“ວັນທີ 12–18 ເດືອນຕຸລາ. 3 ນີໄຟ 20–26: ‘ເຈົ້າເປັນລູກຫລານແຫ່ງພັນທະສັນຍາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 12–18 ເດືອນຕຸລາ. 3 ນີໄຟ 20–26,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ພຣະຄຣິດປະກົດຕໍ່ຊາວນີໄຟ

ຮູບພຣະຄຣິດປະກົດຕໍ່ຊາວນີໄຟ ໂດຍ ແອນດຣູ ໂບສ໌ລີ

ວັນທີ 12–18 ເດືອນຕຸລາ

3 ນີໄຟ 20–26

“ເຈົ້າເປັນລູກຫລານແຫ່ງພັນທະສັນຍາ”

ເມື່ອກ່າວເຖິງພຣະຄຳພີ, ພຣະເຢຊູມັກໃຊ້ຄຳວ່າ ຄົ້ນຄວ້າ (ເບິ່ງ 3 ນີໄຟ 20:11; 23:1, 5). ເມື່ອທ່ານອ່ານ 3 ນີໄຟ 20–26, ທ່ານກຳລັງຄົ້ນຫາຫຍັງ?

ບັນທຶກຄວາມປະທັບໃຈຂອງທ່ານ

ເມື່ອທ່ານໄດ້ຍິນຜູ້ຄົນໃຊ້ຖ້ອຍຄຳເຊັ່ນ ເຊື້ອສາຍອິດສະຣາເອນ, ທ່ານຮູ້ສຶກວ່າເຂົາເຈົ້າເວົ້າກ່ຽວກັບທ່ານບໍ? ຊາວນີໄຟ ແລະ ຊາວເລມັນ ແມ່ນລູກຫລານຂອງອິດສະຣາເອນແທ້ໆ—ແມ່ນແຕ່ເລື່ອງລາວຂອງພວກເຂົາເລີ່ມຕົ້ນໃນເຢຣູຊາເລັມ—ແຕ່ຕໍ່ພວກເຂົາບາງຄົນ, ເຢຣູຊາເລັມ ອາດເບິ່ງຄືວ່າ “ເປັນແຜ່ນດິນທີ່ຢູ່ຫ່າງໄກ, ແຜ່ນດິນຊຶ່ງພວກເຂົາບໍ່ຮູ້ຈັກ” (ຮີລາມັນ 16:20). ແມ່ນແລ້ວ, ພວກເຂົາໄດ້ເປັນ “ກິ່ງງ່າຂອງຕົ້ນອິດສະຣາເອນ,” ແຕ່ພວກເຂົາກໍຍັງ “ຫລົງຈາກຕົ້ນຂອງມັນ” (ແອວມາ 26:36; ເບິ່ງ 1 ນີໄຟ 15:12 ນຳອີກ). ແຕ່ເມື່ອພຣະຜູ້ຊ່ວຍໃຫ້ລອດປະກົດຕໍ່ພວກເຂົາ, ພຣະອົງຢາກໃຫ້ພວກເຂົາຮູ້ວ່າ ພວກເຂົາບໍ່ໄດ້ສູນເສຍຈາກພຣະອົງ. “ເຈົ້າເປັນເຊື້ອສາຍອິດສະຣາເອນ,” ພຣະອົງກ່າວ, “ແລະ ເຈົ້າຢູ່ໃນພັນທະສັນຍາ” (3 ນີໄຟ 20:25). ພຣະອົງອາດເວົ້າບາງສິ່ງທີ່ຄ້າຍຄືກັນນັ້ນກັບທ່ານໃນທຸກວັນນີ້, ເພາະທຸກຄົນທີ່ໄດ້ຮັບບັບຕິສະມາ ແລະ ໄດ້ເຮັດພັນທະສັນຍາກັບພຣະອົງ ກໍເປັນເຊື້ອສາຍອິດສະຣາເອນ, “ຢູ່ໃນພັນທະສັນຍາ,” ຄືກັນ ບໍ່ວ່າທ່ານເປັນເຊື້ອສາຍຂອງໃຜ ຫລື ອາໄສຢູ່ໃສກໍຕາມ. ໃນອີກຄຳໜຶ່ງ, ເມື່ອພຣະເຢຊູກ່າວເຖິງເຊື້ອສາຍອິດສະຣາເອນ, ພຣະອົງໄດ້ກ່າວກ່ຽວກັບທ່ານ. ຄຳແນະນຳໃຫ້ມອບພອນແກ່ “ທຸກຕະກຸນຂອງແຜ່ນດິນໂລກ” ແມ່ນສຳລັບທ່ານ (3 ນີໄຟ 20:27). ຄຳເຊື້ອເຊີນໃຫ້ “ຕື່ນຂຶ້ນອີກ, ແລະ ຈົ່ງມີຄວາມເຂັ້ມແຂງ” ແມ່ນສຳລັບທ່ານ (3 ນີໄຟ 20:36). ແລະ ຄຳສັນຍາທີ່ປະເສີດຂອງພຣະອົງ ທີ່ວ່າ, “ຄວາມຮັກຂອງເຮົາ ໝັ້ນຄົງບໍ່ສິ້ນສຸດໄດ້, ທັງເຮົາຈະຮັກສາສັນຍາແຫ່ງສັນຕິພາບໄວ້ສືບໄປ,” ແມ່ນສຳລັບທ່ານ (3 ນີໄຟ 22:10).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

3 ນີໄຟ 20–22

ໃນຍຸກສຸດທ້າຍ, ພຣະເຈົ້າຈະກະທຳວຽກງານທີ່ຍິ່ງໃຫຍ່ ແລະ ມະຫັດສະຈັນ.

ພຣະຜູ້ຊ່ວຍໃຫ້ລອດໃຫ້ຄຳສັນຍາທີ່ໜ້າອັດສະຈັນກັບຝູງຊົນ ແລະ ໄດ້ທຳນາຍກ່ຽວກັບອະນາຄົດຂອງຜູ້ຄົນແຫ່ງພັນທະສັນຍາຂອງພຣະອົງ—ແລະ ນັ້ນກໍຮ່ວມທັງທ່ານ. ດັ່ງທີ່ປະທານຣະໂຊ ເອັມ ແນວສັນ ໄດ້ກ່າວວ່າ: “ເຮົາກໍເປັນຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ. ເຮົາມີສິດທິພິເສດທີ່ຈະມີສ່ວນຮ່ວມໃນການບັນລຸຄຳສັນຍາເຫລົ່ານີ້. ນີ້ເປັນເວລາທີ່ໜ້າຕື່ນເຕັ້ນພຽງໃດທີ່ຈະມີຊີວິດຢູ່!” (“The Gathering of Scattered Israel,” Ensign ຫລື Liahona, Nov. 2006, 79).

ໃຫ້ຊອກຫາຄຳທຳນາຍກ່ຽວກັບວັນເວລາສຸດທ້າຍ ຢູ່ໃນພຣະຄຳຂອງພຣະອົງ ໃນ 3 ນີໄຟ 20–22. ຄຳທຳນາຍຂໍ້ໃດທີ່ເປັນໜ້າຕື່ນເຕັ້ນຕໍ່ທ່ານໂດຍສະເພາະ? ທ່ານສາມາດເຮັດສິ່ງໃດເພື່ອຊ່ວຍໃຫ້ຄຳທຳນາຍຢູ່ໃນບົດເຫລົ່ານີ້ສຳເລັດຄົບຖ້ວນ?

ໃຫ້ສັງເກດເບິ່ງວ່າ 3 ນີໄຟ 21:1–7 ກ່າວວ່າ ການອອກມາຂອງພຣະຄຳພີມໍມອນ (“ເລື່ອງເຫລົ່ານີ້” ໃນ ຂໍ້ທີ 2 ແລະ 3) ເປັນເຄື່ອງໝາຍຂອງຄຳສັນຍາຂອງພຣະເຈົ້າ ທີ່ໄດ້ເລີ່ມຕົ້ນບັນລຸຄວາມສຳເລັດແລ້ວ. ແມ່ນຫຍັງຄືຄຳສັນຍາເຫລົ່ານັ້ນ, ແລະ ພຣະຄຳພີມໍມອນໄດ້ຊ່ວຍໃຫ້ມັນສຳເລັດຄົບຖ້ວນແນວໃດ?

ເບິ່ງ Russell M. Nelson, “Hope of Israel” (worldwide devotional for youth, June 3, 2018), broadcasts.ChurchofJesusChrist.org ນຳອີກ.

3 ນີໄຟ 20:10–12; 23; 26:1–12

ພຣະຜູ້ຊ່ວຍໃຫ້ລອດປະສົງໃຫ້ເຮົາຄົ້ນຄວ້າຖ້ອຍຄຳຂອງສາດສະດາ.

ພຣະຄຳຂອງພຣະເຢຊູ ແລະ ການກະທຳຕະຫລອດທົ່ວບົດເຫລົ່ານີ້ ເປີດເຜີຍວິທີທີ່ພຣະອົງຮູ້ສຶກກ່ຽວກັບພຣະຄຳພີແນວໃດ. ທ່ານຮຽນຮູ້ຫຍັງແດ່ກ່ຽວກັບຂໍ້ພຣະຄຳພີຢູ່ໃນ 3 ນີໄຟ 20:10–12; 23; ແລະ 26:1–12? ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ທີ່ດົນໃຈທ່ານໃຫ້ “ຄົ້ນຫາສິ່ງເຫລົ່ານີ້ຢ່າງພາກພຽນ”? (3 ນີໄຟ 23:1).

3 ນີໄຟ 22; 24

ພຣະເຈົ້າມີຄວາມເມດຕາຕໍ່ຜູ້ທີ່ກັບມາຫາພຣະອົງ.

ໃນ 3 ນີໄຟ 22 ແລະ 24, ພຣະຜູ້ຊ່ວຍໃຫ້ລອດອ້າງຖ້ອຍຄຳຂອງເອຊາຢາ ແລະ ມາລາກີ ທີ່ເຕັມໄປດ້ວຍພາບທີ່ແຈ່ມແຈ້ງ ແລະ ຄຳປຽບທຽບ—ຫີນປະເສີດທີ່ຈະສ້າງຮາກຖານ, ເປົ່າໄຟເຮັດອາວຸດ, ຊຳລະເງິນໃຫ້ບໍລິສຸດ, ປະຕູສະຫວັນ. ອາດເປັນສິ່ງໜ້າສົນໃຈທີ່ຈະຂຽນສິ່ງເຫລົ່ານີ້ໄວ້. ແຕ່ລະຢ່າງສິດສອນທ່ານຫຍັງແດ່ກ່ຽວກັບຄວາມສຳພັນຂອງພຣະເຈົ້າກັບຜູ້ຄົນຂອງພຣະອົງ? ຍົກຕົວຢ່າງ, 3 ນີໄຟ 22:4–8 ປຽບທຽບພຣະເຈົ້າໃສ່ກັບສາມີ ແລະ ຜູ້ຄົນຂອງພຣະອົງເປັນພັນລະຍາ. ການອ່ານກ່ຽວກັບພາບເຫລົ່ານີ້ອາດກະຕຸ້ນທ່ານໃຫ້ຄິດກ່ຽວກັບຄວາມສຳພັນຂອງທ່ານເອງກັບພຣະຜູ້ເປັນເຈົ້າ. ຄຳສັນຍາຢູ່ໃນບົດເຫລົ່ານີ້ໄດ້ບັນລຸຄວາມສຳເລັດຢູ່ໃນຊີວິດຂອງທ່ານແນວໃດ? (ເບິ່ງ ໂດຍສະເພາະ 3 ນີໄຟ 22:7–8, 10–17; 24:10–12, 17–18).

3 ນີໄຟ 25:5–6

ໃຈຂອງເຮົາຄວນຫັນໄປຫາບັນພະບຸລຸດຂອງເຮົາ.

ຄຳສັນຍາທີ່ເອລີຢາຈະກັບມາ ເປັນສິ່ງທີ່ຊາວຢິວຕະຫລອດທົ່ວໂລກໄດ້ລໍຄອຍດ້ວຍຄວາມກະຕືລືລົ້ນ ເປັນເວລາຫລາຍສັດຕະວັດ. ໄພ່ພົນຍຸກສຸດທ້າຍຮູ້ວ່າ ເອລີຢາໄດ້ກັບມາແລ້ວ, ໄດ້ປະກົດຕໍ່ໂຈເຊັບ ສະມິດ ຢູ່ໃນພຣະວິຫານເຄີດແລນ ໃນປີ 1836 (ເບິ່ງ ຄຳສອນ ແລະ ພັນທະສັນຍາ 110:13–16). ວຽກງານຂອງການຫັນໃຈໄປຫາບັນພະບຸລຸດ—ວຽກງານພຣະວິຫານ ແລະ ປະຫວັດຄອບຄົວ—ກໍກຳລັງດຳເນີນຢູ່. ທ່ານເຄີຍມີປະສົບການຢ່າງໃດແດ່ ທີ່ຊ່ວຍທ່ານໃຫ້ຫັນໃຈໄປຫາບັນພະບຸລຸດຂອງທ່ານ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

3 ນີໄຟ 22:2

ຫລັງຈາກການອ່ານຂໍ້ນີ້, ພວກທ່ານອາດຢາກຕັ້ງຜ້າເຕັ້ນທີ່ເຮັດເອງ ແລະ ເວົ້າລົມກັນເຖິງວິທີທີ່ສາດສະໜາຈັກເປັນຜ້າເຕັ້ນຢູ່ໃນຖິ່ນແຫ້ງແລ້ງກັນດານແນວໃດ. ຄຳວ່າ “ຕໍ່ເຊືອກໃຫ້ຜ້າເຕັ້ນ” ແລະ “ສຽບຫລັກ [ຂອງມັນ] ໃຫ້ແໜ້ນ” ໝາຍຄວາມວ່າແນວໃດ? ເຮົາຈະເຊື້ອເຊີນຄົນອື່ນໃຫ້ພົບເຫັນ “ບ່ອນຫລົບໄພ” ຢູ່ໃນສາດສະໜາຈັກແນວໃດ? (ໃຫ້ເບິ່ງ ວິດີໂອ “Welcome” ທີ່ ComeuntoChrist.org).

3 ນີໄຟ 23:6–13

ຖ້າຫາກພຣະຜູ້ຊ່ວຍໃຫ້ລອດຢາກກວດເບິ່ງບັນທຶກທີ່ຄອບຄົວຂອງເຮົາຮັກສາ, ພຣະອົງອາດຖາມເຮົາຄຳຖາມໃດແດ່? ມີເຫດການທີ່ສຳຄັນ ຫລື ປະສົບການທາງວິນຍານທີ່ເຮົາຄວນບັນທຶກໄວ້ບໍ? ຕອນນີ້ອາດເປັນເວລາທີ່ເໝາະສົມທີ່ຈະເຮັດ ຫລື ຕື່ມເລື່ອງລາວໃສ່ໃນບັນທຶກຄອບຄົວ ແລະ ປຶກສານຳກັນກ່ຽວກັບສິ່ງທີ່ຈະລວມໃສ່ໃນນັ້ນ. ສະມາຊິກໃນຄອບຄົວທີ່ຍັງນ້ອຍຢູ່ອາດມັກປະດັບປະດາບັນທຶກຂອງທ່ານ ດ້ວຍຮູບພາບ ຫລື ການວາດພາບ. ເປັນຫຍັງຈຶ່ງສຳຄັນທີ່ຈະບັນທຶກປະສົບການທາງວິນຍານຂອງຄອບຄົວໄວ້?

3 ນີໄຟ 24:7–18

ເຮົາເຄີຍປະສົບພອນຈາກການຈ່າຍເງິນສ່ວນສິບທີ່ສັນຍາຢູ່ໃນຂໍ້ເຫລົ່ານີ້ແນວໃດ? ຂ່າວສານຂອງແອວເດີ ເດວິດ ເອ ແບ໊ດນາ “The Windows of Heaven” (Ensign ຫລື Liahona, Nov. 2013, 17–20) ສາມາດຊ່ວຍສະມາຊິກໃນຄອບຄົວໃຫ້ຮັບຮູ້ພອນເຫລົ່ານີ້ໄດ້.

3 ນີໄຟ 25:5–6

ທ່ານຈະຊ່ວຍສະມາຊິກໃນຄອບຄົວຂອງທ່ານໃຫ້ຫັນໃຈໄປຫາບັນພະບຸລຸດຂອງເຂົາເຈົ້າແນວໃດ? ບາງທີທ່ານສາມາດມອບໝາຍສະມາຊິກໃນຄອບຄົວໃຫ້ຮຽນຮູ້ກ່ຽວກັບບັນພະບຸລຸດຄົນໜຶ່ງຂອງພວກທ່ານ ແລະ ແບ່ງປັນກັບຄອບຄົວເຖິງສິ່ງທີ່ເຂົາເຈົ້າໄດ້ຮຽນຮູ້ (ເບິ່ງ FamilySearch.org). ຫລື ພວກທ່ານສາມາດຊ່ວຍກັນຊອກຫາບັນພະບຸລຸດ ຜູ້ຕ້ອງໄດ້ເຮັດພິທີການຂອງພຣະວິຫານແທນ ແລະ ວາງແຜນໄປພຣະວິຫານ ເພື່ອປະຕິບັດພິທີການເຫລົ່ານັ້ນ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ດຳເນີນຊີວິດຕາມປະຈັກພະຍານຂອງທ່ານ. “ທ່ານສອນສິ່ງທີ່ທ່ານເປັນ,” ແອວເດີ ນຽວ ເອ ແມ໊ກສະແວວ ໄດ້ສິດສອນ. “‘ລັກສະນະນິໄສຂອງທ່ານຈະເປັນສິ່ງທີ່ໜ້າຊົງຈຳ … ຫລາຍກວ່າຄວາມຈິງໃດໜຶ່ງ ຢູ່ໃນບົດຮຽນໃດໜຶ່ງ” (“But a Few Days” [address to Church Educational System religious educators, Sept. 10, 1982], 2). ຖ້າຫາກທ່ານຢາກສິດສອນຫລັກທຳພຣະກິດຕິຄຸນໃດໜຶ່ງ, ໃຫ້ທ່ານດຳລົງຊີວິດຕາມຫລັກທຳນັ້ນໃຫ້ດີທີ່ສຸດ.