“Meei 11–17. Motiaea 18–24: ‘Ti a tia n Rin Inanon te Berita ae Tabu ma Ngaia,’” Nakomai, Irirai—Ibukiia Aomata n Tatabemaniia ao Utu: Ana Boki Moomon 2020 (2020)
“Meei 11–17. Motiaea 18–24,” Nakomai, Iriirai—Ibukiia Aomata n Tatabemaniia ao Utu
Minerva K. Teichert (1888-1976), Birinakon te Uea ae Rimwaai ao Ana Aomata, 1949-1951, te oera iaon te mitionaite, 35 7/8 x 48 intiti. Brigham Young University Museum of Art, 1969.
Meei 11–17
Motiaea 18–24
Ti a Tia n Rin Inanon te Berita ae Tabu ma Ngaia
Beretitenti Thomas S. Monson e reirei, “Ngkai ti wareki koroboki aika tabu ao mani iangoi raoi, ti na karekeaana wirikiriki ae maraara te Tamnei nakoira” (“Ti aki Nakonako n ti Ngaira,” Ensign ke Riaona, Nob. 2013, 122).
Korea Am Namakin
Rongorongon Aramwa ma ana botanaomata n Motiaea 18; 23–24 kaotaki bwa tera ae nanonaki n “roko nakon ana nanai te Atua” (Motiaea 18:8). Ngke a bwabetitoaki, a karaoa aia berita ae tabu ma te Atua bwa a na “toro Irouna ao ni kawakin ana tua” (Motiaea 18:10). Ngkai aio bon te motinano ae rangi n onoti, e na riai ni karaoaki bwa ti na kanga ni karaoa aron te ibuobuoki nakon temanna ma temanna. Eng, te mwananga n okira Tamara are i Karawa e a bon nakoimi n tatabemani ngkami, ao akea ae e konaa ni kawakina ara berita aika tabu ibukira, ma anne e aki nanonaki bwa ti tiku ni tii ngaira. Ti kainnanoira i bon i marenara. Ngkai ngaira membwa n ana Ekaretia Kristo, ti berita bwa ti na beku ibukin te Atua man ni buoka ao ni beku iroun temanna ma temanna inanon kawaira, “katoka[iaomi] rawawataia raomi” (Motiaea 18:8–10). Ana botanaomata Aramwa a tauraoi ni uotii rawawataia, n aron ae ti karaoia. Teuana te kawai ae e kona ni buokiira iai te Uea ni “uota rake [ara] rawawata ma te beebete” (Motiaea 24:15) bon man anganakira aomata Aika Itiaki n aia komuniti ake a tia ni berita n tang ma ngaira ao karaunanora, n aron ae ti a tia ni berita ni karaoia ibukiia.
Iango ibukin Kamatebwaian Koroboki aika tabu i bon Iroum
Te bwabetito n reitaki ma berita aika tabu ni beku nakon te Atua ao n tei bwa te tia kakoaua Ibukina.
Motiaea 18:8–10 kanoana ana reirei Aramwa n taekan berita aika tabu ibukin te bwabetito, ke te berita are ti karaoia nakon te Atua n te bwabetito. Ngkana ko wareki kiibu aikai, iangoi raoi titiraki aikai:
-
Tera ae ko reiakinna man kiibu aikai n taekan te berita ake ko karaoi n te bwabetito? Tera ae e beritanna te Atua nakoim?
-
E kanga te berita ae tabu ni beku i bukin te Atua (taraa te kibu 10) n irekereke nakon ara kekeiaki n ibuobuoki i bon i marenara? (tarai kiibu 8–9).
-
Tera ae ko na karaoia ni kawakina am berita?
-
E kanga kawakinan am berita aika tabu n te bwabetito ni buokiko “kaonaki ma te Tamnei”? (Motiaea 18:14). E na kanga te Tamnei ni buokiko ni kawakin berita aika tabu?
Ngke I karaoa te berita ae tabu ma te Atua, I karekea Ana kakabwaia.
Te rongorongo e kaota naba te kawai ae e riai ibukin te bwabetito. Tera ae ko reiakinna n kiibu 14–17 n taekan aron karaoakin te bwabetito? Tera riki ae ko reiakinna n taekan te bwabetito man Mataio 3:16; I-Rom 6:3–5; 3 Nibwaai 11:21–28; ao Reirei ao Berita aika Tabu 20:72–74?
Taraa naba Reirei ao Berita aika Tabu 20:37, 77, 79.
Ana aomata te Atua a riai ni katiteuanaaki.
Ngke Aramwa ao ana aomata a kunea, iriran Iesu Kristo n tabetai e nanonaki aei bwa ko riai ni kitan kawai ni maiu aika ataaki ibukin rakaia ao kaokoroia. Ma ana aomata Aramwa a karekei korakoraia mai irouia n tatabemaniia nako n aron mwakoron “ana ekaretia Kristo” (Motiaea 18:17). E kanga te reirei n Motiaea 18:17–30 ni kaungako nakon te tamaroa riki bwa te membwa n te Ekaretia? Tera ae ko kona ni karaoia ni buokiia kaain am uoote ke am mwaanga ni “botaki nanoia n te nano ae ti teuana ao i nanon te tangira”? (Motiaea 18:21).
Taraa naba Henry B. Eyring, “Our Hearts Knit as One,” Ensign ke Riaona, Nobembwa. 2008, 68–71.
A na kakoroaki bukin aia taeka burabeti.
Abinataai e karaoi tabeua taetae ni burabeti ae onoti n taekan te bwai ae e na riki nakon te Uea ae Noa ao ana botanaomata ngkana a rawa n rairinanoia. Mangaia ae, nakon taetae ni burabeti tabeua aikai a tara n aki kakoauaaki (taraa Motiaea 12:1–8, 14–15), riki ngke Nibwaite a tia n tokanikai ni kamanoaia ni kaaitaraia Remwanaite n riaon 50 te ririki (taraa Motiaea 9:16–18; 11:19). Ma ana taeka te burabeti ana koro bukiia—inanon ara bong n ai aron ana tai Abinataai.
Tera ae ko kunea ni Motiaea 19–20 are e kaira Kiteon bwa e na katanoata ana taetae ni burabeti Abinataai bwa a tia ngkai ni koro bukiia? (taraa Motiaea 20:21). E kanga te rongorongo aei ni kakorakora am onimaki n te kauring ao reirei iroun ana burabeti te Atua ao am motinnano n tou mwiin ana taeka? Ningai ae ko a tia ni kakoaua ana taeka te burabeti ae e a tia ni koro bukiia n ara bong aikai?
Te Atua e konaa ni kabebetei rawawatau.
Ana botanaomata Rimwaai ao ana botanaomata Aramwa a bwaka inanon te tautoronaki, n aron bukiia aika a kakaokoro ao kaokoron aia kaangaanga. Tera ae ko reiakinna man kabotauan rongorongon ana botanaomata Rimwaai ni Motiaea 19–22 ao ana botanaomata Aramwa ni Motiaea 18; 23–24? Ko kona ni kunea bwa e kanga kurubu aikai n tatabemaniia ni tautoronaki ke a kanga n tatabemaniia nako n riki ni kainanomataaki. N aron ae ko karaoia, noori rongorongo ake e kaaineti nakon maium. Ibukin te katooto, tera ae ko reiakinna man te rongorongo aei are e na buokiiko ni uota rawawatam?
I kona ni onimakina te Uea.
E ngae ngke a tia n rairinanoia man aia bure, Aramwa ma ana botanaomata a teimatoa inanon te tautoronaki. Aia taneiai are oti bwa onimakinan te Uea ao maiuakinan ara berita aika tabu e aki tuuki n taainako kaangaanga, ma e buokiira n tokanikai iaoia. Ngkana ko wareka Motiaea 23:21–24 ao 24:8–17, tarai taeka ao mwakoro n taeka are e kona ni buokiiko n onimakina te Atua, n aki ongea am kaangaanga.
Taraa naba Thomas S. Monson, “N na Aki Bwaka Mai Roum, Ke Ni Kitaniko,” Ensign ke Riaona, Nobembwa. 2013, 85–87.
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Motiaea 18:1–4
Iai aron taekinana ae ko kona ni wareki koraan taian aroka aika taian aboro, ma ko aki kona ni wareki taian aboro ake a na otinako man teuana te koraa. Tii temanna n aomata are e karekea ana koaua iroun Abinataai, te aomata anne—Aramwa—e kairi nanoia naan aia rooro Nibwaite. Tao ko kona ni kabongana te uaanikai ma te koraa ni karaoa katamneian te reirei aei. E kanga te rongorongo aei ni kamwakuraki nakoia ara utu? Tera ae ti kona ni karaoia n tibwaua ara koaua ma tabeman?
Motiaea 18:8–10
Tera ae ti kona n reiakinna n ara berita n ara bwabetito man kiibu aikai? (taraa naba R&B 20:73, 77–79). Tera ae ti kona ni karaoia ni katauraoa ke ni kawakina ara berita aika tabu n te bwabetito?
Motiaea 18:30
Tera taabo aika onoti nanoia nakoira ibukin te taneiai n tamnei are ti a tia ni karekea mai ikanne?
Motiaea 21:11–16; 24:10–15
Tera ti reiakin man kabotauan tautoronakiia ana aomata Aramwa ao ana aomata Rimwaai?
Motiaea 21:15; 24:11–15
Tera ae ti reiakinna man kiibu aikai n taekan tabeua ana kawai te Uea ni kaekai ara tataro?
Ibukin riki iango ibukin reiakinaia ataei, taraa te kabwarabwara n te wiiki aei i nanon Nakomai, iriirai—Ibukin te Moanrinan.
Kanakoraoan te kamatebwai I bon Iroum
Kakaea te tai ae nakoraoi ibukim. E rangi ni bebete n taainako aron reiakinakia ngkana ko kona ni kamatebwai booki aika tabu n akean katabetabeam. Kakaea te tai ae nakoraoi ibukim, ao karaoa am kabanea n tamaroa ibukin am kamatebwai ni koaua ni katoa bong.
Ranin Moomon, iroun Jorge Cocco