“24–30 ʻAokosi. Hilamani 7–12: ‘Manatuʻi ʻa e ʻEikí,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“24–30 ʻAokosi. Hilamani 7–12,” Haʻu, ʻo Muimui ʻIate Au—Maʻá e Palaimelí: 2020
Tā fakatātaaʻi ʻo Nīfai ʻi ha taua ʻi heʻene ngoué ʻe Jerry Thompson
24–30 ʻAokosi
Hilamani 7-12
“Manatuʻi ʻa e ʻEikí”
ʻI hoʻo lau ʻa e Hilamani 7–12, fakalaulauloto ki he founga ʻe lava ke tāpuekina ai e fānau ʻokú ke akoʻí ʻe he ngaahi talanoa mo e ngaahi tefitoʻi moʻoni ʻi he ngaahi vahe ko ʻení. ʻE lava ke tānaki atu ʻe he ngaahi fakakaukau ʻi he fokotuʻutuʻu ko ʻení ki he ueʻi fakalaumālie ʻokú ke maʻú.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Fehuʻi ki he fānaú ʻa e meʻa ʻoku nau ʻilo fekauʻaki mo e palōfita ko Nīfaí ko e foha ʻo Hilamani (vakai ki he Hilamani 7–12). Kapau ʻe fie maʻu, fakamatalaʻi ʻa e faikehekehe ʻi he vahaʻa ʻo e palōfita ko ʻeni ko Nīfaí mo e palōfita ko Nīfai ʻi he kamataʻanga ʻo e Tohi ʻa Molomoná.
Akoʻi e Tokāteliné: Fānau Iiki Angé
ʻOku finangalo ʻa e ʻEikí ke u manatuʻi Ia.
Naʻe fifili ʻa Nīfai ki he ʻuhinga kuo tafoki ai hono kakaí mei he ʻOtuá mo ngalo Ia ʻiate kinautolú. Te ke tokoniʻi fēfē ʻa e fānaú ke nau ako ha ngaahi founga te nau lava ai ʻo manatuʻi ʻa e Tamai Hēvaní mo Sīsuú?
Ngaahi ʻEkitivitī ʻe Ala Fakahokó
-
Vahevahe mo e fānaú ha aʻusia ʻi ha taimi naʻe ngalo ai ʻiate koe ha meʻa mahuʻinga. Fehuʻi ange pe kuo ngalo nai ʻiate kinautolu ʻi ha taimi ha meʻa mahuʻinga. Lau ange ʻa e Hilamani 7:20, pea fakamatalaʻi ange naʻe fili ʻa e kau Nīfaí ke nau fakangaloki ʻa e ʻOtuá. Naʻe loto ʻa e palōfita ko Nīfaí ke nau manatuʻi ʻa e ʻOtuá. ʻOmi ha ngaahi fakatātā ʻi ha kato ʻokú ne fakafofongaʻi ʻa e ngaahi founga ʻe lava ai e fānaú ʻo manatuʻi ʻa e Tamai Hēvaní mo Sīsuú. Tuku ki he fānaú ke nau taufetongi ʻi hono fili ha fakatātā pea vahevahe ki he founga te tau lava ai ʻo manatuʻi ʻa e ʻOtuá ʻi he ʻaho kotoa pē.
-
Tokoniʻi e fānaú ke nau fakakakato e peesi ʻekitivitī ʻo e uike ní.
ʻOku fakamoʻoni ʻa e kau palōfitá kia Sīsū Kalaisi.
Naʻe fakamoʻoni ʻa Nīfai ʻe hāʻele mai ʻa Sīsū Kalaisi, pea naʻá ne fakaafeʻi ʻa hono kakaí ke nau fakatomala pea muimui kiate Ia. Fakaʻaongaʻi ʻa e ngaahi vahe ko ʻení ke akoʻi ki he fānaú ʻoku fakamoʻoni ʻa e kau palōfita kotoa pē kia Sīsū Kalaisi.
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo Sīsū Kalaisi, pea talaange ki he fānaú ʻoku fakaafeʻi kitautolu ʻe he kau palōfita hangē ko Nīfaí ke tau muimui kia Sīsū. Lau ʻa e ngaahi lea ko ʻeni fekauʻaki mo e kau palōfitá mei he Hilamani 8:22: “Kuo nau fakamoʻoni ki he hāʻele mai ʻa Kalaisí, pea nau ʻamanaki atu, pea nau fiefia ʻi he ʻaho ʻa ia te ne hāʻele mai aí.” Vahevahe mo e fānaú kau ki ha meʻa kuo lea ʻaki ʻe heʻetau palōfita moʻuí fekauʻaki mo e Fakamoʻuí.
-
Hivaʻi fakataha ha foʻi hiva fekauʻaki mo e kau palōfitá, hangē ko e “Muimui He Palōfitá” (Tohi Hiva ʻa e Fānaú, 58). Fili ha kupuʻi lea mahuʻinga mei he hivá, pea hiki ʻa e foʻi lea taki taha mei he kupuʻi leá ʻi ha laʻivaʻe laʻi pepa. Tuku ʻa e ngaahi laʻivaʻe laʻi pepá ʻi he falikí ʻo fakatatau atu ke aʻu ki ha fakatātā ʻo e Fakamoʻuí. Fakaafeʻi ʻa e fānaú ke nau muimui ʻi he hala ʻoku fokotuʻutuʻu atu ai ʻa e ngaahi laʻivaʻé, pea tokoniʻi kinautolu ke nau lau ʻa e ngaahi leá.
Te u talangofua ki he Tamai Hēvaní.
ʻE lava ʻe he sīpinga ʻa Nīfaí ʻo ueʻi fakalaumālie ʻa e fānau ʻokú ke akoʻí ke nau talangofua ki he ʻEikí.
Ngaahi ʻEkitivitī ʻe Ala Fakahokó
-
Lau ʻa e Hilamani 10:2, 11–12, pea tokoni ke mahino ki he fānaú naʻe talangofua ʻa Nīfai ki he ʻOtuá. Fakaafeʻi ʻa e fānaú ke nau fakatātaaʻi ʻa e meʻa naʻe fai ʻe Nīfaí. Hangē ko ʻení, kole ange ke nau lue ki ha tafaʻaki ʻe taha ʻo e lokí (ʻo hangē haʻanau lue ki ʻapí), tuʻu, tafoki takai, pea lue ki he tafaʻaki ʻe taha ʻo e lokí (ʻo hangē haʻanau foki ke akoʻi ʻa e kakaí). Tokoniʻi kinautolu ke nau ʻiloʻi naʻe loto ʻa Nīfai ke talangofua ki he ʻEikí neongo naʻe pau ke ne fai ha meʻa naʻe faingataʻa.
-
Tokoni ke mahino ki he fānaú, ʻoku finangalo ʻa e Tamai Hēvaní he taimi ʻe niʻihi ke tau fai ha meʻa ʻoku kehe mei he meʻa ʻoku tau fie faí, ka te tau lava ʻo talangofua kiate Ia ʻo hangē ko ia naʻe fai ʻe Nīfaí. Vahevahe ha ngaahi fakamatala hangē ko e “Taimi ʻe niʻihi ʻoku ou fie ʻita, ka ʻoku finangalo ʻa e Tamai Hēvaní ke u … ,” pea tuku ki he fānaú ke nau fakaʻosi ʻa e fakamatalá. Poupouʻi ʻa e fānaú ke nau manatuʻi ke kiʻi tuʻu ʻo fakakaukau ki he meʻa ʻoku finangalo ʻa e Tamai Hēvaní ke nau faí, pea nau fai ia.
Akoʻi e Tokāteliné: Fānau Lalahi Angé
Te u malu fakalaumālie ʻi he taimi ʻoku ou muimui ai ki he palōfitá.
Naʻe akoʻi mai ʻe Palesiteni Sēmisi E. Fausi: “ʻOku tau malu ʻi he taimi ʻoku tau talangofua ai ki he ngaahi meʻa ʻoku lea ʻaki ʻe he [Palesiteni ʻo e Siasí] pea muimui ki heʻene akonakí” (“Continuous Revelation,” Ensign, Nov. 1989, 10).
Ngaahi ʻEkitivitī ʻe Ala Fakahokó
-
Fakaafeʻi ʻa e fānaú ke nau faʻu ʻi he palakipoé ha lisi ʻo e ngaahi meʻa ʻoku fai ʻe ha palōfita (vakai ki he “Palōfita,” Fakahinohino ki he Ngaahi Folofolá, scriptures.ChurchofJesusChrist.org). Tokoniʻi kinautolu ke nau kumi ʻa e Hilamani 7:1–2, 27–29; 8:22–23; mo e 10:3–4, 6–7 ke vakai ki he founga naʻe fai ai ʻe Nīfai ha niʻihi ʻo e ngaahi meʻa ʻi heʻenau lisí. Ko e fē nai ha taimi kuo tau mamata ai hono fai ʻe hotau palōfitá ʻa e ngaahi meʻá ni? Vahevahe hoʻo fakamoʻoni ki he palōfita moʻuí. Ke fakatātaaʻi e mahuʻinga ʻo e kau palōfitá, fakaʻaliʻali ʻa e fuofua miniti ʻo e vitiō, “Watchman on the Tower” (ChurchofJesusChrist.org).
-
Lau fakataha ʻa e Hilamani 11:3–7 (pe toe vakaiʻi ʻa e “Vahe 39: Naʻe Maʻu ʻe Nīfai ha Mālohi Lahi,” Ngaahi Talanoa ʻo e Tohi ʻa Molomoná, 108–10, pe ko e vitiō kaunga ki ai ʻi he ChurchofJesusChrist.org). Kole ki he fānaú ke nau fakafanongo ki he meʻa naʻe hoko ki he kakai naʻe ʻikai ke nau fanongo ki he palōfitá. Ko e hā ʻe hoko ʻi he taimi ʻoku ʻikai ai ke tau fanongo ki he palōfitá? ʻOku faitāpuekina fēfē kitautolu ʻi he taimi ʻoku tau muimui ai kiate Iá? Vahevahe ha meʻa kuo akoʻi mai ʻe hotau palōfitá, pea poupouʻi ʻa e fānaú ke nau muimui ki heʻene ngaahi akonakí.
ʻOku finangalo ʻa e ʻEikí ke u manatuʻi Ia.
ʻE fehangahangai ʻa e fānau ʻokú ke akoʻí mo ha ngaahi meʻa te ne tohoakiʻi ʻenau tokangá ʻa ia ʻe lava tupunga ai ha ʻikai ke nau manatuʻi ʻa e Tamai Hēvaní mo Sīsū Kalaisi. Te ke lava fēfē ʻo ueʻi fakalaumālie ʻa e fānaú ke līʻoa ʻa honau taimí ki he ngaahi meʻa fakalaumālié?
Ngaahi ʻEkitivitī ʻe Ala Fakahokó
-
Lau fakataha ʻa e Hilamani 7:20–21, pea fehuʻi ki he fānaú pe ʻoku nau pehē ʻoku ʻuhinga ki he hā ʻa e fakangaloʻi ʻa e ʻOtuá. Fakamatalaʻi ange ʻoku ʻuhinga foki ʻa e fakangaloʻí ki he “liʻaki” pe “fakasītuʻaʻi.” Fakaʻaliʻali ha fakatātā ʻo e Fakamoʻuí, pea fakaafeʻi ʻa e fānaú ke nau tā ha ngaahi meʻa te nau ngali fakamoleki ha taimi lahi ki hono faí, ʻa ia ʻe ala tupu ai haʻanau fakangaloʻi ʻa e ʻEikí. Fokotuʻu ʻenau ngaahi fakatātaá ʻi muʻa ʻi he fakatātā ʻo Sīsuú. Kole ki he fānaú ke nau fakakaukau ki ha ngaahi meʻa te nau lava ʻo fai he ʻaho takitaha ke nau manatuʻi ai ʻa e Tamai Hēvaní mo Sīsū. ʻI heʻenau vahevahe ʻenau ngaahi fakakaukaú, toʻo tahataha ʻa e ngaahi fakatātaá kaeʻoua leva kuo ʻasi mai ʻa e fakatātā ʻo e Fakamoʻuí.
-
Fakaafeʻi ʻa e fānaú ke nau fakakakato ʻa e peesi ʻekitivitī ki he uike ní.
ʻI he taimi ʻoku ou fakalaulauloto ai ki he ngaahi folofola ʻa e ʻOtuá, ʻoku lava ke u maʻu ha fakahā.
ʻOku ʻiloʻi nai ʻe he fānau ʻokú ke akoʻí ʻa e ʻuhinga ʻo e fakalaulaulotó? Tokoniʻi kinautolu ke mahino naʻe tāpuekina ʻa Nīfai ʻaki ha fakahā ʻi he taimi naʻá ne fakalaulauloto ai ki he ngaahi meʻa kuo fakahā ʻe he ʻEikí kiate iá.
Ngaahi ʻEkitivitī ʻe Ala Fakahokó
-
Tokoniʻi ʻa e fānaú ke mahino ʻa e ʻuhinga ʻo e fakalaulaulotó (vakai ki he “Fakalaulaulotó,” Fakahinohino ki he Ngaahi Folofolá, scriptures.ChurchofJesusChrist.org). Fakaafeʻi kinautolu ke nau fakakaukau ki ha ngaahi lea kehe ʻokú ne fakamatalaʻi ʻa e ʻuhinga ʻo e fakalaulaulotó. Kole ange leva ke nau lau ʻa e Hilamani 10:1–3 pea fetongi ʻa e foʻi lea fakalaulaulotó ʻaki ʻa e ngaahi lea naʻa nau fakakaukau ki aí. Ko e hā e meʻa naʻe hoko ʻi he taimi naʻe fakalaulauloto ai ʻa Nīfai ki he ngaahi folofolá? (vakai ki he Hilamani 10:3–7). Vahevahe ki ha taimi naʻá ke maʻu ai ha fakahā hili haʻo fakalaulauloto ki ha folofola pe ha fakahā he kuongá ni pe ko ha aʻusia fakalaumālie.
-
ʻOange ki he fānaú ha taimi ke nau lau ai ʻa e Hilamani 10, pe lau fakataha ia, pea poupouʻi kinautolu ke nau kumi ha veesi ʻoku nau loto ke fakalaulauloto ki ai lolotonga e uike ka hokó. Fakaafeʻi kinautolu ke nau hiki ʻa e veesi naʻa nau filí ʻi ha laʻipepa pe kaati pea tuku ia ʻi ha feituʻu ke fakamanatu ange kiate kinautolu ke nau fakalaulauloto ki he veesi ko iá lolotonga e uike ka hoko maí. ʻOange kiate kinautolu ha taimi ʻi ha kalasi ʻi he kahaʻú, ke nau vahevahe ʻa e meʻa naʻa nau ako ʻi heʻenau fakalaulauloto ki he vēsí.
Poupouʻi e Ako ʻi ʻApí
Poupouʻi ʻa e fānaú ke nau vahevahe mo honau ngaahi fāmilí ʻa e meʻa naʻa nau palani ke fai ke nau manatuʻi ai ʻa e Tamai Hēvaní mo Sīsū Kalaisi ʻi he ʻaho kotoa. Te nau lava foki ʻo fakaafeʻi honau ngaahi fāmilí ke nau kau atu mo kinautolu ʻi heʻenau taumuʻá.
Fakatupulaki ʻEtau Akoʻí
Fai ha fakaafe ʻokú ne fakaʻapaʻapaʻi e tauʻatāina ke filí. ʻI he taimi te ke fakaafeʻi ai e fānaú ke nau ngāueʻi e meʻa naʻá ke akoʻi kiate kinautolú, fakakaukau ki ha ngaahi founga ke fakaʻapaʻapaʻi ai ʻenau tauʻatāina ke filí ʻi heʻenau fakahoko ʻa e meʻa naʻa nau akó. Hangē ko ʻení, hili pē ha lēsoni fekauʻaki mo e Fakamoʻuí, te ke lava ʻo fehuʻi ange, “Ko e hā te ke fai ke ke manatuʻi ai ʻa e Fakamoʻuí ʻi he uiké ni?”