Xjultikankil li yaalil tzol’leb’, xb’aan laj Michael T. Malm

8–14 junio

Alma 8–12

Li Jesukristo taachalq chixtojb’al rix lix tenamit

Xtzolb’aleb’ li loq’laj hu naxk’e xb’oqb’al li k’utb’esinb’il na’leb’. Chi jo’kan, naq nakawil ru Alma 8–12, tz’iib’aheb’ li musiq’anb’il na’leb’ re li Musiq’ej naq a’an naxk’ut chawu li na’leb’ sa’ li raatineb’ laj Alma ut laj Amulek.

Xtz‘iib‘ankil li nakak‘oxla

Ink’a’ taasachmanq lix k’anjel li Dios. A’b’anan, wan naq chanchan naq nasachman lix yalb’al qaq’e chi tenq’ank sa’ lix k’anjel—malaj ut ink’a’ naqil sa’ junpaat li naqaj naq taak’ulmanq. Wan naq naqeek’a tana’ jo’ kireek’a laj Alma naq kixjultika li evangelio sa’ Ammonihah—tz’eqtaananb’il, chuub’anb’il, ut isinb’il chaq. A’b’an, naq jun li anjel kixye re naq taasutq’iiq ut tixyal wi’chik, laj Alma “sa’ junpaat kisutq’i” chi kaw xch’ool (Alma 8:18), ut li Dios kixkawresi lix b’e. Ink’a’ ka’ajwi’ kixkawresi li tzakemq choq’ re laj Alma ut jun li na’ajej taaruuq taahilanq wi’, a’an kixkawresi ajwi’ laj Amulek, li ki’ok choq’ jun rech aj k’anjel, jun kawil aj kolol rix li evangelio, ut jun tz’aqal ramiiw. Naq naqak’ul li ch’a’ajkilal malaj li rahilal naq nokok’anjelak sa’ li rawa’b’ejihom li Qaawa’, naru taajultiko’q qe chan ru naq li Dios kixtenq’a ut kixk’am xb’e laj Alma, ut naru taqakanab’ qib’ chiru li Dios, naq a’an tooxtenq’a ut tixk’am ajwi’qab’e, us ta sa’ ch’a’ajkilal wanko.

Li na’leb’ re xtzolb’aleb’ li loq’laj hu aajunes

Alma 8

Naru naq lix yalb’al inq’e chixwotzb’al li evangelio naraj ru li najtil k’anjelak ut li kuyum.

Us ta maare wan ani taatz’eqtaananq re lix nawom aach’ool chirix li evangelio, misachk laa yo’onihom chirix—relik chi yaal, li Qaawa’ ink’a’ tixkanab’ li kristiaan a’an, ut a’an tixk’am aab’e re taanaw li tento taab’aanu. Li kixk’ul laj Alma, a’an naq jun li anjel kixtaqla chi sutq’iik sa’ li tenamit Ammonihah re xjultikankil li evangelio, us ta naq ak tz’eqtanaanb’il chi kaw xb’aaneb’ li kristiaan aran (chi’ilmanq Alma 8:14–16). K’a’ru nakatzol rik’in naq laj Alma kixwotz li evangelio us ta kiwan li ch’a’ajkilal ut li yale’k-ix? B’arwan reheb’ li raqal sa’ Alma 8 li neke’xnimob’resi li rajom aach’ool chixwotzb’al li evangelio?

Chi’ilmanq ajwi’ 3 Nefi 18:30–32; Jeffrey R. Holland, “Li tojok tz’aq—ut li osob’tesink—re wank choq’ tzolom,” Jolomil ch’utub’aj-ib’ re abril 2014.

Alma 9:18–25; 10:16–23

Li Dios naxraq aatin chirixeb’ li ralal xk’ajol a’ yaal li saqen ut nawom wankeb’ re.

Naq naqil ru li esilal chirix chan ru naq eb’ laj Nefita sa’ li tenamit Ammonihah ke’xhob’eb’ lix moos li Qaawa’, naru nasach sa’ qach’ool naq ke’wan chaq junxil choq’ jun tenamit li ke’paab’ank re li evangelio ut naq wanjenaqeb’ chaq choq’ jun “tenamit q’axal usilanb’ileb’ xb’aan li Qaawa’ ” (Alma 9:20). Relik chi yaal, jun xraqal li raatin laj Alma choq’ re li tenamit sa’ Ammonihah, a’an naq rik’in naq ke’xkawob’resi chaq raameb’ us ta k’a’jo’ naq osob’tesinb’ileb’ chaq, q’axal wi’chik ink’a’ us lix wanjikeb’ chiruheb’ laj Lamanita, li yookeb’ chi maakob’k chi maak’a’ xnawomeb’. K’a’ru naqatzol rik’in a’in chirix chan ru naq li Dios naraqok aatin chirixeb’ li ralal xk’ajol?

Naq nakawil ru resil li xninqal ru osob’tesink kixk’e li Dios re li tenamit aj Nefita (chi’ilmanq Alma 9:19–23), k’oxla li xninqal ru osob’tesink li xk’eehom aawe. K’a’ru yookat chixb’aanunkil re k’ulub’ejaqat re xk’ulb’aleb’ li osob’tesink a’an? K’a’ru li nakaweek’a naq tento taajal?

Chi’ilmanq ajwi’ Tzol’leb’ ut Sumwank 82:3.

Alma 11–12

Lix k’uub’anb’il na’leb’ li Dios, a’an jun k’uub’anb’il na’leb’ re li tojb’al-ix.

Eb’ li profeet sa’ lix Hu laj Mormon ke’roksi jalan jalanq k’ab’a’ej re xch’olob’ankil lix k’uub’anb’il na’leb’ li Dios choq’ reheb’ li ralal xk’ajol, jo’ li k’uub’anb’il na’leb’ re li kolb’a-ib’ malaj li k’uub’anb’il na’leb’ re sahil ch’oolejil. Sa’ Alma 11–12, laj Alma ut laj Amulek neke’xk’ab’a’i li k’uub’anb’il na’leb’ re li tojb’al-ix. Naq nakawileb’ ru li ch’ol a’an, k’oxlan chirix k’a’ut naq li aatin “tojb’al-ix” na’oksiman re xch’olob’ankil li k’uub’anb’il na’leb’. Naru ajwi’ taatz’iib’a jun xk’osb’al ru li k’a’ru ke’xk’ut laj Alma ut laj Amulek chirixeb’ li raqal a’in re li k’uub’anb’il na’leb’.

Li T’ane’k:

Laj Tojol-ix:

Li jalb’a-k’a’uxlej:

Li kamk:

Li wakliik chi yo’yo:

Li raqb’a-aatin:

K’e reetal chan ru naq li raatin li Amulek kixtoch’ xch’ooleb’ li kristiaan (chi’ilmanq Alma 11:46). K’a’ut nakak’oxla naq eb’ li na’leb’ a’an k’a’jo’ xwankileb’ ? Chan ru naq xe’jalok re laa yu’am?

Chi’ilmanq ajwi’ D. Todd Christofferson, “Lix waklijik li Jesukristo chik yo’yo,” Jolomil ch’utub’aj-ib’ re abril 2014.

Alma 12:8–18

Wi ink’a’ tinkawob’resi li waam, naru tink’ul xkomon chik li raatin li Dios.

Wankeb’ li maare neke’xpatz’ k’a’ut naq li qaChoxahil Yuwa’ ink’a’ naxk’e chi nawmank chixjunil chiqu. Sa’ Alma 12:9–14, laj Alma kixch’olob’ k’a’ut naq wan naq ramb’ileb’ lix muqmuukil na’leb’ li Dios chiqu. Eb’ li patz’om a’in naru tate’xtenq’a chixk’oxlankil li k’a’ru kixk’ut:

• K’a’ru naraj naxye xkawob’resinkil li qaam? Ma aak’ehom reetal naq wan naq nakab’aanu a’an laa’at?

• K’a’ut naq li Qaawa’ maare tixram li raatin chiruheb’ li ani xe’xkawob’resi li raameb’?

• Ma aanumsihom li yeechi’ihom re xk’ulb’al “li jun raqal li aatin li q’axal nim wi’chik”? (Alma 12:10). Chan ru xaweek’a naq xak’ul a’an?

• K’a’ru naru taab’aanu re naq li raatin li Dios “taatawmanq aawik’in”? (Alma 12:13). Wi ta natawman aawik’in li raatin li Dios, chan raj ru naq te’jalaaq “laa waatin,” “laa k’anjel,” ut “laa k’oxlahom”? (Alma 12:14).

Re xtawb’al xkomoneb’ li na’leb’ a’an, k’e reetal chan ru naq jalan wi’ laj Amulek rik’in li jun siir chik reheb’ laj Ammonihah. Chan ru naq li k’a’ru kixk’ul laj Amulek (chi’ilmanq Alma 10:1–11) naxk’ut xyaalal li k’a’ru naxk’ut laj Alma sa’eb’ li raqal a’in?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

Alma 8:10–18

K’a’ru naru naqatzol rik’in laj Alma chirix li ab’ink chiru li Qaawa’ “sa’ junpaat” (raqal 18), us ta maare ch’a’aj xb’aanunkil? Re xch’olob’ankil li na’leb’ a’in reheb’ li kok’al toj ka’ch’ineb’, taaruuq taab’aanu jun li b’atz’unk b’ar wi’ nakach’olob’ chan ru xb’aanunkil jun ch’ina k’anjel, toja’ naq taawil jarub’ k’asal neke’ajman ru chiru li komon sa’ laa junkab’al re xtz’aqob’resinkil ru li k’anjel. Qayehaq, naru taawil ani naru tixb’as jun t’ikr sa’ junpaat.

Alma 10:1–12

K’a’ru naru naqatzol rik’in lix numsihom laj Amulek sa’eb’ li raqal a’in? Chan ru naq ke’toche’ xch’ool li ani ke’ab’ink re lix ch’olob’ahom? Kanab’eb’ li komon sa’ laa junkab’al chixk’uub’ankil xna’leb’ chixb’aanunkil k’a’ruhaq sa’ li xamaan a’in a’ yaal li k’a’ru ke’xtzol rik’in lix b’aanuhom laj Amulek.

Alma 10:22–23

K’a’ru naqatzol sa’eb’ li raqal a’in chirix lix wankil jun ch’uut chi kristiaan tiikeb’ xch’ool sa’ jun li tenamit aj maak?

Alma 11:34–37

Chan ru naq jalan wi’ naq li Jesukristo nokoxkol sa’ li qamaak rik’in naq nokoxkol chiru li qamaak? (chi’ilmanq Helaman 5:10; chi’ilmanq ajwi’ 1 Jwan 1:9–10). Re xk’utb’esinkil li kixk’ut laj Amulek, naru taawotz li seraq’ sa’ xtiklajik li raatin li Elder Allen D. Haynie “Xjultikankil ani xookanab’ wi’ qib’” (Jolomil ch’utub’aj-ib’ re octubre 2015). Chan ru naq li Jesukristo nokoxkol chiru li qamaak?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li tzolok aajunes

Tzol li raatineb’ li profeet ut apostol re roso’jikeb’ li kutan. Il ru li k’a’ru xe’xk’ut li profeet ut apostol re roso’jikeb’ li kutan chirixeb’ li yaalil na’leb’ nakataw sa’eb’ li loq’laj hu. Qayehaq, taaruuq taataw jun jolomil na’leb’ sa’ Alma 8–12 ut taasik’ li na’leb’ a’an sa’ li jolomil ch’utub’aj-ib’ toje’ xnume’ (chi’ilmanq Li k’utuk jo’ li Kolonel, 21).

B’onb’il xjalam-uuch laj Alma naq nawa’ak rochb’een laj Amulek xb’aan laj Dan Burr