“ວັນທີ 4–10 ເດືອນພຶດສະພາ. ໂມໄຊຢາ 11–17: ‘ແສງສະຫວ່າງ … ຈະບໍ່ມີຄວາມມືດເລີຍ,’” ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 4–10 ເດືອນພຶດສະພາ. ໂມໄຊຢາ 11–17,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Abinadi before King Noah [ອະບີນາໄດຢູ່ຕໍ່ໜ້າກະສັດໂນອາ], ໂດຍ ແອນດຣູ ໂບສ໌ລີ
ວັນທີ 4–10 ເດືອນພຶດສະພາ
ໂມໄຊຢາ 11–17
“ແສງສະຫວ່າງ … ຈະບໍ່ມີຄວາມມືດເລີຍ”
ຖ້ອຍຄຳຂອງອະບີນາໄດເຮັດໃຫ້ເກີດການປ່ຽນແປງອັນໃຫຍ່ຫລວງ ຢ່າງໜ້ອຍຕໍ່ຜູ້ໜຶ່ງຢູ່ໃນສານຂອງກະສັດໂນອາ (ເບິ່ງ ໂມໄຊຢາ 17:2–4). ໃຫ້ອ່ານ ໂມໄຊຢາ 11–17 ດ້ວຍການອະທິຖານຢູ່ໃນໃຈ ເພື່ອວ່າທ່ານຈະໄດ້ຮັບຄວາມປະທັບໃຈກ່ຽວກັບວິທີທີ່ທ່ານສາມາດປ່ຽນແປງ.
ບັນທຶກຄວາມປະທັບໃຈຂອງທ່ານ
ໄຟທີ່ລຸກລາມສາມາດເກີດຈາກເຊື້ອໄຟພຽງເມັດດຽວ. ອະບີນາໄດເປັນພຽງຄົນດຽວທີ່ໄດ້ເປັນພະຍານຕໍ່ຕ້ານກະສັດທີ່ມີອິດທິພົນ ແລະ ສານຂອງເພິ່ນ. ພາກສ່ວນໃຫຍ່ຂອງຖ້ອຍຄຳຂອງເພິ່ນໄດ້ຖືກປະຕິເສດ, ແລະ ເພິ່ນໄດ້ຖືກສັ່ງປະຫານ. ແຕ່ປະຈັກພະຍານຂອງເພິ່ນເຖິງພຣະເຢຊູຄຣິດ, ຜູ້ຊຶ່ງເປັນ “ແສງສະຫວ່າງ … ຈະບໍ່ມີຄວາມມືດເລີຍ” (ໂມໄຊຢາ 16:9), ໄດ້ມີອິດທິພົນຕໍ່ປະໂລຫິດໜຸ່ມຄົນໜຶ່ງຊື່ ແອວມາ. ແລະ ການປ່ຽນໃຈເຫລື້ອມໃສອັນເລັກນ້ອຍນັ້ນ ໄດ້ເລີ່ມຕົ້ນເຕີບໂຕຂຶ້ນ ຂະນະທີ່ແອວມາໄດ້ນຳຫລາຍຄົນມາສູ່ການກັບໃຈ ແລະ ມີສັດທາໃນພຣະເຢຊູຄຣິດ. ແປວໄຟທີ່ໄດ້ຂ້າອະບີນາໄດ ໄດ້ດັບມອດໄປແລ້ວ, ແຕ່ແປວໄຟແຫ່ງສັດທາທີ່ຖ້ອຍຄຳຂອງເພິ່ນໄດ້ກໍ່ສ້າງໄວ້ ຈະມີອິດທິພົນຕະຫລອດໄປຕໍ່ຊາວນີໄຟ—ແລະ ຕໍ່ຜູ້ທີ່ອ່ານຖ້ອຍຄຳຂອງເພິ່ນ ໃນທຸກວັນນີ້. ເຮົາສ່ວນຫລາຍຈະບໍ່ເຄີຍປະເຊີນໜ້າກັບສິ່ງທີ່ອະບີນາໄດໄດ້ປະເຊີນ ເພາະປະຈັກພະຍານຂອງເຮົາ, ແຕ່ກໍມີເວລາໃດເວລາໜຶ່ງ ທີ່ເຮົາຖືກທົດສອບເລື່ອງຄວາມກ້າຫານ ແລະ ສັດທາ ເພາະການຕິດຕາມພຣະເຢຊູຄຣິດ. ບາງທີການສຶກສາປະຈັກພະຍານຂອງອະບີນາໄດ ຈະເຮັດໃຫ້ເຮົາມີປະຈັກພະຍານ ແລະ ມີຄວາມກ້າຫານຫລາຍກວ່າເກົ່າຄືກັນ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຮົາສາມາດຢືນເປັນພະຍານເຖິງຄວາມຈິງ, ເຖິງແມ່ນວ່າເຮົາຈະຢືນຢູ່ຄົນດຽວກໍຕາມ.
ໃຫ້ຄິດເບິ່ງວ່າ ມັນຄົງເປັນສິ່ງທໍ້ຖອຍໃຈຫລາຍຂະໜາດໃດສຳລັບອະບີນາໄດ ທີ່ຈະເອີ້ນປ່າວການກັບໃຈ ຕໍ່ຜູ້ຄົນທີ່ເບິ່ງຄືວ່າ ບໍ່ສົນໃຈເລີຍກັບການປ່ຽນແປງການດຳລົງຊີວິດໃນທາງທີ່ຊົ່ວຮ້າຍຂອງພວກເຂົາ. ຂ່າວສານຂອງເພິ່ນຖືກປະຕິເສດເທື່ອແລ້ວເທື່ອອີກ. ແຕ່ອະບີນາໄດບໍ່ເຄີຍຍົກເລີກ.
ເມື່ອໃດທີ່ທ່ານເຄີຍຮູ້ສຶກວ່າ ທ່ານຢືນຢູ່ຄົນດຽວໃນການປົກປ້ອງຄວາມຈິງ? ຂະນະທີ່ທ່ານອ່ານ ໂມໄຊຢາ 11–13 ແລະ 17, ທ່ານຮຽນຮູ້ຫຍັງແດ່ ທີ່ສາມາດຊ່ວຍທ່ານກຽມພ້ອມເມື່ອພຣະຜູ້ເປັນເຈົ້າຕ້ອງການໃຫ້ທ່ານຢືນຂຶ້ນປົກປ້ອງພຣະກິດຕິຄຸນຂອງພຣະອົງ? ຫລັກທຳອື່ນໃດແດ່ທີ່ທ່ານໄດ້ຮຽນຮູ້ຈາກຕົວຢ່າງຂອງອະບີນາໄດ?
ເຮົາຕ້ອງຕັ້ງໃຈເພື່ອຈະເຂົ້າໃຈພຣະຄຳຂອງພຣະເຈົ້າ.
ພວກປະໂລຫິດຂອງກະສັດໂນອາ ກໍຮູ້ຈັກພຣະຄຳຂອງພຣະເຈົ້າດີ—ພວກເຂົາສາມາດອ້າງເຖິງຂໍ້ຄວາມຢູ່ໃນພຣະຄຳພີ ແລະ ອ້າງວ່າໄດ້ສິດສອນພຣະບັນຍັດ. ແຕ່ພຣະບັນຍັດເຫລົ່ານັ້ນ “ບໍ່ມີຂຽນໄວ້ໃນໃຈຂອງ [ພວກເຂົາ],” ແລະ “[ພວກເຂົາ] ບໍ່ໄດ້ຕັ້ງໃຈເພື່ອໃຫ້ເຂົ້າໃຈເລີຍ” (ໂມໄຊຢາ 13:11; 12:27). ດ້ວຍເຫດນີ້, ຊີວິດຂອງພວກເຂົາຈຶ່ງບໍ່ມີການປ່ຽນແປງ.
ຂະນະທີ່ທ່ານອ່ານ ໂມໄຊຢາ 12:19–30, ໃຫ້ໄຕ່ຕອງກ່ຽວກັບວ່າ ການຕັ້ງໃຈເພື່ອໃຫ້ເຂົ້າໃຈພຣະຄຳຂອງພຣະເຈົ້າ ໝາຍຄວາມວ່າແນວໃດ. ສິ່ງນີ້ໄດ້ດົນໃຈທ່ານໃຫ້ປ່ຽນແປງຫລືບໍ່ ໃນວິທີທີ່ທ່ານມີສ່ວນຮ່ວມໃນການຮຽນຮູ້ພຣະກິດຕິຄຸນ?
ພຣະຜູ້ເປັນເຈົ້າຈະສະໜັບສະໜູນຜູ້ຮັບໃຊ້ຂອງພຣະອົງ ໃນວຽກງານຂອງພຣະອົງ.
ຕາມຈິງແລ້ວ, ປະສົບການຂອງອະບີນາໄດ ໄດ້ສະແດງໃຫ້ເຫັນຫລາຍຕົວຢ່າງເຖິງວິທີທີ່ພຣະຜູ້ເປັນເຈົ້າສະໜັບສະໜູນຜູ້ຮັບໃຊ້ຂອງພຣະອົງ—ທ່ານສາມາດພົບເຫັນຫລາຍໆຕົວຢ່າງເຊັ່ນນັ້ນ ຢູ່ໃນ ໂມໄຊຢາ 13:1–9. ກົງກັນຂ້າມ, ພຣະຜູ້ເປັນເຈົ້າໄດ້ປ່ອຍໃຫ້ອະບີນາໄດຖືກຂົ່ມເຫັງ, ຖືກຈັບເຂົ້າຄຸກ, ແລະ ຖືກຂ້າເພາະປະຈັກພະຍານຂອງເພິ່ນ. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ເປີດເຜີຍວ່າອະບີນາໄດໄວ້ວາງໃຈໃນພຣະຜູ້ເປັນເຈົ້າ? ຕົວຢ່າງຂອງອະບີນາໄດເປັນຜົນກະທົບຕໍ່ວິທີທີ່ທ່ານຄິດກ່ຽວກັບການເອີ້ນ ແລະ ໜ້າທີ່ຮັບຜິດຊອບຂອງທ່ານແນວໃດ?
ພຣະເຢຊູຄຣິດໄດ້ຮັບທຸກທໍລະມານເພື່ອເຮົາ.
ກະສັດໂນອາ ແລະ ພວກປະໂລຫິດຂອງເພິ່ນເຊື່ອວ່າ ຄວາມລອດມີມາຜ່ານທາງກົດຂອງໂມເຊ. ອະບີນາໄດຢາກໃຫ້ພວກເຂົາຮູ້ວ່າ ຄວາມລອດມີມາຜ່ານທາງພຣະເມຊີອາ, ພຣະເຢຊູຄຣິດ. ຢູ່ໃນ ໂມໄຊຢາ 14–15, ໃຫ້ສັງເກດເບິ່ງຖ້ອຍຄຳ ແລະ ສຳນວນທີ່ບັນຍາຍກ່ຽວກັບພຣະຜູ້ຊ່ວຍໃຫ້ລອດ ແລະ ສິ່ງທີ່ພຣະອົງໄດ້ຮັບທຸກທໍລະມານເພື່ອທ່ານ. ຂໍ້ໃດແດ່ທີ່ຊ່ວຍທ່ານໃຫ້ມີຄວາມຮັກ ແລະ ຄວາມຮູ້ບຸນຄຸນຫລາຍກວ່າເກົ່າຕໍ່ພຣະອົງ?
ພຣະເຢຊູຄຣິດເປັນທັງພຣະບິດາ ແລະ ພຣະບຸດແນວໃດ?
ຂໍ້ຄວາມເຫລົ່ານີ້ ບາງເທື່ອກໍສັບສົນ ເພາະເບິ່ງຄືວ່າ ອະບີນາໄດ ໄດ້ສອນວ່າ ພຣະບິດາເທິງສະຫວັນ ແລະ ພຣະເຢຊູຄຣິດ ເປັນອົງດຽວກັນ, ແຕ່ເຮົາຮູ້ວ່າ ພວກພຣະອົງເປັນຕົວຂອງໃຜລາວ. ອະບີນາໄດໝາຍເຖິງຫຍັງ? ເພິ່ນໄດ້ສິດສອນວ່າ ພຣະເຈົ້າອົງເປັນພຣະບຸດ—ພຣະເຢໂຮວາ—ຈະເປັນພຣະຜູ້ໄຖ່ (ເບິ່ງ ໂມໄຊຢາ 15:1), ຢູ່ໃນເນື້ອໜັງ, ເຄິ່ງມະນຸດ ແລະ ເຄິ່ງພຣະເຈົ້າ (ຂໍ້ທີ 2–3). ພຣະອົງໄດ້ຍິນຍອມຕໍ່ພຣະປະສົງຂອງພຣະເຈົ້າອົງເປັນພຣະບິດາທັງໝົດ (ຂໍ້ທີ 5–9). ເພາະສິ່ງນີ້, ພຣະເຢຊູຄຣິດຈຶ່ງໄດ້ເປັນທັງພຣະບຸດຂອງພຣະເຈົ້າ ແລະ ເປັນຕົວແທນໃຫ້ແກ່ພຣະເຈົ້າອົງເປັນພຣະບິດາຢູ່ໃນໂລກ (ເບິ່ງ ໂຢຮັນ 14:6–10).
ອະບີນາໄດສືບຕໍ່ອະທິບາຍວ່າ ພຣະເຢຊູຄຣິດກໍຍັງເປັນພຣະບິດານຳອີກ ໃນຄວາມໝາຍທີ່ວ່າ ເມື່ອເຮົາຮັບເອົາການໄຖ່ຂອງພຣະອົງ, ເຮົາກໍກາຍເປັນ “ລູກຫລານຂອງພຣະອົງ” (ໂມໄຊຢາ 15:11–12). ໃນອີກຄຳໜຶ່ງ, ເຮົາໄດ້ເກີດໃໝ່ທາງວິນຍານຜ່ານທາງພຣະອົງ (ເບິ່ງ ໂມໄຊຢາ 5:7).
ເບິ່ງ ໂຢຮັນ 5:25–27; 8:28–29; 17:20–23; “The Father and the Son,” Ensign, Apr. 2002, 12–18 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ໂມໄຊຢາ 11–13; 17
ອະບີນາໄດ ແລະ ແອວມາ ເປັນຕົວຢ່າງທີ່ດົນໃຈ ເຖິງຄວາມຈົງຮັກພັກດີຕໍ່ຄວາມຈິງຢູ່ຕໍ່ໄປ ເຖິງແມ່ນການເຮັດເຊັ່ນນັ້ນ ບໍ່ເປັນທີ່ນິຍົມກໍຕາມ. ສະມາຊິກໃນຄອບຄົວຂອງທ່ານອາດຖືກສັງຄົມກົດດັນ ເພື່ອໃຫ້ລົດມາດຕະຖານຂອງເຂົາເຈົ້າລົງ. ເຂົາເຈົ້າຮຽນຮູ້ຫຍັງແດ່ຈາກອະບີນາໄດ ແລະ ແອວມາ ກ່ຽວກັບການປົກປ້ອງຄວາມຈິງ? ຮູບພາບທີ່ມາກັບໂຄງຮ່າງນີ້ສາມາດຊ່ວຍຄອບຄົວທ່ານໃຫ້ວາດພາບເຫັນເລື່ອງລາວໄດ້. ຫລັງຈາກໄດ້ສຶກສາບົດເຫລົ່ານີ້ແລ້ວ, ໃຫ້ຄິດທີ່ຈະຫລິ້ນລະຄອນກ້ອມ ກ່ຽວກັບສິ່ງທີ່ເກີດຂຶ້ນໃນຊີວິດຈິງ ເພື່ອວ່າສະມາຊິກໃນຄອບຄົວຂອງທ່ານຈະສາມາດເຝິກຝົນການຕອບຮັບຕໍ່ຄວາມກົດດັນ ເພື່ອໃຫ້ລົດມາດຕະຖານຂອງເຂົາເຈົ້າລົງ. ຫລື ພວກທ່ານສາມາດເລົ່າປະສົບການໃຫ້ກັນຟັງ ເຖິງຕອນທີ່ພວກທ່ານໄດ້ປົກປ້ອງຄວາມຈິງ.
ໂມໄຊຢາ 12:33–37; 13:11–24
ຄຳວ່າ ມີພຣະບັນຍັດຂອງພຣະເຈົ້າ “ຂຽນໄວ້ໃນໃຈ [ຂອງເຮົາ]” ໝາຍຄວາມວ່າແນວໃດ? (ໂມໄຊຢາ 13:11). ບາງທີພວກທ່ານຄວນຂຽນບາງສິ່ງ (ຫລື ແຕ້ມຮູບຕາມຄວາມຄິດຂອງພວກທ່ານ) ໃສ່ໃນຮູບຫົວໃຈໃຫຍ່ຢູ່ໃນເຈ້ຍ. ພຣະບັນຍັດຂໍ້ໃດທີ່ມີຄ່າຫລາຍຕໍ່ເຮົາ? ເຮົາຈະຂຽນມັນໄວ້ໃນໃຈຂອງເຮົາແນວໃດ?
ການສຶກສາພຣະຄຳພີສາມາດຊ່ວຍເຮົາໃຫ້ຂຽນພຣະບັນຍັດໄວ້ໃນໃຈຂອງເຮົາ.
ໂມໄຊຢາ 14
ຢູ່ໃນບົດນີ້ ທ່ານຈະພົບເຫັນຄຳສັບ ແລະ ສຳນວນຫລາຍອັນ ທີ່ບັນຍາຍກ່ຽວກັບພຣະເຢຊູຄຣິດ. ບາງທີຄອບຄົວຂອງທ່ານສາມາດຂຽນຂໍ້ຄວາມເຫລົ່ານັ້ນໄວ້ ເມື່ອພວກທ່ານພົບເຫັນມັນ. ສະມາຊິກໃນຄອບຄົວຂອງທ່ານຮູ້ສຶກແນວໃດກ່ຽວກັບພຣະຜູ້ຊ່ວຍໃຫ້ລອດ ຂະນະທີ່ເຮົາສຶກສາຖ້ອຍຄຳ ແລະ ສຳນວນເຫລົ່ານີ້?
ໂມໄຊຢາ 15:26–27; 16:1–13
ຂໍ້ເຫລົ່ານີ້ບັນຍາຍເຖິງສິ່ງທີ່ຈະເກີດຂຶ້ນກັບລູກໆຂອງພຣະເຈົ້າ ຖ້າຫາກພຣະເຢຊູ “ບໍ່ໄດ້ສະເດັດມາຍັງແຜ່ນດິນໂລກ” (ໂມໄຊຢາ 16:6) ຫລື ຖ້າຫາກພວກເຂົາບໍ່ຕິດຕາມພຣະອົງ. ສິ່ງທີ່ດີຢ່າງໃດແດ່ຈະເກີດຂຶ້ນ ເພາະພຣະອົງໄດ້ສະເດັດມາ ແລະ ໄດ້ຊົດໃຊ້ເພື່ອເຮົາ? ໃຫ້ເບິ່ງວິດີໂອ “Why We Need a Savior” (ChurchofJesusChrist.org) ນຳອີກ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ໃຊ້ເລື່ອງເລົ່າ ແລະ ຕົວຢ່າງເພື່ອສິດສອນຫລັກທຳພຣະກິດຕິຄຸນ. ພຣະຜູ້ຊ່ວຍໃຫ້ລອດມັກສິດສອນຫລັກທຳພຣະກິດຕິຄຸນ ໂດຍການໃຊ້ເລື່ອງເລົ່າ ແລະ ຄຳອຸປະມາ. ໃຫ້ຄິດຫາຕົວຢ່າງ ແລະ ເລື່ອງເລົ່າຈາກປະສົບການຂອງທ່ານເອງ ທີ່ສາມາດເຮັດໃຫ້ຫລັກທຳພຣະກິດຕິຄຸນເກີດເປັນຕົວເປັນຕົນ ສຳລັບຄອບຄົວຂອງທ່ານ (ເບິ່ງ Teaching in the Savior’s Way, 22).
His Face Shone with Exceeding Luster [ໃບໜ້າຂອງເພິ່ນສົ່ງແສງສະຫວ່າງອອກມາດ້ວຍລັດສະໝີ], ໂດຍ ແຈຣາມີ ວິນບອກ