“Meei 18-24. Motiaea 25-28: ‘A Aranaki bwa Ana Botanaomata te Atua,’” Nakomai, Iriirai—Ibukin te Moanrinan: Ana Boki Moomon 2020 (2020)
“Meei 18-24. Motiaea 25-28,” Nakomai, Iriirai—Ibukin te Moanrinan: Ana Boki Moomon 2020
Rairakin Aramwa te Ataei, iroun Gary L. Kapp
Meei 18-24
Motiaea 25–28
“A Aranaki bwa Ana Botanaomata te Atua”
Tamara are i Karawa e ataia bwa tera ae a kainnanoia n reiakinna ataei ake n am kiraati ao e kanga aron ae ko na rootiia. Ukera Ana kairiiri n am tai ni wareka Motiaea 25–28 ao manga rinanoa te kabwarabwara aio.
Korea Am Namakin
Kaungaa te Tibwatibwa
Kaota te tamnei n te kabwarabwara n te wiiki aio n Nakomai, Iriirai—Ibukiia Aomata n Tatabemaniia ao Utu, ao tuangiia ataei bwa a na kabwarabwaraa bwa tera ae riki n te tamnei. Ngkana ataei a rangi ni mataata n rongorongon Aramwa te Ataei ao natin Motiaea mwaane, kariaia bwa a na tibwaua te bwai are ataia.
Reirei te Reirei: Ataei aika a Uarereke
E tangirai te Uea bwa N na kabwarai bure.
Te Uea e tuanga Aramwa bwa E bane ni kabwarai aia bure ake a rairananoia. Ti riai n ira Ana katooto ni kabwarai aia bure naake a bure nakoira.
Waaki ni kakukurei aika a Kona ni Karaoaki
-
Warekia nakoia ataei te kibu n taeka man Motiaea 26:31: “Ao kam na kabwarai naba ami bure imarenami.” Kariaia ataei bwa a na kataneiaia n atonga “I kabwaraa am bure” tabeua te tai, ao kakaea ngkana a ataia bwa tera nanon ae ko kabwarai bure. Tibwaua te bwai ae e riki nakoim mani maium ngke ko kabwaraa ana bure temanna ke iai temanna ae e kabwaraa am bure.
-
Buokiia ataei bwa a na karaoa te takakaro ni kabwaraa ana bure temanna. Tuanga temanna te ataei bwa e na riki bwa aongkoa e a tia ni karaoa te bwai teuana ae e kamaraki ke ni kauna nanon temanna te ataei. Tera ae e kona te ataei are temanna n taekina ke ni karaoia ni kaota ae e kabwaraa te bure?
-
Kaoiia ataei bwa a na korea tamnein te ubu ae e nanokawaki n iteran te beeba ao te ubu ae e kukurei ni iterana are teuana. Tuangiia bwa a na taua ieta te ubu are e nanokawaki ao a taekina te bwai are e riki nakoia ngke tariia ke roaraoia a kamaraki nanoia. Tuangiia bwa a na taua ieta te ubu are e kukurei ao a taekinna bwa a kanga ni kabwaraa te bure ke a kanga bwa a na kabwaraa ana bure te aomata anne.
Te euangkerio e buokiia aomata bwa a na bitaki ao n riki n ai aron Iesu Kristo.
Rairakiia Aramwa te Ataei ao natin Motiaea mwaane a kaota te banna bwa ibukina bwa iai Iesu Kristo ao Ana euangkerio, a kona ni bane ni bitaki aomata ao n riki n ai aron Iesu.
Waaki ni kakukurei aika a Kona ni Karaoaki
-
Kakimototoa n taekina rongorongon rairakin Aramwa te Ataei ao natin Motiaea mwaane, n aron are e kabwarabwaraaki ni Motiaea 27:8–37. Ibukin te buoka, taraa “Mwakoro 18: Aramwa te Ataei E Raira Nanona” (Karaki man Ana Boki Moomon, , 49-52, ke te witeo ae irekereke ma ngaia iaon ChurchofJesusChrist.org). Ngkanne manga karakina te karaki, kariaia ataei bwa a na tibwaua kabwarabwaraana n aron are a uringnga. Kariaia bwa a na karaoa te kaotioti iaon te karaki, ao buokiia bwa a na noora te kaokoro imarenan te tai ngke a tuai n rairi nanoia Aramwa ao natin Motiaea mwaane ao rimwi.
-
Buokiia ataei bwa a na kabongana te iteraniba ibukin te waaki ni kakukurei n te wiiki aei n karakina karakinan Aramwa ao natin Motiaea mwaane. Wareka Motiaea 27:24, ao buokiia ataei bwa a na ataia ae Aramwa ao natin Motiaea mwaane a bitaki ibukina bwa a rairinanoia man aia bure ao a butimwaea ana euangkerio Iesu Kristo.
TamneiAramwa te Ataei ngke e uotaki nakon ana auti tamanaE Kimwareirei Tamana, iroun Walter Rane
I kona n tibwaua te euangkerio ma tabeman.
Imwina ngke a tia n rairaki, natin Motiaea mwaane a ingainga ni kan tibwaua te euangkerio ma tabeman, ni ikotaki ma aia kairiribai, ake taian Reimwanaite.
Waaki ni Kakukurei aika a Konaa ni Karaoaki
-
Kabongana Motiaea 28:1–8 n tuangiia ataei ibukiia natin Motiaea mwaane ngke a iangoia n tataekina te euangkerio nakoia taian Reimwanaite. Ibukin te buoka, taraa “Mwakoro 19: Natin Motiaea Mwaane a Riki bwa Mitinare” (karaki man Ana Boki Moomon, 53, ke te witeo ae irekereke ma ngaia iaon ChurchofJesusChrist.org). Bukin tera a tangiria ni kan tibwaua te euangkerio? (taraa kiibu 3).
-
Buokiia ataei n tatabemaniia ni iangoa temanna ae e kainnanoia ni kan ataa riki taekan te euangkerio. Buokiia ataei ni baireia bwa tera ae a na taekinna nakon te aomata are a iangoia.
-
Baane anenea te anene ibukin tataekinan te euangkerio, n aron “I Want to Be a Missionary Now” (aia boki n Anene Ataei, 168). Kaoti mwakoro n taeka n te anene are e taekinna bwa ti na kangaa n tibwaua te euangkerio ma tabeman.
Reirei te Reirei: Ataei aika a Ikawai
Motiaea 26:22–23, 29–30; 27:8–37
Te Atua e bane ni kabwarai aia bure akana a rairinanoia.
Ngkana iai n am kiraati ae teuanne ke neienne e kan ataia raoi bwa e bon koaua ae e kabwaraaki ana bure, ana taeka te Atua nakon Aramwa te Ikawai ao te bwai are e a tia n rinanona Aramwa te Ataei kona ni ibuobuoki.
Waaki ni Kakukurei aika a Kona ni Karaoaki
-
Tuangiia ataei bwa na iangoia ae aongkoa a marooro nakon temanna ae e aki ataia bwa te Atua e na bon kabwaraa ana bure. Kaoiia bwa a na rinanon ana taeka te Atua nakon Aramwa te Ikawai ni Motiaea 26:22–23, 29–30. Tera ae a kunea bwa e na kona ni buoka te aomata anne?
-
Imwain te kiraati, tuanga temanna te ataei bwa e na wareka rongorongon rairakin Aramwa te Ataei, are e kuneaki ni Motiaea 27:8–37, ao e na roko n tauraoi ni karakina te karaki nakoia kain te kiraati n ai aron ae aongkoa ngaia Aramwa te Ataei. (Ngkana e kainnanoaki, tuanga teuanne ke neienne n tuangiia a na karo bwa a na buokia.) Inanon ana tai ni karakina te karaki te ataei anne, anga te titiraki n ai aron “E kanga am namakin ngke … ?” ke “Tera ae e riki imwina?”
-
Kaoiia ataei bwa a na korei ni karinanii taeka man Motiaea 27:8–10 are e kabwarabwaraa bwa tera aroia Aramwa ao natin Motiaea mwaane imwain rairakiia. Ngkanne tuangiia bwa a na manga korei ni karinani man Motiaea 27:32–37 are e kabwarabwaraa bwa e kanga aroia imwin rairakiia. Ni kaineti ma kiibu 24–29, tera ae e karika te bitaki ae korakora aei iroun Aramwa?
Ngkana e na kabwaraaki au bure, N na riai ni kabwarai bure.
Buokiia ataei n noora te reitaki imarenan te kabwara bure are a kaotia nakon temanna ao te kabwara bure are a kantaningaia bwa e na reke irouia.
Waaki ni Kakukurei aika a Kona ni karaoaki
-
Kaoiia ataei bwa a na wareka Motiaea 26:29–31 ao warekia bwa iraua te tai ae kaoti te taeka ae “kabwarabure” ni kaoti. Teraa ae ti reireinaki ni kiibu aikai ibukin kabwaraan aia bure tabeman? E kanga te ikabwarabure ni buoka te aomata are e a tia ni karaoa te bwai ae kairua ao te aomata are e kabwara te bure?
-
Tuanga te ataei bwa e na korea te buriiti iaon te burakibooti, ao tibwua te rongorongo are e taekinaki iroun Beretitenti Thomas S. Monson: “Teuare e aki kona ni kabwara ana bure temanna e urua te buriiti are e na bon manga riaona ngkana e na kona n roko i karawa, bwa aomata ni kabane a kainnanoa te ikabwarabure” (George Herbert, e taekinaki ana taeka inanon “Hidden Wedges,” Ensign, Meei 2002, 19). Kamauna iteran te buriiti, ao tuangiia ataei bwa a na buokiko ni manga karaoia, teutana imwin teutana, n aia tai n tibwauai kawai are a na kona ni karabaaba te ikabwarabure nakoia tabeman. Kaoiia bwa a na iangoa temanna are e kainnanoia ni kabwara ana bure.
I kona n tataro ao n aki mamatam bwa te Atua e na kakabwaiaia naake I tangiriia.
Iangoia bwa kona kanga ni buokiia ataei bwa a na ataia ae te aki mamatam e kona ni karikirakea aia onimaki ngkai a tataro ibukiia aomata ake a tangiriia.
Waaki ni kakukurei aika a Konaa ni Karaoaki
-
Baane wareka Motiaea 8–24, ao tuangiia ataei bwa a na kakaea bwa tera ae a karaoia Aramwa ma ana botanaomata ni buoka Aramwa te Ataei. Tibwaua te bwai are e riki nakoim ngke ko aki mamatam ao n tataro ibukin temanna, ao kaungaia ataei bwa a na tibwaua te bwai are e riki naba nakoia.
-
Kaoiia ataei bwa a na iangoa temanna ae ataia bwa e kainnanoa ana ibuobuoki te Atua inanon maiun teuanne ke neienne. Kaota am koaua bwa ataei a kona n tataro ao n aki mamatam ma te onimaki bwa te Atua e na kakabwaia te aomata anne. Kaoiia ataei bwa a na tataro ibukin te aomata are a iangoia ao, ngkana a kona, n aki mamatam naba ibukiia.
Kaungaa te Kamatebwai n te Mweenga
Tuangiia ataei bwa a na rinea teuana te bwai are a reiakinna man te bwai are e a tia n rinanona Aramwa te Ataei ao natin Motiaea mwaane are a tangiria ni kan tibwauaia ma aia utu.
Kanakoraoan Ara Anga reirei
Boutokaia kaaro. “A bon rangi ni kakawaki kaaro bwa taan reireia te euangkerio nakoia natiia—iai irouia te mwiokoaki ao te korakora ni kairoroia natiia (taraa Te Tua Kaua 6:6-7). N am tai n reireiniia ataei n tain te taromauri, tataro bwa a na reke kawai ake ko kona ni boutokaia kaaro iai” (Reirei n Ana Kawai te tia Kamaiu, 25).