“Meei 18–24. Motiaea 25–28: ‘A Aranaki bwa ana Botanaomata te Atua,’” Nakomai, Iriirai—Ibukiia Aomata n Tatabemaniia ao Utu: Ana Boki Moomon 2020 (2020)
“Meei 18–24. Motiaea 25–28,” Nakomai, Iriirai—Ibukiia Aomata n Tatabemaniia ao Utu: 2020
Rairakin Aramwa te Ataei, iroun Gary L. Kapp
Meei 18—-24
Motiaea 25-28
“A aranaki bwa ana botanaomata te Atua”
Imwina “bwanaan te Uea e roko nakon [Aramwa],” e koroi bwaai ake e tuangaki iroun te Uea “bwa e aonga ni iai irouna” (Motiaea 26:13, 33). Ko na kanga n tou mwiin ana banna ni katooto Aramwa?
Korea Am Namakin
E kaania teniua te rooro imwin maenakoia ni maeka n abaia, te naan Nibwaite ao a manga katiteuanaaki n riki bwa kurubu n aomata ae ti teuana. Ana botanaomata Rimwaai, ana botanaomata Aramwa, ao ana botanaomata Motiaea—riki ana botanaomata Taraemera, ake aki riki mairoun Nibwaai—ngkai ni kabane “a warekaki ma Nibwaite” (Motiaea 25:13). Mai buakoia aika mwaiti a tangiria ni kan riki bwa membwa n te Ekaretia are e a tia Aramwa ni kateia. Ngaia ni kabane bon koraki ake “a tauraoi ni katoka iaoia aran Kristo” a bwabetitoaki, “ao a aranaki bwa a na botananomata te Atua” (Motiaea 25:23–24). Imwin ririki aika bati ni mangaongao ao n tautoronaki, e taraa n ae ti te naan Nibwaite aika a roko ni kukureiia ao man rau.
Ma imwain anne, taan aki kakoaua a moana bwainikirinakiia Aika Itiaki. Tera ae karika karawawataan te nano riki bwa a mwaiti te rooro ake aki kakoaua riki bon oin natiia naake taan kakoaua—te “rooro ae rikirake” (Motiaea 26:1), n ikotaki ma natin Motiaea mwaane ao temanna natin Aramwa temwaane. Ngkanne iai te kakai ae riki, ao te kakai aio bon rongorongon te kantaninga nakoia kaaro ake a nanobuaka ibukin te rooro. Man karakinan rairakin Aramwa nakon te ekaretia tiaki ibukiia ana karo ma bon mai irouna. Te rairaki ni koaua bon te kakai are, inanon te kawai teuana ke teuana, e kainnanoa rikina iroura ni kabane.
Iango ibukin te Kamatebwai I Bon Iroum ni Koroboki aika Tabu
Bon tabeu ibukin oin au onimaki ao au kakoaua.
Koraki ake a ongo ana kabwarabwara te Uea ae Beniamina a karekea te taneiai n te rairaki ae kamimi (taraa Motiaea 5:1–7), ma te rairaki bon nakon oin am taneiai i bon iroum are e aki konaa ni bwaatinaki kanga ai aron te kaubwai nakoia naati. Ti riai ni kabane ni karekea ara taneiai n oin rairakira nakon ana euangkerio Iesu Kristo. Ngkana ko wareware n Motiaea 26:1–6 taekan “rikiraken te rooro” Nibwaite ake aki kakoaua, a ataa te kaangaanga man aia aki kakoaua. Ko riai n iangoi naba taekaia aomata ake ko tangiriia ni uotiia nakon Kristo. Ngkana ko aki kona n tuangia aron rairakim, te Tamnei e na wirikirikini bwaai nakoim ko na karaoa buokaia ni kakaea te onimaki. Ngkana ko wareware ni Motiaea 25–28 taekan bwa e kanga Aramwa ao tabeman membwa n te Ekaretia ni buokiia te rooro ae rikirake, a mwaiti kantaninga ake ana roko iroum.
Taraa naba Reirei ao Berita aika Tabu 68:25–29.
Ana toro aika kakaonimaki te Atua a ukoukora karaoan Ana kantaninga.
N tabetai ti na iangoia bwa te tia kairiiri n te Ekaretia n aron Aramwa e atai n taainako bwaai aika eti aika a riai ni karaoaki. Ni Motiaea 26 ti wareka te kaangaanga inanon te Ekaretia are Aramwa e aki kona ni katokia, ao “e maaku bwa rimwi e karaoa te kaairua imatan te Atua” (Motiaea 26:13). Tera ae karaoia Aramwa n te kaangaanga aei? (taraa Motiaea 26:13–14, 33–34, 38–39). Tera ana taneiai Aramwa are kaotia n taekana bwa ko na kanga n taobarai kaangaanga inanon ami utu ke am mwakuri n te Ekaretia?
E na nang kakaongora naba ngkana a koreaki koaua are e kaotia te Atua nakon Aramwa, e kuneaki ni Motiaea 26:15–32. Kinaa bwa tabeua man koaua aikai aki ineti kaekaaia nakon ana titiraki Aramwa. Tera aron te kaoti aei nakoim n taekan te tataro ao karekean kaotioti n onoti nakoim?
Ni kabane mwaane ao aine a na manga bungiaki kaua.
E bon ootara bwa Aramwa te Teei e kainnanoa te manga bungiaki n te tamnei, ibukina bwa Ngaia ma natin Motiaea mwaane bon “ kabanean buakakaia taan bure,” ake a kataia “ni kamauna ana ekaretia te Atua” (Motiaea 28:4; 27:10). Ma ni waekoan mwiin rairakina, Aramwa e kakoaua bwa te rairaki e bon reke—ao e riai—ibukiia ni kabane aomata: “Tai miimi,” e taku, “bwa ni kabane aomata … a na bane ni manga bungiaki” (Motiaea 27:25; e kairaki te italic). Anne, eng, n ikotaki ma ngkoe.
Ngkana ko wareka taekan ana taneiai Aramwa, e kuneaki ni Motiaea 27:8–37, ko riai ni kataia bwa ngkoe ko riai ni mena n ana tabo. Ti aki ngkoe te tia kamauna te ekaretia, ma ko kona ni iangoi raoi bwaai ibukim are ko kainnanoa te bitaki. Ai antai ae ko na n riki n, ai aron taman Aramwa, e boutokaiko ao n tataro ibukim “ma te onimaki ae bati”? Tera taneiai aika a tia ni ibuobuoki “ni kaota [nakoim] mwaakan ao korakoran te Atua”? (Motiaea 27:14). Tera “bwaai aika moan te korakora” are e a tia te Uea ni karaoia ibukim ke am utu are ko riai n “uringnga”? (Motiaea 27:16). Tera ko reiakinna mairoun Aramwa te Teei n ana taeka ao ana mwakuri bwa tera nanon te manga bungiaki? Titiraki n aron aikai e na ko na ni buokiko n tarai rikirakem inanon waakin te manga bungiaki.
Taraa naba Motiaea 5:6–9; Aramwa 36; “Rairaki” (Atuun te Euangkerio, topics.ChurchofJesusChrist.org).
E kimwareirei Tamana, iroun Walter Rane
Te Atua e ongo au tataro ao e na kaekai nakon Ana kantaninga.
Tao ko na kina te karo ae Aramwa te Unimwaane, n aroaroia natina te mwaane ke natina te aine ake a karaoi oin aia rinerine ae buakaka. Ke tao ngkoe ae ko mena n te aroaro anne. Tera ae ko kunea ni Motiaea 27:14, 19–24 are e a anganiko te kantaninga? E kanga kiibu aikai ni kairi nanon am tataro n tei ibukiia tabeman?
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Motiaea 25:5–11
E kanga aia namakin ana botanaomata Motiaea imwina ngke e wareka nakoia ana rekooti ana botonaomata Tinebi ao ana botanaomata Aramwa? A tia am utu ni kawakin te naan rekooti ake ko kona ni wareware mai iai? Tao ko kona n reitia nakon am rekooti ke moanna ni kawakin bon mairoum. Tera ae ko na karini are e na buoka am utu (n ikotaki ma rooro aika ana roko) ni “kaonaki ma te kimwareireiae moan te bati” ao n reiakin taekan “raoiroin te Atua naba ngkai”? (Motiaea 25:8, 10).
Motiaea 25:16
Bukin tera e rangi ni kakawaki irouia ana botanaomata Rimwaai bwa a na uringnga bwa te Uea e a tia ni kaotinakoia man te tautoronaki? Tera e a tia ni karaoia te Uea ibukira bwa ti na riai ni ururinga?
Motiaea 26:29–31; 27:35
Ni kaineti nakon kiibu aikai, tera ae riai ni karaoia te aomata bwa e na karekea irouna te kabwara bure?
Motiaea 27:21–24
Ngkana ko wareki kiibu aikai, bairea temanna man am utu bwa e na kona n tataro ao n aki mamatam ibukina.
Motiaea 27–28
Ni buokiia am utu ni katamneia rongorongo inanon mwakoro aikai, ko riai ni kaoiia bwa a na korea tamneiia aomata ake a irekereke ao kabonganai tamnei ni manga karakina riki te karaki. Ke a na rangi ni kukurei ngkana ko karaoa te kaotioti ibukin te karaki, a na kanga ni katamneia te bitaki n aia taneiai Aramwa ao natin Motiaea mwaane?
Ibukin riki iango ibukin reiakinaia ataei, taraa te kabwarabwara n te wiiki aei i nanon Nakomai, iriirai—Ibukin te Moanrinan.
Kanakoraoan Ara Anga reirei
Kabonganai tamnei. “Te Boki n Tamnei n te Euangkerio ao te LDS Media Library iaon ChurchofJesusChrist.org karekei mwaitin tamnei ao witeo are e na buoka [am utu] kaururingi reirei ke taai aika a riki” (Reirei n Ana Kawai te Tia Kamaiu, 22).
Kamataata n tamnein te anera ae kaoti nakon Aramwa te Teei iroun Kevin Keele