Ha’api’i i te ha’api’ira’a tumu mau,nā Michael T. Malm Malm

8–14 nō Tiunu

Alama 8–12

« E haere mai Iesu Mesia nō te fa’aora i tōna ra mau ta’ata »

’A tai’o ai ’outou i te mau mea tā Alama ’e Amuleka i ha’api’i i te mau ta’ata nō Amoniha, i tō ’outou mana’o, e aha te mea e riro ’ei mea faufa’a ta’a ’ē nō te mau tamari’i tā ’outou e ha’api’i nei ?

Pāpa’i i te mau mana’o e tae mai

Tītau i te mana’o

Ani i te mau tamari’i ’ia fa’ata’a mai e aha te ’ohipa a te mau misiōnare ’e ’ia parau ato’a mai nō ni’a i te hō’ē ta’ata tā rātou i ’ite e tāvini nei i te hō’ē misiōni. E aha tā te mau misiōnare e ha’api’i nei i te ta’ata ? Tauturu i te mau tamari’i ’ia hi’o ē, e misiōnare ’o Alama ’e ’o Amuleka tei fa’a’ite i te ’evanelia i te mau ta’ata nō Amoniha.

Ha’api’i i te ha’api’ira’a tumu : Mau tamari’i ’āpī

Alama 8

E nehenehe au e fa’a’ite i te ’evanelia.

’Ua rātere Alama nā roto i te fenua tā’āto’a nō te poro i te ’evanelia, ’e ’ua poro ’o Amuleka i roto i tōna iho ’oire i tōna mau hoa ’e te mau ta’ata tupu. Nāhea ʼoutou i te fa’auru i te mau tamariʼi ʼia pe’e i tō rāua hi’ora’a ’e ’ia fa’a’ite i te ’evanelia ia vetahi ʼē ?

Mau ’ohipa e nehenehe e rave

• Tai’o ’āmui i te ’āfara’a mātāmua o te « Pene 22 : Te misiōni a Alama i Amoniha » (Te mau ’ā’amu o te Buka a Moromona, 58–63 ; hi’o ato’a i te video tano i ni’a ChurchofJesusChrist.org). Ani i te mau tamari’i ’ia tāpe’a ’āpipiti i te rima ’e ’ia feruri, ’o Amuleka ’e ’o Alama rātou, tei ha’api’i ’āmui i te ’evanelia, ’a hīmene ai rātou i te hō’ē hīmene nō ni’a i te ’ohipa misiōnare, mai te « Je voudrais déjà partir en mission » (Chants pour les enfants, 90).

• Tauturu i te mau tamari’i ’ia fa’ahiti fa’ahou i te hō’ē parau mau o te ’evanelia e rave rahi taime, mai teie « Te fa’a’ite pāpū nei te Buka a Moromona nō te Mesia » ’e ’aore rā, « ’Ua ’ite au tē here nei Iesu iā’u ». I muri iho, e ani i te tamari’i tāta’itahi ’ia tāmata i te fa’a’ite i teie parau mau i te tahi atu ta’ata i roto i te piha ha’api’ira’a. ’Ei tuha’a nō teie ’ohipara’a, e nehenehe ’outou e tauturu i te mau tamari’i ’ia fa’a’ī i te ’api ’ohipara’a o teie hepetoma.

• Ani i te mau tamari’i ’ia parau mai ia ’outou nō ni’a i te hō’ē mea tā rātou i fa’a’ite i te hō’ē melo o te ’utuāfare ’e ’aore rā, i te hō’ē hoa—mai te hō’ē tao’a ha’uti ’e ’aore rā, hō’ē monamona. Tauturu ia rātou ’ia tāpura i te tahi mau mea faufa’a tā tātou e nehenehe e fa’a’ite ia vetahi ’ē nō ni’a ia Iesu Mesia. E fa’ata’a ē, nō te faufa’a rahi o te ’evanelia, ’ua haere ’o Alama e fa’a’ite i te reira i te ta’ata i roto e rave rahi mau ’oire ’ia ti’a ho’i ia rātou ’ia ha’api’i mai, nāhea ’ia roa’a te ’oa’oa.

Alama 8:18–22

E nehenehe au e riro ʼei hoa maita’i.

’Ua riro te tāvinira’a a Amuleka ia Alama ’ei hi’ora’a maita’i nō te mau tamari’i nāhea rātou ’ia here ’e ’ia tāvini ia vetahi ’ē.

Mau ’ohipa e nehenehe e rave

• Ani i te hō’ē tamari’i ’ia fa’ahua, ’o Amuleka ’oia ’e te tahi fa’ahou tamari’i ’ia fa’ahua, ’o Alama ’oia ’a fa’ati’a ai ’outou i te ’ā’amu i roto i te Alama 8:18–22. Vaiiho i te mau tamari’i ’ia tauturu mai i te fa’ati’ara’a i te ’ā’amu, ’e e ani i te tahi atu mau tamari’i ’ia riro ’ei Alama ’e ’ei Amuleka. Nāhea Amuleka i te rirora’a ’ei hoa maita’i nō Alama ? Ani i te mau tamari’i ’ia paraparau mai nō ni’a i te rirora’a te hō’ē ta’ata ’ei hoa nō rātou. E aha tā teie ’itera’a i fa’atupu i roto ia rātou ? Nō te aha te Atua e hina’aro ai ia tātou ’ia riro ’ei mau hoa maita’i nō vetahi ’ē ?

• ’Imi ’e ’aore rā, e pāpa’i hōho’a nō te fa’ahōho’a i te auhoara’a (mai teie e piti ta’ata e tauahi ra ’e ’aore rā, hō’ē māfatu), ’e e tāpūpū i te reira ’ei mau tuha’a puzzle. I muri i te tuha’a puzzle tāta’itahi, e pāpa’i i te hō’ē mea tā Alama ’e ’o Amuleka i rave nō te riro ’ei mau hoa maita’i ’e ’aore rā, te mau mea tā tātou e nehenehe e rave nō te riro ’ei hoa maita’i. Ani i te mau tamari’i te tahi i muri mai i te tahi’ia mā’iti i te hō’ē tuha’a,’e ’ia tu’u i te reira i roto i te puzzle ’a tai’o ai ’outou i te mea i pāpa’ihia i muri. Tauturu ia rātou ’ia feruri i te mau ta’ata e nehenehe rātou e riro ’ei hoa. Fa’a’ite pāpū ē, ’o Iesu Mesia tō tātou hoa rahi a’e.

E nehenehe tātou e riro ’ei mau hoa maita’i nō vetahi ’ē.

Alama 11:43–44

I muri a’e i te pohera’a, e ti’afa’ahou mai au.

’Ua ha’api’i Amuleka i te mau ta’ata nō Amoniha nō ni’a i te ti’afa’ahoura’a. Nāhea ’outou i te tauturu i te mau tamari’i tā ’outou e ha’api’i ra ’ia hāro’aro’a i te aura’a o te parau ’ia ti’afa’ahou ?

Mau ’ohipa e nehenehe e rave

• Fa’a’ohipa i tō ’outou rima nō te fa’ahōho’a i te hō’ē vārua, ’e e fa’a’ohipa i te hō’ē rimarima nō te fa’ahōho’a i te hō’ē tino. Tātara i tō ’outou rima i rāpae i te rimarima nō te fa’a’ite i te mau tamari’i ē, e fa’ata’a-’ē-hia tō tātou vārua ’e tō tātou tino i te pohera’a. I muri iho e tu’u fa’ahou i tō ’outou rima i roto i te rimarima nō te fa’a’ite ē, e ’āmui-fa’ahou-hia tō tātou vārua ’e tō tātou tino i te ti’afa’ahoura’a. Vaiiho i te mau tamari’i, te tahi i muri mai i te tahi,’ia ’ō’omo i te rimarima ’e ’ia tātara, ’a tai’o ai ’outou i te Alama 11:43 ia rātou. Fa’a’ite i te hōho’a o Maria ’e o Iesu Mesia tei ti’afa’ahou (Vaira’a hōho’a ’evanelia, no. 59), ’e e fa’a’ite pāpū ē, ’aua’a Iesu Mesia i ti’a ai i te mau ta’ata ato’a ’ia ti’afa’ahou.

• Ani i te mau tamari’i ’ia pāpa’i hōho’a i tō rātou mau hoa ’e ’aore rā, te mau melo o tō rātou ’utuāfare, ’e tae noa atu i te mau melo o te ’utuāfare fēti’i. ’A fa’a’ite ai te mau tamari’i i tā rātou mau hōho’a, ’a fa’atoro i ni’a i te hoa tāta’itahi ’e ’aore rā, te melo o te ’utuāfare tā rātou i pāpa’i ma te fa’ata’a ē, e ti’afa’ahou ’oia. Fa’a’ite pāpū ē, aua’a Iesu i ti’a ai ia tātou ’ia pārahi i pīha’i iho i tō tātou ’utuāfare ē a muri noa atu.

Ha’api’i i te ha’api’ira’a tumu : Mau tamari’i pa’ari

Alama 8–10

E nehenehe tā’u e fa’a’ite i te ’evanelia.

’Ua fa’a’ite Alama ’e ’o Amuleka i te ’evanelia, noa atu i te mau taime e ’ere i te mea ’ōhie. Nāhea tō rāua itoito ’e te fa’aro’o i te fa’auru i te mau tamari’i tā ’outou e ha’api’i nei ?

Mau ’ohipa e nehenehe e rave

• Nā roto i tā ’outou iho mau parau, ’a ha’apoto i te mau ’ohipa i tupu i roto i te Alama 8-10. Mā’iti e rave rahi parau tumu nō roto mai i teie mau ’ohipa i tupu ’o tē nehenehe e tauturu i te mau tamari’i ’ia fa’a’ite i te ’evanelia, mai te tāpe’a-māite-ra’a (hi’o Alama 8:8–13), mai te fa’a’ite-pāpū-ra’a nō te Mesia (hi’o Alama 9:26–27), ’e te fāri’ira’a i te hō’ē hoa (hi’o Alama 10:7–11). Ani i te mau tamari’i ’ia tai’o i te mau ’īrava i mā’itihia ’e ’ia fa’ati’a e aha tā rātou i ha’api’i mai nō ni’a i te fa’a’itera’a i te ’evanelia. Nō te aha e mea faufa’a ’ia parau i te ’evanelia ia vetahi ’ē ?

• Ani i te mau tamari’i ’ia fa’a’ite mai i te mau ’itera’a ’a fa’a’ite ai rātou i te ’evanelia i te hō’ē ta’ata, ’e ’aore rā, e fa’a’ite i te ’ohipa i tupu nō ’outou. Ani i te mau tamari’i ’ia fa’aro’o i te mau rāve’a nō te fa’aineine ia rātou nō te fa’a’ite i te ’evanelia ’a hīmene ai rātou i te hō’ē hīmene nō ni’a i te ’ohipa misiōnare, mai te « Proclamons la vérité » (Chants pour les enfants, 92–93). Nō te aha te Metua i te Ao ra i hinaʼaro ai ʼia fa’a’ite tātou i te ’evanelia ? Tauturu i te mau tamari’i ’ia fa’anaho i te mau rāve’a nō te fa’a’ite i te ’evanelia i tō rātou mau hoa, mai te hōro’ara’a i te hō’ē Buka a Moromona ’e ’aore rā, te anira’a ia rātou ’ia haere mai i te hō’ē ’ohipara’a nā te ’Ēkālesia. Hōro’a i te taime ia rātou nō te ha’uti mai i te mea tā rātou e parau ’e ’aore rā, e rave i roto i taua mau taime ra.

Alama 11–12

Te fa’anahora’a a te Atua, e rāve’a ïa nō te fa’aorara’a.

Nāhea ’outou i te fa’a’ohipa i te Alama 11–12 nō te « [fa’a’ite] i te mau [tamari’i] i te fa’anahora’a nō te fa’aorara’a ? » Alama 5:59

Mau ’ohipa e nehenehe e rave

• Pāpa’i i ni’a i te tāpura ’ere’ere i te tahi mau parau tumu e tū’ati i ni’a i te fa’anahora’a nō te fa’aorara’a ’o tē ’itehia i roto i te Alama 11–12, mai te hi’ara’a o Adamu ’e o Eva, te tāra’ehara a Iesu Mesia, te tātarahapa, te pohe, te ti’afa’ahoura’a, ’e te ha’avāra’a. Tai’o i te tahi mau ’īrava i roto i te Alama 11 ’e ’aore rā 12 ’o tē ha’api’i nei nō ni’a i te mau parau tumu, ’e e hōro’a i te taime i te mau tamari’i ’ia pāpa’i hōho’a e fa’ahōho’a ra i te parau tumu tāta’itahi. E aha te ’ohipa a te Fa’aora i roto i teie fa’anahora’a ? I muri iho e ani i te mau tamari’i ’ia fa’a’ohipa i tā rātou mau hōho’a mai te mea ra ē, tē ha’api’i ra rātou i te hō’ē hoa nō ni’a i te fa’anahora’a a te Atua.

Alama 12:10

Mai te mea e’ita vau e fa’a’eta’eta i tō’u ’ā’au, e nehenehe au e fāri’i hau atu i te parau a te Atua.

Nō ni’a i te ’apora’a mai i te mau parau mau pae vārua, e mea faufa’a te huru o tō tātou ’ā’au ’e o tō tātou ferurira’a.

Mau ’ohipa e nehenehe e rave

• Tai’o ’āmui i te Alama 12:10, ’e e ’āparau e aha te aura’a nō tē parau, « fa’a’eta’eta » i tō tātou ’ā’au. Nō te aha e mea fifi nō te hō’ē ’ā’au ’eta’eta ’ia ha’api’i mai nō ni’a i te Atua ?

• Nō te fa’ahōho’a i teie parau tumu, e fa’a’ite i te mau tamari’i i te hō’ē rimu ’e hō’ē ’ōfa’i ’e e ani ia rātou ’o vai tē ’ote maita’i a’e i te pape. Nāhea tātou i te fa’a’ite i te Fatu ē, tē hina’aro nei tātou ’ia marū tō tātou ’ā’au mai te hō’ē rimu ?

Fa’aitoito i te ha’api’ira’a mai i te fare

Ani i te mau tamari’i ’ia ’imi i te mau rāve’a nō te fa’a’ite i te ’evanelia ’e ’aore rā, nō te tauturu atu i te hō’ē ta’ata ’ē i teie hepetoma.

Ha’amaita’ira’a i tā tātou ha’api’ira’a

Fa’a’ite i te ’itera’a pāpū i tā ’outou piha ha’api’ira’a. E nehenehe te hō’ē ’itera’a pāpū e ’ōhie roa mai mai teie, « ’ua ’ite au ē, ’ua here te Metua i te Ao ra ia ’outou tāta’itahi » ’e ’aore rā « e tupu te au māite i roto iā’u, ’ia ha’api’i mai au nō ni’a ia Iesu Mesia » (Hi’o ato’a Ha’api’ira’a mai tā te Fa’aora, 11.)