“29 Sune–5 Siulai. ʻAlamā 23–29: ‘Naʻe ʻIkai ke Nau Toe Hē,’” Haʻu, ʻo Muimui ʻIate Au—Maʻá e Palaimelí: Tohi ʻa Molomoná 2020 (2020)
“29 Sune–5 Siulai. ʻAlamā 23–29,” Haʻu, ʻo Muimui ʻIate Au—Maʻá e Palaimelí: 2020
Tanu ʻe he kau ʻAnitai-Nīfai-Līhaí ʻEnau Ngaahi Meʻataú, tā ʻe Jody Livingston
29 Sune–5 Siulai
ʻAlamā 23–29
“Naʻe ʻIkai ke Nau Toe Hē”
Ako ʻi he faʻa lotu ʻa e ʻAlamā 23–29, ʻo kumi ki ha ueʻi fakalaumālie fekauʻaki mo e meʻa ʻoku fie maʻu ʻe he fānaú mo e founga ke tokoniʻi ʻaki kinautolú.
Lekooti ʻa e Ngaahi Ongo ʻOkú ke Maʻú
Fakaafeʻi Ke Vahevahe
Tā ha fofonga fiefia ʻi ha laʻi pepa, pea tuku ki he fānaú ke nau puke taha taha ia. ʻI heʻenau puke ʻa e laʻi pepá, fakaafeʻi kinautolu ke nau talaatu ha meʻa ʻoku nau ako mei he Tohi ʻa Molomoná, ʻa ia ʻokú ne ʻomi ai ha fiefia kiate kinautolu.
Akoʻi e Tokāteliné: Fānau Iiki Angé
ʻOku tāpuekina au ʻi he taimi ʻoku ou tauhi ai ʻeku ngaahi palōmesí.
Ko e hā e meʻa naʻá ke ako ʻi hoʻo ako ʻa e ʻAlamā 24:6–24 te ne lava ʻo tokoni ke mahino ki he fānaú ʻa e mahuʻinga ʻo hono tauhi ha palōmesi angatonu?
Ngaahi ʻEkitivitī ʻe Ala Fakahokó
-
Lau ha ngaahi veesi pe kupuʻi lea mei he ʻAlamā 24:6–24 ke akoʻi e fānaú kau ki he kau ʻAnitai-Nīfai-Līhaí, palōmesi ne nau faí, mo e founga ne nau tauhi ʻaki ʻa e palōmesí. Te ke lava ʻo fakaʻaongaʻi ʻa e fakatātā ʻi he fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí pe “Vahe 26: Ko e Kakai ʻo ʻĀmoní” (Ngaahi Talanoa ʻo e Tohi ʻa Molomoná, 73–74, pe ko e vitiō kaunga ki aí ʻi he ChurchofJesusChrist.org).
-
Fakamatalaʻi hono tauhi ʻe he kau ʻAnitai-Nīfai-Līhaí ʻenau ngaahi palōmesí ʻaki hono tanu ʻenau ngaahi meʻataú. Fakaafeʻi ʻa e fānaú ke nau tā ha heletā pea nau pehē pē hangē ʻoku nau keli ha luo ʻo tanu ai ʻenau heletaá. Tokoniʻi e fānaú ke nau fakakaukau ki ha ngaahi palōmesi ʻoku nau fai. Ko e hā e ʻuhinga ʻoku mahuʻinga ai ke tauhi e ngaahi palōmesí? Fakamatalaʻi ange ko e taimi ʻoku tau papitaiso aí, ʻoku tau fai ha ngaahi palōmesi mo e ʻOtuá ʻokú Ne fai ha ngaahi talaʻofa mo kitautolu. ʻOku ui ʻeni ko e ngaahi fuakava. Fakamoʻoniʻi ʻoku tāpuekina kitautolu ʻi he taimi ʻoku tau tauhi ai ʻetau ngaahi palōmesi mo e ʻOtuá.
ʻOku ʻomi ʻe he ongoongoleleí ʻa e fiefia kiate au, pea te u lava ʻo vahevahe ʻa e fiefia ko ʻení mo e niʻihi kehé.
Naʻe maʻu ʻe ʻĀmoni ʻa ia naʻá ne tokoni ke akoʻi e ongoongoleleí ki he kau ʻAnitai-Nīfai-Līhaí, ha fiefia lahi mei heʻene malanga ʻaki ʻa e ongoongoleleí. Naʻe maʻu ʻe ʻAlamā, ʻa ia naʻá ne akoʻi foki ʻa e ongoongoleleí ki he kakai tokolahi, ʻa e fiefia tatau. Te tau lava ʻo aʻusia ʻa e fiefia tatau ʻi he taimi ʻoku tau vahevahe ai ʻetau ngaahi fakamoʻoni mo e niʻihi kehé.
Ngaahi ʻEkitivitī ʻe Ala Fakahokó
-
Fili ha kupuʻi lea ʻe niʻihi mei he ʻAlamā 26 pe 29 ʻoku lau kau ki he fiefiá, pea lau ia ki he fānaú (vakai ki he ʻAlamā 26:11, 13 pe ʻAlamā 29:13–14 ki ha sīpinga). Fakaafeʻi ʻa e fānaú ke nau tuʻu ki ʻolunga ʻi he taimi kotoa pē ʻoku nau fanongo ai ki he foʻi lea “fiefia.” Tokoni ke mahino ki he fānaú, naʻe fiefia ʻa ʻAlamā mo ʻĀmoni ʻi hono vahevahe ʻa e ongoongoleleí. Vahevahe ha aʻusia naʻe ʻomi ai ʻe hono vahevahe ʻo e ongoongoleleí ha fiefia kiate koe.
-
Fakaafeʻi ʻa e fānaú ke nau tā ha ngaahi fakatātā ʻo e ngaahi meʻa ʻokú ne ʻomi ʻa e fiefiá kiate kinautolú. Fakaafeʻi ʻa e kiʻi leka takitaha ke ne ʻoange ʻene fakatātaá ki ha taha kehe ʻi he kalasí pea fakamatalaʻi ia. Fakamahinoʻi ange, ko e taimi ʻoku ʻomi ai ʻe ha meʻa ha fiefia kiate kitautolu—hangē ko e ongoongoleleí—ʻoku tupulaki ʻetau fiefiá ʻi he taimi ʻoku tau vahevahe ai iá.
-
ʻOange ki ha tokotaha ha tatau ʻo e Tohi ʻa Molomoná, pea tuku ke ne akoako vahevahe ia mo ha tokotaha kehe ʻi he kalasí. Poupouʻi e fānaú ke nau vahevahe ʻa e anga ʻo ʻenau ongo kau ki he Tohi ʻa Molomoná. Ko e hā e ʻuhinga ʻoku tau vahevahe ai e Tohi ʻa Molomoná mo e niʻihi kehé?
Te u lava ʻo tokoniʻi hoku ngaahi kaungāmeʻá ke nau moʻui ʻaki ʻa e ongoongoleleí.
Naʻe maluʻi ʻe he kau Nīfaí ʻa e kau ʻAnitai-Nīfai-Līhaí, mei honau ngaahi filí pea tokoniʻi kinautolu ke tauhi e ngaahi fuakava ne nau fai mo e ʻEikí.
Ngaahi ʻEkitivitī ʻe Ala Fakahokó
-
Fai ʻa e talanoa ʻo hono fakahoko ʻe he kau ʻAnitai-Nīfai-Līhaí ha palōmesi he ʻikai ke nau toe taú (vakai ki he ʻAlamā 27:20–30). Fakamatalaʻi ange, koeʻuhi ko e palōmesi ʻa e kau ʻAnitai-Nīfai-Līhaí, naʻe ʻikai ke nau lava ʻo maluʻi kinautolu mei honau ngaahi filí. Lau ʻa e ʻAlamā 27:23, pea fakamatalaʻi ange naʻe fili ʻe honau ngaahi kaungāmeʻa ʻi he kakai Nīfaí ke nau maluʻi e kau ʻAnitai-Nīfai-Līhaí kae lava ke nau tauhi ʻenau palōmesí. Te tau lava fēfē nai ʻo tokoniʻi hotau ngaahi kaungāmeʻá ke nau tauhi ʻenau ngaahi palōmesí? Talanoa ki ha taimi naʻe tokoniʻi ai koe ʻe haʻo kaungāmeʻa ke ke tauhi hoʻo ngaahi palōmesi mo e ʻOtuá.
-
Fakatātaaʻi mo e fānaú ʻa e ngaahi tūkunga te nau lava ai ʻo tokoniʻi e niʻihi kehé ʻi ha founga lelei, ke nau fili ʻa e totonú. Hangē ko ʻení, ko e hā te tau lava ʻo lea ʻaki ki ha kaungāmeʻa ʻoku loto ke loi pe ʻulungāanga kovi?
Akoʻi e Tokāteliné: Fānau Lalahi Angé
Ko e fuakavá ko ha ngaahi palōmesi ia ʻoku ou fai mo e ʻOtuá pe ʻokú Ne fakahoko mo au.
Naʻe tanu ʻe he kau ʻAnitai-Nīfai-Līhaí ʻenau ngaahi meʻataú pea palōmesi he ʻikai ʻaupito ke nau toe tāmate. ʻI he meʻa tatau pē, ʻe lava ʻe he fānau ʻokú ke akoʻí ʻo tauhi ʻenau ngaahi fuakavá.
Ngaahi ʻEkitivitī ʻe Ala Fakahokó
-
ʻOange ki he fānau takitaha ha fanga kiʻi foʻi maka iiki, pea fakaafeʻi kinautolu ke nau tohiʻi e foʻi lea fuakava ʻi heʻenau foʻi maká. Fakamatalaʻi ange ko e fuakavá ko ha palōmesi ʻi he vahaʻa ʻo e Tamai Hēvaní mo ʻEne fānaú. ʻOku ngaohi fēfē nai kitautolu ʻe heʻetau ngaahi fuakavá ke tau mālohi pe “maʻu” hangē ha maká? ( ʻAlamā 24:19). Lau fakataha ʻa e ʻAlamā 24:16–25 ke ʻiloʻi ʻa e fuakava naʻe fai ʻe he kakai ʻo ʻĀmoní pea mo e anga ʻenau fakaʻapaʻapaʻi ʻenau fuakavá. Fakaafeʻi ʻa e fānaú ke nau ʻave ʻa e ngaahi foʻi maká ki honau ʻapí ko ha fakamanatu ke tauhi ʻenau ngaahi fuakavá.
-
Lau mo e fānaú ʻa e ʻAlamā 24:16–19, pea aleaʻi e meʻa naʻe fai ʻe he kau ʻAnitai-Nīfai-Līhaí ke fakahaaʻi ai ki he ʻOtuá kuo nau fakatomala. Ko e hā naʻa nau fuakava he ʻikai ke nau faí? Fakamatalaʻi ange ko e ngaahi fuakava ʻoku tau faí ko ha “fakamoʻoni ki he ʻOtuá” ʻoku tau fie muimui ki he ngaahi fekau ʻa e ʻOtuá (veesi 18). Ko e hā ha ngaahi fuakava kuo fai ʻe he fānaú?
-
Fakaafeʻi ʻa e fānaú ke nau tā ha ngaahi fakatātā ʻo e ngaahi meʻatau ʻa e kau ʻAnitai-Nīfai-Līhaí. Fakaafeʻi leva kinautolu ke nau tohi, ʻi he tuʻa ʻo e meʻataú, ha meʻa ʻoku nau ongoʻi ʻoku totonu ke nau liliu kae lava ke nau muimui kakato ange ai kia Sīsū Kalaisi. Tuku ke nau pehē pē ʻoku nau tanu ʻenau ngaahi meʻataú pea faʻu ha palani ke nau ngāueʻi e meʻa ne nau tohí.
ʻAlamā 24:7–10; 26:23–34; 27:27–30
Te tau lava ʻo fakatomala mo liliu koeʻuhí ʻoku angaʻofa ʻa e Tamai Hēvaní.
Kuo ako ʻe fānaú kimuí ni mai fekauʻaki mo ʻAlamā, ʻĀmoni, mo e kau ʻAnitai-Nīfai-Līhaí. Te ke fakaʻaongaʻi fēfē ʻa e ngaahi talanoa ko ʻení ke fakamatalaʻi ʻoku angaʻofa ʻa e Tamai Hēvaní kiate kinautolu ʻoku nau fakatomala fakamātoató?
Ngaahi ʻEkitivitī ʻe Ala Fakahokó
-
Hiki ʻa e Kimuʻa mo e Kimui ʻi he palakipoé. Kole ki ha niʻihi ʻo e fānaú ke nau lau ʻa e ngaahi veesi ko ʻení, ke ʻiloʻi ʻa e tōʻonga ʻa e kau Leimaná kimuʻa ʻi hono akoʻi kinautolu ʻe ʻĀmoni mo hono ngaahi tokouá: ʻAlamā 17:14–15; 26:23–24. Kole ki he fānau kehé ke nau lau ʻa e ngaahi veesi ko ʻení ke ʻiloʻi e founga naʻe liliu ai ʻa e kau Leimaná: ʻAlamā 26:31–34; 27:27–30. Fakaafeʻi ʻa e fānaú ke lisi ʻi lalo ʻi he palakipoé ʻa e meʻa ne nau maʻú. Fakaafeʻi leva kinautolu ke kumi ʻi he ʻAlamā 24:7–10, ʻa e founga naʻe malava ai e kau Leimaná ʻo liliu fakaʻaufulí. Vahevahe hoʻo fakamoʻoni ki he mālohi ʻo e ʻOtuá ke fakamolemoleʻi kitautolu mo tokoniʻi kitautolu ke tau fakatomala mo liliú.
-
Fakaafeʻi ʻa e fānaú ke nau lau fakataha ʻa e ʻAlamā 26:21–22, ʻo kumi ki he ngaahi tāpuaki ʻoku ʻomi kiate kinautolu ʻoku fakatomalá. Fakaafeʻi e fānaú ke nau fakamatala ki ha niʻihi ʻo e ngaahi tāpuaki ko ʻení ʻi he ngaahi lea pē ʻa nautolu.
ʻOku ʻomi ʻe he ongoongoleleí ʻa e fiefia kiate au, pea te u lava ʻo vahevahe ʻa e fiefia ko ʻení mo e niʻihi kehé.
ʻOku fonu ʻi he ngaahi vahe ko ʻení ha ngaahi sīpinga ʻo e fiefia ʻoku haʻu mei he moʻui ʻaki mo hono vahevahe ʻa e ongoongoleleí. Te ke fakaʻaongaʻi fēfē nai ʻa e ʻAlamā 26 mo e 29 ke ueʻi fakalaumālie ʻa e fānaú ke nau fekumi ki he fiefia ko ʻení?
Ngaahi ʻEkitivitī ʻe Ala Fakahokó
-
Tokoniʻi e fānaú ke nau fekumi ki he foʻi lea “fiefia” ʻi he ʻAlamā 26 mo e 29. Lau fakataha ʻa e niʻihi ʻo e ngaahi veesi ne nau maʻú, pea aleaʻi e meʻa ʻoku akoʻi ʻe he ngaahi veesi ko ʻení fekauʻaki mo e fiefiá. Ko e hā e meʻa naʻe maʻu ai e fiefia ʻa ʻĀmoni mo ʻAlamaá? Vahevahe ha aʻusia ʻi he taimi naʻá ke fiefia ai mei he moʻui ʻaki pe vahevahe ʻa e ongoongoleleí, pe fakaafeʻi ʻa e fānaú ke nau vahevahe ha ngaahi aʻusia pē ʻa nautolu.
-
Fakaafeʻi ha ongo tamaiki ʻe toko ua ke na fehāngaaki pea sio ko hai te ne lava ʻo ʻai e tokotaha ʻe tahá ke ʻuluaki malimalí. Ko e hā ha ngaahi founga ʻe niʻihi te tau lava ai ʻo ʻoatu e fiefiá ki he niʻihi kehé? ʻOku ʻoatu fēfē nai ʻa e fiefiá ʻe hono vahevahe ʻo e ongoongoleleí? Tokoniʻi e fānaú ke nau fakakaukau ki ha ngaahi founga te nau lava ai ʻo vahevahe ʻa e fiefia ʻo e ongoongoleleí ki honau ngaahi kaungāmeʻá mo e ngaahi fāmilí.
Poupouʻi e Ako ʻi ʻApí
Fakaafeʻi ʻa e fānaú ke nau tauhi ʻenau ngaahi palōmesí ʻo hangē ko ia naʻe fai ʻe he kau ʻAnitai-Nīfai-Līhaí.
Fakatupulaki ʻo ʻEtau Founga Akoʻí
Ako ha potufolofola. Fili ha kupuʻi lea ʻi he folofolá pe potufolofola nounou ʻokú ke pehē ʻe lava ʻo tokoni ki he fānau ʻi hoʻo kalasí, pea tokoniʻi kinautolu ke nau ako maʻuloto ia. ‘E lava ke tokoni foki ʻa e ngaahi nāunau ki he sió mo e ngaahi fakatātā ʻa e nimá.