Tā fakatātaaʻi ʻo Nīfai ʻi ha taua he ngoué ‘e Jerry Thompson

24–30 ʻAokosi

Hilamani 7–12

“Manatuʻi ʻa e ʻEikí”

Naʻe maʻu ʻe Nīfai, Līhai, mo ha niʻihi kehe ha “ngaahi fakahā lahi ʻi he ʻaho taki taha” (Hilamani 11:23). ʻOku ʻikai ko e maʻu fakahā hokohokó maʻá e kau palōfitá pē—te ke lava foki mo koe ʻo maʻu ia. ʻE lava ke tokoni hono lekooti e ngaahi ongo ʻokú ke maʻú ke toutou hoko hoʻo maʻu ha ngaahi fakahā.

Lekooti e Ngaahi Ongo ʻOkú ke Maʻú

Naʻe fakalotolahi ʻa e tamai ʻa Nīfaí, ʻa Hilamani, ki hono ngaahi fohá ke “manatu, manatu”: naʻá ne fie maʻu ke na manatuʻi ʻena ngaahi kuí, manatuʻi e ngaahi lea ʻa e kau palōfitá, kae lahi tahá ke manatuʻi “hotau Huhuʻí, ʻa ia ko Kalaisi” (vakai, Hilamani 5:5–14). ʻOku hā mahino naʻe manatuʻi ʻe Nīfai, he ko e pōpoaki tatau pē eni naʻá ne fakahaaʻi he ngaahi taʻu kimui angé ʻi he “vilitaki taʻetuku” (Hilamani 10:4) ki he kakaí. Naʻá ne fehuʻi,“Naʻa mou lava fēfē ʻo fakangaloʻi homou ʻOtuá?” (Hilamani 7:20). Ko e ngaahi ngāue kotoa ʻa Nīfaí—ʻene malangá, lotú, fakahoko e ngaahi maná, mo e kole tāumaʻu ki he ʻOtuá ki ha hongé—ko ha ngaahi feinga ia ke tokoni ki he kakaí ke nau tafoki ki he ʻOtuá pea manatuʻi Ia. ʻI ha ngaahi founga lahi, ʻoku hoko hono fakangaloʻi e ʻOtuá ko ha palopalema lahi ange ʻi he ʻikai ʻiloʻi Iá, pea ʻoku faingofua ke fakangaloʻi Ia ʻi hono fakahohaʻasi hotau ʻatamaí ʻe he “ngaahi meʻa vaʻinga ʻo e māmani ko ʻení” pea kāpui ʻe he angahalá (Hilamani 7:21; vakai foki, Hilamani 12:2). Kae hangē ko ia ʻoku fakahaaʻi mai ʻe he ngāue fakafaifekau ʻa Nīfaí, ʻoku ʻikai pē teitei fuʻu tōmui ke manatuʻi mo “tafoki ki he ʻEiki ko homou ʻOtuá” (Hilamani 7:17).

Ngaahi Fakakaukau ki hono Ako Fakatāutaha ʻo e Folofolá

Hilamani 7–11

ʻOku fakahā ʻe he kau palōfitá e finangalo ʻo e ʻOtuá.

ʻOku tokolahi ha kau palōfita ʻoku fakamatalaʻi ʻi he kotoa ʻo e Tohi ʻa Molomoná, ka ko e Hilamani 7–11 ko ha feituʻu lelei ia ke ako pe ko e hā e palōfita, ko e hā ʻokú ne faí, mo e founga ke tau maʻu ai ʻene ngaahi leá. ‘I hoʻo lau e ngaahi vahe ko ʻení, tokanga ki he ngaahi angafai, fakakaukau, mo e fakafeangai ʻa Nīfai mo e ʻEikí. ʻOku tokoni fēfē e ngāue fakafaifekau ʻa Nīfaí ke mahino ange kiate koe e fatongia ʻo e palōfitá ʻi hotau kuongá? Ko ha ngaahi sīpinga eni ʻe niʻihi. Ko e hā mo ha toe meʻa ʻokú ke maʻu?

Hilamani 7:17–22:ʻOku kalanga ʻaki ʻe he kau palōfitá e fakatomalá pea fakatokanga ki he ngaahi nunuʻa ʻo e faiangahalá.

Hilamani 7:29; 9:21–36:‘Oku ʻilo ʻe he kau palōfitá ʻi he fakahā mei he ʻOtuá ʻa e ngaahi meʻa ʻoku fie maʻu ke fanongo ki ai e kakaí.

Hilamani 10:7:ʻOku foaki ki he kau palōfitá e mālohi ke fakamaʻu ʻi māmani pea ʻi langi (vakai foki, Mātiu 16:19; TF 132:46).

Hilamani 10:4–7, 11–12:

ʻOku takiekina fēfē ʻe he ngaahi vēsí ni e anga hoʻo ongoʻi fekauʻaki mo ʻetau palōfita moʻuí? Ko e hā kuó ne akoʻi kimuí ni maí? Ko e hā ʻokú ke fai ke fanongo mo muimui ki heʻene fakahinohinó?

Hilamani 9–10

‘Oku tokoni ʻa e ngaahi fakaʻilongá mo e maná ka ʻoku ʻikai feʻunga ke fakatupulaki ha tui ʻoku tuʻuloá.

Kapau naʻe feʻunga e ngaahi fakaʻilongá mo e maná ke liliu ha loto ʻo ha taha, ta naʻe mei ului kotoa e kau Nīfaí ʻe he ngaahi fakaʻilonga fakaofo ne fakahoko ʻe Nīfai ʻi he Hilamani 9. Ka naʻe hoko ha “fakakikihi ʻi he kakaí” (Hilamani 10:1) koeʻuhi ko e tokolahi ʻo kinautolu “naʻa nau kei fakafefeka pē honau lotó” (Hilamani 10:15). ʻOku tali fēfē ʻe he kau fai angahalá e ngaahi fakaʻilongá mo e maná? (vakai, Hilamani 10:12–15; vakai foki, 3 Nīfai 2:1–2). Ko e hā e fakatuʻutāmaki ʻo hono ʻai e ngaahi fakaʻilongá ko e makatuʻunga ia ʻo ha fakamoʻoní? (vakai, “Signs,” Gospel Topics, topics.ChurchofJesusChrist.org).

Hilamani 10:2–4

ʻOku fakaafeʻi ʻe he fakalaulaulotó ʻa e fakahaá.

Kapau kuó ke ongoʻi mafasia, hohaʻa, pe puputuʻu, mahalo te ke ako ha lēsoni mahuʻinga mei he sīpinga ʻa N1ifai ʻi he Hilamani 10:2–4. Ko e hā naʻá ne fai ʻi heʻene ongoʻi “mafasia lahí”? (veesi 3).

Naʻe akoʻi ʻe Palesiteni Henry B. Eyring ʻo pehē, “ʻI heʻetau fakalaulaulotó, ʻoku tau fakaafeʻi mai ai e fakahā ʻa e Laumālié. Ko e fakalaulaulotó kiate au, ko e fakakaukau mo e lotu ia hili ʻeku lau mo ako fakalelei e folofolá” (Ngāue ʻi he Laumālié,” Ensign pe Liahona,Nōvema 2010, 60). Te ke fokotuʻu fēfē ha tōʻonga ʻo e fakalaulaulotó? Ke lau fekauʻaki mo ha founga ʻe taha ke toutou fakalaulauloto ai ki he folofola ʻa e ʻOtuá, vakai ki he pōpoaki ʻa Brother Devin G. Durrant “ ʻOku ou Fakalaulauloto Maʻu Pē Kiate Kinautolu” (Ensign pe Liahona, Nōv. 2015, 112–15).

Vakai foki, Lea Fakatātā 4:26; Luke 2:19; 1 Nīfai 11:1; 2 Nīfai 4:15–16; 3 Nīfai 17:3; Molonai 10:3; TF 88:62.

Hilamani 12

ʻOku finangalo e ʻEikí keu manatuʻi Ia.

ʻI he Hilamani 12, ʻoku fakamatala fakanounouʻi ai ʻe Molomona, ʻa ia naʻá ne fakanounouʻi e lekōtí, ha niʻihi ʻo e ngaahi lēsoni te tau lava ʻo ako mei he talanoa ʻo Nīfai ʻi he ngaahi vahe kimuʻá. Fakakaukau ke fakaʻaongaʻi ʻene fakamatala fakanounoú ko ha faingamālie ke vakavakaiʻi ho lotó. Mahalo naʻá ke fie lisi e ngaahi meʻa ʻoku pehē ʻe Molomona ʻokú ne ʻai ke fakangaloʻi ʻe he kakaí e ʻEikí. Ko e hā ʻoku tokoni atu ke ke manatuʻi ai Iá? Ko e hā ha ngaahi liliu ʻokú ne ueʻi koe ke ke fakahoko ʻo fakatefito ʻi he meʻa kuó ke akó?

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau e folofolá mo ho fāmilí, ʻe lava ke tokoni atu ʻa e Laumālié ke mou ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu homou fāmilí. Ko ha ngaahi fakakaukau ʻeni ʻe niʻihi.

Hilamani 7–9

Ko e hā ha ngaahi faitatau ‘oku tau vakai ki ai ʻi he ngaahi meʻa naʻe fai ʻe Nīfaí mo e meʻa ʻoku fakahoko ʻe he kau palōfitá he kuongá ni? Ko e hā ʻoku akoʻi mai ʻe hotau palōfitá he kuongá ni? Mahalo te ke lava ‘o fili ha faleʻi kimuí ni kuo ʻomi ʻe he palōfitá pea aleaʻi fakafāmili e ngaahi founga ke lelei ange hoʻo muimui ki aí.

Hilamani 10:4–5, 11–12

Naʻe fakahaaʻi fēfē ʻe Nīfai naʻá ne fekumi ki he finangalo ʻo e ʻEikí kae ʻikai ko hono loto ʻoʻoná? Te tau lava fēfē ʻo muimui ki heʻene sīpingá? Ko e hā ha ngaahi founga ʻe lava lelei ange ai hotau fāmilí ʻo fekumi ki he finangalo ʻo e ʻEikí?

Hilamani 11:1–16

Ko e hā naʻe holi ki ai ʻa Nīfaí pea ko e hā naʻá ne fakahoko fekauʻaki mo iá? Ko e hā ʻoku tau ako fekauʻaki mo e lotú mei he sīpinga ʻa Nīfaí?

Hilamani 11:17–23

Ko e hā ʻoku tau ako fekauʻaki mo e tokoua ʻo Nīfai ko Līhaí, ʻi he Hilamani 11:17–23? Ko hai ʻoku tau ʻilo ʻokú ne moʻui angatonu kae ʻikai faʻa fakatokangaʻi?

Hilamani 12:1–6

Te ke lava nai ʻo fakakaukau ki ha lēsoni fakatātā te ke lava ʻo fakaʻaongaʻi ke tokoni ke mahino ki ho fāmilí e ʻuhinga ʻo e ʻikai tuʻu maʻu pe “taʻeangatonú”? Hangē ko ʻení, mahalo te ke fakaafeʻi ha mēmipa ʻo e fāmilí ke ne fakapalanisi ha meʻa ʻi hono ʻulú. Te ke lava leva ʻo fakaafeʻi ha kau mēmipa ʻo e fāmilí ke nau fekumi ʻi he Hilamani 12:1–6 ki ha ngaahi ʻuhinga ʻe lava ke ʻikai tuʻu maʻu ai ʻa e kakaí ʻi heʻenau muimui ki he ʻEikí. Ko e hā ha founga te tau lava ai ʻo kei tuʻu maʻu fakalaumālie?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Fakatupulaki ʻo ʻEtau Founga Akoʻí

Toe Vakaiʻi. Ko ha fakakaukau ʻeni ke tokoni ki he kau mēmipa ʻo e fāmilí ke manatuʻi e ngaahi folofola ʻoku nau akó: Fili ha veesi ʻokú ke pehē ʻoku mahuʻingamālie, pea fakaʻaliʻali ia ʻi homou ʻapí ʻi ha feituʻu ʻe toutou lava ke sio ki ai e kau mēmipa ʻo e fāmilí. Fakaafeʻi e toenga ʻo e fāmilí ke nau taufetongi ʻi hono fili ha potufolofola ke fakaʻaliʻali, pea aleaʻi ia ʻi he fakataha mai ʻa e fāmilí ʻo hangē ko e houa maʻumeʻatokoní pe lotu fakafāmilí.

© Ko e Tohi ʻa Molomoná maʻá e Kau Laukonga Kei Siʻí, Seianitumi—ʻOku ʻIlo ʻa e Tokotaha Fakapoó, tā ʻe Briana Shawcroft; ʻikai ngofua ke hiki hano tatau