« 15–21 nō Tiunu. Alama 13–16 : ‘Ō i roto i te fa’aeara’a o te Fatu ra’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)

« 15–21 nō Tiunu. Alama 13–16 », Mai, pe’e mai—nō te ta’ata hō’ē ’e te ’utuāfare : 2020

Hōho’a

’O Alama ’e Amuleka e haere mai ra i rāpae i te fare tāpe’ara’a

Fa’ahōho’ara’a nō Alama rāua Amuleka tei fa’aorahia mai nā roto mai i te fare tāpe’ara’a, nā Andrew Bosley

15–21 nō Tiunu

Alama 13–16

« Ō i roto i te fa’aeara’a o te Fatu ra »

E tao’a rahi te fa’aurura’a tā ’outou e fāri’i nei ’ia feruri ’outou i ni’a i te mau pāpa’ira’a mo’a. E ti’a ia ’outou ’ia fa’a’ite ē tē ha’afaufa’a nei ’outou i te reira nā roto i te pāpa’ira’a i te reira ’e i te ’ohipara’a i ni’a i te reira.

Pāpa’i i tō ’outou mau mana’o

E nehenehe e parau ē ’ua ora maita’i Amuleka ’e Zeezeroma i Amoniha. E « ta’ata ro’o rahi » ’o Amuleka, « e rave rahi [tōna] fēti’i » ’e « ’ua noa’a [tāna] tao’a rahi » (Alama 10:4). E « ta’ata pa’ari roa » ’o Zeezeroma i roto i te mau ha’api’i ture ’e « e ’ohipa rahi ho’i tāna » (Alama 10:31). Tae mai nei Alama i Amoniha ma te anira’a hanahana ’ia tātarahapa ’e ’ia « ō… i roto i te fa’aeara’a o te Fatu ra » (Alama 13:16). Nō Amuleka, nō Zeezeroma ’e nō te tahi mau pu’era’a, ’ua tītau te fāri’ira’a i teie anira’a i te tusia ’e tae noa atu te ’ati rahi fātata e’ita e nehenehe e amo.

’Aita rā te ’ā’amu e hope i reira. I roto i te Alama 13–16, tē ha’api’i mai nei tātou e aha tē tupu i te hope’a nō te feiā e ti’aturi i « te mana o te Mesia e ora ai te ta’ata » (Alama 15:6). I te tahi taime tē vai ra te fa’aorara’a, te tahi taime te ora o te māuiui—’e i te tahi taime e mea fifi te mau mea i roto i teie orara’a. Tāmau noa rā, « nā te Fatu [te mau ta’ata nōna] e rave i ni’a iāna iho i roto i te hanahana » (Alama 14:11). Tāmau noa, e « hōro’a mai ho’i te Fatu i te mana ia [tātou] mai te au i tō [tātou] fa’aro’o, ’o tei roto i te Mesia » (Alama 14:28). ’E tāmau noa te reira « fa’aro’o i te Fatu ra » i te hōro’a ia tātou i te « tīa’i i te ora mure ’ore » (Alama 13:29). ’Ia tai’o ’outou i teie mau pene, e ti’a ’ia fāri’i i te tāmāhanahanara’a i roto i teie mau parau ’e e riro paha ’outou i te māramarama maita’i a’e i tā Alama i parau ’a parau ai ’oia nō te « fa’aeara’a o te Fatu ra. »

Hōho’a

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

Alama 13:1–19

E tauturu te mau ’ōro’a autahu’ara’a iā’u ’ia fāri’i i te tāra’ehara nā roto ia Iesu Mesia.

E ha’amana’o paha ’oe ē i roto i te Alama 12, ’ua ha’api’i Alama nō ni’a i te rāve’a ora (hi’o Alama 12:24–27). I roto i te pene 13, ’ua paraparau ’oia nō te mau tahu’a tā te Atua i fa’atōro’a nō te « ha’api’i mai i taua mau mea nei i te ta’ata nei » (Alama 13:1). Tē fa’a’ite nei te mau parau a Alama e rave rahi parau mau mana rahi nō ni’a i te autahu’ara’a. Penei a’e e nehenehe tā ’oe e tāmata i te hi’o mai hō’ē a’e parau i roto i te ’īrava tāta’itahi nō Alama 13:1–9. Teie te tahi mana’o nō te ha’amata :

’Īrava 1 :’Ua pi’i-ato’a-hia te autahu’ara’a te « ha’apa’ora’a a te Tamaiti a te Atua » (hi’o ato’a PH&PF 107:1–4).

’Īrava 2 :Tē fa’atōro’a nei te Atua i te mau tahu’a nō te tauturu i te mau ta’ata ’ia hi’o i ni’a i tāna Tamaiti nō te tāra’ehara.

’Īrava 3 :’Ua fa’aineinehia te mau ta’ata e mau nei i te autahu’ara’a nō tāna mau hōpoi’a « mai te tumu mai ā o teie nei ao ».

E aha atu ā tā ’oe e ’ite ra ? E aha tō ’oe mana’o nō ni’a i te autahu’ara’a ’ia feruri ’oe i teie mau parau mau ? Nāhea te mau ’ōro’a autahu’ara’a i te tauturu ia ’oe ’ia hi’o i ni’a i te Mesia nō te tāra’ehara ?

E tano ’ia hi’o ē, e rave rahi ta’ata i Amoniha e feiā pe’e ia Nehora (hi’o Alama 14:18 ; 15:15). E aha te ta’a-’ē-ra’a i roto i te mau tahu’a nō te ha’apa’ora’a a Nehora (hi’o Alama 1:3–6) ’e te mau tahu’a tei fa’atōro’ahia mai te au i te « ha’apa’ora’a a te Tamaiti a te Atua » (PH&PF 107:3), tā Alama i fa’ahiti ? (hi’o Alama 13:1–19).

Hi’o ato’a Dale G. Renlund, « Te Autahuʼaraʼa ’e te mana tāra’ehara a te faʼaora », Ensign ’aore rā Liahona, Nov. 2017, 64–67.

Tē tauturu nei te mau ’ōro’a autahu’ara’a ia tātou ’ia hi’o i ni’a ia Iesu Mesia nō te tāra’ehara.

Alama 13:3

’O te feiā noa ānei tei mau i te autahu’ara’a tei « parauhia ’e tei fa’aineinehia mai te tumu mai ā o teie nei ao » ?

Tē fa’ahiti ta’a ’ē nei te mau ha’api’ira’a a Alama i roto i te Alama 13:3 i te parau nō te feiā e mau nei i te autahu’ara’a. Teie rā, e tano te parau tumu tāna i ha’api’i ē—’ua fāri’i te mau ta’ata i te tonora’a ’e ’ua fa’aineinehia rātou nō te fa’atupu i te reira « mai te tumu mai ā o te ao nei »—nō tātou pā’āto’a ïa. ’Ua nā ’ō te peresideni Spencer W. Kimball : « I roto i te ao nā mua tātou i haere mai ai i’ō nei, ’ua hōro’ahia te tahi mau hōpoi’a i te mau vahine ha’apa’o maita’i ’e ’ua fa’ata’ahia te mau tāne ha’apa’o maita’i nō te tahi mau ’ohipa a te autahu’ara’a. Noa atu ’aita tātou e ha’amana’o nei i te mau tuha’a nō te reira, e’ita te reira e taui i te huru hanahana mau o tā tātou i fāri’i a’ena » (Te Mau Ha’api’ira’a a te Mau Peresideni o te ’Ēkālesia : Spencer W. Kimball [2006], 262 ; hi’o ato’a PH&PF 138:55–56).

Alama 14

I te tahi taime e fa’ati’a te Atua ’ia mamae te feiā parau ti’a.

Tē fa’ati’a nei te Alama 14 nō te feiā parau ti’a tei mamae ’e tei pohe roa nō tō rātou mau ti’aturira’a. E uiui paha tō ’oe mana’o mai te mau ta’ata e rave rahi ē, nō te aha te mau mea ri’ari’a e tupu i ni’a i te mau ta’ata e tāmata nei i te ora ma te parau ti’a. E’ita paha ’oe e ’ite pau roa mai i te mau pāhonora’a i teie uira’a fifi i roto i te Alama 14, e nehenehe rā e ha’api’i rahi i roto i te huru Alama ’e Amuleka i te pāhonora’a i te ’ohipa tā rāua i fa’aruru. E aha tā rāua mau parau ’e mau ’ohipa e ha’api’i nei ia ’oe nō ni’a i te tumu te Fatu e fa’ati’a ai i te tahi taime ’ia mamae te feiā parau ti’a ? E aha tā ’oe i ha’api’i mai nā roto mai ia rāua nō ni’a i te fa’arurura’a i te hāmani-’ino-ra’a ?

Hi’o ato’a Mataio 5:43–44 ; Mareko 14:55–65 ; Romas 8:35–39 ; 1 Petero 4:12–14 ; Te Parau Ha’api’ira’a ’e te mau Parau Fafau 122:5–9.

Alama 15:16, 18

E tītau te ti’ara’a pipi i te fa’atusiara’a.

E mea au ’ia fa’ati’a i te hō’ē tāpura nō te mau mea tā Amuleka i vaiiho nō te fāri’i i te ’evanelia (hi’o Alama 10:4–5 ; 15:16) ’ei reira e fa’aau atu ai i te hō’ē tāpura nō te mau mea tāna i ’āpī mai (hi’o Alama 15:18 ; 16:13–15 ; 34:8). E aha tā ’oe i ineine e fa’atusia nō te riro ’ei pipi ha’apa’o maita’i atu ā ?

Hōho’a

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Alama 13

E nehenehe tō ’outou ’utuāfare e ’āpī nā roto i te tāpa’ora’a i te mau taime ato’a e ’ite rātou i te parau « fa’aeara’a » i roto i te Alama 13. E aha te tahi atu mau ta’o ’e mau mana’o e ’āpe’e i te reira ? Nāhea te reira e tauturu ai ia tātou ’ia māramarama e aha « te fa’aeara’a o te Fatu » ? E aha te ta’a-’ē-ra’a i roto i te fa’aeara’a pae tino ?

Alama 13:10–12

’Ei tauturura’a i tō ’outou ’utuāfare e hi’o mana’o i tā teie mau ’īrava e ha’api’i nei, e nehenehe tā ’outou e hōroi ’āmui i te hō’ē mea—mai te tahi ’ahu ’uo’uo. E aha te mana’o ’ia repo tātou ? E aha te mana’o ’ia mā tātou ? E aha te tū’atira’a o teie mau mana’o ’e te mau mana’o nō te harara’a ’e i muri iho nō te tātarahapara’a ’e nō te tāmāra’a ia tātou nā roto i te tāra’ehara a te Fa’aora ?

Alama 15:1–12

E aha tā tātou e ha’api’i nei i roto i te ’ohipa i tupu nō Zeezeroma nō ni’a i te mana o Fatu nō te ha’apūai ’e nō te fa’aora i tō tātou māuiui, noa atu ā nā tātou te hape ? E aha tā te autahu’ara’a e nehenehe e rave nō te fāri’ira’a tātou i tōna pūai ’e tāna fa’aorara’a i te māuiui ?

Alama 16:1–10

I muri iho i te tai’ora’a i teie mau ’īrava, e nehenehe e tai’o i te Alama 9:4. E aha tā tātou e nehenehe e ha’api’i mai nā roto i te fa’aaura’a i te huru o Zorama i te fāri’ira’a i te mau parau a te Atua ’e te huru te mau ta’ata nō Amoniha i te fāri’ira’a i te reira ? E aha tā tātou e rave nei nō te ha’apa’o maita’i i te mau parau a tō tātou mau peropheta ora ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’ira’a i tā tātou ha’api’ira’a

’Ia vai ineine noa. E tere ’oi’oi te mau taime ha’api’ira’a, nō reira ’a haru mai i te reira ’ia tupu ana’e mai. ’Ei hi’ora’a, e nehenehe te hō’ē ’ati i roto i te ao e riro ’ei rāve’a nō te fa’a’ite i te mau parau tumu i roto i te Alama 14 nō ni’a i te tumu te Fatu e fa’ati’a ai i te tahi taime ’ia mamae te feiā hara ’ore. (Hi’o Ha’api’ira’a mai tā te Fa’aora, 16.)