“ວັນທີ 19–25 ເດືອນຕຸລາ. 3 ນີໄຟ 27–4 ນີໄຟ: ‘ບໍ່ມີຜູ້ຄົນກຸ່ມໃດທີ່ມີຄວາມສຸກຫລາຍໄປກວ່ານີ້,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 19–25 ເດືອນຕຸລາ. 3 ນີໄຟ 27–4 ນີໄຟ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
Christ’s Prayer [ການອະທິຖານຂອງພຣະຄຣິດ], ໂດຍ ແດເຣັກ ແຮກສະເຕດ
ວັນທີ 19–25 ເດືອນຕຸລາ
3 ນີໄຟ 27–4 ນີໄຟ
“ບໍ່ມີຜູ້ຄົນກຸ່ມໃດທີ່ມີຄວາມສຸກຫລາຍໄປກວ່ານີ້”
ພຣະຜູ້ເປັນເຈົ້າໄດ້ບັນຊາສານຸສິດຂອງພຣະອົງໃຫ້ຂຽນສິ່ງທີ່ພວກເຂົາໄດ້ມີປະສົບການໄວ້ (ເບິ່ງ 3 ນີໄຟ 27:23–24). ຂະນະທີ່ທ່ານສຶກສາ, ໃຫ້ຂຽນປະສົບການທາງວິນຍານທີ່ທ່ານມີລົງໄວ້.
ບັນທຶກຄວາມປະທັບໃຈຂອງທ່ານ
ຄຳສອນຂອງພຣະເຢຊູຄຣິດບໍ່ພຽງແຕ່ເປັນທິດສະດີທີ່ງົດງາມ ເພື່ອໃຫ້ໄຕ່ຕອງເທົ່ານັ້ນ. ມັນມີຄວາມໝາຍເກີນກວ່ານັ້ນອີກ—ມັນຫວັງໃຫ້ປ່ຽນຊີວິດຂອງເຮົາ. ໜັງສື 4 ນີໄຟ ໃຫ້ຕົວຢ່າງທີ່ຍອດຍ້ຽມເຖິງເລື່ອງນີ້, ໂດຍການສະແດງໃຫ້ເຫັນຢ່າງລະອຽດເຖິງພຣະກິດຕິຄຸນຂອງພຣະຜູ້ຊ່ວຍໃຫ້ລອດ ທີ່ສາມາດປ່ຽນແປງຜູ້ຄົນ. ຫລັງຈາກການປະຕິບັດສາດສະໜາກິດທີ່ສັ້ນໆຂອງພຣະເຢຊູ, ການຂັດແຍ້ງລະຫວ່າງຊາວນີໄຟ ແລະ ຊາວເລມັນເປັນເວລາຫລາຍສັດຕະວັດ ໄດ້ຢຸດຕິລົງ. ສອງປະຊາຊາດທີ່ຮູ້ຈັກກັນວ່າເປັນຜູ້ຄົນທີ່ແຕກແຍກ ແລະ ມີຄວາມທະນົງຕົວ ໄດ້ກາຍເປັນ “ພວກດຽວກັນ, ເປັນລູກຂອງພຣະຄຣິດ” (4 ນີໄຟ 1:17), ແລະ ພວກເຂົາເລີ່ມຕົ້ນ “ມີເຂົ້າຂອງທັງໝົດນຳກັນ” (4 ນີໄຟ 1:3). “ຄວາມຮັກຂອງພຣະເຈົ້າ … ມີຢູ່ໃນໃຈຂອງຜູ້ຄົນ,” ແລະ “ບໍ່ມີຜູ້ຄົນກຸ່ມໃດທີ່ມີຄວາມສຸກຫລາຍໄປກວ່ານີ້ໃນບັນດາຜູ້ຄົນທັງປວງທີ່ພຣະຫັດຂອງພຣະເຈົ້າໄດ້ສ້າງຂຶ້ນມາ” (4 ນີໄຟ 1:15–16). ນີ້ຄືວິທີທີ່ຄຳສອນຂອງພຣະຜູ້ຊ່ວຍໃຫ້ລອດໄດ້ປ່ຽນແປງຊາວນີໄຟ ແລະ ຊາວເລມັນ. ຄຳສອນໄດ້ປ່ຽນແປງທ່ານແນວໃດ?
ແນວຄິດສຳລັບການສຶກສາພຣະຄຳພີເປັນສ່ວນຕົວ
ສາດສະໜາຈັກຂອງພຣະເຢຊູຄຣິດໄດ້ຖືກເອີ້ນຕາມພຣະນາມຂອງພຣະອົງ.
ຂະນະທີ່ສານຸສິດຂອງພຣະຜູ້ຊ່ວຍໃຫ້ລອດເລີ່ມຕົ້ນສະຖາປະນາສາດສະໜາຈັກຂອງພຣະອົງຕະຫລອດທົ່ວແຜ່ນດິນ, ໄດ້ມີຄຳຖາມໜຶ່ງ, ຊຶ່ງຕໍ່ບາງຄົນ, ອາດເປັນເລື່ອງເລັກນ້ອຍ—ສາດສະໜາຈັກຄວນມີຊື່ວ່າແນວໃດ? (ເບິ່ງ 3 ນີໄຟ 27:1–3). ທ່ານຮຽນຮູ້ຫຍັງແດ່ກ່ຽວກັບຄວາມສຳຄັນຂອງຊື່ນີ້ຈາກຄຳຕອບຂອງພຣະຜູ້ຊ່ວຍໃຫ້ລອດ ຢູ່ໃນ 3 ນີໄຟ 27:4–12? ໃນປີ 1838 ພຣະຜູ້ເປັນເຈົ້າໄດ້ເປີດເຜີຍຊື່ຂອງສາດສະໜາຈັກຂອງພຣະອົງໃນປະຈຸບັນ (ເບິ່ງ ຄຳສອນ ແລະ ພັນທະສັນຍາ 115:4). ໃຫ້ໄຕ່ຕອງແຕ່ລະຄຳຢູ່ໃນຊື່ນັ້ນ. ຄຳເຫລົ່ານີ້ຊ່ວຍເຮົາໃຫ້ຮູ້ເຖິງຜູ້ທີ່ເຮົາເປັນ, ສິ່ງທີ່ເຮົາເຊື່ອຖື, ແລະ ວິທີທີ່ເຮົາຄວນປະຕິບັດແນວໃດ?
ເບິ່ງ Russell M. Nelson, “The Correct Name of the Church,” Ensign ຫລື Liahona, Nov. 2018, 87–80; M. Russell Ballard, “The Importance of a Name,” Ensign ຫລື Liahona, Nov. 2011, 79–82 ນຳອີກ.
ເມື່ອເຮົາຊຳລະຄວາມປາດຖະໜາຂອງເຮົາໃຫ້ບໍລິສຸດ, ເຮົາກາຍເປັນສານຸສິດທີ່ຊື່ສັດຫລາຍກວ່າເກົ່າ.
ທ່ານຈະວ່າແນວໃດ ຖ້າຫາກພຣະຜູ້ຊ່ວຍໃຫ້ລອດໄດ້ຖາມທ່ານ, ຄືກັນກັບທີ່ພຣະອົງໄດ້ຖາມສານຸສິດຂອງພຣະອົງວ່າ, “ພວກເຈົ້າປາດຖະໜາອັນໃດຈາກເຮົາ?” (3 ນີໄຟ 28:1). ໃຫ້ຄິດກ່ຽວກັບສິ່ງນີ້ຂະນະທີ່ທ່ານອ່ານກ່ຽວກັບປະສົບການຂອງສານຸສິດຂອງພຣະຜູ້ຊ່ວຍໃຫ້ລອດ ຢູ່ໃນ 3 ນີໄຟ 28:1–11. ທ່ານຮຽນຮູ້ຫຍັງແດ່ກ່ຽວກັບຄວາມປາດຖະໜາໃນໃຈຂອງສານຸສິດ ຈາກຄຳຕອບຂອງເຂົາເຈົ້າຕໍ່ຄຳຖາມຂອງພຣະອົງ? ປະທານດາລິນ ເອັຈ ໂອກສ໌ ໄດ້ສິດສອນວ່າ: “ເພື່ອບັນລຸຈຸດໝາຍປາຍທາງນິລັນດອນຂອງເຮົາ, ເຮົາຈະປາດຖະໜາ ແລະ ທຳງານເພື່ອຄວາມເໝາະສົມທີ່ຈະກາຍເປັນບຸກຄົນນິລັນດອນ. … ເຮົາຈະມີຄວາມປາດຖະໜາທີ່ຈະກາຍເປັນເໝືອນດັ່ງ [ພຣະເຢຊູຄຣິດ]” (“Desire,” Ensign ຫລື Liahona, May 2011, 44–45). ທ່ານສາມາດເຮັດສິ່ງໃດເພື່ອເຮັດໃຫ້ຄວາມປາດຖະໜາໃນໃຈຂອງທ່ານຊອບທຳຫລາຍກວ່າເກົ່າ? (ສຳລັບລາຍລະອຽດເພີ່ມເຕີມກ່ຽວກັບ “ການປ່ຽນແປງເກີດຂຶ້ນກັບຮ່າງກາຍ” ຂອງສານຸສິດສາມຄົນ, ໃຫ້ເບິ່ງ 3 ນີໄຟ 28:37 ແລະ “ບຸກຄົນທີ່ຖືກປ່ຽນສະພາບແລ້ວ,” ຄູ່ມືພຣະຄຳພີ, scriptures.ChurchofJesusChrist.org.)
ການປ່ຽນໃຈເຫລື້ອມໃສຕໍ່ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ ນຳພາໄປສູ່ຄວາມເປັນອັນໜຶ່ງດຽວກັນ ແລະ ຄວາມສຸກ.
ທ່ານສາມາດວາດພາບວ່າ ມັນຈະເປັນແນວໃດຖ້າທ່ານມີຊີວິດຢູ່ໃນຊ່ວງໄລຍະປີເຫລົ່ານັ້ນຫລັງຈາກການມາຢ້ຽມຢາມຂອງພຣະຜູ້ຊ່ວຍໃຫ້ລອດ? ຜູ້ຄົນໄດ້ດຳລົງຊີວິດຢ່າງສະຫງົບສຸກໄດ້ແນວໃດ—ເກືອບເຖິງ 200 ປີ? ຂະນະທີ່ທ່ານສຶກສາ 4 ນີໄຟ 1:1–18, ໃຫ້ຄິດທີ່ຈະຂຽນການເລືອກທີ່ຜູ້ຄົນເຫລົ່ານັ້ນໄດ້ເຮັດ ເພື່ອຈະໄດ້ມີປະສົບການທີ່ເປັນພອນໃຫ້ແກ່ຊີວິດ.
ໃຫ້ໄຕ່ຕອງສິ່ງທີ່ທ່ານສາມາດເຮັດ ເພື່ອຊ່ວຍຄອບຄົວ, ຫວອດ, ຫລື ຊຸມຊົນຂອງທ່ານໃຫ້ດຳລົງຊີວິດດ້ວຍຄວາມເປັນອັນໜຶ່ງດຽວກັນ ແລະ ມີຄວາມສຸກຫລາຍກວ່າເກົ່າ, ຄືກັນກັບຜູ້ຄົນຢູ່ໃນ 4 ນີໄຟ ໄດ້ມີ. ຄຳສອນຢ່າງໃດແດ່ຂອງພຣະເຢຊູຄຣິດ ທີ່ທ່ານສາມາດດຳລົງຊີວິດຕາມຢ່າງເຕັມສ່ວນ ເພື່ອຈະສາມາດບັນລຸເປົ້າໝາຍນີ້ໄດ້? ທ່ານສາມາດເຮັດຫຍັງໄດ້ແດ່ເພື່ອຊ່ວຍຄົນອື່ນໃຫ້ເຂົ້າໃຈ ແລະ ດຳລົງຊີວິດຕາມຄຳສອນເຫລົ່ານີ້?
ຄວາມຊົ່ວຮ້າຍນຳພາໄປສູ່ການແຕກແຍກ ແລະ ຄວາມໂສກເສົ້າ.
ໜ້າເສຍໃຈທີ່ສັງຄົມຊີໂອນ ຊຶ່ງບັນຍາຍຢູ່ໃນ 4 ນີໄຟ (ເບິ່ງ ໂມເຊ 7:18 ນຳອີກ) ໃນທີ່ສຸດ ໄດ້ເລີ່ມເສື່ອມໂຊມລົງ. ຂະນະທີ່ທ່ານອ່ານ 4 ນີໄຟ 1:19–49, ໃຫ້ຊອກຫາທັດສະນະຄະຕິ ແລະ ການປະພຶດ ທີ່ເຮັດໃຫ້ສັງຄົມພັງທະລາຍ. ທ່ານເຫັນວ່າຕົວເອງມີທັດສະນະຄະຕິ ແລະ ການປະພຶດແບບນີ້ບໍ?
ເບິ່ງ “Chapter 18: Beware of Pride,” Teachings of Presidents of the Church: Ezra Taft Benson (2014), 229–40 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
3 ນີໄຟ 27:13–21
ຂໍ້ເຫລົ່ານີ້ສາມາດຊ່ວຍສະມາຊິກໃນຄອບຄົວໃຫ້ເຂົ້າໃຈຫລາຍຂຶ້ນເຖິງສິ່ງທີ່ພຣະຜູ້ຊ່ວຍໃຫ້ລອດໝາຍເຖິງ ເມື່ອພຣະອົງອ້າງວ່າ “ພຣະກິດຕິຄຸນຂອງເຮົາ.” ຫລັງຈາກການອ່ານ ແລະ ການສົນທະນາກ່ຽວກັບຂໍ້ເຫລົ່ານີ້ແລ້ວ, ທ່ານສາມາດຂໍໃຫ້ສະມາຊິກໃນຄອບຄົວສະຫລຸບຄວາມໝາຍຂອງພຣະກິດຕິຄຸນໃນໜຶ່ງປະໂຫຍກ.
3 ນີໄຟ 27:23–26
ເຮົາເຖິງຂັ້ນໃດແລ້ວ ເລື່ອງການບັນທຶກສິ່ງທີ່ເຮົາໄດ້ “ເຫັນ ແລະ ໄດ້ຍິນ”—ເປັນສ່ວນບຸກຄົນ ຫລື ເປັນຄອບຄົວ? ເປັນຫຍັງການຮັກສາບັນທຶກເລື່ອງທີ່ເປັນທາງວິນຍານຈຶ່ງສຳຄັນ?
3 ນີໄຟ 27:30–31
ເພື່ອຊ່ວຍສະມາຊິກໃນຄອບຄົວໃຫ້ເຂົ້າໃຈເຖິງຄວາມສຸກທີ່ພຣະຜູ້ຊ່ວຍໃຫ້ລອດໄດ້ບັນຍາຍຢູ່ໃນຂໍ້ເຫລົ່ານີ້, ພວກທ່ານສາມາດຫລິ້ນເກມ ຊຶ່ງໃຫ້ສະມາຊິກໃນຄອບຄົວໄປລີ້ ແລະ ໃຫ້ຄົນໜຶ່ງຊອກຫາ. ສິ່ງນີ້ອາດພາໄປສູ່ການສົນທະນາເຖິງຄວາມສຳຄັນທີ່ຈະຊອກຫາສະມາຊິກໃນຄອບຄົວໃຫ້ຄົບທຸກຄົນ ເພື່ອວ່າຈະ “ບໍ່ມີຜູ້ໃດໃນພວກເຂົາເສຍໄປ.” ເຮົາຈະສາມາດຊ່ວຍເຫລືອສະມາຊິກໃນຄອບຄົວຂອງເຮົາ ເພື່ອຍຶດໝັ້ນຢູ່ໃນພຣະກິດຕິຄຸນ ຫລື ກັບຄືນມາໄດ້ແນວໃດ ຖ້າຫາກເຂົາເຈົ້າໄດ້ໜີໄປ?
3 ນີໄຟ 28:17–18, 36–40
ເຮົາສາມາດຮຽນຮູ້ຫຍັງແດ່ຈາກຕົວຢ່າງຂອງມໍມອນ ເມື່ອເພິ່ນບໍ່ເຂົ້າໃຈທຸກສິ່ງກ່ຽວກັບການປ່ຽນແປງທີ່ໄດ້ເກີດຂຶ້ນກັບສານຸສິດຊາວນີໄຟສາມຄົນ? ເຮົາສາມາດເຮັດຫຍັງແດ່ເມື່ອເຮົາບໍ່ເຂົ້າໃຈທຸກສິ່ງກ່ຽວກັບຫລັກທຳພຣະກິດຕິຄຸນ? ປະທານດີເດີ ແອັຟ ອຸກດອບ ໄດ້ສິດສອນວ່າ: “ພຣະເຈົ້າເປັນຫ່ວງທ່ານ. ພຣະອົງຈະຮັບຟັງ ແລະ ພຣະອົງຈະຕອບຄຳຖາມສ່ວນຕົວຂອງທ່ານ. ຄຳຕອບຕໍ່ຄຳຖາມຂອງທ່ານຈະມາສູ່ທ່ານໃນວິທີທາງຂອງພຣະອົງເອງ, ແລະ ໃນເວລາຂອງພຣະອົງເອງ, ແລະ ສະນັ້ນ, ທ່ານຕ້ອງຮຽນຮູ້ທີ່ຈະຮັບຟັງສຸລະສຽງຂອງພຣະອົງ” (“Receiving a Testimony of Light and Truth,” Ensign ຫລື Liahona, Nov. 2014, 21).
4 ນີໄຟ 1:15
ເພື່ອບໍ່ໃຫ້ມີການຂັດແຍ້ງຢູ່ໃນບ້ານເຮືອນຂອງທ່ານ, ບາງທີສະມາຊິກໃນຄອບຄົວສາມາດຕັ້ງເປົ້າໝາຍທີ່ຈະຮັກກັນຫລາຍກວ່າເກົ່າໃນອາທິດນີ້. ຫລັງຈາກໜຶ່ງອາທິດຜ່ານໄປ, ໃຫ້ທົບທວນຄວາມກ້າວໜ້າຂອງພວກທ່ານນຳກັນ ແລະ ສົນທະນາວິທີທີ່ການສະແດງຄວາມຮັກຕໍ່ກັນຫລາຍກວ່າເກົ່າ ມີຜົນກະທົບຕໍ່ຄອບຄົວຂອງທ່ານແນວໃດ.
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສຶກສາສ່ວນຕົວ
ສະແຫວງຫາການເປີດເຜີຍທຸກວັນ. ສ່ວນຫລາຍການເປີດເຜີຍຈະມີມາເທື່ອລະ “ບັນທັດ” (2 ນີໄຟ 28:30). ຂະນະທີ່ທ່ານໄຕ່ຕອງຂໍ້ພຣະຄຳພີທີ່ທ່ານກຳລັງສຶກສາ, ແນວຄິດ ແລະ ຄວາມປະທັບໃຈອາດມາສູ່ທ່ານ ຕະຫລອດທັງວັນ. ຢ່າຄິດວ່າການສຶກສາພຣະກິດຕິຄຸນເປັນສິ່ງທີ່ທ່ານຕ້ອງ “ຫາເວລາໃຫ້ກັບມັນ” ແຕ່ໃຫ້ເປັນບາງສິ່ງທີ່ທ່ານເຮັດຢູ່ສະເໝີ (ເບິ່ງ Teaching in the Savior’s Way, 12).
Christ with Three Nephite Disciples [ພຣະຄຣິດກັບສານຸສິດຊາວນີໄຟສາມຄົນ], ໂດຍ ແກຣີ ແອວ ແຄບ