“27 Siulai–2 ʻAokosi. ʻAlamā 39–42: ‘Ko e Palani Lahi ʻo e Fiefiá,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“27 Siulai–2 ʻAokosi. ʻAlamā 39–42,” Haʻu, ʻo Muimui ʻIate Au—Maʻá e Palaimelí: 2020
Fefine, Ko e Hā ʻOkú Ke Tangi Aí? tā ʻe Mark R. Pugh
27 Siulai–2 ʻAokosi
ʻAlamā 39–42
“Ko e Palani Lahi ʻo e Fiefiá”
Hili hono ako ʻi he faʻa lotu ʻa e ʻAlamā 39–42, palani ha ngaahi ʻekitivitī ke tokoniʻi e fānaú ke nau ako. Te ke lava ʻo maʻu ha ngaahi fakakaukau ʻi he ngaahi ʻekitivitī ko ʻení ʻe lava ʻo fakaʻaongaʻi ki ha faʻahinga kulupu taʻu motuʻa pē.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Fakaafeʻi ʻa e fānaú takitaha ke nau tuʻu ki ʻolunga ʻo vahevahe ha meʻa fekauʻaki mo e ongoongoleleí, kuo nau ako kimuí ni mai ʻi ʻapi pe ʻi he lotú.
Akoʻi e Tokāteliné: Fānau Iiki Angé
Te u lava ʻo hoko ko ha faʻifaʻitakiʻanga lelei.
Naʻe poupouʻi ʻe ʻAlamā ʻa Kolianitoni ke ako mei he ngaahi sīpinga lelei ʻo hono ngaahi tokouá mo fakatokanga kia Kolianitoni ke ʻoua naʻa hoko ko ha faʻifaʻitakiʻanga kovi ki he niʻihi kehé.
Ngaahi ʻEkitivitī ʻe Ala Fakahokó
-
Fakamatalaʻi ange ko Sipiloni mo Kolianitoní ko ha ongo tautehina, koia naʻe hoko ʻa Sipiloni ko ha faʻifaʻitakiʻanga lelei kia Kolianitoni. Fakaafeʻi ʻa e fānaú ke nau toutou lea ʻaki fakataha mo koe ʻa e fehuʻi ko ʻení: “ʻIkai koā kuó ne fokotuʻu ha sīpinga lelei maʻau?” ( ʻAlamā 39:1). Kole ki he fānaú ke nau talanoa kau ki ha taha ʻoku hoko ko ha sīpinga lelei kiate kinautolu.
-
Fai ha kiʻi foʻi vaʻinga pe hivaʻi ha hiva ʻa ia ʻe lava e fānaú ʻo muimui pe faʻifaʻitakiʻi ʻa e meʻa ʻokú ke faí, hangē ko e “Do as I’m Doing” (Children’s Songbook, 276). Tuku ki he fānau takitaha ke nau taufetongi ʻi he hoko ko e takí pe sīpingá. Fehuʻi ki he fānaú pe te nau lava fēfē ʻo hoko ko ha faʻifaʻitakiʻanga lelei ki ha taha.
-
Fakaʻaliʻali e ngaahi fakatātā ʻoku fai ai ʻe Sīsū ha ngaahi meʻa lelei, pea fakamatalaʻi ange ko Ia hotau faʻifaʻitakiʻanga haohaoá. Fakamatalaʻi ange te tau lava ʻo hoko ko ha ngaahi sīpinga lelei ʻo hangē ko Sīsuú. Fakaafeʻi ʻa e fānaú ke nau tā ha ngaahi fakatātā ʻo kinautolu pē ʻoku nau hoko ai ko ha sīpinga lelei.
ʻOku lava ʻe he Tamai Hēvaní mo Sīsū Kalaisi ʻo tokoniʻi au ke fakatonutonu ʻeku ngaahi fehālaakí.
Neongo ʻoku ʻikai fie maʻu ia ke fakatomala ʻa e fānau īkí, ka ʻe tokoni hono faiange e talanoa ʻo Kolianitoní ke kamata ke mahino kiate kinautolu ʻa e ʻuhinga ʻo e fakatomalá.
Ngaahi ʻEkitivitī ʻe Ala Fakahokó
-
Fakamatalaʻi kotoa ange fekauʻaki mo e natula ʻo e ngaahi ngaahi angahala ʻa Kolianitoní, fakamatalaʻi ange naʻe fai ʻe Kolianitoni ha fili hala. Ko e hā te tau lava ʻo talaange ke tokoni ai kiate iá? Lau ki he fānaú ʻa e lea naʻe fai ʻe he tamai ʻa Kolianitoní ko ʻAlamā, kiate iá: “ʻOku totonu ke ke fakatomala pea liʻaki hoʻo ngaahi angahalá” ( ʻAlamā 39:9). Talaange kiate kinautolu ʻoku ʻuhinga ʻa e “fakatomalá” ko ʻetau kole ki he Tamai Hēvaní mo Sīsū Kalaisi ke fakamolemoleʻi mo tokoniʻi kitautolu ke fakatonutonu ʻetau ngaahi fehalākí pea te tau feinga ke tau hoko ʻo toe hangē ange ko Kinauá.
-
ʻOange ki ha tamasiʻi ha meʻa ʻoku mamafa ki hono puké lolotonga hoʻo fai ha talanoa fekauʻaki mo ha taha naʻá ne fai ha meʻa hala pea ongoʻi mamahi ai. Talaange ki he fānaú ʻoku hangē ʻa e meʻa mamafá ko e ngaahi ongo mamahi ʻoku tau maʻu ʻi he taimi ʻoku tau fai ai ha fehālaaki. Toʻo ʻa e meʻa mamafá mei he tamasiʻí ʻi he lolotonga hoʻo fakamoʻoniʻi ange ʻoku lava ʻe he Tamai Hēvaní mo Sīsū Kalaisi ʻo toʻo ʻa e meʻa mamafá, ngaahi ongo mamahí mo tokoniʻi kitautolu ke fakatonutonu ʻetau ngaahi fehalākí ʻi he taimi ʻoku tau fakatomala aí. Hivaʻi fakataha ha foʻi hiva fekauʻaki mo e fakatomalá, hangē ko e “Repentance”(Children’s Songbook, 98).
Te u toetuʻu.
Tokoniʻi ʻa e fānaú ke nau hanganaki atu ki ha ʻaho te nau toetuʻu ai mo kinautolu ʻoku nau ʻofa aí.
Ngaahi ʻEkitivitī ʻe Ala Fakahokó
-
Lolotonga hoʻo lau leʻolahi ʻa e ʻAlamā 40:23, ʻai e fānaú ke nau ngāueʻaki ʻa e peesi ʻekitivitī ki he uike ní ke tokoniʻi kinautolu ke nau fakakaukauloto ki he meʻa ʻoku akoʻi mai ʻe he veesi ko ʻení. Fakaafeʻi ʻa e fānau takitaha ke fakaʻaongaʻi ʻa e peesi ʻekitivitií ke akoʻi ki ha taha kehe ʻi he fānaú ko e hā ʻa e toetuʻu.
-
Fakaʻaliʻali ha fakatātā ʻo e Fakamoʻui kuo toetuʻú, pea akoʻi ki he fānaú ha hiva fekauʻaki mo e Toetuʻú, hangē ko e “Naʻe Toetuʻu Nai ʻa Sīsū?” pe ko e “Kuo Toe Tuʻu” (Tohi Hiva ʻa e Fānaú, 45; Ngaahi Himí, fika 108). Taʻofi ʻi ha ngaahi taimi ke fakamatalaʻi ʻa e ʻuhinga mo hono mahuʻinga ʻo e ngaahi leá mo e ngaahi kupuʻi leá.
-
Fehuʻi ki he fānaú pe ʻoku ʻi ai ha taha ʻoku nau ʻilo kuo ʻosi mālōlō. Fai hoʻo fakamoʻoni ʻe toetuʻu ʻa e tokotaha ko iá mo e tokotaha kotoa pē ʻi ha ʻaho, koeʻuhí ko Sīsū Kalaisi. Kapau ʻe fie maʻu, fakaʻaongaʻi ʻa e peesi ʻekitivitī ki he uike ní ke fakamatalaʻi ange ʻa e ʻuhinga te tau toetuʻu aí.
ʻĪmisiMele mo SīsūKo Mele mo e ʻEiki Kuo Toetuʻú, tā ʻe Harry Anderson
Akoʻi e Tokāteliné: Fānau Lalahi Angé
Te u lava ʻo hoko ko ha faʻifaʻitakiʻanga lelei.
ʻE lava ke tokoni ʻa e akonaki ʻa ʻAlamā kia Kolianitoní, ke mahino ki he fānaú ʻa e mahuʻinga ʻo e muimuí pea mo e hoko ko ha faʻifaʻitakiʻanga leleí.
Ngaahi ʻEkitivitī ʻe Ala Fakahokó
-
Fakamatalaʻi ange naʻe fai ʻe he foha ʻo ʻAlamā ko Kolianitoí ha angahala mamafa lolotonga e taimi naʻe totonu ai ke ne malanga ʻaki ʻa e ongoongoleleí. Lau mo e fānaú ʻa e konga fakaʻosi ʻo e ʻAlamā 39:11, pea kole ki he fānaú ke nau fanongo ki he founga naʻe uesia ai ʻe he angahala ʻa Kolianitoní ʻa e kakai Sōlamí. Tokoniʻi ʻa e fānaú ke nau fakakaukau ki ha kakai ʻe ala tākiekina kinautolu ʻe heʻenau ngaahi tōʻongá. Te nau lava fēfē ʻo hoko ko ha ngaahi faʻifaʻitakiʻanga lelei ki he kakai ko ʻení?
-
Lau fakataha ʻa e ʻAlamā 39:1. Naʻe hoko fēfē ʻa e tokoua ʻo Kolianitoni ko Sipiloní ko ha faʻifaʻitakiʻanga lelei? Kole ki he fānaú ke nau kumi ha ngaahi tali ki he fehuʻi ko ʻeni ʻi he ʻAlamā 38:2–4. Vahevahe kau ki ha kau faʻifaʻitakiʻanga lelei ʻi hoʻo moʻuí, pea fakaafeʻi ʻa e fānaú ke nau fai ʻa e meʻa tatau. Fakaʻaliʻali ʻa e vitiō, “Lessons I Learned as a Boy” (ChurchofJesusChrist.org), pea fehuʻi ki he fānau pe naʻe founga fēfē ʻa e hoko ʻa e tamasiʻi lahi angé ko ha faʻifaʻitakiʻanga leleí.
-
ʻOmi ha kasa pe fakatātā ʻo e laʻaá, pea fakafehoanaki ʻa e māmá ki he mālohi ʻo ha faʻifaʻitakiʻanga māʻoniʻoni. Hangē ko hono tokoniʻi ʻe he maama mei ha kasá pe laʻaá ke tau mamata ki ha hala ʻoku fie maʻu ke tau muimui aí, ʻoku fakahā mai foki ʻe ha faʻifaʻitakiʻanga māʻoniʻoni kiate kitautolu ʻa e meʻa ke fai ke tau lava ai ʻo muimui ki he Tamai Hēvaní. Vahevahe ha aʻusia ʻi ha taimi kuo tokoniʻi ai koe ʻe ha tā sīpinga lelei ha tokotaha. Ko e hā ʻe lava ke fai ʻe he fānaú ke nau hoko ai ko ha faʻifaʻitakiʻanga lelei ki he niʻihi kehé? Fakamoʻoni ange ko Sīsū Kalaisi ʻa hotau faʻifaʻitakiʻanga haohaoá.
Te u lava ʻo fakatomala ʻi he taimi ʻoku ou fai ai ha ngaahi fehālaaki.
ʻOku fai ʻe he fānau ʻokú ke akoʻí ha angahala mo ha ngaahi fehālaaki hangē pē ko kitautolu kotoá. Te ke lava fēfē ʻo ueʻi kinautolu ke “liʻaki [ʻenau] ngaahi angahalá” pea fakatomala? ( ʻAlamā 39:9).
Ngaahi ʻEkitivitī ʻe Ala Fakahokó
-
Kole ki he fānaú ke vahevahe ha aʻusia ʻi ha taimi ne nau lavea ai. Ko e hā e meʻa ne nau fai ke tokoniʻi ke fakamoʻui ai honau laveá? Fakamatalaʻi ange ʻoku fakalaveaʻi ʻe he angahalá ʻa hotau ngaahi laumālié, ka ʻe lava ʻe he Fakamoʻuí ʻo fakamoʻui kitautolu ʻi he taimi oku tau fakatomala aí.
-
Kole ki he fānaú ke nau kumi e kupuʻi lea “fakatomala pea liʻaki hoʻo ngaahi angahalá” ʻi he ʻAlamā 39:9, pea tokoniʻi ke mahino kiate kinautolu e ʻuhinga ʻo e “fakatomalá” mo e “liʻakí”. Fakamoʻoniʻi ange ʻoku malava ʻa e fakatomalá ʻo fakafou ʻia Sīsū Kalaisi mo ʻEne Fakaleleí. Lau fakataha ʻa e ʻAlamā 39:10–14 ke kumi ki ha ngaahi meʻa kehe te tau lava ʻo fai te ne tokoniʻi ai kitautolu ke tau fakatomala mo fakaʻehiʻehi mei he angahalá.
Hili ʻa e maté, ʻoku ʻalu leva hotau ngaahi laumālié ki he maama tataliʻanga ʻo e ngaahi laumālié kae ʻoua leva kuo aʻu ki he Toe Tuʻú mo e Fakamāú.
ʻOku fakanatula pē ke tau fifili ko e hā e meʻa ʻe hoko kiate kitautolu hili ʻetau maté. ʻE lava ke tokoni ʻa e ngaahi lea ʻa ʻAlamaá ki he fānaú ke nau maʻu ha ngaahi tali fakalaumālie.
Ngaahi ʻEkitivitī ʻe Ala Fakahokó
-
Hikiʻi ʻa e mate, maama tataliʻanga ʻo e ngaahi laumālié, toe tuʻú, mo e fakamāú ʻi ha ngaahi laʻipepa kehekehe, pea fakapipiki kinautolu ki he palakipoé ʻi ha hokohoko kehekehe pē. Tokoniʻi e fānaú ke mahino kiate kinautolu ʻa e ʻuhinga ʻo e ngaahi foʻi lea ko ʻení. Lau mo e fānaú ʻa e ʻAlamā 40:6–7, 11–14, mo e 21–23 pea kole ange ke nau fakahokohoko ʻa e ngaahi foʻi lea ʻi he palakipoé ʻo fakatatau mo e hokohoko totonu ʻo ʻenau hokó.
-
Hiki ʻi he palakipoé ha lisi ʻo e ngaahi fehuʻi ʻe lava ʻo tali ʻe he ʻAlamā 40:6–7, 11–14, mo e 21–23, pea fakaafeʻi ʻa e fānaú ke nau fakahoa ʻa e fehuʻi takitaha ki he ngaahi vēsí ke maʻu ai ha tali. Hangē ko ʻení, ʻe lava ke tali ʻa e fehuʻi “ʻE fēfē hoku sinó ʻi he taimi ʻe toetuʻu aí?” ʻe he ʻAlamā 40:23. Kapau ʻe fie maʻu, fakamatalaʻi ki he fānaú ʻa e ngaahi foʻi lea faingataʻá lolotonga ʻenau laukongá. Poupouʻi ʻa e fānaú ke nau vahevahe ʻa e ʻuhinga ʻoku nau houngaʻia ai ʻi he palani ʻa e Tamai Hēvaní.
Poupouʻi e Ako ʻi ʻApí
Poupouʻi ʻa e fānaú ke nau fakamālōʻia ha mēmipa ʻo e fāmilí kuo hoko ko ha faʻifaʻitakiʻanga lelei kiate kinautolu pea ke nau fakakaukau ki ha founga ʻe taha te nau lava ai ʻo hoko ko ha faʻifaʻitakiʻanga lelei ʻi he uiké ni.
Fakatupulaki ʻEtau Akoʻí
Fakakau atu ʻa e ngaahi ongoʻangá. “ʻOku ako lelei taha ha fānau (mo e kakai lalahi) tokolahi ʻi he taimi ʻoku fakakau atu ai ha ngaahi ongoʻanga (senses) kehekehé. Kumi ha ngaahi founga ke tokoniʻi ai e fānaú ke nau fakaʻaongaʻi honau ngaahi ongoʻanga ke sió, fanongó, mo e alá ki heʻenau akó” (Faiako ʻi he Founga ʻa e Fakamoʻuí, 25).