“ວັນທີ 18–24 ເດືອນພຶດສະພາ. ໂມໄຊຢາ 25–28: ‘ພວກເຂົາຖືກເອີ້ນວ່າຜູ້ຄົນຂອງພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 18–24 ເດືອນພຶດສະພາ. ໂມໄຊຢາ 25–28,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Conversion of Alma the Younger [ການປ່ຽນໃຈເຫລື້ອມໃສຂອງແອວມາຜູ້ເປັນລູກ], ໂດຍ ແກຣີ ແອວ ແຄບ
ວັນທີ 18–24 ເດືອນພຶດສະພາ
ໂມໄຊຢາ 25–28
“ພວກເຂົາຖືກເອີ້ນວ່າຜູ້ຄົນຂອງພຣະເຈົ້າ”
ຫລັງຈາກ “ສຸລະສຽງຂອງພຣະຜູ້ເປັນເຈົ້າໄດ້ມາເຖິງ [ແອວມາ],” ເພິ່ນໄດ້ຂຽນສິ່ງທີ່ພຣະຜູ້ເປັນເຈົ້າໄດ້ບອກເພິ່ນ “ເພື່ອເພິ່ນຈະມີມັນ” (ໂມໄຊຢາ 26:14, 33). ທ່ານຈະເຮັດຕາມຕົວຢ່າງຂອງແອວມາແນວໃດ?
ບັນທຶກຄວາມປະທັບໃຈຂອງທ່ານ
ຫລັງຈາກເກືອບເຖິງສາມລຸ້ນຄົນຂອງການອາໄສຢູ່ໃນຕ່າງແຜ່ນດິນ, ແລ້ວຊາວນີໄຟກໍໄດ້ລວມເຂົ້າເປັນຜູ້ຄົນດຽວກັນອີກ. ຜູ້ຄົນຂອງລິມໄຮ, ຜູ້ຄົນຂອງແອວມາ, ແລະ ຜູ້ຄົນຂອງໂມໄຊຢາ—ແມ່ນແຕ່ຜູ້ຄົນຂອງເຊຣາເຮັມລາ, ຜູ້ບໍ່ໄດ້ເປັນທາຍາດຂອງນີໄຟ—ບັດນີ້ ທຸກຄົນຖືກ “ນັບເຂົ້າຢູ່ກັບຊາວນີໄຟ” (ໂມໄຊຢາ 25:13). ພວກເຂົາຫລາຍຄົນກໍຢາກກາຍເປັນສະມາຊິກຂອງສາດສະໜາຈັກທີ່ແອວມາໄດ້ສະຖາປະນາຂຶ້ນນຳອີກ. ສະນັ້ນ ທຸກຄົນທີ່ “ປາດຖະໜາທີ່ຈະຮັບເອົາພຣະນາມຂອງພຣະຄຣິດ” ຈຶ່ງໄດ້ຮັບບັບຕິສະມາ, “ແລະ ພວກເຂົາຖືກເອີ້ນວ່າຜູ້ຄົນຂອງພຣະເຈົ້າ” (ໂມໄຊຢາ 25:23–24). ຫລັງຈາກຫລາຍປີຂອງການຂັດແຍ້ງ ແລະ ການເປັນຊະເລີຍ, ເບິ່ງຄືວ່າໃນທີ່ສຸດ ຊາວນີໄຟຈະໄດ້ຊື່ນຊົມກັບຄວາມສະຫງົບສຸກ.
ແຕ່ບໍ່ດົນ, ຜູ້ທີ່ບໍ່ເຊື່ອກໍເລີ່ມຕົ້ນຂົ່ມເຫັງໄພ່ພົນ. ສິ່ງທີ່ເຮັດໃຫ້ເຈັບປວດໃຈຫລາຍໂດຍສະເພາະແມ່ນວ່າ ຜູ້ທີ່ບໍ່ເຊື່ອເຫລົ່ານີ້ ແມ່ນລູກຂອງຜູ້ທີ່ເຊື່ອນັ້ນເອງ—ພວກ “ຄົນລຸ້ນໃໝ່” (ໂມໄຊຢາ 26:1), ລວມທັງພວກລູກຊາຍຂອງໂມໄຊຢາ ແລະ ລູກຊາຍຄົນໜຶ່ງຂອງແອວມາ. ແລ້ວສິ່ງມະຫັດສະຈັນໄດ້ເກີດຂຶ້ນ, ເລື່ອງລາວຂອງການມະຫັດສະຈັນນັ້ນໄດ້ໃຫ້ຄວາມຫວັງແກ່ພໍ່ຜູ້ທີ່ເຈັບປວດໃຈມາຫລາຍລຸ້ນຄົນ. ແຕ່ເລື່ອງລາວຂອງການປ່ຽນໃຈເຫລື້ອມໃສຂອງແອວມາ ບໍ່ແມ່ນພຽງແຕ່ສຳລັບພໍ່ແມ່ຂອງລູກ ທີ່ອອກນອກທາງເທົ່ານັ້ນ. ການປ່ຽນໃຈເຫລື້ອມໃສແມ່ນການມະຫັດສະຈັນທີ່, ບໍ່ວ່າໃນທາງໃດກໍທາງໜຶ່ງ, ຈຳເປັນຕ້ອງເກີດຂຶ້ນກັບເຮົາທຸກຄົນ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ເຮົາຮັບຜິດຊອບຕໍ່ສັດທາ ແລະ ປະຈັກພະຍານຂອງເຮົາເອງ.
ຜູ້ທີ່ໄດ້ຍິນຄຳເທດສະໜາຂອງກະສັດເບັນຢາມິນ ໄດ້ປະສົບກັບການປ່ຽນໃຈເຫລື້ອມໃສທີ່ມະຫັດສະຈັນ (ເບິ່ງ ໂມໄຊຢາ 5:1–7), ແຕ່ການປ່ຽນໃຈເຫລື້ອມໃສເປັນປະສົບການສ່ວນຕົວ ທີ່ບໍ່ສາມາດສົ່ງຕໍ່ໃຫ້ຄົນອື່ນ ຄືມູນມໍລະດົກທີ່ສົ່ງຕໍ່ໃຫ້ລູກໆຂອງບາງຄົນ. ເຮົາທຸກຄົນຈະຕ້ອງມີປະສົບການຂອງການປ່ຽນໃຈເຫລື້ອມໃສຂອງຕົວເອງ ຕໍ່ພຣະກິດຕິຄຸນຂອງພຣະເຢຊູຄຣິດ. ຂະນະທີ່ທ່ານອ່ານ ຢູ່ໃນ ໂມໄຊຢາ 26:1–6 ກ່ຽວກັບ “ຄົນລຸ້ນໃໝ່” ຂອງຊາວນີໄຟທີ່ບໍ່ເຊື່ອ, ໃຫ້ສັງເກດເບິ່ງຜົນສະທ້ອນຂອງຄວາມບໍ່ເຊື່ອຂອງພວກເຂົາ. ທ່ານອາດຄິດກ່ຽວກັບຜູ້ຄົນທີ່ທ່ານຢາກພາມາຫາພຣະຄຣິດນຳອີກ. ເຖິງແມ່ນວ່າທ່ານບໍ່ສາມາດມອບການປ່ຽນໃຈເຫລື້ອມໃສໃຫ້ເຂົາເຈົ້າ, ແຕ່ພຣະວິນຍານອາດບອກສິ່ງທີ່ທ່ານ ສາມາດ ເຮັດ ເພື່ອຊ່ວຍເຂົາເຈົ້າໃຫ້ພົບສັດທາ. ຂະນະທີ່ທ່ານອ່ານ ຢູ່ໃນ ໂມໄຊຢາ 25–28 ກ່ຽວກັບວິທີທີ່ແອວມາ ແລະ ສະມາຊິກຂອງສາດສະໜາຈັກຄົນອື່ນໆ ໄດ້ຊ່ວຍຄົນລຸ້ນໃໝ່, ແນວຄິດເພີ່ມເຕີມອາດມາສູ່ທ່ານ.
ເບິ່ງ ຄຳສອນ ແລະ ພັນທະສັນຍາ 68:25–29 ນຳອີກ.
ຜູ້ຮັບໃຊ້ທີ່ຊື່ສັດຂອງພຣະເຈົ້າ ຈະສະແຫວງຫາທີ່ຈະເຮັດຕາມພຣະປະສົງຂອງພຣະອົງ.
ບາງເທື່ອເຮົາອາດຄິດວ່າ ຜູ້ນຳຂອງສາດສະໜາຈັກເຊັ່ນ ແອວມາ ຈະເຮັດສິ່ງທີ່ຖືກຕ້ອງສະເໝີໄປ. ຢູ່ໃນ ໂມໄຊຢາ 26 ເຮົາອ່ານເຖິງບັນຫາຢູ່ໃນສາດສະໜາຈັກ ທີ່ແອວມາບໍ່ເຄີຍຈັດການມາກ່ອນ, ແລະ “ເພິ່ນຢ້ານວ່າເພິ່ນຈະເຮັດຜິດໃນສາຍພຣະເນດຂອງພຣະເຈົ້າ” (ໂມໄຊຢາ 26:13). ແອວມາໄດ້ເຮັດສິ່ງໃດ ໃນສະຖານະການເຊັ່ນນີ້? (ເບິ່ງ ໂມໄຊຢາ 26:13–14, 33–34, 38–39). ປະສົບການຂອງແອວມາ ແນະນຳສິ່ງໃດກ່ຽວກັບວິທີທີ່ທ່ານອາດເຂົ້າຫາບັນຫາທີ່ຫຍຸ້ງຍາກຢູ່ໃນຄອບຄົວຂອງທ່ານ ຫລື ໃນການຮັບໃຊ້ສາດສະໜາຈັກຂອງທ່ານ?
ມັນອາດເປັນສິ່ງທີ່ໜ້າສົນໃຈ ທີ່ຈະຂຽນຄວາມຈິງບາງຢ່າງທີ່ພຣະເຈົ້າໄດ້ເປີດເຜີຍຕໍ່ແອວມາ, ທີ່ພົບເຫັນຢູ່ໃນ ໂມໄຊຢາ 26:15–32. ໃຫ້ສັງເກດເບິ່ງ ຄວາມຈິງບາງຢ່າງເຫລົ່ານີ້ ບໍ່ໄດ້ຕອບຄຳຖາມຂອງແອວມາໂດຍກົງ. ສິ່ງນີ້ແນະນຳທ່ານແນວໃດ ກ່ຽວກັບການອະທິຖານ ແລະ ການຮັບການເປີດເຜີຍສ່ວນຕົວ?
ຊາຍ ແລະ ຍິງທຸກຄົນ ຈະຕ້ອງໄດ້ເກີດໃໝ່.
ເຫັນໄດ້ຢ່າງແຈ້ງຊັດວ່າ ແອວມາຜູ້ເປັນລູກ ຕ້ອງການ ການເກີດໃໝ່ທາງວິນຍານ, ເພາະເພິ່ນ ແລະ ພວກລູກຊາຍຂອງໂມໄຊຢາ “ເປັນຄົນຊົ່ວຮ້າຍແທ້ໆໃນຄົນບາບ,” ຜູ້ໄດ້ທ່ອງທ່ຽວໄປ “ເພື່ອທຳລາຍສາດສະໜາຈັກຂອງພຣະເຈົ້າ” (ໂມໄຊຢາ 28:4; 27:10). ແຕ່ບໍ່ດົນຫລັງຈາກການປ່ຽນໃຈເຫລື້ອມໃສຂອງເພິ່ນ, ແອວມາໄດ້ເປັນພະຍານວ່າ ການປ່ຽນໃຈເຫລື້ອມໃສແມ່ນມີໃຫ້—ແລະ ຈຳເປັນ—ຕໍ່ທຸກຄົນ: “ຢ່າໄດ້ແປກໃຈເລີຍ,” ເພິ່ນເວົ້າ, “ວ່າມະນຸດ ທັງປວງ … ຕ້ອງເກີດໃໝ່ເສຍກ່ອນ” (ໂມໄຊຢາ 27:25; ເນັ້ນຄຳເນີ້ງ). ສິ່ງນັ້ນ, ແນ່ນອນ, ແມ່ນລວມທັງຕົວທ່ານ.
ຂະນະທີ່ທ່ານອ່ານກ່ຽວກັບປະສົບການຂອງແອວມາ, ທີ່ພົບເຫັນຢູ່ໃນ ໂມໄຊຢາ 27:8–37, ທ່ານອາດພະຍາຍາມປຽບທຽບຕົວເອງໃສ່ກັບເພິ່ນ. ທ່ານບໍ່ໄດ້ພະຍາຍາມທຳລາຍສາດສະໜາຈັກ, ແຕ່ທ່ານສາມາດຄິດເຖິງສິ່ງທີ່ກ່ຽວກັບຕົວທ່ານເອງ ທີ່ຕ້ອງປ່ຽນ. ເຊັ່ນດຽວກັນກັບບິດາຂອງແອວມາ, ມີໃຜແດ່ທີ່ສະໜັບສະໜູນທ່ານ ແລະ ອະທິຖານເພື່ອທ່ານ “ດ້ວຍສັດທາຫລາຍ”? ປະສົບການໃດແດ່ທີ່ໄດ້ຊ່ວຍ “ເຮັດໃຫ້ [ທ່ານ] ສຳນຶກເຖິງ ອຳນາດ ແລະ ສິດອຳນາດຂອງພຣະເຈົ້າ”? (ໂມໄຊຢາ 27:14). “ສິ່ງຍິ່ງໃຫຍ່” ໃດແດ່ທີ່ພຣະຜູ້ເປັນເຈົ້າໄດ້ກະທຳເພື່ອທ່ານ ຫລື ຄອບຄົວຂອງທ່ານ ທີ່ທ່ານຄວນ “ຈື່ຈຳ”? (ໂມໄຊຢາ 27:16). ທ່ານຮຽນຮູ້ຫຍັງແດ່ຈາກຖ້ອຍຄຳ ແລະ ການກະທຳຂອງແອວມາຜູ້ເປັນລູກ ກ່ຽວກັບຄວາມໝາຍຂອງການເກີດໃໝ່? ຄຳຖາມເຊັ່ນນີ້ອາດຊ່ວຍທ່ານໃຫ້ປະເມີນຄວາມກ້າວໜ້າຂອງທ່ານ ໃນຂັ້ນຕອນຂອງການເກີດໃໝ່.
ເບິ່ງ ໂມໄຊຢາ 5:6–9; ແອວມາ 36 ນຳອີກ.
His Father Rejoiced [ບິດາຂອງເພິ່ນປິຕິຍິນດີ], ໂດຍ ວາວເຕີ ເຣນ
ພຣະເຈົ້າໄດ້ຍິນຄຳອະທິຖານຂອງເຮົາ ແລະ ຈະຕອບຄຳອະທິຖານເຫລົ່ານັ້ນອີງຕາມພຣະປະສົງຂອງພຣະອົງ.
ບາງທີທ່ານອາດຮູ້ຈັກພໍ່ ຫລື ແມ່ຄົນໃດຄົນໜຶ່ງ ທີ່ເປັນຄືກັນກັບແອວມາຜູ້ເປັນບິດາ, ທີ່ລູກຊາຍ ຫລື ລູກສາວໄດ້ເລືອກເຮັດສິ່ງທີ່ທຳລາຍ. ຫລື ທ່ານອາດເປັນພໍ່ ຫລື ແມ່ຄົນນັ້ນ. ທ່ານພົບເຫັນຫຍັງຢູ່ໃນ ໂມໄຊຢາ 27:14, 19–24 ທີ່ໃຫ້ຄວາມຫວັງແກ່ທ່ານ? ຂໍ້ເຫລົ່ານີ້ມີອິດທິພົນຕໍ່ຄຳອະທິຖານຂອງທ່ານ ເພື່ອຄົນອື່ນແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ໂມໄຊຢາ 25:5–11
ຜູ້ຄົນຂອງໂມໄຊຢາຮູ້ສຶກແນວໃດຫລັງຈາກທີ່ເພິ່ນໄດ້ອ່ານບັນທຶກຂອງຜູ້ຄົນຂອງຊີນິບ ແລະ ຜູ້ຄົນຂອງແອວມາໃຫ້ພວກເຂົາຟັງ? ຄອບຄົວຂອງທ່ານໄດ້ຮັກສາບັນທຶກໃດບໍ ທີ່ທ່ານສາມາດຫາອ່ານໄດ້? ບາງທີທ່ານສາມາດຕື່ມບັນທຶກຂອງທ່ານໃສ່ນຳ ຫລື ເລີ່ມຕົ້ນຂຽນບັນທຶກຂອງທ່ານເອງ. ທ່ານຈະລວມສິ່ງໃດໃສ່ໃນບັນທຶກ ທີ່ອາດຊ່ວຍຄອບຄົວຂອງທ່ານ (ລວມທັງຄົນລຸ້ນຫລັງ) ໃຫ້ “ເຕັມໄປດ້ວຍຄວາມຊື່ນຊົມຢ່າງລົ້ນເຫລືອ” ແລະ ຮຽນຮູ້ກ່ຽວກັບ “ພຣະກະລຸນາທິຄຸນທັນທີຂອງພຣະເຈົ້າ”? (ໂມໄຊຢາ 25:8, 10).
ໂມໄຊຢາ 25:16
ເປັນຫຍັງມັນຈຶ່ງສຳຄັນສຳລັບຜູ້ຄົນຂອງລິມໄຮ ທີ່ຈະຈື່ຈຳວ່າ ພຣະຜູ້ເປັນເຈົ້າໄດ້ປົດປ່ອຍພວກເຂົາອອກຈາກການເປັນຊະເລີຍ? ພຣະຜູ້ເປັນເຈົ້າໄດ້ເຮັດສິ່ງໃດເພື່ອເຮົາ ຊຶ່ງເຮົາຄວນຈື່ຈຳ?
ໂມໄຊຢາ 26:29–31; 27:35
ອີງຕາມຂໍ້ເຫລົ່ານີ້, ຜູ້ຄົນຄວນເຮັດສິ່ງໃດ ເພື່ອຈະໄດ້ຮັບການໃຫ້ອະໄພ?
ໂມໄຊຢາ 27:21–24
ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຄິດກ່ຽວກັບບາງຄົນຢູ່ໃນຄອບຄົວຂອງທ່ານ ທີ່ທ່ານສາມາດອະທິຖານ ແລະ ຖືສິນອົດເຂົ້າເພື່ອ.
ໂມໄຊຢາ 27–28
ເພື່ອຊ່ວຍຄອບຄົວຂອງທ່ານໃຫ້ສາມາດວາດພາບເລື່ອງລາວຢູ່ໃນບົດເຫລົ່ານີ້, ທ່ານຄວນເຊື້ອເຊີນເຂົາເຈົ້າໃຫ້ແຕ້ມຮູບກ່ຽວກັບຜູ້ຄົນທີ່ກ່ຽວຂ້ອງ ແລະ ໃຊ້ຮູບເຫລົ່ານັ້ນ ເພື່ອເລົ່າເລື່ອງ. ຫລື ເຂົາເຈົ້າອາດຢາກສະແດງຕາມເລື່ອງເລົ່າ; ເຂົາເຈົ້າຈະສະແດງເຖິງການປ່ຽນແປງທີ່ແອວມາ ແລະ ພວກລູກຊາຍຂອງໂມໄຊຢາໄດ້ປະສົບແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ໃຊ້ສິລະປະ. ປຶ້ມຮູບພຣະກິດຕິຄຸນ ແລະ ຫ້ອງສະໝຸດສື່ສານ ຢູ່ທີ່ ChurchofJesusChrist.org ບັນຈຸຮູບພາບ ແລະ ວິດີໂອຢ່າງຫລວງຫລາຍ ທີ່ສາມາດຊ່ວຍຄອບຄົວຂອງທ່ານໃຫ້ວາດພາບຄວາມຄິດ ຫລື ວາດພາບເຫດການໄດ້.
ຮູບພາບທູດປະກົດຕໍ່ແອວມາຜູ້ເປັນລູກ ໂດຍ ແຄວິນ ຂຽວ