« 1–7 nō Tiunu. Alama 5–7 : ‘« Ua ’itea ānei ia ’outou taua fa’ahuru-’ē-ra’a rahi i roto i tō ’outou ’ā’au na ?’ »Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 1–7 nō Tiunu. Alama 5–7 », Mai, pe’e mai—nō te ta’ata hō’ē ’e te ’utuāfare : 2020
’Aita ʼoutou i moʼehia nā Jon McNaughton
1–7 nō tiunu
Alama 5–7
« ’Ua ’itea ānei ia ’outou taua fa’ahuru-’ē-ra’a rahi ra i roto i tō ’outou ’ā’au na ? »
E ti’a i te Alama 5–7 e tauturu ia ’outou ’ia feruri i tō ’outou fa’afāriura’a tāmau ia Iesu Mesia ra. ’A tai’o noa ai ’outou, ’ā pāpa’i i tā te Vārua e ha’api’i ia ’outou.
Pāpa’i i te mau mana’o e tae mai
’Aita Alama i ’ite i te tāpū māfatu o teie tau e fa’aora i te ta’ata, ’o te monora’a i te māfatu ’ino ’aore rā te māfatu ma’ima’i i te hō’ē māfatu maita’i. ’Ua ’ite rā ’oia i te « fa’ahuru-’ē-ra’a ’ā’au » fa’ahiahia atu ā (Alama 5:26)—hō’ē tauira’a i reira te Fa’aora e hōro’a mai ai i te hō’ē ora ’āpī i te pae vārua, mai te huru ra ’ua « fānau-fa’ahou-hia » (hi’o Alama 5:14, 49). ’Ua ti’a roa ia Alama ’ia ’ite ē, o te fa’ahuru-’ē-ra’a ’ā’au mau tei tītauhia nō te mau ’āti Nephi e rave rahi. Te hō’ē pae e mau ta’ata tao’a rahi, ’e te tahi pae e mau ta’ata veve, te hō’ē pae e mea te’ote’o ’e te tahi pae e mea ha’eha’a, te hō’ē pae e hāmani ’ino ra ’e te tahi pae tei raro a’e i te hāmani-’ino-ra’a (hi’o Alama 4:6–15). Tītauhia rā ia rātou pā’āto’a ’ia haere mai ia Iesu Mesia ’ia fa’aorahia rātou—mai ia tātou pā’āto’a nei. Tē ’imi ra ānei tātou i te upo’oti’a i ni’a i te te’ote’o ’aore rā tē fa’a’oroma’i ra tātou i te mau ’ati, hō’ē ā poro’i tā Alama : « ’A haere mai, ’eiaha e mata’u » (Alama 7:15). Vaiiho ana’e i te Fa’aora ’ia taui i te ’ā’au ’eta’eta ’e te hara rahi ’aore rā te ’ā’au pēpē, ’ei ’ā’au ha’eha’a ’e te mā ’e te ’āpī.
Mau mana’o nō tā ’oe iho tuatāpapara’a pāpa’ira’a mo’a
Tītauhia ’ia ’ite au i te hō’ē fa’ahuru-’ē-ra’a rahi o te ’ā’au—’e ’ia tāmau noa te reira.
E ti’a i te mau uira’a hi’opo’ara’a huru tā Alama i ui i te mau ta’ata nō Zarahemela, i roto i te Alama 5:14–33, i te tauturu ia ’oe ’ia hi’opo’a i tō ’oe iho vārua ’e ’ia māramarama i te aura’a nō te tupura’a « te hō’ē fa’ahuru-’ē-ra’a rahi o te ’ā’au » i te roara’a o tō ’oe orara’a. ’Ua fa’ata’a te peresideni M. Russell Ballard i te faufa’a o teie mau uira’a : « Tītauhia iā’u ’ia rave tāmau māite i te taime nō te ui iā’u iho ē, « E aha tō’u huru ? » E au i te hō’ē uiuira’a ’ōmo’e ia ’oe iho… Mai te hō’ē arata’i nō’u i roto i te reira hi’opo’ara’a ’ōmo’e nō’u iho, e mea au nā’u ’ia tai’o ’e ’ia feruri hōhonu i te mau parau ha’aferuri e ’itehia i roto i te pene pae a Alama » (« ’Ia ho’i ’e ’ia fāri’i », Ensign ’aore rā Liahona, Mē 2017, 64).
E nehenehe e tai’o i te mau uira’a a Alama mai te huru ra ē, tē fa’atupu ra ’oe i tā ’oe iho uiuira’a ’e tē hi’opo’a ra ’oe i tō ’oe ’ā’au. E hinaʼaro paha ʼoe e pāpa’i i tā ’oe mau pāhonora’a i teie mau uira’a. E aha tā ’oe e mana’o ra e taui i roto i tō ’oe orara’a i muri iho i tā ’oe uiuira’a ?
Hi’o ato’a Dale G. Renlund, « Te tāpe’ara’a i te tauira’a pūai o te ’ā’au », Ensign ’aore rā Liahona, Nov. 2009, 97–99.
Tītauhia i te pipi tāta’itahi a te Mesia ’ia ’ite i te hō’ē « fa’ahuru-’ē-ra’a ’ā’au ».
E ti’a iā’u ’ia noa’a tō’u iho nei ’ite nō te Fa’aora ’e nō tāna ’evanelia nā roto i te Vārua Maita’i.
’Ua hōro’a Alama i te hō’ē ’itera’a pāpū pūai nō te Fa’aora ’e nō tāna ’evanelia, ’e ’ua fa’ata’a ato’a mai ’oia nāhea i te noa’ara’a te reira iāna. ’A fa’a’ite pāpū ai ’oia, ’aita ’oia i fa’ahiti i tōna ’itera’a ’e tōna fa’aro’o i te hō’ē melahi (hi’o Mosia 27:10–17) ’ua fa’ata’a mai rā ’oia i te ho’o tāna i ’aufau nō te ’ite mai i te parau mau nōna iho. E aha tā ’oe e ha’api’i nei i roto i te Alama 5:44–51 nō ni’a i te huru te noa’ara’a te parau mau ia Alama ? Nāhea tā ’oe e nehenehe e pe’e i tōna hi’ora’a i roto i tā ’oe mau tauto’ora’a nō te noa’a mai ’aore rā nō te ha’apūai i tō ’oe ’itera’a pāpū ? E aha tā ’oe i ha’api’i mai nō ni’a i te Fa’aora i roto i te mau ha’api’ira’a a Alama i roto i te Alama 5:33–35, 48–50, ’e te 57–60 ?
E tauturu te ha’apa’o-itoito-ra’a iā’u ’ia fa’aea i ni’a i te « ’ē’a e tae atu ai i te bāsileia o te Atua ».
’Aita te mau ta’ata nō Gideona i fa’aruru i te hō’ē ā mau fifi o te mau ta’ata nō Zarahemela, nō reira ’ua tauturu te Vārua ia Alama ’ia ’ite i tō rātou mau hina’aro ’e ’ia ha’api’i ta’a ’ē ia rātou (hi’o Alama 7:17, 26). E nehenehe tā ’oe e hi’o i te ta’a-’ē-ra’a i roto i te poro’i a Alama i tō Zarahemela (hi’o Alama 5) ’e i tō Gideona. ’Ei hi’ora’a, ’ua ta’a ia Alama ē, tei ni’a te mau ta’ata nō Gideona i « te ’ē’a e tae atu i te bāsileia o te Atua » (Alama 7:19). I roto i tāna a’ora’a ia rātou, ’ua ha’api’i rahi Alama ia rātou nō ni’a i te rāve’a e fa’aea i ni’a i terā ’ē’a (hi’o Alama 7). E aha te parau a’o tāna i hōro’a ia rātou ? E aha tā ’oe e nehenehe e fa’a’ohipa i roto i tō ’oe orara’a i teienei ?
’Ua rave te Fa’aora i ni’a iāna i tā’u mau hara, mau māuiui ’e mau ’ati.
’Ua mana’o a’enei ānei ’outou ē, ’aita e ta’ata e ta’a ra i tō ’oe mau tāfifira’a ’aore rā mau fifi ? Mai te peu ē ’ē, penei a’e e nehenehe i te mau parau mau e ha’api’ihia nei i roto i te Alama 7:7–16 e tauturu mai. ’Ua fa’a’ite pāpū Elder David A. Bednar ē :« ’Ua ’ite pāpū roa te Tamaiti a te Atua ’e ’ua hāroʻaroʻa ho’i, i te mea ē, ’ua ’ite oia ’e ’ua amo ho’i i tā tātou tāta’itahi mau hōpoi’a. ’E nō tāna tusia fāito ’ore ’e te mure ’ore ho’i (hi’o Alama 34:14), e mana’o pāpū tōna i te tahi, ’e e nehenehe tāna e fa’atoro mai i tōna rima aroha » (« Fa’a’oroma’i i te mau ’ati ma te paruparu ’ore », Ensign ’aore rā Liahona, Mē 2014, 90).
’Ia tai’o ’oe i te Alama 7:7–16, ’a feruri e aha tā teie mau ’īrava e tauturu nei ia tātou ’ia māramarama nō ni’a i te mau fā o te tusia a te Fa’aora. Nāhea tātou nō te tītau i tōna mana i roto i tō tātou orara’a ? A feruri e pāpa’i i tō ’outou mau mana’o.
Hi’o ato’a Isaia 53:3–5.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Alama 5:6–13
Nō te aha Alama i hina’aro ai i tōna mau ta’ata ’ia ha’amana’o i te aroha o te Fatu i ni’a i tō rātou mau tupuna ? E aha te mau ’ā’amu i roto i tō ’outou ’ā’amu ’utuāfare e ha’api’i nei nō ni’a i tōna aroha ? E nehenehe e haere i ni’a ia familysearch.org/myfamily nō te pāpa’i i te reira mau ’ā’amu.
Alama 5:14–33
’Ua ’ite paha te mau melo o te ’utuāfare e aha te mana’o ’ia vai ineine—’aore rā ’ia vai ineine ’ore—nō te hō’ē tere pūhapara’a, nō te hō’ē hi’opo’ara’a i te fare ha’api’ira’a ’aore rā te hō’ē uiuira’a tihepu ’ohipa. E aha te mau ’ohipa i tupu a’enei ’o tā rātou e nehenehe e fa’a’ite mai nō te fa’ahōho’a i te faufa’a rahi ’ia vai ineine ? E nehenehe e ani i te mau melo o te ’utuāfare ’ia hi’o fa’ahou ā i te Alama 5:14–33 ’e ’ia ’imi mai i te mau uira’a tā Alama i ui ’ei fa’aineinera’a i tōna mau ta’ata ’ia fārerei i te Atua. Penei a’e e nehenehe te melo tāta’itahi o te ’utuāfare e mā’iti i te hō’ē uira’a ’a fa’a’ite mai ai nāhea te reira e nehenehe e tauturu ia tātou ’ia fārerei i te Atua. E nehenehe ato’a tō ’outou ’utuāfare ’ia pia haere i te mau uira’a e rave rahi a Alama nā roto i te fare ’ei fa’aferurira’a i te mau melo o te ’utuāfare.
Alama 6:4–6
E aha te tahi tumu tātou e putuputu ai ’ei feiā mo’a ? Nāhea tātou nō te fa’ariro i tō tātou taime i te purera’a ’ei taime tauturu mau nō tātou iho ’e nō vetahi ’ē ?
Alama 7:9–16
E aha tā tātou i ha’api’i mai i roto i teie mau ’īrava ’o tē tauturu ia tātou « ’eiaha e mata’u » (Alama 7:15) i te taime e tītauhia ia tātou ’ia tātarahapa ’e ’ia taui ? E aha tā teie mau ’īrava e ha’api’i nei ia tātou nō ni’a i te fāriura’a i ni’a i te Fa’aora i te taime e hina’aro tātou i te tauturu ? E aha te tahi atu mea tā tātou i rave nō te fāri’i i tāna tauturu ? Nāhea ’oia i te fa’aorara’a ia tātou ?
Alama 7:23
’O vai tā tātou i mātau e hi’ora’a maita’i nō te hō’ē ’aore rā e rave rahi atu ā mau huru i tāpurahia i roto i teie ’īrava ? Nō te aha e mea faufa’a ’ia fa’atupu i teie mau huru ?
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere
Ha’amaita’ira’a i tā tātou ha’api’ira’a
Ani i te mau uira’a e tītau manihini i te mau melo o te ’utuāfare ’ia rave. ’A feruri i te mau uira’a e ’ume i te mau melo o te ’utuāfare ’ia feruri i ni’a i te huru e nehenehe tā rātou e ora hope atu ā i te ’evanelia. « E ’ere teie mau uira’a nō te ’āparaura’a ; nō te ha’aferuri rā ia tātou iho » (Ha’api’ira’a mai tā te Fa’aora, 31).
Tō tātou pāruru, nā Jay Bryant Ward