“ວັນທີ 11–17 ເດືອນພຶດສະພາ. ໂມໄຊຢາ 18–24: ‘ພວກເຮົາໄດ້ເຂົ້າເຮັດພັນທະສັນຍາກັບພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 11–17 ເດືອນພຶດສະພາ. ໂມໄຊຢາ 18–24,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
ມິເນີວາ ເຄ ໄທເກີດ (1888-1976), Escape of King Limhi and His People [ການລັກໜີຂອງກະສັດລິມໄຮ ແລະ ຜູ້ຄົນຂອງເພິ່ນ], 1949-1951, ສີນ້ຳມັນ ເທິງແຜ່ນໄມ້ອັດ, 35 7/8 x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ, 1969.
ວັນທີ 11–17 ເດືອນພຶດສະພາ
ໂມໄຊຢາ 18–24
ພວກເຮົາໄດ້ເຂົ້າເຮັດພັນທະສັນຍາກັບພຣະເຈົ້າ
ປະທານທອມມັສ ແອັສ ມອນສັນ ໄດ້ສິດສອນວ່າ, “ເມື່ອເຮົາອ່ານ ແລະ ໄຕ່ຕອງພຣະຄຳພີ, ເຮົາຈະປະສົບກັບການສື່ມທີ່ອ່ອນຫວານຂອງພຣະວິນຍານຕໍ່ຈິດວິນຍານຂອງເຮົາ” (“We Never Walk Alone,” Ensign ຫລື Liahona, Nov. 2013, 122).
ບັນທຶກຄວາມປະທັບໃຈຂອງທ່ານ
ເລື່ອງລາວຂອງແອວມາ ແລະ ຜູ້ຄົນຂອງເພິ່ນ ຢູ່ໃນ ໂມໄຊຢາ 18; 23–24 ສະແດງໃຫ້ເຫັນເຖິງຄວາມໝາຍຂອງການ “ມາຫາຝູງຊົນຂອງພຣະເຈົ້າ” (ໂມໄຊຢາ 18:8). ເມື່ອພວກເຂົາໄດ້ຮັບບັບຕິສະມາ, ພວກເຂົາກໍໄດ້ເຮັດພັນທະສັນຍາກັບພຣະເຈົ້າ ທີ່ຈະ “ຮັບໃຊ້ພຣະອົງ ແລະ ຮັກສາພຣະບັນຍັດຂອງພຣະອົງ” (ໂມໄຊຢາ 18:10). ເຖິງແມ່ນສິ່ງນີ້ເປັນການເຮັດຄຳໝັ້ນສັນຍາສ່ວນຕົວທີ່ເຂັ້ມງວດ, ແຕ່ມັນຍັງມີສ່ວນກ່ຽວຂ້ອງກັບວິທີທີ່ພວກເຂົາປະຕິບັດຕໍ່ກັນແລະກັນນຳອີກ. ແມ່ນແລ້ວ, ການເດີນທາງກັບໄປຫາພຣະບິດາເທິງສະຫວັນ ເປັນເລື່ອງສ່ວນຕົວ ແລະ ເລື່ອງບຸກຄົນ, ແລະ ບໍ່ມີຄົນໃດສາມາດຮັກສາພັນທະສັນຍາຂອງເຮົາໃຫ້ເຮົາ, ແຕ່ກໍບໍ່ໄດ້ໝາຍຄວາມວ່າ ເຮົາຢູ່ຕາມລຳພັງ. ເຮົາຕ້ອງການກັນແລະກັນ. ໃນຖານະສະມາຊິກຂອງສາດສະໜາຈັກຂອງພຣະຄຣິດ, ເຮົາເຮັດພັນທະສັນຍາທີ່ຈະຮັບໃຊ້ພຣະເຈົ້າ ໂດຍການຊ່ວຍ ແລະ ຮັບໃຊ້ຊຶ່ງກັນແລະກັນ ຢູ່ໃນເສັ້ນທາງ, “ແບກຫາບພາລະຂອງກັນແລະກັນ” (ໂມໄຊຢາ 18:8–10). ຜູ້ຄົນຂອງແອວມາ ໄດ້ມີພາລະແບກຫາບທີ່ໜັກໜ່ວງແທ້ໆ, ຄືກັນກັບເຮົາທຸກຄົນ. ແລະ ວິທີໜຶ່ງທີ່ພຣະຜູ້ເປັນເຈົ້າຊ່ວຍເຫລືອເຮົາໃຫ້ “ທົນຕໍ່ພາລະແບກຫາບ [ຂອງເຮົາ] ຢ່າງງ່າຍດາຍ” (ໂມໄຊຢາ 24:15) ແມ່ນໂດຍການມອບຊຸມຊົນຂອງໄພ່ພົນໃຫ້ເຮົາ ຜູ້ທີ່ໄດ້ສັນຍາທີ່ຈະເປັນທຸກກັບເຮົາ ແລະ ປອບໃຈເຮົາ, ຄືກັນກັບທີ່ເຮົາໄດ້ສັນຍາທີ່ຈະເຮັດເພື່ອເຂົາເຈົ້າ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ການບັບຕິສະມາແມ່ນຮ່ວມທັງພັນທະສັນຍາທີ່ຈະຮັບໃຊ້ພຣະເຈົ້າ ແລະ ຢືນເປັນພະຍານຂອງພຣະອົງ.
ໂມໄຊຢາ 18:8–10 ບັນຈຸຄຳສອນຂອງແອວມາກ່ຽວກັບພັນທະສັນຍາແຫ່ງການບັບຕິສະມາ, ຫລື ຄຳສັນຍາທີ່ເຮົາເຮັດກັບພຣະເຈົ້າ ຕອນຮັບບັບຕິສະມາ. ຂະນະທີ່ທ່ານອ່ານຂໍ້ເຫລົ່ານີ້, ໃຫ້ໄຕ່ຕອງຄຳຖາມດັ່ງຕໍ່ໄປນີ້:
-
ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບຄຳສັນຍາທີ່ທ່ານໄດ້ເຮັດຕອນຮັບບັບຕິສະມາ? ພຣະເຈົ້າໄດ້ສັນຍາຫຍັງກັບທ່ານ?
-
ການເຮັດພັນທະສັນຍາທີ່ຈະຮັບໃຊ້ພຣະເຈົ້າ (ເບິ່ງ ຂໍ້ທີ 10) ກ່ຽວຂ້ອງກັບຄວາມພະຍາຍາມຂອງເຮົາ ທີ່ຈະປະຕິບັດສາດສະໜາກິດຕໍ່ກັນແລະກັນແນວໃດ? (ເບິ່ງ ຂໍ້ທີ 8–9).
-
ທ່ານໄດ້ເຮັດຫຍັງເພື່ອຮັກສາຄຳສັນຍາຂອງທ່ານ?
-
ການຮັກສາພັນທະສັນຍາແຫ່ງການບັບຕິສະມາຂອງທ່ານ ຊ່ວຍທ່ານໃຫ້ “ເຕັມໄປດ້ວຍພຣະວິນຍານ” ແນວໃດ? (ໂມໄຊຢາ 18:14). ພຣະວິນຍານຊ່ວຍທ່ານຮັກສາພັນທະສັນຍາຂອງທ່ານແນວໃດ?
ເມື່ອເຮົາເຮັດພັນທະສັນຍາກັບພຣະເຈົ້າ, ເຮົາຮັບເອົາພອນຂອງພຣະອົງ.
ເລື່ອງນີ້ກໍຍັງເປີດເຜີຍແບບແຜນ ທີ່ຖືກຕ້ອງຂອງການບັບຕິສະມານຳອີກ. ທ່ານຮຽນຮູ້ຫຍັງແດ່ ຢູ່ໃນ ຂໍ້ທີ 14–17 ກ່ຽວກັບວິທີປະຕິບັດການບັບຕິສະມາ? ທ່ານຮຽນຮູ້ຫຍັງອີກແດ່ກ່ຽວກັບການບັບຕິສະມາຈາກ ມັດທາຍ 3:16; ໂຣມ 6:3–5; 3 ນີໄຟ 11:21–28; ແລະ ຄຳສອນ ແລະ ພັນທະສັນຍາ 20:72–74?
ເບິ່ງ ຄຳສອນ ແລະ ພັນທະສັນຍາ 20:37, 77, 79 ນຳອີກ.
ຜູ້ຄົນຂອງພຣະເຈົ້າຄວນເປັນອັນໜຶ່ງດຽວກັນ.
ດັ່ງທີ່ແອວມາ ແລະ ຜູ້ຄົນຂອງເພິ່ນໄດ້ຄົ້ນພົບ, ການຕິດຕາມພຣະເຢຊູຄຣິດ ບາງເທື່ອກໍໝາຍເຖິງການປະທິດທາງທີ່ຄຸ້ນເຄີຍຂອງຊີວິດ ເພື່ອບາງສິ່ງທີ່ໃໝ່ ແລະ ແຕກຕ່າງ. ແຕ່ຜູ້ຄົນຂອງແອວມາໄດ້ຮັບຄວາມເຂັ້ມແຂງຈາກກັນແລະກັນ ໃນການເປັນພາກສ່ວນຂອງ “ສາດສະໜາຈັກຂອງພຣະຄຣິດ” (ໂມໄຊຢາ 18:17). ຄຳສອນຢູ່ໃນ ໂມໄຊຢາ 18:17–30 ດົນໃຈທ່ານໃຫ້ເປັນສະມາຊິກຂອງສາດສະໜາຈັກ ທີ່ດີກວ່າເກົ່າແນວໃດ? ທ່ານສາມາດເຮັດຫຍັງແດ່ເພື່ອຊ່ວຍສະມາຊິກຂອງຫວອດ ຫລື ຂາສາຂອງທ່ານ ໃຫ້ “ຜູກພັນກັນໄວ້ໃນຄວາມເປັນອັນໜຶ່ງດຽວກັນ ແລະ ໃນຄວາມຮັກ”? (ໂມໄຊຢາ 18:21).
ເບິ່ງ Henry B. Eyring, “Our Hearts Knit as One,” Ensign ຫລື Liahona, Nov. 2008, 68–71 ນຳອີກ.
ຖ້ອຍຄຳຂອງສາດສະດາຈະເກີດເປັນຈິງ.
ອະບີນາໄດໄດ້ທຳນາຍກ່ຽວກັບບາງສິ່ງທີ່ຈະເກີດກັບກະສັດໂນອາ ແລະ ຜູ້ຄົນຂອງເພິ່ນໂດຍສະເພາະ ຖ້າຫາກພວກເຂົາປະຕິເສດທີ່ຈະກັບໃຈ. ເຖິງຢ່າງໃດກໍຕາມ, ຄຳທຳນາຍບາງຢ່າງເຫລົ່ານີ້ ຟັງແລ້ວກໍບໍ່ເປັນໜ້າເຊື່ອ (ເບິ່ງ ໂມໄຊຢາ 12:1–8, 14–15), ໂດຍສະເພາະ ນັບແຕ່ຊາວນີໄຟໄດ້ປົກປ້ອງຕົວເອງຈາກຊາວເລມັນ ມາເປັນເວລາເກືອບເຖິງ 50 ປີແລ້ວ (ເບິ່ງ ໂມໄຊຢາ 9:16–18; 11:19). ແຕ່ຖ້ອຍຄຳຂອງສາດສະດາຈະເກີດເປັນຈິງ—ໃນວັນເວລາຂອງເຮົາ ເທົ່າໆກັບໃນວັນເວລາຂອງອະບີນາໄດ.
ທ່ານພົບເຫັນຫຍັງ ຢູ່ໃນ ໂມໄຊຢາ 19–20 ທີ່ພາໃຫ້ກີເດໂອນປະກາດວ່າ ການທຳນາຍຂອງອະບີນາໄດ ໄດ້ເກີດເປັນຈິງແລ້ວ? (ເບິ່ງ ໂມໄຊຢາ 20:21). ເລື່ອງນີ້ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານແນວໃດ ໃນຄຳເຕືອນ ແລະ ຄຳແນະນຳຂອງສາດສະດາຂອງພຣະເຈົ້າ ແລະ ໃນຄຳໝັ້ນສັນຍາຂອງທ່ານ ທີ່ຈະເຮັດຕາມຖ້ອຍຄຳຂອງພວກເພິ່ນ? ຕອນໃດທີ່ທ່ານໄດ້ເຫັນຖ້ອຍຄຳຂອງສາດສະດາເກີດເປັນຈິງໃນວັນເວລາຂອງເຮົາ?
ພຣະເຈົ້າສາມາດເຮັດໃຫ້ພາລະຂອງເຮົາເບົາບາງລົງ.
ທັງຜູ້ຄົນຂອງລິມໄຮ ແລະ ຜູ້ຄົນຂອງແອວມາ ໄດ້ຕົກຢູ່ໃນຄວາມເປັນທາດ, ເຖິງແມ່ນດ້ວຍເຫດຜົນ ແລະ ດ້ວຍສະຖານະການທີ່ແຕກຕ່າງກັນກໍຕາມ. ທ່ານສາມາດຮຽນຮູ້ຫຍັງແດ່ໂດຍການປຽບທຽບເລື່ອງລາວຂອງຜູ້ຄົນຂອງລິມໄຮ ຢູ່ໃນ ໂມໄຊຢາ 19–22 ໃສ່ກັບຜູ້ຄົນຂອງແອວມາ ຢູ່ໃນ ໂມໄຊຢາ 18; 23–24? ທ່ານສາມາດສັງເກດເຫັນວິທີທີ່ແຕ່ລະກຸ່ມເຫລົ່ານີ້ ໄດ້ຕອບຮັບຕໍ່ການເປັນຊະເລີຍ ຫລື ວິທີທີ່ແຕ່ລະກຸ່ມໄດ້ຖືກປົດປ່ອຍໃນທີ່ສຸດ. ເມື່ອທ່ານເຮັດເຊັ່ນນັ້ນ, ຈົ່ງຊອກຫາຂ່າວສານທີ່ກ່ຽວຂ້ອງກັບຊີວິດຂອງທ່ານ. ຍົກຕົວຢ່າງ, ທ່ານຮຽນຮູ້ຫຍັງແດ່ຈາກເລື່ອງເຫລົ່ານີ້ ທີ່ຈະຊ່ວຍທ່ານແບກຫາບພາລະຂອງທ່ານ?
ເຮົາສາມາດໄວ້ວາງໃຈພຣະຜູ້ເປັນເຈົ້າ.
ເຖິງແມ່ນວ່າພວກເຂົາໄດ້ກັບໃຈຈາກບາບຂອງພວກເຂົາ, ແຕ່ແອວມາ ແລະ ຜູ້ຄົນຂອງເພິ່ນຍັງພົບເຫັນຕົວເອງຢູ່ໃນຄວາມເປັນທາດຢູ່ຄືເກົ່າ. ປະສົບການຂອງພວກເຂົາສະແດງໃຫ້ເຫັນວ່າ ການໄວ້ວາງໃຈພຣະຜູ້ເປັນເຈົ້າ ແລະ ການດຳລົງຊີວິດຕາມພັນທະສັນຍາຂອງເຮົາ ບໍ່ໄດ້ປ້ອງກັນຈາກຄວາມຫຍຸ້ງຍາກສະເໝີໄປ, ແຕ່ມັນຊ່ວຍເຮົາໃຫ້ເອົາຊະນະຄວາມຫຍຸ້ງຍາກເຫລົ່ານັ້ນ. ຂະນະທີ່ທ່ານອ່ານ ໂມໄຊຢາ 23:21–24 ແລະ 24:8–17, ໃຫ້ສັງເກດເບິ່ງຂໍ້ຄວາມ ແລະ ສຳນວນ ທີ່ສາມາດຊ່ວຍທ່ານໃຫ້ຮຽນຮູ້ທີ່ຈະໄວ້ວາງໃຈໃນພຣະເຈົ້າ, ບໍ່ວ່າສະຖານະການຂອງທ່ານຈະເປັນແບບໃດກໍຕາມ.
ເບິ່ງ Thomas S. Monson, “I Will Not Fail Thee, nor Forsake Thee,” Ensign ຫລື Liahona, Nov. 2013, 85–87 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ໂມໄຊຢາ 18:1–4
ມີຄຳກ່າວໄວ້ວ່າ ນັບແກ່ນຈາກໝາກນັ້ນ ນັບໄດ້, ແຕ່ນັບໝາກຈາກແກ່ນນັ້ນ ນັບບໍ່ໄດ້. ມີພຽງແຕ່ຄົນດຽວທີ່ຮັບເອົາປະຈັກພະຍານຂອງອະບີນາໄດ, ແຕ່ບຸກຄົນນັ້ນ—ແອວມາ—ໄດ້ເປັນອິດທິພົນຕໍ່ຊາວນີໄຟຫລາຍລຸ້ນຄົນ. ບາງທີທ່ານຄວນໃຊ້ໝາກໄມ້ໜ່ວຍໜຶ່ງທີ່ມີແກ່ນ ເພື່ອສາທິດຫລັກທຳຂໍ້ນີ້. ຂ່າວສານນີ້ກ່ຽວຂ້ອງກັບຄອບຄົວຂອງເຮົາແນວໃດ? ເຮົາສາມາດເຮັດຫຍັງໄດ້ແດ່ ເພື່ອແບ່ງປັນປະຈັກພະຍານຂອງເຮົາໃຫ້ກັບຄົນອື່ນ?
ໂມໄຊຢາ 18:8–10
ເຮົາສາມາດຮຽນຮູ້ຫຍັງແດ່ກ່ຽວກັບພັນທະສັນຍາແຫ່ງການບັບຕິສະມາຂອງເຮົາ ຈາກຂໍ້ເຫລົ່ານີ້? (ເບິ່ງ ຄຳສອນ ແລະ ພັນທະສັນຍາ 20:73, 77–79 ນຳອີກ). ເຮົາໄດ້ເຮັດຫຍັງເພື່ອກະກຽມ ຫລື ຮັກສາພັນທະສັນຍາແຫ່ງການບັບຕິສະມາຂອງເຮົາ?
ໂມໄຊຢາ 18:30
ມີບ່ອນໃດແດ່ທີ່ມີຄວາມໝາຍພິເສດຕໍ່ເຮົາ ເພາະປະສົບການທາງວິນຍານທີ່ເຮົາມີຢູ່ທີ່ນັ້ນ?
ໂມໄຊຢາ 21:11–16; 24:10–15
ເຮົາຮຽນຮູ້ຫຍັງແດ່ ໂດຍການປຽບທຽບຄວາມສາມາດຂອງຜູ້ຄົນຂອງແອວມາ ໃສ່ກັບຂອງຜູ້ຄົນຂອງລິມໄຮ?
ໂມໄຊຢາ 21:15; 24:11–15
ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບບາງວິທີທີ່ພຣະຜູ້ເປັນເຈົ້າຕອບຄຳອະທິຖານຂອງເຮົາ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ຊອກຫາເວລາທີ່ສະດວກສຳລັບທ່ານ. ສ່ວນຫລາຍແລ້ວ ມັນເປັນສິ່ງງ່າຍທີ່ສຸດ ທີ່ຈະຮຽນຮູ້ ເມື່ອທ່ານສາມາດສຶກສາພຣະຄຳພີ ໂດຍປາດສະຈາກສິ່ງລົບກວນ. ໃຫ້ຊອກຫາເວລາທີ່ສະດວກສຳລັບທ່ານ, ແລະ ໃຫ້ສຶກສາຢ່າງສະໝ່ຳສະເໝີ ໃນເວລາດຽວກັນນັ້ນທຸກໆວັນ.
The Waters of Mormon [ນ້ຳມໍມອນ], ໂດຍ ໂຮເຮ ໂກໂກ