Ki he Ngaahi Tāpuaki ʻo e Tauʻatāiná, tā ʻe Scott M. Snow

3–9 ʻAokosi

ʻAlamā 43–52

“Tuʻu Maʻu ʻi he Tui kia Kalaisí”

ʻI hoʻo palani ʻa e ngaahi ʻekitivitií, te ke lava ʻo maʻu ha ngaahi fakakaukau heni ʻi he ngaahi fokotuʻu ki he akoʻí maʻá e fānau iiki angé mo e lalahi angé fakatouʻosi.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Kole ki he fānaú ke nau vahevahe ʻa e meʻa ʻoku nau manatuʻi kau ki ha niʻihi ʻo e kakai pe ngaahi talanoa ʻi he ʻAlamā 43–52, hangē ko e ʻEikitau ko Molonaí pe ko e fuka ʻo e tauʻatāiná. Ke tokoni ki heʻenau manatú, fakaʻaliʻali ange ha ngaahi fakatātā mei he Ngaahi Talanoa ʻo e Tohi ʻa Molomoná, ko e Tohi Fakatātā ʻo e Ongoongoleleí, pe Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí.

Akoʻi e Tokāteliné: Fānau Iiki Angé

ʻAlamā 43:17–21; 48:7–8; 49:1–5; 50:1–6

Te u lava ʻo maʻu ʻa e malu fakalaumālié ʻi he ongoongoleleí.

Naʻe teuteuʻi ʻe Molonai hono kakaí ʻaki ʻa e teunga taha mo ha ngaahi kolotau ke maluʻi ʻaki ʻa e kau Nīfaí mei he kau Leimaná. ʻOku akoʻi mai ʻe heʻene ngaahi feingá ʻa e founga te tau lava ai ʻo maʻu ha malu fakalaumālie.

Ngaahi ʻEkitivitī ʻe Ala Fakahokó

• Talanoa nounou ki he fānaú fekauʻaki mo e tau he vahaʻa ʻo e kakai Nīfaí mo e kakai Leimaná (vakai ki he ʻAlamā 43), ʻo fakamamafaʻi ange naʻe tui ʻe he kau Nīfaí ha teunga tau ke maluʻi ʻaki kinautolu. Te ke lava ʻo fakaʻaongaʻi ʻa e “Vahe 31: Ko Hono Ikunaʻi ʻe Molonai ʻa Seilahemená” (Ngaahi Talanoa ʻo e Tohi ʻa Molomoná, 85–88, pe ko e vitiō kaunga ki ai ʻi he ChurchofJesusChrist.org). Lau ʻa e ʻAlamā 43:19, pea fakaafeʻi ʻa e fānaú ke nau tuhu ki he ngaahi konga ʻo honau sinó ʻi heʻenau fanongo ki ai ʻi he folofolá.

• Fakamatalaʻi ange, hangē ko e kau ʻa e kau Nīfaí ki ha tau fakatuʻasinó, ʻoku tau ʻi ha tau fakalaumālie mo Sētane, ʻa ia ʻoku ʻikai ke ne loto ke tau tauhi ʻa e ngaahi fekau ʻa e ʻOtuá. Tā ha kiʻi tamasiʻi pe kiʻi taʻahine ʻi he palakipoé, pea tokoniʻi ʻa e fānaú ke nau fakakaukau ki he ngaahi meʻa ʻokú ne maluʻi fakalaumālie kitautolu ʻo hangē ko hono maluʻi ʻe he teunga taú ʻa hotau ngaahi sinó (hangē ko e lotú, lau folofolá, pe tauhi ʻa e ngaahi fekaú). Ko e taimi kotoa pē ʻoku ʻasi ai ʻi he folofola ʻoku laú ha teunga tau, tā ʻa e konga ʻo e teunga taú ʻi he fakatātā ʻoku ʻi he palakipoé.

Maluʻi ʻo ha Kolo Nīfai, tā ʻe Minerva K. Teichert

ʻAlamā 46:11–16; 48:11–13, 16–17

Te u lava ʻo angatonu hangē ko e ʻEikitau ko Molonaí.

Ko Molonaí ko ha faʻifaʻitakiʻanga lelei ia ʻo e tuí, loto-toʻá, mo e ngāue tokoní. Fakakaukau ki he founga te ke lava ai ʻo ueʻi fakalaumālie ʻa e fānaú ke nau muimui ki heʻene sīpingá.

Ngaahi ʻEkitivitī ʻe Ala Fakahokó

• Fakaʻaliʻali ʻa e fakatātā ʻo Molonai ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Talanoa ki he fānaú fekauʻaki mo e fuka ʻo e tauʻatāiná pea mo e meʻa naʻe tohi aí, ʻo ngāue ʻaki ha ngaahi kupuʻi lea mei he ʻAlamā 46:11–16. Te ke lava ʻo fakaʻaongaʻi ʻa e “Vahe 32: Ko e ʻEikitau ko Molonaí mo e Fuka ʻo e Tauʻatāiná” (Ngaahi Talanoa ʻo e Tohi ʻa Molomoná, 89–90, pe ko e vitiō ʻoku kaunga ki aí ʻi he ChurchofJesusChrist.org). Tuku ke tokoni atu ʻa e fānaú ʻi he lahi taha te nau lavá, ʻi hono fai ʻa e talanoá. Fakamahinoʻi ange, naʻe ngāue ʻaki ʻe Molonai ʻa e fuka ʻo e tauʻatāiná ke tokoni ki he kau Nīfaí ke nau manatuʻi ʻa e meʻa naʻe mahuʻinga kiate kinautolú.

• Tokoniʻi ʻa e fānaú ke nau ngaahi maʻanautolu pe maʻa hoʻo kalasí, ha fuka ʻo e tauʻatāiná. Kamata ʻaki haʻo tokoniʻi kinautolu ke nau fakakaukau ki ha ngaahi meʻa ʻoku nau tui ki ai pe ngaahi meʻa ʻoku finangalo ʻa e Tamai Hēvaní ke nau manatuʻi. Tuku ke nau tā ha ngaahi fakatātā ʻo e ngaahi meʻa ko ʻení ʻi ha laʻipepa lahi, pe ko hoʻo ʻomi ha ngaahi fakatātā ke nau fakapipiki ki he laʻipepá.

• Tuku ki he fānaú ke nau talaatu fekauʻaki mo ha niʻihi ʻoku nau fie hangē ko kinautolú pea mo hono ʻuhingá. Vahevahe leva mo kinautolu ha niʻihi ʻo e ngaahi lea mei he ʻAlamā 48:11–13 ʻokú ne fakamatalaʻi ʻa Molonaí, pea fakaafeʻi kinautolu ke nau mateʻi atu ko hai ʻoku fakamatala ki ai ʻa e ngaahi lea ko ʻení. Fakaʻaliʻali ha fakatātā ʻo Molonai, pea talanoa ki ha ngaahi founga te tau lava ai ʻo hangē ko iá.

Akoʻi e Tokāteliné: Fānau Lalahi Angé

ʻAlamā 43:17–21; 48:7–8; 49:1–5; 50:1–6

Te u lava ʻo maʻu ʻa e malu fakalaumālié ʻi he ongoongoleleí.

ʻOku lahi ha ngaahi fakatuʻutāmaki fakalaumālie ʻi he māmaní, ka ʻoku lahi ʻānoa ʻa e ngaahi meʻa ʻe lava ʻa e fānaú ʻo ako mei he kau Nīfaí fekauʻaki mo e founga ke maluʻi ʻaki kinautolú.

Ngaahi ʻEkitivitī ʻe Ala Fakahokó

• Fakaafeʻi ʻa e tamasiʻi takitaha ke lau fakalongolongo ha taha ʻo e ngaahi veesi ko ʻeni ʻokú ne fakamatalaʻi ʻa e founga naʻe teuteu ai ʻa e kau Nīfaí ki he tau mo e kau Leimaná: ʻAlamā 43:19; 48:8; 49:1–5; mo e 50:2–4. Kole ki he fānaú ke vahevahe ʻa e meʻa naʻa nau akó (fai ha tokoni ʻo ka fie maʻu). Fakamatalaʻi ange ʻoku tau ʻi ha tau fakalaumālie mo Sētane, pea kuo pau ke tau maluʻi fakalaumālie kitautolu, hangē ko hono maluʻi fakatuʻasino ʻe he kau Nīfaí kinautolu mei he kau Leimaná. Ko e hā ha ngaahi faʻahinga teungatau fakalaumālie pe ngaahi kolotau te tau lava ʻo langa ke maluʻi ʻaki kitautolu ʻi heʻetau ngaahi tau fakalaumālié?

• Tokoniʻi ʻa e fānaú ke nau ngaohi ha pā mei ha pepa fefeka lahi, pea kole ange ke nau tohi ai ʻa e ngaahi meʻa ʻokú ne maluʻi fakalaumālie ʻaki kitautolú. ʻOange ki he tamasiʻi takitaha ha laʻipepa, pea fakaafeʻi ʻa e fānaú ke nau hiki ha meʻa ʻoku kovi ʻe ala ʻahiʻahiʻi kitautolu ʻe Sētane ke tau fai (hangē ko e loí, kaihaʻá, pe ʻulungāanga koví). Kole ange ke nau nusinusiʻi ʻenau ʻū laʻipepá ke hoko ko ha foʻi pulu pea tolo kinautolu ki he paá ke fakahaaʻi ʻa e founga ʻoku lava ai ʻe he ongoongoleleí ʻo maluʻi kitautolu meia Sētané (vakai foki ki he ʻEfesō 6:16).

ʻAlamā 46:11–16; 48:11–13, 16–17

Te u lava ʻo angatonu hangē ko e ʻEikitau ko Molonaí.

Ko Molonai ko ha ākonga angatonu mo mālohi ʻo Sīsū Kalaisi, naʻá ne ueʻi fakalaumālie ʻa e kakai Nīfaí ke nau moʻui ʻaki ʻa e ongoongoleleí (vakai ki he ʻAlamā 48:17). Ko e hā ʻe lava ʻo ako ʻe he fānau ʻi ho kalasí mei heʻene sīpingá?

Ngaahi ʻEkitivitī ʻe Ala Fakahokó

• Lau fakataha ʻa e ʻAlamā 46:11–16. Ko e hā e meʻa naʻe fie maʻu ʻe Molonai ke manatuʻi ʻe he kakai Nīfaí? (vakai ki he veesi 12). Naʻá ne tokoniʻi fēfē nai kinautolu ke nau manatuʻi ʻa e ngaahi meʻá ni? Kole ki he fānaú ke nau lisi ha ngaahi meʻa ʻoku finangalo ʻa e Tamai Hēvaní ke tau manatuʻi. Tuku ki he fānaú ke nau faʻu haʻanau “fuka ʻo e tauʻatāina” ʻaki ha ngaahi kupuʻi lea pe fakatātā ʻe tokoni ke nau manatuʻi e ngaahi meʻá ni.

• Kole ki ha kiʻi tamasiʻi ke ne lau ʻa e ʻAlamā 48:17. Fakaafeʻi kinautolu ke nau ako ʻa e ʻAlamā 48:11–13, 16 ke tokoni ke mahino ki he fānaú ʻa e ʻuhinga ʻoku fakaafeʻi ai kitautolu ke tau hangē ko Molonaí. Kole ange ke nau kumi ha ngaahi foʻi lea mo e ngaahi kupuʻi lea ʻoku tokoni ke mahino kiate kitautolu ʻa e ʻuhinga naʻe hoko ai ʻa Molonai ko ha ākonga lelei ʻo Sīsū Kalaisí. ʻI heʻenau vahevahe ʻa e meʻa ne nau maʻú, poupouʻi kinautolu ke nau fakakaukau ki ha ngaahi meʻa pau te nau lava ʻo fai ke nau hoko ai ʻo hangē ko Molonaí.

ʻAlamā 47:4–19

ʻOku ʻahiʻahiʻi mo kākaaʻi māmālie kitautolu ʻe Sētane.

ʻOku fie maʻu ke ʻilo ʻe he fānaú, ʻe feinga ʻa Sētane ke ne fakataueleʻi kitautolu ke tau fai ha ngaahi angahala iiki koeʻuhí ke ne lava ʻo tataki kitautolu ki ha angahala lahi ange.

Ngaahi ʻEkitivitī ʻe Ala Fakahokó

• Lau fakataha ha ngaahi veesi kuo fili mei he ʻAlamā 47:4–19, pea fakamatalaʻi ki he fānaú ʻa e founga naʻe lava ai ʻe ʻAmalekaia ʻo puleʻi ʻa e kau tau ʻa Lehonitaí, neongo naʻe “fakapapau [ʻe he kau taú] honau ʻatamaí” he ʻikai ke fakamālohiʻi kinautolu ke nau tau mo e kau Nīfaí. Ko e hā naʻe mei hoko kapau naʻe tala ʻe ʻAmalekaia kia Lehonitai ʻa e meʻa naʻá ne palani ke faí mei he kamataʻangá? Ko e hā e meʻa ʻoku akoʻi mai kiate kitautolu ʻe he ngaahi veesi ko ʻení fekauʻaki mo e feinga ʻa Sētane ke kākaaʻi kitautolú?

• Fakaʻaliʻali ha fakatātā ʻo ha fale ʻoku tauhi lelei pea mo ha fale kuo liʻaki, pe fakaʻaliʻali ha fakatātā ʻo ha ngoue maʻuiʻui pea mo ha ngoue kuo vaoa. Tuku ki he fānaú ke nau talanoa fekauʻaki mo e meʻa ʻoku nau sio ki ai ʻi he ngaahi fakatātaá pea mo e ngaahi liliu ne fai ʻi he fakatātaá hili ha ngaahi taimi. Ko e hā ne mei lava ke fai ʻe he tokotaha ʻaʻana ʻa e falé pe ngoué ke taʻofi ai ha hoko e meʻá ni? Fakamatalaʻi ange, ʻe lava ke faiangala ha niʻihi kapau he ʻikai ke nau matuʻuaki e ngaahi ʻahiʻahi ʻa Sētane ke fai ʻa e ngaahi angahala īkí (hangē ko e taʻefaitotonú pe sio ponokalafí) pea iku ai ki ha ngaahi angahala lalahi ange. Ko e hā ha ngaahi meʻa ʻoku kovi ʻoku fie maʻu ke tau siʻaki ʻi heʻetau moʻuí?

Poupouʻi e Ako ʻi ʻApí

Kole ki he fānau takitaha ke nau talamai ha meʻa ʻe taha naʻá ne fanongo ki ai pe ongoʻi he ʻahó ni pea ʻoku fie vahevahe ia mo ha mēmipa ʻo e fāmilí. Fakalotolahiʻi kinautolu ke nau muimui totonu ʻi heʻenau ngaahi palaní.

Fakatupulaki ʻo ʻEtau Founga Akoʻí

Tokoniʻi ʻa e fānaú ke nau langaki ha loto falala. ʻE ʻi ai ha fānau ʻe niʻihi mahalo he ʻikai te nau ongoʻi te nau lava ʻo ako ʻa e ongoongoleleí ʻiate kinautolu pē. Ko e founga ʻe taha ke langaki ʻaki ʻenau loto falalá ko hono fakahikihikiʻi kinautolu ʻi he taimi ʻoku nau kau mai ai ki he kalasí.