“17–23 ʻAokosi. Hilamani 1–6: ‘Maka ʻo Hotau Huhuʻí,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“17–23 ʻAokosi. Hilamani 1–6,” Haʻu, ʻo Muimui ʻIate Au—Maʻá e Palaimelí: 2020
17–23 ʻAokosi
Hilamani 1–6
“Maka ʻo Hotau Huhuʻí”
ʻOku fakataumuʻa ʻa e ngaahi ʻekitivitī ʻi he fokotuʻutuʻu ko ʻení ke ne fakatupu ha ngaahi fakakaukau mo ha tataki fakalaumālie ʻi homou lotó mo e ʻatamaí. ʻOku faʻa haʻu ʻa e ngaahi fakakaukau lelei tahá ʻi he taimi ʻokú ke fakalaulauloto ai ʻi he faʻa lotu ʻa e ngaahi folofolá mo e ngaahi fie maʻu ʻa e fānau ʻokú ke akoʻí.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Ke poupouʻi ʻa e fānaú ʻi heʻenau ako e ongoongoleleí ʻi ʻapí, fakaafeʻi ha niʻihi ʻo kinautolu ke nau vahevahe ha meʻa naʻa nau ako ʻi he uiké ni. Fakamatalaʻi ange ʻa e founga ʻokú ke ako ʻaki ʻa e ongoongoleleí ʻi ʻapí, pea talanoa ki ha ngaahi founga ʻe lava ke tokoniʻi ai ʻe he fānaú honau ngaahi fāmilí ke nau ako mei he Tohi ʻa Molomoná.
Akoʻi e Tokāteliné: Fānau Iiki Angé
Te u lava ʻo langa ʻa hoku fakavaʻé ʻia Sīsū Kalaisi.
Naʻe akoʻi ʻe Hilamani hono ongo foha ko Nīfai mo Līhaí ke langa hake ʻena moʻuí ʻi he maka ʻo hotau Huhuʻí. Fakalaulauloto ki he founga te ke fai ai ʻa e meʻa tatau maʻá e fānau ʻokú ke akoʻí.
Ngaahi ʻEkitivitī ʻe Ala Fakahokó
-
Fakaʻaliʻali ha fakatātā ʻo ha temipale pe ko ha fale ʻe taha, pea fakamatalaʻi ange ʻoku fie maʻu ki he ngaahi falé ha ngaahi fakavaʻe mālohi ke ʻoua naʻa nau holo ʻi he havilí mo e ngaahi matangí. Ke fakatātaaʻi ʻeni, fakaafeʻi ʻa e fānaú ke nau feinga ke ʻunuakiʻi ha foʻi maka ʻaki hono feinga ke puhiʻi. Lau ʻa e ngaahi fuofua laine ʻo e Hilamani 5:12, pea kole ki he fānaú ke nau hiki honau nimá ʻi he taimi ʻoku nau fanongo ai ko hai ʻa e “maka” ʻoku totonu ke hoko ko hotau fakavaʻé.
-
Fakaafeʻi ʻa e fānaú ke nau fai ha ngaahi tōʻonga fakatātā lolotonga hoʻo lau ʻa e Hilamani 5:12. Hangē ko ʻení, te nau lava ʻo taʻalo honau nimá ʻi he taimi ʻokú ke lau ai fekauʻaki mo e “matangi mālohi” ʻa e tēvoló pea tuʻu ʻi ha feituʻu pē ʻe taha ʻi he taimi te ke lau ai fekauʻaki mo e “maka ʻo hotau Huhuʻí.”
-
Fakaafeʻi ʻa e fānaú ke nau tokoni atu ʻi hono langa ha meʻa ʻo fakaʻaongaʻi ha ngaahi konga papa pe ngaahi nāunau kehe. Kamata ʻaki hono faʻu ha “makatuʻunga mālohi”, pea talanoa kiate kinautolu ʻa e founga ʻoku totonu ke hoko ai ʻa Sīsū Kalaisi ko e makatuʻunga ʻo ʻetau moʻuí. Kole ki he fānaú ke nau vahevahe ha ngaahi meʻa te nau lava ʻo fai ke nau muimui ai kia Sīsū Kalaisi, pea tuku ke nau tānaki ha konga ki he fakavaʻé ʻo fakatatau mo e meʻa takitaha ʻoku nau vahevahé.
-
Fakaafeʻi ʻa e fānaú ke nau valivali ʻa e peesi ʻekitivitií, pea tokoniʻi kinautolu ke nau kosi ia ʻo toʻo. Ko e hā te tau lava ʻo fai ke langa ai ʻetau moʻuí ʻi he makatuʻunga ʻo Sīsū Kalaisí? Vahevahe ha niʻihi ʻo e ngaahi founga kuó ke langa ai hoʻo moʻuí ʻi he Fakamoʻuí pea mo hono tāpuekina hoʻo moʻuí ʻi hono fai iá.
ʻOku fanafana mai ʻa e Laumālie Māʻoniʻoní ʻi ha kihiʻi leʻo siʻi.
ʻOku tatau ʻa e fakamatala ʻi he Hilamani 5:29–30, 45–47 ki he leʻo naʻe fanongo ki ai e kau Leimaná mo e founga ʻoku tau faʻa fakamatalaʻi ʻaki ʻa e lea ʻa e Laumālie Māʻoniʻoní. Te ke lava ʻo fakaʻaongaʻi ʻa e ngaahi veesi ko ʻení ke tokoniʻi ʻa e fānaú ke nau ʻiloʻi ʻa e leʻo ʻo e Laumālié.
Ngaahi ʻEkitivitī ʻe Ala Fakahokó
-
Vahevahe ʻa e talanoa kia Nīfai mo Līhai ʻi he fale fakapōpulá. Te ke lava ʻo fakaʻaongaʻi ʻa e “Vahe 37: Ko Nīfai mo Līhai ʻi he Fale Fakapōpulá” (Ngaahi Talanoa ʻo e Tohi ʻa Molomoná, 99–102, pe ko e vitiō kaunga ki ai ʻi he ChurchofJesusChrist.org). ʻI he taimi ʻokú ke talanoa ai fekauʻaki mo e leʻo naʻe fanongo ki ai ʻa e kau Leimaná, lea ʻi ha leʻo vaivai. Toutou fai ʻa e talanoá, pea fakaafeʻi ʻa e fānaú ke nau fanafana fakataha mo koe. Talanoa ki he fānaú kau ki ha ngaahi taimi kuo fanafana atu ai ʻa e Laumālie Māʻoniʻoní kiate koe mo fakamālohia hoʻo fakamoʻoní.
-
Lau ʻa e Hilamani 5:30, pea hivaʻi ha foʻi hiva fekauʻaki mo e Laumālie Māʻoniʻoní, hangē ko e “The Still Small Voice” (Children’s Songbook, 106–7). Fakaʻilongaʻi ha ngaahi foʻi lea ʻi he veesi folofolá pea mo e hivá, ʻokú ne fakamatalaʻi ʻa e founga ʻoku lea mai ai ʻa e Laumālie Māʻoniʻoní kiate kitautolú (vakai foki ki he Hilamani 5:45–47). Fakaʻaongaʻi ʻa e Hilamani 5:29 mo hoʻo ngaahi aʻusia pē ʻaʻau ke vahevahe mo e fānaú ha ngaahi sīpinga ʻe niʻihi ʻo e ngaahi meʻa lelei ʻoku lava ke ueʻi kitautolu ʻe he Laumālie Māʻoniʻoní ke tau faí.
Akoʻi e Tokāteliné: Fānau Lalahi Angé
ʻI he taimi ʻoku ou loto-fakatōkilalo aí, ʻe tāpuakiʻi au ʻe he Tamai Hēvaní.
ʻOku ʻi he Tohi ʻa Molomoná ha ngaahi sīpinga lahi ʻo e ngaahi fakatuʻutāmaki ʻo e loto hīkisiá pea mo e ngaahi tāpuaki ʻo e loto-fakatōkilaló, pea ko e niʻihi ʻo e ngaahi sīpinga ko ʻení ʻoku hā ia ʻi he Hilamani 1–6. ʻI hoʻo ako ʻa e ngaahi vahe ko ʻení, fakalaulauloto ki he founga te ke lava ai ʻo ngāue ʻaki ʻa e ngaahi sīpinga ko ʻení ke akoʻi ʻaki ʻa e fānau ʻi hoʻo kalasí.
Ngaahi ʻEkitivitī ʻe Ala Fakahokó
-
Tuku ki he fānaú ke nau tokoni atu ʻi hono tā ʻi he palakipoé ʻa e fakatātā ko ʻeni ʻo e “siakale ‘o e hīkisiá.” Lau fakataha ʻa e Hilamani 3:24, 33–34 mo e 4:11–15, pea fakaafeʻi ʻa e fānaú ke nau tuhu ki he ngaahi konga ʻo e siakalé ʻoku fakamatalaʻi mai ʻe he ngaahi veesi ko ʻení.
-
Hikiʻi ʻa e ongo foʻi lea Loto-fakatōkilalo mo e Loto-hīkisia ʻi he palakipoé. Hiki ha ngaahi sīpinga ʻe niʻihi ʻo e ngaahi tōʻonga loto-fakatōkilaló mo e loto-hīkisiá ʻi ha ngaahi laʻipepa, pea fakaafeʻi ʻa e fānaú ke nau taufetongi ʻi hono fili ha laʻipepa pea fakapipiki ia ʻi he tafaʻaki ʻo e foʻi lea ʻokú ne fakamatalaʻi ʻa e tōʻonga ko iá ʻi he palakipoé. Ko e hā ha ngaahi founga ʻe niʻihi te tau lava ai ʻo fili ke tau loto-fakatōkilalo?
Ko e “siakale ʻo e loto-hīkisiá.”
Te u langa hoku makatuʻungá ʻia Sīsū Kalaisi.
ʻOku ʻi he Hilamani 5:12 ha ngaahi fakatātā mahuʻinga ʻo hono langa ʻa hotau makatuʻungá ʻia Sīsū Kalaisi. Te ke fakaʻaongaʻi fēfē ʻa e ngaahi fakatātā ko ʻení ke fakatātaaʻi ki he fānaú ʻa e tefitoʻi moʻoni ko ʻení? ʻE tokoni hono fai iá ke teuteuʻi ai ʻa e fānaú ki he ngaahi ʻahiʻahi mo e ngaahi faingataʻa te nau fehangahangai mo iá.
Ngaahi ʻEkitivitī ʻe Ala Fakahokó
-
ʻOmi ki he kalasí ha faʻahinga ʻe niʻihi ʻo e ngaahi nāunau te ne lava ʻo fakafofongaʻi ha ngaahi fakavaʻe vaivai pe mālohi (hangē ko ha foʻi vavae pe maka lafalafa pe taila). Fakaafeʻi ʻa e fānaú ke nau langa ha taua ʻo ngāue ʻaki ʻa e ngaahi konga papa pe ngaahi nāunau kehe ʻi he ngaahi faʻahinga kehekehe ʻo e fakavaʻé. Ko e hā e meʻa ʻokú ne ngaohi ha ngaahi fakavaʻe ke mālohi ange ʻi he ngaahi fakavaʻe ko eé? Lau fakataha ʻa e Hilamani 5:12, pea fehuʻi ki he fānaú ko e hā e ʻuhinga ʻoku nau pehē ai ko Sīsū Kalaisí ko ha “makatuʻunga mālohi” ki heʻetau moʻuí. Te tau lava fēfē ʻo fokotuʻu ʻetau moʻuí ʻiate Iá? Fakaafeʻi kinautolu ke nau fekumi ʻi he Hilamani 3:27–29, 35 mo e Tefito ʻo e Tuí 1:4 ke nau maʻu ha ngaahi fakakaukau.
-
Fakaafeʻi ʻa e fānaú ke nau lau ʻa e Hilamani 5:5–14 pea lau pe ko e tuʻo fiha ʻa e ʻasi e foʻi lea “manatu” ʻi he vēsí. Ko e hā naʻe akoʻi ʻe Hilamani ki hono ngaahi fohá ʻoku totonu ke nau manatuʻí? ʻE tokoniʻi fēfē nai kitautolu ʻe hono manatuʻi ʻa e ngaahi meʻá ni, ke hoko ai ʻa Sīsū Kalaisi ko e makatuʻunga ʻo ʻetau moʻuí?
ʻOku fetongi ʻe he fakatomalá ʻa e fakapoʻuli fakalaumālié ʻaki ʻa e māmá.
Naʻe takatakaiʻi ʻe ha fakapoʻuli ʻa e kau Leimana naʻa nau ō ki he fale fakapōpulá ke tamateʻi ʻa Nīfai mo Līhaí. ʻI he taimi ʻoku tau faiangahala aí, ʻoku tau ʻi ha fakapoʻuli fakalaumālie. ʻOku akoʻi kitautolu ʻe he Hilamani 5:20–52 ki he founga ʻe lava ke toʻo ai ʻetau “ʻao fakapoʻuli” fakalaumālié (veesi 41).
Ngaahi ʻEkitivitī ʻe Ala Fakahokó
-
Ngaohi ʻa e loki akó ki he fakapoʻuli taha ʻe lavá; pea lau pe fakamatala fakanounouʻi leva ʻa e talanoa ʻi he Hilamani 5:20–40 ʻo ngāue ʻaki ha kiʻi kasa siʻisiʻi. Ko e hā ne mei ongoʻi ʻe he kau Leimaná lolotonga ʻenau ʻi he fakapoʻulí? Fakaafeʻi ʻa e fānaú ke nau fanongo ki he meʻa naʻe akoʻi ʻe ʻAminatapi ki he kakaí ke nau faí kae lava ke toʻo ʻa e fakapoʻulí, pea lau leva ʻa e veesi 41. Fakamoʻui leva ʻa e ʻuhilá, pea lau fakataha ʻa e veesi 42–48. Ko e hā ʻa e ngaahi meʻa ʻoku akoʻi mai ʻe he ngaahi veesi ko ʻení kau ki he ngaahi tāpuaki ʻoku ʻomi ʻe he fakatomalá ki heʻetau ngaahi moʻuí?
-
Fakaafeʻi ʻa e fānaú ke nau fakakaukauloto pē ʻoku nau akoʻi ha tamasiʻi siʻisiʻi ange fekauʻaki mo e Laumālie Māʻoniʻoní. Te nau fakaʻaongaʻi fēfē ʻa e Hilamani 5:29–33, 44–47 ke akoʻi ʻa e anga e leʻo ʻo e Laumālié mo e ngaahi meʻa ʻe niʻihi ʻoku talamai ʻe he Laumālié kiate kitautolú? Kuo ueʻi fēfē nai koe ʻe he Laumālie Māʻoniʻoní ke ke fakatomalá? Fakaafeʻi ʻa e fānaú ke nau vahevahe ha ngaahi aʻusia ʻi ha taimi kuo nau ongoʻi ai ʻa e fiemālié mo e nonga ʻo e Laumālie Māʻoniʻoní.
Poupouʻi e Ako ʻi ʻApí
Fakaafeʻi ʻa e fānaú ke nau fehuʻi ki ha ngaahi mēmipa ʻo e fāmilí fekauʻaki mo e founga kuo nau langa ai ʻenau moʻuí ʻia Sīsū Kalaisí. Pe te nau vahevahe mo honau ngaahi fāmilí ʻa ʻenau palani ki hono langa ʻenau moʻui ʻanautolu peé ʻi he Fakamoʻuí.
Fakatupulaki ʻEtau Akoʻí
Fakamoʻoni kia Sīsū Kalaisi. ʻOku ʻi ai haʻo faingamālie toputapu ke ke tokoni ke fakamālohia ʻa e tupulaki ʻo e fakamoʻoni ʻa e fānau ʻi hoʻo kalasí. Tokoniʻi kinautolu ke nau ongoʻi ʻa e ʻofa ʻa Sīsū ʻiate kinautolú pea vahevahe maʻu pē hoʻo fakamoʻoni kiate Iá.