“ວັນທີ 27 ເດືອນເມສາ–ວັນທີ 3 ເດືອນພຶດສະພາ. ໂມໄຊຢາ 7–10: ‘ໂດຍໄດ້ຮັບກຳລັງຈາກພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 27 ເດືອນເມສາ–ວັນທີ 3 ເດືອນພຶດສະພາ. ໂມໄຊຢາ 7–10,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ອຳໂມນສິດສອນກະສັດລິມໄຮ

ມິເນີວາ ເຄ ໄທເກີດ (1888-1976), Ammon before King Limhi [ອຳໂມນຢູ່ຕໍ່ໜ້າກະສັດລິມໄຮ], 1949-1951, ສີນ້ຳມັນ ເທິງແຜ່ນໄມ້ອັດ, 35 15/16 x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969.

ວັນທີ 27 ເດືອນເມສາ–ວັນທີ 3 ເດືອນພຶດສະພາ

ໂມໄຊຢາ 7–10

“ໂດຍໄດ້ຮັບກຳລັງຈາກພຣະຜູ້ເປັນເຈົ້າ”

ຂະນະທີ່ທ່ານອ່ານ, ພຣະວິນຍານຈະດົນໃຈທ່ານໃຫ້ສົນໃຈກັບສຳນວນ ຫລື ຂ່າວສານບາງຢ່າງ. ໃຫ້ຂຽນຄວາມຮູ້ສຶກຂອງທ່ານວ່າ ຂ່າວສານເຫລົ່ານັ້ນກ່ຽວຂ້ອງກັບທ່ານແນວໃດ.

ບັນທຶກຄວາມປະທັບໃຈຂອງທ່ານ

ຂະນະທີ່ຜູ້ຄົນຂອງກະສັດໂມໄຊຢາຊື່ນຊົມກັບ “ສັນຕິສຸກຕິດຕໍ່ກັນ” ຢູ່ໃນເມືອງເຊຣາເຮັມລາ (ໂມໄຊຢາ 7:1), ຄວາມຄິດຂອງເຂົາເຈົ້າໄດ້ຫັນໄປຫາຊາວນິໄຟອີກກຸ່ມໜຶ່ງ, ຜູ້ໄດ້ໜີໄປຫລາຍປີແລ້ວ ເພື່ອໄປຢູ່ໃນແຜ່ນດິນ ລີໄຮ-ນີໄຟ. ຫລາຍລຸ້ນຄົນໄດ້ຜ່ານໄປ, ແລະ ຜູ້ຄົນຂອງໂມໄຊຢາ ບໍ່ໄດ້ຍິນຫຍັງເລີຍຈາກພວກເຂົາ. ສະນັ້ນ ໂມໄຊຢາຈຶ່ງໄດ້ຂໍໃຫ້ອຳໂມນນຳພາກຸ່ມຄົ້ນຫາກຸ່ມໜຶ່ງ ເພື່ອໄປຊອກຫາຊາວນີໄຟຜູ້ທີ່ໄດ້ໜີໄປ. ກຸ່ມຄົ້ນຫາ ໄດ້ພົບເຫັນວ່າ ຊາວນີໄຟ, “ເພາະຄວາມຊົ່ວຮ້າຍ” (ໂມໄຊຢາ 7:24), ຊຶ່ງໄດ້ກາຍເປັນຊະເລີຍຂອງຊາວເລມັນ. ແຕ່ເມື່ອອຳໂມນ ແລະ ອ້າຍນ້ອງຂອງລາວໄດ້ໄປເຖິງ, ທັນໃດນັ້ນ ກໍມີຄວາມຫວັງທີ່ຈະໄດ້ຮັບການປົດປ່ອຍ.

ບາງເທື່ອເຮົາກໍເປັນເໝືອນດັ່ງຊາວນີໄຟທີ່ເປັນຊະເລີຍເຫລົ່ານີ້, ຮັບທຸກທໍລະມານເພາະບາບຂອງເຮົາ, ສົງໃສວ່າເມື່ອໃດເຮົາຈຶ່ງຈະມີສັນຕິສຸກຄືນອີກ. ບາງເທື່ອເຮົາກໍເປັນເໝືອນດັ່ງອຳໂມນ, ຮູ້ສຶກວ່າໄດ້ຖືກກະຕຸ້ນໃຫ້ເອື້ອມອອກໄປຫາຄົນອື່ນ ແລະ ໃນທີ່ສຸດພົບເຫັນວ່າຄວາມພະຍາຍາມຂອງເຮົາ ໄດ້ດົນໃຈເຂົາເຈົ້າໃຫ້ “ເງີຍໜ້າ [ຂອງເຂົາເຈົ້າ] ຂຶ້ນ, ແລະ ປິຕິຍິນດີ, ແລະ ໝັ້ນໃຈໃນພຣະເຈົ້າ” (ໂມໄຊຢາ 7:19). ບໍ່ວ່າສະຖານະການຂອງເຮົາຈະເປັນແນວໃດ, ເຮົາທຸກຄົນຕ້ອງກັບໃຈ ແລະ “ຫັນໜ້າມາຫາພຣະຜູ້ເປັນເຈົ້າດ້ວຍຈຸດປະສົງເຕັມທີ່ແຫ່ງໃຈ,” ດ້ວຍສັດທາ ວ່າ “ພຣະອົງຈະ … ປົດປ່ອຍ [ເຮົາ]” (ໂມໄຊຢາ 7:33).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂມໄຊຢາ 7:14–33

ຖ້າຫາກເຮົາຫັນມາຫາພຣະຜູ້ເປັນເຈົ້າ, ໝັ້ນໃຈໃນພຣະອົງ, ແລະ ຮັບໃຊ້ພຣະອົງ, ແລ້ວພຣະອົງຈະປົດປ່ອຍເຮົາ.

ການໄດ້ພົບກັບອຳໂມນ, ຜູ້ເປັນຊາວນີໄຟຈາກເມືອງເຊຣາເຮັມລາ, ໄດ້ເຮັດໃຫ້ກະສັດລິມໄຮມີຄວາມຫວັງ, ແລະ ເພິ່ນຢາກໃຫ້ຜູ້ຄົນຂອງເພິ່ນມີຄວາມຫວັງຄືກັນ. ຂະນະທີ່ທ່ານອ່ານ ໂມໄຊຢາ 7:14–33, ໃຫ້ສັງເກດເບິ່ງສິ່ງທີ່ກະສັດລິມໄຮໄດ້ກ່າວຕໍ່ຜູ້ຄົນຂອງເພິ່ນ ເພື່ອຊຸກຍູ້ພວກເຂົາ, ເພີ່ມຄວາມເຂັ້ມແຂງໃຫ້ແກ່ສັດທາຂອງພວກເຂົາ, ແລະ ໃຫ້ຄວາມຫວັງແກ່ພວກເຂົາ ວ່າພຣະເຈົ້າຈະຊ່ວຍເຫລືອພວກເຂົາ. ເຖິງແມ່ນວ່າທ່ານອາດບໍ່ໄດ້ເຮັດບາບແບບດຽວກັນກັບທີ່ຜູ້ຄົນຂອງກະສັດລິມໄຮໄດ້ເຮັດ, ຖ້ອຍຄຳຂອງເພິ່ນຊ່ວຍທ່ານໃຫ້ຫັນມາຫາພຣະຜູ້ເປັນເຈົ້າໄດ້ແນວໃດ? ທ່ານຈະສັງເກດເຫັນ, ຍົກຕົວຢ່າງ, ວ່າກະສັດລິມໄຮໄດ້ເຕືອນຜູ້ຄົນຂອງເພິ່ນກ່ຽວກັບເລື່ອງລາວທີ່ຜ່ານມາ ຊຶ່ງພຣະເຈົ້າໄດ້ປົດປ່ອຍຜູ້ຄົນ (ເບິ່ງ ຂໍ້ທີ 18–20). ເລື່ອງລາວເຫລົ່ານີ້, ຕະຫລອດທັງເລື່ອງລາວຢູ່ໃນພຣະຄຳພີ ຫລື ປະສົບການສ່ວນຕົວ, ຊ່ວຍທ່ານໃຫ້ໄວ້ວາງໃຈໃນພຣະເຈົ້າແນວໃດ?

ໂມໄຊຢາ 8:5–12

ແຜ່ນຈາລຶກ 24 ແຜ່ນ ທີ່ຜູ້ຄົນຂອງກະສັດລິມໄຮພົບເຫັນແມ່ນກ່ຽວກັບຫຍັງ?

ຂະນະທີ່ຜູ້ຄົນກຸ່ມນ້ອຍໜຶ່ງຂອງກະສັດລິມໄຮ ໄດ້ໄປຊອກຫາແຜ່ນດິນເຊຣາເຮັມລາ ແຕ່ບໍ່ພົບ, ພວກເຂົາໄດ້ພົບເຫັນແຜ່ນຈາລຶກຄຳ 24 ແຜ່ນ ຊຶ່ງມີອັກຂະລະທີ່ພວກເຂົາບໍ່ຮູ້ຈັກ. ແຜ່ນຈາລຶກເຫລົ່ານີ້, ຊຶ່ງໃນທີ່ສຸດ ໄດ້ຖືກແປໂດຍກະສັດໂມໄຊຢາ, ບອກເຖິງຜູ້ຄົນທີ່ຮູ້ຈັກກັນວ່າເປັນ ຊາວຢາເຣັດ, ຜູ້ໄດ້ມາຫາແຜ່ນດິນແຫ່ງຄຳສັນຍາ ຈາກຫໍບາເບນ ແລະ ໃນທີ່ສຸດໄດ້ຖືກທຳລາຍ (ເບິ່ງ ໂມໄຊຢາ 28:11–19). ຕໍ່ມາ ໂມໂຣໄນໄດ້ຫຍໍ້ແຜ່ນຈາລຶກເຫລົ່ານີ້ (ເບິ່ງ ອີເທີ 1:1–2), ຊຶ່ງກາຍເປັນ ໜັງສືອີເທີ. ໃຫ້ສັງເກດເບິ່ງ ຢູ່ໃນ ໂມໄຊຢາ 28:18 ເຖິງຜົນກະທົບຂອງບັນທຶກເຫລົ່ານີ້ ຕໍ່ຜູ້ຄົນຂອງໂມໄຊຢາ.

ໂມໄຊຢາ 8:12–19

ພຣະຜູ້ເປັນເຈົ້າໄດ້ຈັດໃຫ້ມີສາດສະດາ, ຜູ້ພະຍາກອນ, ແລະ ຜູ້ເປີດເຜີຍໄວ້ ເພື່ອຜົນປະໂຫຍດຂອງມວນມະນຸດ.

ເມື່ອກະສັດລິມໄຮໄດ້ຍິນປະຈັກພະຍານຂອງອຳໂມນ ວ່າພຣະຜູ້ເປັນເຈົ້າໄດ້ຍົກຜູ້ໜຶ່ງຂຶ້ນເປັນຜູ້ພະຍາກອນ, ກະສັດລິມໄຮ “ກໍປິຕິຍິນດີຢ່າງຍິ່ງ, ແລະ ຖວາຍຄວາມຂອບພຣະຄຸນແດ່ພຣະເຈົ້າ” (ໂມໄຊຢາ 8:19). ທ່ານຄິດວ່າເປັນຫຍັງເພິ່ນຈຶ່ງຮູ້ສຶກເຊັ່ນນັ້ນ? ທ່ານຮຽນຮູ້ຫຍັງແດ່ກ່ຽວກັບຜູ້ພະຍາກອນ ຈາກຖ້ອຍຄຳຂອງອຳໂມນ ຢູ່ໃນ ໂມໄຊຢາ 8:13–19? ໃນວັນເວລາຂອງເຮົາ, “ຝ່າຍປະທານສູງສຸດ ແລະ ສະພາອັກຄະສາວົກສິບສອງ ໄດ້ຖືກສະໜັບສະໜູນໃຫ້ເປັນສາດສະດາ, ຜູ້ພະຍາກອນ, ແລະ ຜູ້ເປີດເຜີຍ” (Bible Dictionary, “Seer”). ເທື່ອສຸດທ້າຍທີ່ທ່ານໄດ້ໄຕ່ຕອງກ່ຽວກັບພອນຂອງການມີສາດສະດາ, ຜູ້ພະຍາກອນ, ແລະ ຜູ້ເປີດເຜີຍ ຢູ່ໃນໂລກນີ້ ແມ່ນດົນປານໃດແລ້ວ? ບາງທີທ່ານຄວນບັນທຶກວິທີທີ່ສາດສະດາ, ຜູ້ພະຍາກອນ, ແລະ ຜູ້ເປີດເຜີຍເປັນ “ປະໂຫຍດອັນຍິ່ງໃຫຍ່” ຕໍ່ທ່ານໄວ້ (ໂມໄຊຢາ 8:18).

ສາດສະດາໂຈເຊັບ ສະມິດ ໄດ້ເປັນຜູ້ພະຍາກອນທີ່ຍິ່ງໃຫຍ່ ຜູ້ນຳໜ້າຍຸກສະໄໝຂອງເຮົາ (ເບິ່ງ ຄ&ພ 21:1; 124:125; ໂຈເຊັບ ສະມິດ—ປະຫວັດ 1:62). ເພິ່ນເປັນຕົວຢ່າງຂອງຄຳບັນຍາຍຂອງອຳໂມນກ່ຽວກັບຜູ້ພະຍາກອນ ລະຫວ່າງການປະຕິບັດສາດສະໜາກິດຂອງເພິ່ນແນວໃດ?

ໂມໄຊຢາ 9–10

ເຮົາສາມາດປະເຊີນໜ້າກັບການທ້າທາຍຂອງເຮົາ “ໂດຍໄດ້ຮັບກຳລັງຈາກພຣະຜູ້ເປັນເຈົ້າ.”

ຊີນິບໄດ້ຍອມຮັບວ່າ ລາວໄດ້ເຮັດຄວາມຜິດ. ບາງຄັ້ງລາວກໍກະຕືລືລົ້ນຫລາຍເກີນໄປ, ແລະ ລາວໄດ້ເຮັດໃຫ້ຜູ້ຄົນຂອງລາວ—ບັນພະບຸລຸດຂອງຜູ້ຄົນຂອງກະສັດລິມໄຮ—ຕົກຢູ່ໃນສະຖານະການທີ່ລຳບາກ ເພາະການເຮັດສັນຍາທີ່ບໍ່ສະຫລາດ ນຳກະສັດເລມັນ. ແຕ່ຕໍ່ມາ, ເມື່ອລາວໄດ້ເຮັດສົງຄາມກັບຊາວເລມັນ, ລາວໄດ້ຊ່ວຍຜູ້ຄົນຂອງລາວໃຫ້ປະເຊີນໜ້າກັບການທ້າທາຍຂອງພວກເຂົາດ້ວຍສັດທາ. ຂະນະທີ່ທ່ານອ່ານ ໂມໄຊຢາ 9–10, ໃຫ້ຊອກຫາສິ່ງທີ່ຜູ້ຄົນຂອງຊີນິບໄດ້ເຮັດ ເພື່ອສະແດງອອກເຖິງສັດທາຂອງພວກເຂົາ. ພຣະເຈົ້າໄດ້ເຮັດໃຫ້ພວກເຂົາເຂັ້ມແຂງແນວໃດ? ມັນໝາຍຄວາມວ່າແນວໃດຕໍ່ທ່ານ ທີ່ທ່ານໄດ້ອອກໄປ “ໂດຍໄດ້ຮັບກຳລັງຈາກພຣະຜູ້ເປັນເຈົ້າ”? (ໂມໄຊຢາ 9:17; 10:10–11).

ໂມໄຊຢາ 10:11–17

ການເລືອກຂອງເຮົາສາມາດເປັນອິດທິພົນໃຫ້ຫລາຍລຸ້ນຄົນ.

ອີງຕາມ ໂມໄຊຢາ 10:11–17, ການກະທຳ ແລະ ທ່າທີຂອງບັນພະບຸລຸດຂອງຊາວເລມັນ ໄດ້ກີດກັນຊາວເລມັນຈາກການຮູ້ຄວາມຈິງແນວໃດ? ການເລືອກຂອງບັນພະບຸລຸດຂອງຊາວເລມັນ ມີຜົນກະທົບຕໍ່ຄົນລຸ້ນຫລັງແນວໃດ? ໃຫ້ຄິດກ່ຽວກັບຜູ້ຄົນທີ່ທ່ານອາດມີອິດທິພົນຕໍ່ ເພາະຄວາມເຊື່ອ ແລະ ການເລືອກຂອງທ່ານ; ທ່ານເຮັດຫຍັງແດ່ເພື່ອຊ່ວຍເຂົາເຈົ້າໃຫ້ມີສັດທາຢ່າງເຕັມປ່ຽມໃນພຣະຄຣິດ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ໂມໄຊຢາ 7:19–20

ໃຫ້ສັງເກດເບິ່ງຕົວຢ່າງທີ່ກະສັດລິມໄຮກ່າວເຖິງ ເພື່ອຊຸກຍູ້ຜູ້ຄົນຂອງເພິ່ນໃຫ້ມີສັດທາ. ມີຕົວຢ່າງໃດແດ່ຈາກພຣະຄຳພີ ທີ່ດົນໃຈເຮົາໃຫ້ “ໝັ້ນໃຈໃນພຣະເຈົ້າ”? ໝັ້ນໃຈໃນພຣະເຈົ້າ ໝາຍຄວາມວ່າແນວໃດ? (ເບິ່ງ ໂມໄຊຢາ 9:17; 10:19 ນຳອີກ). ມີເລື່ອງລາວໃດແດ່ຈາກຊີວິດຂອງເຮົາ ຫລື ຊີວິດຂອງບັນພະບຸລຸດຂອງເຮົາ ທີ່ເຮົາສາມາດແບ່ງປັນ ເພື່ອດົນໃຈໃຫ້ມີຄວາມໝັ້ນໃຈໃນພຣະເຈົ້າຫລາຍກວ່າເກົ່າ?

ໂມໄຊຢາ 7:26–27

ເຮົາຮຽນຮູ້ຫຍັງແດ່ກ່ຽວກັບພຣະຜູ້ຊ່ວຍໃຫ້ລອດຈາກຂໍ້ເຫລົ່ານີ້? (ເບິ່ງ ຄຳສອນ ແລະ ພັນທະສັນຍາ 130:22 ນຳອີກ). ການຮູ້ຈັກສິ່ງເຫລົ່ານີ້ ເຮັດໃຫ້ເຮົາຮູ້ບຸນຄຸນແນວໃດ?

ໂມໄຊຢາ 8:13–18

ເພື່ອຊ່ວຍສະມາຊິກໃນຄອບຄົວໃຫ້ເຂົ້າໃຈວ່າ ຜູ້ພະຍາກອນຄືຫຍັງ, ບາງທີທ່ານຄວນສະແດງຮູບພາບຂອງເຄື່ອງມືທີ່ຊ່ວຍເຮົາໃຫ້ເຫັນບາງສິ່ງ ທີ່ເຮົາບໍ່ສາມາດຫລຽວເຫັນດ້ວຍຕາເປົ່າ, ດັ່ງເຊັ່ນ ກ້ອງສ່ອງທາງໄກ, ກ້ອງສ່ອງດາວ, ຫລື ກ້ອງຈຸລະທັດ. ເຄື່ອງມືເຫລົ່ານີ້ເປັນຄືກັນກັບຜູ້ພະຍາກອນແນວໃດ? (ເບິ່ງ ໂມເຊ 6:35–36). ຜູ້ພະຍາກອນສາມາດຫລຽວເຫັນສິ່ງທີ່ເຮົາບໍ່ສາມາດຫລຽວເຫັນແນວໃດ? ເຮົາມີຫລັກຖານໃດແດ່ ທີ່ວ່າໂຈເຊັບ ສະມິດ ເປັນຜູ້ພະຍາກອນ?

ທ່ານສາມາດສະແດງຮູບພາບຂອງສາດສະດາ, ຜູ້ພະຍາກອນ, ແລະ ຜູ້ເປີດເຜີຍທີ່ມີຊີວິດຢູ່ຂອງເຮົາ ແລະ ຖາມຄອບຄົວຂອງທ່ານວ່າ ເຂົາເຈົ້າຮູ້ຫຍັງແດ່ກ່ຽວກັບພວກເພິ່ນ. ເຮົາຕິດຕາມພວກເພິ່ນແນວໃດ?

ໂມໄຊຢາ 9:14–18; 10:1–10

ເມື່ອຊາວເລມັນມາໂຈມຕີ, ຜູ້ຄົນຂອງຊີນິບກໍພ້ອມແລ້ວ ທາງຝ່າຍຮ່າງກາຍ ແລະ ທາງຝ່າຍວິນຍານ. ເຮົາຮຽນຮູ້ຫຍັງແດ່ຈາກຊີນິບ ແລະ ຜູ້ຄົນຂອງລາວ ກ່ຽວກັບການກະກຽມສຳລັບການທ້າທາຍ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ສະແຫວງຫາຄວາມຮູ້ທາງວິນຍານຂອງທ່ານເອງ. ໂຄງຮ່າງນີ້ແນະນຳຂ່າວສານ ແລະ ຫລັກທຳໃຫ້ເອົາໃຈໃສ່ຕໍ່, ແຕ່ຢ່າໃຫ້ຄຳແນະນຳເຫລົ່ານີ້ຈຳກັດການສຶກສາຂອງທ່ານ. ທ່ານອາດປະທັບໃຈກັບບາງຂໍ້ ຫລື ຄົ້ນພົບຫລັກທຳບາງຢ່າງທີ່ບໍ່ໄດ້ກ່າວເຖິງຢູ່ໃນນີ້. ໃຫ້ພຣະວິນຍານນຳພາທ່ານ.