Tā fakatātaaʻi ʻe Joshua Dennis

20–26 Siulai

ʻAlamā 36–38

“Sio ki he ʻOtuá pea Moʻui.”

ʻI hoʻo ako ʻi he faʻa lotu ʻa e ʻAlamā 36–38, ʻe haʻu ha ngaahi ongo kiate koe fekauʻaki mo e fānau ʻokú ke akoʻí. Lekooti ʻa e ngaahi ongo ko ʻení; ʻe ala tupu ai ha ngaahi fakaukau ki he ngaahi ʻekitivitī akó.

Lekooti ʻa e Ngaahi Ongo ʻOkú ke Maʻú

Fakaafeʻi Ke Vahevahe

Fakaafeʻi ʻa e fānaú kotoa ke nau vahevahe ha meʻa kuo akoʻi ange ʻe heʻenau ongomātuʻá. Fehuʻi kiate kinautolu pe ʻoku nau ʻilo e meʻa naʻe akoʻi ʻe ʻAlamā ki hono ngaahi fohá.

Akoʻi e Tokāteliné: Fānau Iiki Angé

ʻAlamā 36:6, 20, 24

ʻOku ʻomi ʻe he fakatomalá ʻa e fiefia kiate au.

ʻE lava ke ueʻi fakalaumālie ʻa e fānaú ʻe hono akoʻi kinautolu ʻi heʻenau kei siʻí fekauʻaki mo e fiefia ʻi he fakatomalá, ke nau fakatomala ʻi heʻenau matuʻotuʻa angé.

Ngaahi ʻEkitivitī ʻe Ala Fakahokó

• Lau ʻa e ʻAlamā 36:20 ki he fānaú, pea kole ange ke nau fakafanongo ki he ongo naʻe maʻu ʻe ʻAlamaá. Fakaafeʻi kinautolu ke nau talaatu ha niʻihi ʻo e ngaahi meʻa ʻokú ne ʻomi ʻa e fiefiá kiate kinautolú. Fakaʻaliʻali ha fakatātā ʻo e Fakamoʻuí, pea fakamatalaʻi ange naʻe ongoʻi fiefia ʻa ʻAlamā koeʻuhí naʻe fakamolemoleʻi ʻe Sīsū Kalaisi ʻene ngaahi angahalá.

• ʻOange ki he fānaú takitaha ha laʻi pepa ʻoku ʻi he tafaʻaki ʻe tahá ha fofonga fiefia pea ʻi he tafaʻaki ʻe tahá ha fofonga mamahi. Kole ange ke nau fakafanongo lolotonga hoʻo lau ʻa e ʻAlamā 36:6 pea nau fili ko e fē ʻa e fofonga ʻoku totonu ke nau puke hake ki ʻolungá. Fakamatalaʻi ange naʻe fakatomala ʻa ʻAlamā pea naʻá ne ongoʻi fiefia koeʻuhí ko hono fakamolemoleʻi ia ʻe Sīsū Kalaisi ʻi heʻene fai e ngaahi fili koví. Kole ki he fānaú ke nau fakafanongo lolotonga hoʻo lau ʻa e ʻAlamā 36:24 fekauʻaki mo e ngaahi fili lelei naʻá ne fai kimuí pea puke hake ʻa e laʻi pepa ʻoku ʻi ai ʻa e fofonga malimalí.

• Hivaʻi fakataha ha foʻi hiva fekauʻaki mo Sīsū Kalaisi, hangē ko e “Naʻá Ne Fekau Hono ʻAló” (Tohi Hiva ʻa e Fānaú, 20–21). Vahevahe hoʻo fakamoʻoni naʻe hāʻele mai ʻa Sīsū Kalaisi ki māmani ke fakahaofi kitautolu mei he angahalá pea ʻomi ʻa e fiefiá kiate kitautolu.

ʻAlamā 37:6–7

“ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi.”

Te ke lava fēfē ʻo akoʻi ʻa e fānaú ke nau ʻiloʻi ʻoku fakaʻaongaʻi ʻe he ʻEikí ha ngaahi meʻa iiki mo faingofua ke fakahoko ʻaki ʻEne ngāué?

Ngaahi ʻEkitivitī ʻe Ala Fakahokó

• Lau ʻa e ʻAlamā 37:6–7, pea fakaafeʻi ʻa e fānaú ke nau tulolo ki lalo ʻi he taimi kotoa pē ʻokú ke lau ai e foʻi lea “iiki.” Fakaʻaliʻali ange kiate kinautolu ha fanga kiʻi meʻa iiki te ne lava ʻo ʻai ke hoko ha ngaahi meʻa lalahi pe ʻunuakiʻi ha ngaahi meʻa lahi, hangē ko ha foʻi maka pe ko ha kī meʻalele. Ko e hā ha ngaahi meʻa lalahi ʻoku hoko pe ngaʻunu koeʻuhí ko e ngaahi meʻa iiki ko ʻení? Tokoniʻi ʻa e fānaú ke nau fakakaukau ki ha faʻahinga meʻa iiki pe faingofua ʻoku finangalo ʻa e ʻOtuá ke tau fai. Ko e hā ha ngaahi meʻa lalahi ʻoku lava ʻo hoko koeʻuhi ko e ngaahi fekau iiki pe faingofua ko ʻení?

• Fakaʻaliʻali ha fakatātā ʻe taha pe ua ʻo ha ngaahi meʻa iiki ʻe lava ʻo fakatahatahaʻi ʻo hoko ko ha ngaahi meʻa lalahi, hangē ko ha konga musie mo ha loto ʻataʻatā, pe ko ha ʻuha mo ha anovai. Fakamoʻoniʻi ange ʻe lava ʻe he fanga kiʻi tōʻonga iiki mo faingofuá ʻo fai ha meʻa lahi ʻi heʻetau ngaahi moʻuí pea mo e moʻui ʻa e niʻihi kehé. Poupouʻi ʻa e fānaú ke nau talanoa kau ki ha ngaahi meʻa faingofua mo lelei ʻoku nau fai he ʻaho takitaha, pe vahevahe haʻo ngaahi sīpinga pē ʻaʻau. Fakaafeʻi ʻa e fānaú ke nau fili ha meʻa faingofua mo lelei ʻe taha te nau lava ʻo fai ʻi he uiké ni pea tā ha fakatātā ʻo ʻenau fai iá. Fakaafeʻi kinautolu ke nau ʻalu mo ʻenau ngaahi fakatātaá ki ʻapi pea vahevahe ia mo honau ngaahi fāmilí.

ʻAlamā 37:38–47

ʻE lava ke tokoniʻi kitautolu ʻe he folofolá ʻi he ʻaho kotoa.

Neongo ʻoku ʻikai lava ha tokolahi ʻo e fānau īkí ʻo laukonga, ka te ke lava ʻo tokoniʻi kinautolu ke nau maʻu ha fakamoʻoni ki he mālohi ʻo e folofolá ke tataki kinautolu ʻi heʻenau moʻui fakaʻahó.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo e Liahoná (hangē ko e Tohi Fakatātā ʻo e Ongoongoleleí, fika 68), pe fakaafeʻi ʻa e fānaú ke nau tā ha Liahona lolotonga ʻenau vahevahe ʻa e meʻa ʻoku nau manatuʻi fekauʻaki mo iá (vakai ki he 1 Nīfai 16:10, 28–29). Puke hake ʻa e folofolá, pea kole ki he fānaú ke nau vahevahe ʻa e founga ʻoku hangē ai ʻa e ngaahi folofolá ko e Liahoná. Fakaʻaongaʻi ʻa e ʻAlamā 37:38–47 mo e peesi ʻekitvitī ki he uike ní ke tānaki atu ki he fealeaʻaki ko ʻení.

• Hivaʻi fakataha ha foʻi hiva fekauaʻki mo e ako ʻo e folofolá, hangē ko e “Fekumi, Fifili, pea mo Lotu” pe “Kumi ki Hoʻo Folofolá” (Tohi Hiva ʻa e Fānaú, 66; Ngaahi Himí, fika 144). Ko e hā ha ngaahi tāpuaki ʻo e ako e folofolá ʻoku lave ki ai ʻi he hivá?

  

  ʻOku akoʻi mai ʻe he folofolá ʻa e founga ke tau muimui ai ki he ʻOtuá.

Akoʻi e Tokāteliné: Fānau Lalahi Angé

ʻAlamā 36

ʻE lava ke “fanauʻi au ʻi he ʻOtuá” ‘i he taimi ʻoku ou muimui ai kia Sīsū mo fakatomala mei heʻeku ngaahi angahalá.

“Ko e Uluí … ko ha liliu ʻi hotau natulá. Ko ha liliu mahuʻinga ia ʻoku ʻuhinga ki ai ʻa e ʻEikí mo ʻEne kau palōfitá ko e toe fanauʻi foʻou” (“Conversion,” Gospel Topics, topics.ChurchofJesusChrist.org).

Ngaahi ʻEkitivitī ʻe Ala Fakahokó

• Toe vakaiʻi mo e fānaú ʻa e talanoa ʻo e fakaului ʻo ʻAlamā ko e Siʻí ʻi he ʻAlamā 36:6–21. Hiki ʻi ha ngaahi laʻi pepa ʻa e ngaahi foʻi lea mo e kupuʻi lea mei he ngaahi veesi ko ʻení ʻokú fakamatalaʻi ʻa e ongo ʻa ʻAlamaá, pea fakapipiki ia ki he palakipoé. Kole ki he fānaú ke nau fokotuʻutuʻu ʻa e ngaahi laʻi pepá ki ha kulupu ʻe ua: ko e ngaahi ongo naʻe maʻu ʻe ʻAlamā kimuʻa peá ne manatuʻi e meʻa naʻe akoʻi ange ʻe heʻene tamaí kau ki he Fakamoʻuí, mo e ngaahi ongo naʻá ne maʻu hili ʻene manatuʻí. Lau fakataha ʻa e ʻAlamā 36:17–20, pea fakamoʻoniʻi ki he fānaú ʻoku fakamolemoleʻi kitautolu ʻe Sīsū Kalaisi ʻi he taimi ʻoku tau fakatomala aí.

• Tohiʻi ʻa e Fanauʻi ʻi he ʻOtuá pea mo e ngaahi fakamoʻoni fakafolofola ko ʻení ʻi he palakipoé: 1 Sione 4:7; Mōsaia 5:7; 27:25–26; ʻAlamā 5:14; 22:15. Tokoniʻi e fānaú ke nau lau ʻa e ngaahi vēsí pea kumi e ngaahi kupuʻi lea ʻoku nau fakamatalaʻi ʻa e ʻuhinga ʻo e fanauʻi ʻi he ʻOtuá. ʻOku fēfē nai ha tōʻonga ʻo ha tokotaha hili hono fanauʻi ia ʻi he ʻOtuá? Te tau fakahaaʻi fēfē nai kuo fanauʻi kitautolu ʻi he ʻOtuá?

ʻAlamā 37:6–9, 38–47

“ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi.”

Tokoniʻi e fānau ʻokú ke akoʻí ke nau ʻiloʻi, neongo kapau ʻe taimi siʻi hono lau ʻa e folofolá he ʻaho takitaha, ʻe lava ke ʻomi ha ngaahi tāpuaki lahi kiate kinautolu.

Ngaahi ʻEkitivitī ʻe Ala Fakahokó

• Tā pe fakaʻaliʻali ange ha kane. Ko ha tulutā vai nai ʻe fiha pea toki fonu ʻa e kané? Tokoniʻi ʻa e fānaú ke nau ʻiloʻi ʻe fie maʻu ha ngaahi tulutā lahi ke fakafonu ʻaki ʻa e kané. ʻOku kaunga fēfē nai ʻeni ki he ʻAlamā 37:6–7? ʻOku hangē fēfē nai hono lau ʻa e folofolá mo hono tānaki atu ha ngaahi tulutā vai ki ha kané?

• Fakaafeʻi ʻa e fānaú ke nau kumi ʻi he ʻAlamā 37:6–9 ki he ngaahi tāpuaki ʻoku maʻu mei he “ngaahi lekooti,” pe folofolá. Faʻu fakataha mo e kalasí ha lisi ʻo e meʻa te nau maʻú. Kuo faitāpuekina fēfē nai ʻetau moʻuí ʻi hono lau ʻa e folofolá? Vahevahe hoʻo fakamoʻoni ki he folofolá, pea poupouʻi ʻa e fānaú ke nau fai e meʻa tatau.

• Fakahā pe fakaʻaliʻali ange ha fakatātā ʻo e Liahoná (hangē ko e Tohi Fakatātā ʻo e Ongoongoleleí, fika 68), pea kole ki he fānaú ke nau toe vakaiʻi e meʻa ne nau manatuʻi kau ki he Liahoná mei he 1 Nīfai 16:10, 28. Tokoniʻi e fānaú ke nau lau ʻa e ʻAlamā 37:38–42. Naʻe anga fēfē e ngāue ʻa e Liahoná? ʻOku faitatau fēfē nai ʻeni mo e founga ʻoku ngāue ai ʻa e folofolá? Lau fakataha ʻa e veesi 43–47 ke tokoni ke tali ʻa e fehuʻi ko ʻení. Fakaafeʻi ʻa e fānaú ke nau fakakakato ʻa e peesi ʻekitivitií ko ha konga ʻo e ʻekitivitī ko ʻení.

Poupouʻi e Ako ʻi ʻApí

Poupouʻi e fānaú ke nau vahevahe ha ʻuhinga ʻe taha ʻoku nau houngaʻia ai ʻi he folofolá pea fakaafeʻi e kau mēmipa ʻo honau ngaahi fāmilí ke nau fai e meʻa tatau.

Fakatupulaki ʻEtau Akoʻí

Tokoniʻi e fānaú ke nau hoko ko ha kau ako leleiange. Ko hoʻo taumuʻa ʻi hono akoʻi ʻo e fānaú, ʻoku ʻikai ko hono akoʻi pē ʻo e moʻoní kiate kinautolu. ʻOku totonu foki ke ke tokoniʻi kinautolu ke nau hoko ko ha kau fekumi ʻiate kinautolu pē, ki he moʻoní. Hangē ko ʻení, te ke lava ʻo palani ha ngaahi ʻekitivitī ʻa ia te nau lava ai ʻo fekumi ke ʻiloʻi ʻiate kinautolu pē ʻa e ngaahi moʻoni ʻi he talanoá, kae ʻikai ko hono talaange pē ki he fānaú ʻa e ngaahi moʻoni ʻoku maʻu ʻi he talanoa ʻo e fakaului ʻa ʻAlamaá.