Minerva K. Teichert (1888-1976), Birinakon te Uea ae Rimwaai ao Ana Aomata, 1949-1951, te oera iaon te mitionaite, 35 7/8 x 48 te inti. Brigham Young University Museum of Art, 1969.

Meei 11–17

Motiaea 18–24

Ti a Tia ni Karaoa te Berita ae tabu ma Atuara

Ngkai ko wareka Motiaea 18–24, iangoia ataei ake ko reireiniia. Te Tamnei ae Raoiroi e kona ni buokiko ni kinaa te koaua are e kaineti nakoia.

Korea am Namakin

Kaungaa te Tibwatibwa

Kaota tamnein temanna ae bwabetitoaki, ao kaoiia ataei bwa a na tibwaua te bwai teuana ae a ataia ibukin te bwabetito. A kona n tibwaua te bwai are a reiakinna ngkai a wareka Motiaea 18–24 ma aia utu, ngkai a ira te bwabetito, ke n te tabo riki teuana.

Reirei te Reirei: Ataei aika a Uarereke

Motiaea 18:7–16

Ngke I bwabetitoaki I bon karaoa au berita ma te Atua.

Teuana te kawai ae rangi ni kakaawaki ni buokiia ataei ni katauraoi ibukin te bwabetito bon reireinaia taekan te berita ae tabu ake a na karaoia ngkana a bwabetitoaki.

Waaki ni Kakukurei aika a Kona ni Karaoaki

• Manga rinanoan karakinan Aramwa ma ana botanaomata n Nein Moomon ni kabongana Motiaea 18:7–16 ke “Mwakoro 15: Aramwa e ReireI ao e Bwabetito” (Karaki man Ana Boki Moomon, 43–44, ke witeo ake a irekereke ma ngaia iaon ChurchofJesusChrist.org). Kaota te tamnei n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu ao anganiia ataei bwa a na karakina nakoim te bwai ae a ataia man te karaki.

• Ni Kabonganan Motiaea 18:8–10 bwa te kairi, reireiniia ataei n oin am taeka bwaai tabeua ake a berita bwa a na karaoia ngkana a bwabetitoaki. Te katooto, a berita bwa a na iriira Tamara are i Karawa ao Iesu man karauan nanoia aomata aika a nanokawaki. Tibwaua te karaki bwa ko kanga ke temanna ae ko kinaa n tia ni kawakin berita aikai. (Taraa naba D&C 20:77, 79; Carole M. Stephens, “Iai Bukina Iroura ae Tamaroa bwa ti na Kimwareirei,” Ensign ke Riaona, Nob. 2013, 115–17.)

• Kabwarabwaraa bwa ngkana ti bwabetitoaki, Tamara are i Karawa e karaoi naba berita nakoira. Tibwauai berita aikai, ae kabwarabwaraaki n Motiaea 18:9–10.

Motiaea 18:17–28

Ngkana I bwabetitoaki, I a riki bwa kain ana Ekaretia Iesu Kristo.

Buokiia ataei bwa a na ota n te bwai ae nanonaki n riki bwa kain te Ekaretia rinanon te bwabetito ao te kamatoa.

Waaki ni Kakukurei aika a Kona ni Karaoaki

• Kaoa temanna ae e a tibwa bwabetitoaki bwa e na tibwaua te bwai ae namakinna. Wareka Motiaea 18:17, ao kabwarabwaraa bwa ngkana ti bwabetitoaki ti a riki bwa kain Ana Ekaretia Iesu Kristo ibukiia Aika Itiaki ni Boong aika Kaitira ao ti berita bwa ti na iriira Iesu.

• Kaoti tamnei nakoia ataei ake a tei ibukin bwaai ake a kabwarabwaraaki n Motiaea 18:17–28. Te katooto, te tamnei ae Katabuaki nakon te Nakoanibonga (Te Boki n Tamnei n te Euangkerio, nambwa. 106) e kona n tei ibukin te kibu 18, ao te tamnei Kabwakaan te Kabwianibwai (Te Boki n Tamnei n te Euangkerio, nambwa 113) e kona n tei ibukin kiibu 27–28. Anganiia ataei bwa a na kabwarabwaraa te bwai are a nooria n te tamnei, ao kabonganai tamnei ao kibu bwa a na buokiia n noori bwaai aika a nanonaki n riki bwa kaain te Ekaretia.

Ti karaoa te berita ae tabu ma te Atua ngkana ti bwabetitoaki.

Motiaea 24:8–17

Te Atua e kona ni kabebetea uotau.

Nningai ae e a tia ni kabebetei uotam te Atua? Iangoi kawai ake ko kona n tibwauai ake ko rinanona ao am koaua ma ataei.

Waaki ni Kakukurei aika a Kona ni Karaoaki

• Buokiia ataei n iangoi mwakuri aika a beebete ake a kona ni karaoi ngkai ko karakina te bwai ae riki nakoia ana botanaomata Aramwa n Motiaea 24:8–17. Kaotia bwa ibukina bwa Aramwa e rineia bwa e na ira ana reirei Abinataai ibukin Iesu, ngaia ma ana botanaomata a bwainikiriinaki, ma aki toki man kakoauaan Iesu.

• Wareka Motiaea 24:14–15 nakoia ataei. Kanoa te baeki ni bwaai aika a tinebu (ake a na tei ibukin te uota ae rawawata), ao kaoa te ataei bwa e na taua te baeki. Kabwarabwaraa bwa ngkana ti nanokawaki, aoraki, ke iai ara kaangaanga, e kona n namakinaki bwa kanga uouotan te bwai ae rawawata. Kaoiia ataei bwa a na ikaruoruo ni buoka te ataei ni uota te baeki bwa e aonga ni beebete. Kabwarabwaraa bwa Tamara are i Karawa e kona ni kabebetei uotara ngkai ti ukoukora Ana ibuobuoki rinanon te tataro, ni buokiia tabeman, ao a bati riki.

Reirei te Reirei: Ataei aika a Ikawai

Motiaea 18:7–16

Ngke I bwabetitoaki I bon karaoa au berita ma te Atua.

Ko na kanga ni buokiia ataei ake ko reireiniia n ota n te berita ae tabu are ti karaoia n te bwabetito?

Waaki ni Kakukurei aika a Kona ni Karaoaki

• Katoaia ataei anganiia te mwakoro ni beeba. Ikotaki wareka Motiaea 18:8–10, ao kaoiia ataei bwa a na korea te berita are a karaoia n te bwabetito n iteran te beeba, te kakabwaia are e berita iai nakoia Tamara are i Karawa n iterana are teuana. Anganiia bwa a na tibwaua te bwai are a kunea ma kain te kiraati. Ngkai a tibwatibwa, anganiia titiraki n aron aikai: Ti na kanga n “tang ma naake a tang”? Tera ae nanonaki n riki bwa ana tia kakoaua te Atua “n taabo ni kabane”? (te kibu 9). Tera ae ti kona ni karaoia ni kawakina ara berita?

• Kaoiia ataei tabeman ake a tia ni bwabetitoaki bwa a na tibwaua te bwai are a uringnga n te bwai are a rinanona. Tera ae karika te bong anne bwa te bong ae onoti? Tera aron aia namakin? Kabwarabwaraa bwa ni katoa Tabati a kabooui aia berita n te bwabetito ngkana a kana te toa. Buokiia ataei ni kabotaua te berita n te bwabetito are e kabwarabwaraaki n Motiaea 18:8–10 ma te tataro n toa (taraa R&B 20:77, 79). Ti na kangan ni karaoa te toa bwa e na onoti, te tai ni karinerine, n ai aron ara bwabetito?

• Titirakina temanna ae e a tibwa rairaki n tibwaua arona ngke teuanne ke neienne e a reiakina taekan te Ekaretia ao aron ana namakin ngke e bwabetitoaki. Anganiia ataei bwa a na titiraki, n aron ae tera ae buoka te aomata anne n tangiria ni karaoi berita ni Motiaea 18:7–16.

Motiaea 18:17–28

Ngai bon Kaain Ana Ekaretia Iesu Kristo Ibukiia Aika Itiaki ni Boong aika Kaitira.

Ko na kanga ni kaunga nanon te ataei bwa e na kakaitau ibukin kakabwaia ni kainakin te Ekaretia?

Waaki ni Kakukurei aika a Kona ni Karaoaki

• Kaoiia ataei bwa a na wareka Motiaea 18:17–28, taratarai ana reirei ana Ekaretia Kristo n ana bong Aramwa aika titebo ma ara bong. Korei aia reke iaon te buraoki ke mwangko, a anganiia ataei bwa a na kabonganai ni katea iai te kateitei are e tei ibukin ana Ekaretia Iesu Kristo.

• Aneneia ma ataei ke wareki taekan “Ana Ekaretia Iesu Kristo” (Aia Boki n Anene Ataei, 77), ao kaoia bwa a na kakauongo nakon bwaai ake ti berita bwa ti na karaoi ngkai ti riki bwa kain te Ekaretia. Buokiia iangoi kawai ake a kona iai ni kawakin berita aikai.

Motiaea 21:1–5, 13–16; 22:1–11; 24:8–22

Te Atua e kona ni kabebetea uotau.

Rongorongoia ana botanaomata Aramwa a kona ni kaotia nakoia ataei bwa n tabetai te Atua e ibuobuoki man kakorakorakira n teimatoa rinanon kataakira n onean mwiin are e na kanakoi. Ko na kanga ni buokiia bwa a na reiakinaki man te karaki aei?

Waaki ni Kakukurei aika a Kona ni Karaoaki

• Buokiia ataei bwa a na atai bwaai aika kakawaki man rongorongoia ana botanaomata Rimwaai n Motiaea 21:1–5, 13–16; ao 22:1–11 ao ana botanaomata Aramwa n Motiaea 24:8–22. Ngkanne titirakiniia ataei n tatabemaniia bwa a na korea teuana te tamnei man taai aikai. Kaoiia ataei bwa a na bairei raoi aia tamnei n teia ae eeti are a na karakina te karaki. Ngkai a karaoia, kamataata bwa te Atua e buokiia ana aomata ni kabebetei rawawataia.

• Kaoia ataei bwa a na wareka Motiaea 21:14–15 ao 24:13–14. Tera aron te Uea ni kaeka aia tataro ana aomata Rimwaai ao ana aomata Aramwa? Tuangiia ataei bwa a na tibwaua te tai ngke a tataro ibukin te ibuobuoki man te kaangaanga ao e buokiia Tamara are i Karawa, ke tibwaua te bwai are ko rinanona.

Kaungaa te Kamatebwai n te Mweenga

Kaoiia ataei bwa a na kabwarabwaraa nakon temanna te bwai are a na berita bwa a na karaoia ke a tia ni karaoia bwa mwakoron aia berita n te bwabetito.

Kanakoraoan Ara Anga reirei

Kanakoa am iango ao tarataraia am ataei. Ngkana aki kona n tekateka am ataei, e a kona ni boo tain te waaki ni kakukurei teuana ke anaa te tai ae kimototo, nakonako ma te karaurau. N iterana teuana, ngkana a kabaeaki ni kan reirei riki, tai tabwara ni waakinako n rinanon bwaai riki n reirei tabeua.