Tē tāpe’a ra Iesu i te hō’ē ’ārenio

’Aita ʼoutou i moʼehia nā Jon McNaughton

1–7 nō Tiunu

Alama 5–7

« ’Ua ’itea ānei ia ’outou taua fa’ahuru-’ē-ra’a rahi ra i roto i tō ’outou ’ā’au na ? »

’A feruri nā roto i te ’ā’au pure i te mau parau tumu i roto i te Alama 5–7 tā ’outou e mana’o ra e mea tano maita’i nō te mau tamari’i tā ’outou e ha’api’i ra.

Pāpa’i i te mau mana’o e tae mai

ha’api’ira’a

Tītau i te mana’o

Ani i te mau tamari’i ’ia fa’a’ite mai e aha tā rātou e ha’amana’o ra i te ha’api’ira’a mai nō ni’a ia Alama tamaiti tau hepetoma i ma’iri a’enei. E fa’ata’a ē, i muri a’e i tō Alama fa’afāriura’ahia, ’ua ha’api’i ’oia i te mau ta’ata i te mau mea faufa’a nō ni’a i te ’evanelia. Vaiiho i te mau tamari’i ’ia fa’a’ite mai e aha tā rātou i ’ite nō ni’a i te mau mea tāna i ha’api’i.

ītona ha’api’ira’a

Ha’api’i i te ha’api’ira’a tumu : Mau tamari’i ’āpī

Alama 5:44–48

E roa’a tō’u iho ’itera’a pāpū nā roto i te Vārua Maita’i.

E nehenehe te mau tamari’i tā ’outou e ha’api’i ra e fa’ananea i tō rātou iho ’itera’a pāpū, noa atu tō rātou ’āpī.

Mau ’ohipa e nehenehe e rave

• Fa’a’ohipa i te hō’ē hōho’a nō Alama tamaiti (hi’o Vaira’a hōho’a ’evanelia, no. 77) nō te hi’o fa’ahou i te ’ā’amu nō te fārereira’a te melahi iāna (hi’o Mosia 27). I muri iho e ani i te mau tamari’i ’ia fa’ata’a mai e aha te hō’ē ’itera’a pāpū, ’e e tauturu ia rātou mai te mea e tītauhia. Fa’ata’a ē, ’ua ha’a Alama nō te fāri’i i te hō’ē ’itera’a pāpū i muri a’e i tō te melahi fārereira’a iāna. Tai’o marū noa i te Alama 5:46 i te tahi ma’a taime, ’e e ani i te mau tamari’i ’ia hāmani i te hō’ē tāpura e aha tā Alama i rave ’e nāhea tōna ’itera’a i te parau mau. (Penei a’e e tītauhia ’outou ’ia fa’ata’a ē, te aura’a nō te ha’apaera’a mā’a, ’o te orera’a ïa e ’amu i te mā’a ’e e inu i te pape.)

• Fa’a’ite i te mau hōho’a nō te mau mea e tupu marū noa i te rahi ’e ’o te tītau i te ’atu’atura’a tāmau, mai te hō’ē rā’au tanu ’e ’aore rā, hō’ē fanau’a ’ānimara. Ani i te mau tamari’i ’ia fa’a’ite mai nāhea tātou i te ’atu’atu i teie mau mea ’e ’ia tauturu ia rātou ’ia tupu i te rahi. Fa’aha’amana’o ia rātou ē, tītau-ato’a-hia ia tātou ’ia ’atu’atu tāmau noa i tō tātou ’itera’a pāpū.

• Fa’a’ohipa i te hō’ē pōpō pau nō te fa’ahōho’a i te hō’ē ’itera’a pāpū ’e ’a pūpuhi i te mata’i i roto i te mau taime ato’a e fa’a’ite ’outou i te hō’ē mea e tauturu i te ’itera’a pāpū ’ia tupu i te rahi. Tā’amu i te pōpō ’e e hōro’a fa’a’ati, ma te ani i te mau tamari’i ’ia fa’a’ite i te hō’ē mea tā rātou e nehenehe e rave nō te tauturu i tō rātou ’itera’a pāpū ’ia tupu i te rahi. Ani i te mau tamari’i ’ia pāpa’i hōho’a ia rātou iho tē rave ra i te mau mea ’o tē ha’apūai i tō rātou ’itera’a pāpū.

e piti tamaiti ’e te mau fanau’a ’ānimara

’Ia fāri’i ana’e tātou i te ’evanelia, e au ïa mai te ha’amatara’a i te hō’ē orara’a ’āpī.

Alama 7:10–13

’Ua rave te Fa’aora i ni’a iāna iho i tā’u mau hara, tō’u mau māuiui ’e tō’u mau ’ati.

E nehenehe te mau parau mau i roto i te Alama 7:10–13 e tauturu i te mau tamari’i ’ia ’ite ē, tē māna’ona’o nei Iesu Mesia ia rātou ’e, e nehenehe ’oia e tauturu ia rātou.

Mau ’ohipa e nehenehe e rave

• Fa’a’ite i te mau tamari’i i te hō’ē hōho’a nō Iesu E fa’ata’a ē, ’ua ’ite ’oia e aha te huru ’ia pēpē, ’ia oto, ’e ’aore rā, ’ia ri’ari’a. Tai’o i te tahi mau ta’o i roto i te Alama 7:11–13 ’o tē fa’ata’a ra e aha tā te Fa’aora i mamae, ’e ’e fa’ata’a i te mau ta’o tā te mau tamari’i i ’ore i ta’a. E ha’apāpū ē, e nehenehe Iesu e tauturu ’e e tāmāhanahana ia tātou ’ia ’oto ana’e tātou. Fa’a’ite e mea nāhea tō te Fa’aora tauturura’a ’e te tāmāhanahanara’a ia ’outou.

• Ani i te mau tamari’i ’ia fa’a’ite mai i te mau ’itera’a ’a ma’ihia ai rātou ’e ’aore rā, ’a māuiui ai ’e ’aore rā, ’a fa’aruru ai i te tahi atu fifi tei fa’atupu i te ’oto ia rātou. Fa’a’ite i tō ’outou ’itera’a pāpū ē, ’ua mamae ato’a te Fa’aora i te reira mau mea ’e ’ua ’ite ’oia nāhea ’ia tauturu ia tātou.

Alama 7:19–20

E mea ’āfaro te ’ē’a nō te ho’i i te Metua i te Ao ra ’e ia Iesu Mesia ra.

Nāhea ’outou i te fa’a’ohipa i te fa’ata’ara’a a Alama nō te ’ē’a ho’ira’a i te Metua i te Ao ra nō te tauturu i te mau tamari’i ’ia ha’api’i mai ’ia rave i te mau mā’itira’a maita’i ?

Mau ’ohipa e nehenehe e rave

• Tai’o Alama 7:19 i te mau tamari’i, ’e e fa’ata’a ē, ’ia rave ana’e tātou i te mau mā’itira’a maita’i, tei ni’a tātou i te ’ē’a e arata’i atu i te Metua i te Ao ra. Hōro’a i te mau tamari’i i te hō’ē ’āna’ira’a mā’itira’a ’e ’aore rā ’ohipa (mai te rirora’a ’ei ta’ata ’ino i ni’a i te mau melo o te ’utuāfare ’e ’aore rā, te tāvinira’a ia rātou). Ani ia rātou ’ia parau mai ia ’outou, e mea maita’i ānei te mā’itira’a tāta’itahi ’e e arata’i ānei te reira i te Atua ra ’e ’aore rā, e mea ’ino ānei ’e e fa’aātea te reira iāna.

• Tai’o i te Alama 7:20 ’e e tauturu i te mau tamari’i ’ia hāro’aro’a i te mau ta’o i roto i teie mau ’īrava ’o tē fa’ata’a ra i te ’ē’a nō te ho’i i te Atua ra. Pāpa’i hōho’a i ni’a i te tāpura ’ere’ere i te hō’ē ’ē’a ’āfaro mai ia tātou haere atu i te Metua i te Ao ra. I muri iho e pāpa’i hōho’a i te hō’ē ’ē’a tīpu’upu’u ma te tahi mau haerera’a e arata’i ’ore atu i te Atua. Ani te mau tamari’i ’ia pe’e i nā ’ē’a e piti ’e tō rātou manimani rima. Tei hea te ’ē’a maita’i a’e ? Tauturu ia rātou ’ia feruri i te mau mā’itira’a maita’i ’o tē tāuturu ia rātou ’ia vai noa i ni’a i te ’ē’a ’āfaro.

ītona ha’api’ira’a

Ha’api’i i te ha’api’ira’a tumu : Mau tamari’i pa’ari

Alama 5:12–14, 27–28, 57 ; 7:14–24

E tītauhia iā’u ’ia fānau-fa’ahou-hia ’e ’ia pe’e i te ’ē’a e arata’i atu i te Atua ra.

Nāhea ’outou i te tauturu i te mau tamari’i ’ia hāro’aro’a i te aura’a nō te parau fānau-fa’ahou-hia ?

Mau ’ohipa e nehenehe e rave

• Fa’a’ite i te mau tamari’i i te hō’ē hōho’a o te hō’ē ’aiū, ’e e ani ia rātou ’ia parau mai nō ni’a i te huru o te hō’ē ’aiū ’ia fānau-’āpī-hia mai ’oia. Ani i te hō’ē tamari’i ’ia tai’o i te Alama 5:14. Nō te tauturu i te mau tamari’i ’ia hāro’aro’a e aha te aura’a ’ia « fānau-vārua-hia i tā te Atua ra », e ani ia rātou ’ia feruri nō ni’a i te huru o Alama tamaiti hou ’oia ’a fa’afāriuhia ai. E aha tōna huru i muri a’e ? (Hi’o Mosia 27:23–32 ’e Alama 36:12–24.) Fa’ata’a ē, ’ia roa’a tō tātou fa’aro’o ia Iesu Mesia ’e e ora ho’i i tāna ’evanelia, e au ïa ē, tē ha’amata ra tātou i te hō’ē orara’a ’āpī, mai te hō’ē ’aiū.

• Tai’o ’āmui i te Alama 7:19, ’e e fa’ata’a ē, i muri a’e i tō tātou fānau-fa’ahou-ra’a, tītauhia ia tātou ’ia pe’e « i te ’ē’a e arata’i atu i te Atua ra ». Huna haere nā roto i te piha i te mau ’api parau ’ua pāpa’ihia teie mau ’īrava pāpa’ira’a mo’a i ni’a iho : Alama 5:12–13, 27–28, 57 ; 7:14–16, 23–24. Ani i te mau tamari’i ’ia mā’imi i te mau ’āpī parau, ’ia ’imi i te mau ’īrava, ’e ’ia fa’a’ite mai e aha tā te ’īrava tāta’itahi e ha’api’i ra e ti’a ia tātou ’ia rave nō te ho’i i mua i te aro o te Atua.

Alama 5:14, 44–48

E roa’a tō’u iho ’itera’a pāpū nā roto i te Vārua Maita’i.

’Ua haere mai te hō’ē melahi e fārerei ia Alama, terā rā mea, « nā roto i te Vārua Maita’i o te Atua i ’ite ai ’oia » i tōna ’itera’a pāpū (Alama 5:46).

Mau ’ohipa e nehenehe e rave

• Tai’o ’e te mau tamari’i i te Alama 5:44–46. E aha tā Alama i rave nō te fāri’i i tōna iho ’itera’a pāpū nō te ’evanelia ? Hōro’a i te tamari’i tāta’itahi i te hō’ē tuha’a ’api parau ’e e ani ia rātou ’ia hāmani i te hō’ē fa’anahora’a nō te rave i teie hepetoma nō te ha’apūai i tō rātou ’itera’a pāpū.

• Hōro’a fa’a’ati i te hō’ē hi’o ’e e vaiiho i te mau tamari’i ’ia hi’o i tō rātou hōho’a ’a tai’o ai ’outou i te Alama 5:14. E aha te aura’a ’ia noa’a te hōho’a o te Fa’aora i tō ’outou nā mata ? Fa’a’ite i te tahi mau taime ’a parau ai ’e ’aore rā, ’a rave ai te hō’ē ta’ata i te hō’ē mea tei fa’aha’amana’o ia ’outou i tō ’outou Fa’aora, ’e e ani i te mau tamari’i ’ia nā reira ato’a.

Alama 7:10–13

’Ua rave te Fa’aora i ni’a iāna iho i tā’u mau hara, tō’u mau māuiui ’e tō’u mau ’ati.

’A tuatāpapa ai ’outou i te Alama 7, ’a feruri nāhea ’outou i te patu i te fa’aro’o ia Iesu Mesia o te mau tamari’i ’ia ti’a ia rātou ’ia fāriu atu i ni’a iāna ra i roto i tō rātou mau tāmatara’a.

Mau ’ohipa e nehenehe e rave

• Ani i te mau tamari’i ’ia tai’o i te Alama 7:11–13, ma te ’imi i te mau mea tā Iesu Mesia i mamae. E hina’aro paha rātou e fa’a’ite mai i te mau taime ’a māuiui ai rātou, ’a ma’ihia ai ’e ’a hepohepo ai. ’Ia au i teie mau ’īrava, nō te aha te Fa’aora i hina’aro ai ’ia mamae i teie mau mea ato’a ? (E fa’ata’a ē, te aura’a nō te parau « fa’aora » ’o te « tauturu » ïa.)

• Parau i te mau tamari’i nō ni’a i te ma’i, te pēpē, ’e ’aore rā, te tahi atu mau ’ati tā ’outou e fa’aruru nei, ’e e ani ē ’ua fāri’i ato’a ānei rātou i te mau mea mai teie te huru. Tai’o ’āmui i te Alama 7:11–13, ’e e ha’apāpū ē, e aha tā Iesu i mamae nō tātou. Tauturu i te mau tamari’i ’ia feruri i te mau taime ’a fāri’i ai te Fa’aora i teie mau mea, mai te taime ’a fa’ahemahia ai ’oia, (hi’o Mataio 4:1–11) ’e ’aore rā i te taime ’a mamae ai ’oia i Getesemane. Nāhea te ’itera’a ē, ’ua ’ite Iesu i tō tātou mau arora’a, e tauturu ia tātou ? Fa’a’ite i tō ’outou ’itera’a pāpū nō ni’a i te mana o Iesu nō te tāmāhanahana, nō te tauturu, ’e nō te fa’aora ia tātou.

ītona ’apora’a ha’api’ira’a

Fa’aitoito i te ha’api’ira’a mai i te fare

Ani i te mau tamari’i ’ia fa’atārere i te hō’ē hōho’a nō Iesu i te hō’ē vāhi e ti’a ia rātou ’ia ’ite tāmau noa i te reira nō te fa’aha’amana’o ia rātou i te mea tā rātou i ha’api’i mai nō ni’a iāna i teie mahana.

Ha’amaita’ira’a i tā tātou ha’api’ira’a

Ha’amaita’i ’ei ’orometua mai te huru Mesia. ’Ei ’orometua, e mea faufa’a ’ia feruri i te mau rāve’a e nehenehe ai ’outou e fa’arahi i tō ’outou ’aravihi nō te tauturu i te mau tamari’i ’ia patu i tō rātou fa’aro’o i te Metua i te Ao ra ’e ia Iesu Mesia. ’A feruri i te fa’a’ohipa i te mau uira’a hi’opo’ara’a i ni’a i te ’api  37 o te Ha’api’ira’a mai tā te Fa’aora.

’api ’ohipara’a : e nehenehe au ʼia riro mai te Fa’aora.