ameritinaite. Titirakiniia ataei taekan bwaai aika a kakamaaku ke a matoatoa irouiia, ao kakoaua bwa a kona n tataro ibukin ana ibuobuoki Tamara are i Karawa ibukin bwaai aikai.
-
Tibwaua te bwai are ko rinanona ngke e buokiko te Atua imwiin am tataro nakoina. Kaoiia ataei bwa a na tibwauai bwaai ake a tia n rinanona ma te tataro.
Au kakoaua e kona ni kakorakoraia tabeman.
N tabetai “ana koaua ae itiaki” (Aramwa 4:19) te ataei e kona n iai mwiina ae korakora iaoia tabeman. Ko na kanga ni buokiia ataei ni karekei kawai n tibwaua aia koaua?
Waaki ni Kakukurei aika a Kona ni Karaoaki
-
Kauki koroboki aika tabu nakon Aramwa 4:19, ao kabwarabwaraa bwa ngke e noori buakakaia aomata Aramwa, e baireia bwa te kawai ae tamaroa ni buokiia bwa e na kaota “ana koaua ae itiaki” nakoia. Kabongana te iteraniba ni waaki ni kakukurei n te wiiki aei n reireiniia ataei bwa tera te koaua ao tera ae raonaki ma ngaia. Kaungaia bwa a na tibwauai aia koaua.
-
Kabwaroa te ran ae itiaki inanon te mwangko te kiraati ae itiaki, ao kabwarabwaraa bwa te ran ai aron ara koaua ibukina bwa ti konaa n tibwauaia ma tabeman. Kabwaroa te kiraati n ran nakon mwangko aika a uarereke ni katoaia ataei, ao tuangiia bwa ngkana ti tibwauai ara koaua, ti buokiia tabeman ni kakorakora riki aia koaua.
-
Ngkana a tangiria ataei, anganiia bwa a na kataneiaia ni kaota aia koaua. Anga kawai tabeua are a na kona iai ni kaotia bwa a ataia bwa e koaua te euangkerio, n raonaki ma rinanon aia mwakuri.
Reirei te Reirei: Ataei aika a Ikawai
I kona n reiakinna ni kinai reirei aika kairua.
N taai tabetai inanon maiura, ti bane ni kaitaraia aomata ae ai aron Neooa—naake a kataia ni keweira ma rongorongo aika a taraa ni koaua ma a kairua ao a karika te kaangaanga. Tibwauakin te rongorongo n Aramwa 1:2–9 e kona ni buokiia ataei ni katauraoi ibukin kaaitara inanona maiuia.
Waaki ni Kakukure aika a Kona ni Karaoaki
-
Buokiia ataei ni wareka Aramwa 1:2–4 n rinanon tabeua bwaai ake e reirei iaona Neooa, te tia reirei ae kewe. Buokiia ni karaoi kawaninga n ae eeti ke kairua ni kabonganai taeka man kiibu aikai. Bukin tera Tatan n tabetai e ikoti koaua ma bwaai aika a kairua? Buokiia ataei bwa a na iangoi tabeua katooto.
-
Imwiin rinanoan Aramwa 1:2–9 n ikotaki, tuangiia ataei n tatabemaniia bwa a na wareki koroboki aika tabu aikai: Mataio 7:21–23; 2 Nibwaai 26:29–31; Motiaea 18:24–26; ao Ereman 12:23–26. A kanga kibu aikai ni kaota kairuan ana reirei Neooa? Ti kanga ni kabonganai koroboki aika tabu ni kakorakorai ara koaua n te euangkerio?
Ngkai kain te Ekaretia, I riai n tangiriia ao ni beku ibukiia tabeman.
N tabetai kain te Ekaretia n ana bong Aramwa a mwamwannano ao angaanga, ao taai tabetai ai akea aia nanoanga ao a kainikatonga. Buokiia ataei ake ko reireiniia bwa a na reirei man bwaai ake a rinanona.
Waaki ni Kakukurei aika a Kona ni Karaoaki
-
Buokiia ataei bwa a na wareka Aramwa 4:6–13, ao ni kabwarabwarai taeka n aron “kakanikoia,” “ribaia,” ao “bwainikiriniia” (ni kabongana te rikitionari ngkana e riai). Tera ara namakin ngkana aomata a karaoi aro aikai nakoira? Kaoiia ataei bwa a na kakaai taeka aikai n Aramwa 1:26–30 ae e kabwarabwaraa aron are e tangiriia Tamara are i Karawa bwa ti na karaoia nakoira imarenara.
-
Tuangiia ataei bwa a na wareka Aramwa 1:27, 30 ao karinani aekakia aomata ake a buokaki irouia kain te Ekaretia. Kaoiia ataei bwa a na iangoiia aomata ake irarikiia ke n te reirei ake a konaa “[tei] ni kainnanoan” (Aramwa 1:30) aia tangira ao aia ibuobuoki. Ni kakorakorai riki reirei aikai, ikotaki anenea taekan te akoi, n aron,“I’ll Walk with You” (Aia Boki n Anene Ataei, 140–41).
Au koaua e kona ni kakorakoraia tabeman.
Aramwa e anganako nakoana ae te mataniwi n tia moti bwa e aonga ni kabanea riki ana tai n tibwaua ana koaua ni buokiia aomata bwa a na rairi nanoia. Ana banna ni katooto e kaungai nanoia ataei n tibwauai aia koaua riki n taatainako.
Waaki ni Kakukurei aika a Kona ni Karaoaki
-
Wareka Aramwa 4:8–12, 15 ma ataei, ao tuangiia bwa a na noori kaangaanga aika a riki n te Ekaretia, n aron are e kabwarabwaraaki ni kibu aikai. Kaoiia ataei bwa a na taekinii bwaai tabeua ake e kona ni karaoi Aramwa bwa aonga n toki kaangaanga aikai. Buokiia bwa a na kunea, inanon Aramwa 4:16–20, tera ae e baireia bwa e na karaoia Aramwa. Bukin tera te koaua e rang mwaaka?
-
Buokiia ataei bwa a na ataia bwa tera te koaua ao bwaai ake a raonna, kaota te witeo “Apostle Testimony Montage” (ChurchofJesusChrist.org); ikotaki anene n taekan atuun te reirei, n aron “Testimony” (Anene n Taromauri, nambwa. 137); ke kabongana te iteraniba ni waaki ni kakukurei ibukin te wiiki aei. Tuangiia ataei bwa a na tibwaua te bwai are a tia n reiakinna iaon te kakoaua man bwaai n ibuobuoki aikai.
Kaungaa te Kamatebwai n te Mweenga
Buokiia ataei n iangoa temanna ae a kona n tibwaua aia koaua ma ngaia n te wiiki ae e na roko. Kaungaia bwa a na korea aia baire ni buokiia ni kakoroa bukin aia kouru.
Kanakoraoan Ara Anga reirei
Anga titiraki aika a na kaoa te koaua. “Anga titiraki aika a na kaungaia taan reiakinaki bwa a na kaota aia koaua n reirei ake a tia n reiakinaki e na kona n riki bwa te kawai ae mwaaka ni kaoan te Tamnei” (Reirei n ana Kawai te Tia Kamaiu, 32). Kaoiia atei bwa a na kaota aia koaua, anga titiraki aika a na kona n iango iai ao n tibwauaia bwa tera aia namakin iroun te Tia Kamaiu ao Ana euangkerio. Ko kona naba n titirakiniia iaon te namakin are a tia ni karekea iaon te tataro, ibuobuoki, otenanti n aron te bwabetito, ke namakinan ana wirikiriki te Tamnei ae Raoiroi.