Akoʻi ʻe ʻAlamā ʻa Kolihola

Fakamoʻoniʻi ʻe he Meʻa Kotoa Pē ʻOku ʻI Ai ha ʻOtua (ʻAlamā mo Kolihola), tā ʻe Walter Rane

6–12 Siulai

ʻAlamā 30–31

“Ko e Ivi ʻo e Folofola ʻa e ʻOtuá”

Ako ʻa e ʻAlamā 30–31 mo fakakaukau ki he fānau ʻokú ke akoʻí. ʻI hoʻo fakalaulauloto ki heʻenau ngaahi mālohingá mo e fie maʻú, ʻe tokoniʻi koe ʻe he Laumālie Māʻoniʻoní ke ke ʻiloʻi e meʻa ke akoʻi kiate kinautolú.

Lekooti ʻa e Ngaahi Ongo ʻOkú ke Maʻú

fakaʻilonga vahevahé

Fakaafeʻi Ke Vahevahe

Fakaafeʻi ʻa e fānaú ke nau vahevahe e ngaahi tali ki he ngaahi fehuʻi hangē ko ʻení: Ko e fē ʻa e taimi ʻoku totonu ke tau lotu aí? Ko e hā ʻetau lea ʻi he taimi ʻoku tau lotu aí? ʻE lava ha taha ʻo vahevahe fekauʻaki mo e anga e lotu ʻa e kau Sōlami pe ko e founga e lotu ʻa ʻAlamaá?

fakaʻilonga akoʻi

Akoʻi e Tokāteliné: Fānau Iiki Angé

ʻAlamā 30:44

ʻOku fakamoʻoni e meʻa kotoa pē ki he ʻOtuá.

Naʻe fakaʻaongaʻi ʻe ʻAlamā ʻa e ngaahi meʻa ʻi he langí mo e māmaní ke fakamoʻoniʻi ʻoku moʻui mo tataki ʻe he ʻOtuá ʻa e ʻunivēsí. Ko e hā ha ngaahi meʻa te ke lava ʻo tokoni ke vakai takai ki ai ʻa e fānaú, ʻoku nau fakamoʻoniʻi ʻa e ʻOtuá?

Ngaahi ʻEkitivitī ʻe Ala Fakahokó

• Lau ʻa e ʻAlamā 30:44 ki he fānaú, pea kole ange ke nau fakafanongo ki he ngaahi meʻa naʻe lea ʻaki ʻe ʻAlamā ʻe tokoni kiate kitautolu ke tau ʻiloʻi ʻoku moʻoni ʻa e ʻOtuá. Fakaʻaliʻali ha ngaahi fakatātā ʻo e niʻihi ʻo e ngaahi meʻa ko ʻení, pea kole ki he fānaú ke nau tuhu ki he ngaahi fakatātaá ʻi he taimi te ke lau ai fekauʻaki mo e ngaahi meʻa ko iá ʻi he vēsí. Fakaafeʻi ʻa e fānaú ke nau tā ha ngaahi fakatātā ʻo e ngaahi meʻa ʻokú ne tokoniʻi kinautolu ke nau tui ki he ʻOtuá.

• Kapau ʻe lava, luelue ʻi tuʻa fakataha mo e fānaú pe kole ange ke nau tuʻu ʻi ha matapā lolotonga hoʻo lau e ʻAlamā 30:44. Kole ange ke nau fakamatalaʻi e ngaahi meʻa ʻoku nau sio ki ai ʻe tokoni kiate kinautolu ke nau ʻilo ʻoku moʻoni ʻa e ʻOtuá. ʻE lava foki ke tokoni ʻa e peesi ʻekitivitī ki he uike ní.

• Kole ki he fānaú ke nau tangutu ʻi ha siakale pea nau hiva fakataha ha foʻi hiva fekauʻaki mo e fakatupu ʻa e ʻOtuá, hangē ko e “ ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16–17). Lolotonga e hiva ʻa e fānaú, fakaafeʻi kinautolu ke nau paasi takai ha meʻa hangē ko ha foʻi pulu. ʻI he taimi ʻoku tuʻu ai e hivá, kole ki he tokotaha ʻokú ne puke ʻa e meʻa ne pāsí ke vahevahe ha meʻa ʻe taha naʻe fakatupu ʻe he Tamai Hēvaní ʻokú ne houngaʻia ai.

ʻAlamā 31:5

ʻOku mālohi e folofola ʻa e ʻOtuá.

ʻI he taimi ʻoku fakakaukau ai e fānaú ki he mālohí, mahalo te nau fakakaukau ki ha ngaahi meʻa hangē ko e kau moʻungaʻi tangata, ngaahi kuini, pe ngaahi tuʻi. Te ke lava ʻo tokoni ke mahino kiate kinautolu ʻoku mālohi ange ʻa e folofola ʻa e ʻOtuá ʻi ha “toe meʻa kehe” ( ʻAlamā 31:5).

Ngaahi ʻEkitivitī ʻe Ala Fakahokó

• Tā ha heletā ʻi he palakipoé. Lau ʻa e ʻAlamā 31:5 ki he fānaú, pea fakaafeʻi kinautolu ke nau fanongo ki he meʻa naʻe pehē ʻe ʻAlamā ʻoku mālohi ange ʻi ha heletaá. Vahevahe ha aʻusia kuo hoko ai e folofola ʻa e ʻOtuá ko ha ivi tākiekina mālohi ʻiate koe.

• Hiva fakataha ha foʻi hiva fekauʻaki mo e folofolá, hangē ko e “Scripture Power” (music.ChurchofJesusChrist.org), pea kole ki he fānaú ke nau fanongo ki he founga ʻoku tokoniʻi ai kitautolu ʻe he folofolá. Toutou lau tuʻo lahi ʻa e kupuʻi lea “ʻOku mālohi ange ʻa e folofola ʻa e ʻOtuá ʻi he …,” pea kole ki he fānaú ke nau tokoni atu ke fakakakato ʻa e kupuʻi leá.

ʻAlamā 31:8–35

ʻOku ongoʻi ʻe he Tamai Hēvaní ʻeku ngaahi lotú.

Naʻe loto mamahi ʻa ʻAlamā ʻi heʻene vakai ki he founga lotu ʻa e kau Sōlamí (vakai ki he ʻAlamā 31:24)—naʻe ʻikai ke nau tui kia Sīsū Kalaisi pea naʻa nau lea ʻaki e lotu tatau maʻu pē ʻi ha feituʻu ʻe lava ai e taha kotoa ʻo mamata kiate kinautolú ( ʻAlamā 31:13–14). Ka naʻe loto-fakatōkilalo ʻa e lotu ʻa ʻAlamaá pea naʻe hā mai ai ʻa e tui kia Kalaisí.

Ngaahi ʻEkitivitī ʻe Ala Fakahokó

• Fakamatala fakanounouʻi maʻá e fānaú ʻa e talanoa ʻo ʻAlamā mo e kau Sōlamí, ʻo fakaʻaongaʻi e ngaahi veesi mei he ʻAlamā 31:8–35. Te ke lava foki ʻo fakaʻaongaʻi e “Vahe 28: Ko e Kau Sōlamí pea mo e Lameiumetoní” (Ngaahi Talanoa ʻo e Tohi ʻa Molomoná, 78–80, pe ko e vitiō kaunga ki ai ʻi he ChurchofJesusChrist.org). Fakamatalaʻi e ngaahi faikehekehe ʻi he vahaʻa ʻo e lotu ʻa e kau Sōlamí mo e lotu ʻa ʻAlamaá. Fakaafeʻi ʻa e fānaú ke nau fakakaukauloto ne nau fetaulaki mo ha taha ʻo e fānau e kau Sōlamí. Ko e hā te nau lea ʻaki ke akoʻi ki he tokotaha ko iá ʻa e founga ʻo e lotú?

• Tokoniʻi e fānaú ke nau kumi ke ʻiloʻi e ngaahi meʻa naʻe lea ʻaki ʻe he kau Sōlamí ʻi heʻenau lotú (vakai ki he ʻAlamā 31:15–18) lolotonga ʻenau tokoni atu ke langa ha taua Lameiumetoni ʻaki ha ngaahi kongokonga pe ngaahi maka. Fakamatalaʻi ange ʻoku ʻikai ko e founga eni ʻoku totonu ke tau lotu ʻakí. Fehuʻi ki he fānaú e founga ʻoku totonu ke tau lotu ʻakí, pea tuku ke nau toʻo ha foʻi poloka pe maka ʻi he taimi kotoa pē ʻoku nau lave ai ki ha founga totonu ʻe taha ʻo e lotú.

fakaʻilonga akoʻi

Akoʻi e Tokāteliné: Fānau Lalahi Angé

ʻAlamā 30

ʻOku fakatokanga mai ʻa e Tohi ʻa Molomoná kiate au fekauʻaki mo e ngaahi akonaki loí.

ʻOku fakamatalaʻi ʻi he Tohi ʻa Molomoná ʻa e ngaahi akonaki loi ʻa Koliholá ke tokoniʻi kitautolu ke tau ʻiloʻi mo siʻaki e ngaahi akonaki tatau ʻi hotau kuongá ni.

Ngaahi ʻEkitivitī ʻe Ala Fakahokó

• Fakaʻaliʻali ha ngaahi meʻa (hangē ko e paʻanga pe meʻakai) mo ha ngaahi fakatātā meʻavaʻinga ʻo e ngaahi meʻá ni. Ko e fē ʻi he ngaahi meʻá ni ʻe fie maʻu ʻe he fānaú? Tokoniʻi e fānaú ke nau kumi ʻi he ʻAlamā 30:12–18 ki he ngaahi loi pe ngaahi akonaki hala naʻe akoʻi ʻe Kolihola fekauʻaki mo e ʻOtuá.

• Tokoniʻi e fānaú ke nau feinga ke ʻiloʻi ʻa e ngaahi loi naʻe akoʻi ʻe Koliholá pea hiki kinautolu ʻi ha ngaahi laʻi pepa ke fakapipiki ki he palakipoé (vakai ki he ʻAlamā 30:12–18, 24). Kole ki he fānaú ke nau fekumi ʻi he ʻAlamā 30:32–35, ki he ngaahi founga ne tali ʻaki ʻe ʻAlamā ki he ngaahi loi ʻa Koliholá. Fehuʻi ki he fānaú pe ʻe anga fēfē haʻanau ʻiloʻi ʻoku moʻoni ʻa e ngaahi meʻa naʻe akoʻi ʻe ʻAlamaá.

  Talanoa ʻa Kolihola mo ʻAlamā

  Talanoa ʻa Kolihola kia ʻAlamā, tā ʻe Robert T. Barrett

ʻAlamā 31:5

ʻOku mālohi ange ʻa e folofola ʻa e ʻOtuá ʻi ha toe meʻa.

Ko e fē nai ha taimi kuó ke ongoʻi ai e mālohi ʻo e folofola ʻa e ʻOtuá? Fakakaukau ki he founga ʻe ala ueʻi fakalaumālie ai ʻe hoʻo ngaahi aʻusiá ʻa e fānau ʻokú ke akoʻí.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau fakakaukau ki ha meʻa pe ko ha tokotaha mālohi, pe fakahā ange ha ngaahi fakatātā ʻo ha ngaahi meʻa mālohi. Ko e hā ha meʻa ʻokú ne ngaohi e ngaahi meʻa ko ʻení ke nau mālohí? Lau fakataha ʻa e ʻAlamā 31:5 pea fehuʻi ki he fānaú pe ʻoku nau pehē ʻoku ʻuhinga ki he hā ʻa e veesi ko ʻení. ʻOku anga fēfē ʻa e mālohi ange e folofola ʻa e ʻOtuá ʻi ha heletaá? Ko e hā e meʻa ʻoku malava ke ne fai ʻaki ʻa e mālohí?

• Fetuʻutaki kimuʻa ki ha fānau ʻe niʻihi, pea kole ange ke nau fakakaukau ki ha aʻusia ke vahevahe ʻi he kalasí, ʻo kau ki ha taimi ne tokoniʻi ai kinautolu ʻe he folofolá pe ko ha lea mei ha taki ʻo e Siasí, ke nau fai ha meʻa lelei. Ko e hā e ʻuhinga naʻe ngaohi ai kinautolu ʻe he folofola ʻa e ʻOtuá ke nau fie fai e ngaahi meʻa leleí?

• Hivaʻi mo e fānaú ha foʻi hiva fekauʻaki mo e folofola ʻa e ʻOtuá, hangē ko e “Fekumi, Fifili, pea Lotu” pe “Muimui He Palōfitá” (Tohi Hiva ʻa e Fānaú, 66, 58–59). Te nau lava foki ʻo hiva ʻa e “Scripture Power” (music.ChurchofJesusChrist.org).

ʻAlamā 31:8–35

Te u lava ʻo loto-fakatōkilalo.

Neongo e kotoa ʻo e ngaahi fehālaaki naʻe fai ʻe he kau Sōlamí, naʻe tautefito e lotomamahi ʻa ʻAlamaá ʻi heʻenau hīkisiá. Mahalo ko ha faingamālie ʻeni ke akoʻi ai ki he fānaú ʻa e mahuʻinga ʻo e loto-fakatōkilaló.

Ngaahi ʻEkitivitī ʻe Ala Fakahokó

• Tokoniʻi e fānaú ke mahino kiate kinautolu e faikehekehe ʻi he vahaʻa ʻo e loto-hīkisiá mo e loto-fakatōkilaló (vakai ki he “Loto-hīkisiá” mo e “Loto-fakatōkilaló” ʻi he Fakahinohino ki he Ngaahi Folofolá). Kole ki he fānaú ke nau taufetongi ʻi hono lau ʻa e ʻAlamā 31:24–28. Pe lau fakataha ʻa e “Vahe 28: Ko e Kau Sōlamí mo e Kau Lameiumetoní” (Ngaahi Talanoa ʻo e Tohi ʻa Molomoná, 78–90). Lolotonga ʻenau laú, kole ange ke nau fakatokangaʻi e founga hono fakahaaʻi ʻe he kau Sōlamí ʻenau loto-hīkisiá. Naʻe fakahaaʻi fēfē ʻe ʻAlamā ʻene loto-fakatōkilaló? (vakai ki he ʻAlamā 31:30–33).

• Vahevahe ʻa e fānaú ki ha ngaahi kulupu, pea kole ki he kulupu takitaha ke nau fili ha tali ki he ngaahi fehuʻi hangē ko ʻení: Ko e hā e meʻa naʻe loto e kau Sōlamí ke nau faí? (vakai ki he ʻAlamā 31:24, 28). Ko e hā ha niʻihi ʻo e ngaahi meʻa fakamāmani ʻoku holi ki ai e kakaí he kuongá ni? Ko e hā ka fakakaukau ai e kakaí ʻoku nau lelei ange he niʻihi kehé? ʻI he taimi ʻoku vahevahe ai ʻe he kulupu takitaha ha talí, tuku ke nau tā ha konga ʻo e taua Lameiumetoní ʻi he palakipoé. Kole ange leva ke nau tamateʻi ha ngaahi konga ʻo e tauá ʻi he taimi kotoa pē ʻoku nau fakakaukau ai ki ha founga te nau lava ʻo loto-fakatōkilalo ai.

fakaʻilonga ako

Poupouʻi e Ako ʻi ʻApí

Fakaafeʻi e fānaú ke akoʻi honau fāmilí ki ha meʻa ne nau ako fekauʻaki mo e mālohi ʻo e folofola ʻa e ʻOtuá he ʻahó ni.

Fakatupulaki ʻEtau Akoʻí

Tokoniʻi e fānaú ke nau ako mei he folofolá. Mahalo heʻikai lava ʻe he fānau īkí ʻo laukonga fēfē, ka te ke kei lava pē ke fakakau mai kinautolu ki he ako mei he folofolá. Hangē ko ʻení, te ke lava ʻo lau ha potufolofola pea fakaafeʻi kinautolu ke nau tuʻu ki ʻolunga pe hiki honau nimá ʻi he taimi te nau fanongo ai ki ha foʻi lea pe kupuʻi lea pau. Tokoniʻi leva ke mahino kiate kinautolu ʻa e foʻi leá pe kupuʻi leá. (Vakai, Faiako ‘i he Founga ‘a e Fakamo‘uí, 20–21.)

peesi ʻekitivitií: ʻoku fakamoʻoni e meʻa kotoa pē ki he ʻOtuá