“3–9 ʻAokosi. ‘Alamā 43–52: ‘Tuʻu Maʻu ʻi he Tui kia Kalaisí,’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2020 (2020)
“3–9 ʻAokosi. ʻAlamā 43–52,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2020
Ki he Ngaahi Tāpuaki ʻo e Tauʻatāiná, tā ʻe Scott M. Snow
3–9 ʻAokosi
ʻAlamā 43–52
“Tuʻu Maʻu ʻi he Tui kia Kalaisí”
ʻE hā mai ʻo ngalingali ʻoku ʻikai kaunga tonu kiate koe ʻa e ngaahi meʻa ne hoko naʻe fakamatalaʻi ʻi he ʻAlamā 43–52. Kae hangē ko e folofola kotoa pē, ʻoku ʻi ai ha pōpoaki ʻa e ʻEikí maʻau. Fekumi ki ai ʻi he faʻa lotu.
Lekooti e Ngaahi Ongo ʻOkú ke Maʻú
ʻI heʻetau lau e ngaahi lea ko ʻení ʻi he kamataʻanga ʻo e ʻAlamā vahe 43—“Pea ko ʻeni ʻoku ou toe foki ki ha fakamatala ʻo e ngaahi tau ʻi he vahaʻa ʻo e kau Nīfaí mo e kau Leimaná”—ʻoku fakanatula pē ke fifili pe ko e hā naʻe fakakau ai ʻe Molomona e ngaahi talanoa tau ko ʻení ʻi he siʻisiʻi ha feituʻu ke tohi ai ʻi he ʻū lauʻi peletí (vakai, Ngaahi Lea ʻa Molomoná 1:5). Ko e moʻoni ʻoku ʻi ai haʻatau ngaahi feingatau ʻi he ngaahi ʻaho kimui ní, ka ʻoku ʻi ai ha ngaahi meʻa mahuʻinga ʻi heʻene ngaahi leá ʻoku ope atu ʻi he founga ngāue mo e fakamamahi ʻo e taú. ʻOku teuteuʻi foki kitautolu ʻe heʻene ngaahi leá ki he tau “[ʻoku tau kau kotoa ki aí]” (Ngaahi Himí, fika. 152), ʻa e tau ʻoku tau feʻao mo ia he ʻaho takitaha ʻo fehangahangai mo e ngaahi mālohi ʻo e koví. ‘Oku moʻoni ʻaupito ʻa e tau ko ʻení, pea ʻoku uesia ʻetau moʻui taʻengatá ʻi he olá. Hangē ko e kau Nīfaí, ‘oku “ueʻi hake [kitautolu] ʻe ha ʻuhinga lelei ange,” ʻa ia ko “hotau ‘Otuá, mo ʻetau lotú, mo e tauʻatāiná, mo ‘etau melinó, mo [hotau ngaahi fāmilí].” Naʻe ui eni ʻe Molonai ko e “feinga ʻa e kau Kalisitiané,” ʻa e feingatau tatau ʻoku tau maʻu he kuongá ni ( ʻAlamā 43:45; 46:12, 16).
Ngaahi Fakakaukau ki hono Ako Fakatāutaha ʻo e Folofolá
ʻOku akoʻi au ʻe he ngaahi tau ʻi he Tohi ʻa Molomoná fekauʻaki mo ʻeku ngaahi feingatau fakafepaki ki he koví.
Mahalo ʻe mahuʻingamālie ange kiate koe hono lau kau ki he ngaahi tau ʻi he vahaʻa ʻo e kau Nīfaí mo e kau Leimaná kapau te ke kumi ki hono ngaahi faitatau mo hoʻo ngaahi feingatau fakalaumālie fakatāutahá. ʻI hoʻo lau e ʻAlamā 43–52, fakatokangaʻi e ngaahi meʻa naʻe fai ʻe he kau Nīfaí ke nau lavameʻa (pe ʻikai lavameʻa) aí. Hili iá pea fakalaulauloto ki he founga ‘e lava ke ke fakaʻaongaʻi ai e meʻa ʻokú ke akó ke tokoni ke ke ikunaʻi hoʻo ngaahi feingatau fakalaumālié. ‘I hoʻo ako e ngaahi veesi hangē ko ʻení, hiki hoʻo ngaahi fakakaukau fekauʻaki mo e founga te ke lava ai ʻo muimui ki he tā sīpinga ʻa e kau Nīfaí:
-
ʻAlamā 43:19. Ne mateuteu e kau Nīfaí mo honau teunga taú. (‘E lava ke u feinga ke teuteuʻi au ʻaki ha teunga tau fakalaumālie.)
-
ʻAlamā 43:23–24. Naʻa nau fekumi ki he fakahinohino ʻa e palōfitá.
Fakatokangaʻi ange foki ʻa e founga naʻe feinga ai ʻa e kau Leimaná mo e kau Nīfai ne hē mei he moʻoní ke ikunaʻi ʻa e kau Nīfaí. ‘E lava ke fakatokanga atu e ngaahi meʻá ni fekauʻaki mo e founga ʻe ala feinga ai e filí ke ʻohofi koé. ‘I hoʻo akó, hiki e founga ʻe ala ʻohofi ai koe ʻe Sētane ʻi ha ngaahi founga tatau:
-
ʻAlamā 43:8. Naʻe feinga ʻa Seilahemena ke fakaʻitaʻi hono kakaí kae lava ke ne maʻu ha mālohi kiate kinautolu. (‘I he taimi ʻoku ou ʻita ai ki he kakai kehé, ʻoku ou foaki ai e mālohi kia Sētane ke ne ikunaʻi au.)
-
ʻAlamā 43:29. Naʻe fie maʻu ʻe he kau Leimaná ke fakapōpulaʻi ʻa e kau Nīfaí.
Ko Hono Maluʻi ʻo ha Kolo Nīfai, tā ʻe Minerva K. Teichert
‘I heʻeku feinga ke faivelenga hangē ko Molonaí, te u hoko ai ʻo hangē ko e Fakamoʻuí.
ʻOkú ke fakaʻamu nai ke ke hoko lahi ange ʻo hangē ko e Fakamoʻuí pea fakasiʻisiʻi e mālohi ʻo e filí ʻi hoʻo moʻuí? Ko ha founga ʻe taha ko e muimui ki he naʻinaʻi ʻi he ʻAlamā 48:17 ke hoko ʻo “tatau … mo Molonaí.” Tokanga ki he ngaahi ʻulungaanga ʻo Molonaí mo ʻene ngaahi ngāue ʻoku fakamatalaʻi ʻi he ʻAlamā 43–52 kae tautautefito ki he 46:11–28 mo e 48:7–17. Ko e hā ʻokú ke saiʻia ai fekauʻaki mo e tangata “kaukaua” ko ʻení? ‘E fakavaivaiʻi fēfē ʻe he ngaahi ʻulungaanga mo e ngāue hangē ko iá e mālohi ʻo e filí ʻi hoʻo moʻuí? Fakalaulauloto ki he meʻa ʻokú ke ongoʻi ke fai ke muimui ai ki he tā sīpinga ʻa Molonaí pea hoko ʻo tatau ange mo e Fakamoʻuí.
ʻOku ʻahiʻahiʻi mo kākaaʻi māmālie kitautolu ʻe Sētane.
‘Oku ʻilo ʻe Sētane ko e tokolahi taha ʻo kitautolú ʻoku ʻikai ke tau fie fakahoko ha ngaahi angahala lalahi mo tui ki ha ngaahi loi lahi. Ko ia ai, ʻokú ne fakaʻaongaʻi ha fanga kiʻi loi mo e ʻahiʻahi olopoto ke tataki kitautolu ki ha ngaahi angahala ʻoku hā ngali siʻisiʻi—ki he lahi taha pē ʻokú ne fakakaukau te tau talí. ʻOku hokohoko atu ʻene fai ʻení kae ʻoua kuo tau hē mamaʻo mei he malu ʻo e moʻui angatonú.
Te ke lava ʻo maʻu ʻa e sīpinga ko ʻení ʻi he fakamatala ki hono kākaaʻi ʻe ʻAmalekaia ʻa Lehonitaí, ʻoku maʻu ʻi he ʻAlamā 47. Fakalaulauloto ʻi hoʻo akó, ki he founga ʻe ala feinga ai ʻa Sētane ke kākaaʻi koé, ʻo hangē ko hono fakamatalaʻi ʻe ʻEletā Lōpeti D. Heilí:
“Naʻe feingaʻi ʻe he tangata lavaki ko ʻAmalekaiá ke ʻʻalu hifo’ ʻa Lehonitai ke na fetaulaki he teleʻá. Ka ʻi he hifo ʻa Lehonitai mei he feituʻu māʻolungá, naʻe fakakonahi ʻfakasiʻisiʻi’ ia kae ʻoua kuó ne mate pea tō ai ʻene kau taú ki he nima ʻo ʻAmalekaiá (vakai, ʻAlamā 47). ʻOku tauheleʻi kitautolu ʻe ha kakai ʻi he fakakikihí mo e tukuakiʻí ke tau hifo mei he potu māʻolungá. Ko e potu māʻolungá ʻa e feituʻu ʻoku ʻi ai ʻa e māmá. … Ko ha feituʻu ia ʻo e malu” (“Lototoʻa Faka-Kalaisí: Ko e Fie Maʻu Kae Hoko ko e Ākongá,”Ensign pe Liahona, Nōvema 2008, 74).
Vakai foki, 2 Nīfai 26:22; 28:21–22.
ʻOku ʻomi ʻe he uouongatahá ʻa e malú.
ʻI he ngaahi tūkunga ʻoku lekooti he kamataʻanga ʻo e ʻAlamā 50, ʻoku ngalingali naʻe ʻikai ha faingamālie ʻo e kau Leimaná ki he kau Nīfaí. Ko e teunga taú, ngaahi kolotaú, mo e ngāue faaitaha ʻa e kau Nīfaí ne nau ʻai ke hā ngali taʻemalava ke ikunaʻi kinautolu (vakai, ʻAlamā 49:28–30 mo e 50:17–20). Ka naʻe vave pē hono maʻu ʻe he kau Leimaná hanau ngaahi kolo lahi—ʻo kau ai kinautolu kuo langa kolotau ai ʻa Molonaí (vakai, ʻAlamā 51:26–27). Naʻe hoko fēfē iá? Kumi ki ha ngaahi tali ʻi hoʻo lau e ngaahi vahe ko ení (fakatefito hoʻo vakaí ki he ʻAlamā 51:1–12). Fakalaulauloto ki he ngaahi fakatokanga ʻe ala ʻomi ʻe he talanoa ko ení maʻau mo ho fāmilí.
Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí
ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu homou fāmilí. Ko ha ngaahi fakakaukau ʻeni ʻe niʻihi.
ʻAlamā 45:2–8
ʻE lava ke ueʻi fakalaumālie ho fāmilí ʻi hono lau fakataha e ngaahi veesi ko ʻení ke fakahoko ha ngaahi fepōtalanoaʻaki tautau toko taha ʻo e ongoongoleleí mo e kau mēmipa ʻo e fāmilí, ʻo hangē ko ia naʻe fai ʻe ʻAlamā mo Hilamaní.
ʻAlamā 46:12–22
Naʻe ueʻi ʻa e kau Nīfaí ʻe he fuka ʻo e tauʻatāiná ke nau tauhi e ngaahi fekau ʻa e ʻOtuá mo maluʻi ʻenau tuí. Ko e hā ʻokú ne ueʻi kitautolu ke fai e meʻa tatau mo iá? Mahalo ʻe lava ke faʻu ʻe homou fāmilí haʻamou fuka ʻo e tauʻatāiná—ko ha fuka pe tupenu mo ha ngaahi lea pe ʻīmisi ʻokú ne fakamanatu atu e founga ke tauhi ai e ngaahi fekau ʻa e ʻOtuá he ʻaho takitaha.
ʻAlamā 48:7–9; 49:1–9; 50:1–6
ʻI he lau homou fāmilí fekauʻaki mo e ngaahi kolotau ʻa e kau Nīfaí, te mou lava ʻo aleaʻi e founga ʻoku mou maluʻi ai homou ʻapí mei he filí. Mahalo ʻe fiefia e fānaú ke langa ha kolotau ʻaki ha ngaahi naunau hangē ko e seá mo e kafú, pe ko haʻanau tā fakatātaaʻi e meʻa ʻoku nau fakakaukau ko e fōtunga ia ʻo e ngaahi kolotau ʻa e kau Nīfaí.
ʻAlamā 51:1–12
Ko e hā ʻoku akoʻi ʻi he ngaahi veesi ko ʻení fekauʻaki mo e meʻa ʻe lava ke hoko ʻi hotau fāmilí ʻi heʻetau fakakikihí? Te tau fakatupulekina fēfē ʻetau faaitahá?
Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.
Fakatupulaki e Ako Fakataautahá
ʻEke ha ngaahi fehuʻi lolotonga hoʻo akó. ʻI hoʻo ako e folofolá, fehuʻi loto kiate koe e ngaahi fehuʻi ʻe tokoni atu ke ke fakalaulauloto ki he tuʻunga ʻo hoʻo moʻui ʻaki e ngaahi meʻa ʻokú ke laú.
Fuka ʻo e Tauʻatāiná, tā ʻe Larry Conrad Winborg