“ວັນທີ 26 ເດືອນຕຸລາ–ວັນທີ 1 ເດືອນພະຈິກ. ມໍມອນ 1–6: ‘ຂ້າພະເຈົ້າປາດຖະໜາທີ່ຈະຊັກຊວນທ່ານທັງຫລາຍ … ໃຫ້ກັບໃຈ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 26 ເດືອນຕຸລາ–ວັນທີ 1 ເດືອນພະຈິກ. ມໍມອນ 1–6,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ມໍມອນກຳລັງຂຽນໃສ່ແຜ່ນຈາລຶກຄຳ

Mormon Abridging the Plates [ມໍມອນຫຍໍ້ແຜ່ນຈາລຶກຄຳ], ໂດຍ ທອມ ໂລແວວ

ວັນທີ 26 ເດືອນຕຸລາ–ວັນທີ 1 ເດືອນພະຈິກ

ມໍມອນ 1–6

“ຂ້າພະເຈົ້າປາດຖະໜາທີ່ຈະຊັກຊວນທ່ານທັງຫລາຍ … ໃຫ້ກັບໃຈ”

ຂະນະທີ່ທ່ານອ່ານ ມໍມອນ 1–6, ໃຫ້ໄຕ່ຕອງສິ່ງທີ່ທ່ານໄດ້ຮຽນຮູ້ຈາກຕົວຢ່າງຂອງມໍມອນ. ບັນທຶກສິ່ງທີ່ທ່ານຮູ້ສຶກໄດ້ດົນໃຈໃຫ້ເຮັດ.

ບັນທຶກຄວາມປະທັບໃຈຂອງທ່ານ

ມໍມອນໄດ້ບັນທຶກເລື່ອງລາວໄວ້ໃຫ້ເຮົາ “ຢ່າງຄົບຖ້ວນ” ເຖິງ “ພາບອັນເປັນຕາຢ້ານ” ຂອງຄວາມຊົ່ວຮ້າຍ ແລະ ການຂ້າຟັນ ທີ່ເພິ່ນໄດ້ເຫັນໃນບັນດາຊາວນີໄຟ (ມໍມອນ 2:18; 5:8). ແຕ່ສິ່ງທີ່ເພິ່ນໄດ້ບັນທຶກໄວ້ຢູ່ໃນ ມໍມອນ 1–6 ແມ່ນພຽງພໍທີ່ຈະເຕືອນເຮົາວ່າ ຜູ້ຄົນທີ່ຊອບທຳສາມາດຕົກໄປໄກຫລາຍຂະໜາດໃດ. ທ່າມກາງຄວາມຊົ່ວຮ້າຍທີ່ແຜ່ຂະຫຍາຍ, ບໍ່ມີໃຜສາມາດກ່າວໂທດມໍມອນ ທີ່ເພິ່ນໄດ້ອ່ອນເພຍ ແລະ ທໍ້ຖອຍໃຈ. ແຕ່ໃນທັງໝົດທີ່ເພິ່ນໄດ້ເຫັນ ແລະ ມີປະສົບການ, ເພິ່ນບໍ່ເຄີຍລືມຄວາມເມດຕາທີ່ຍິ່ງໃຫຍ່ຂອງພຣະເຈົ້າ ແລະ ຄວາມເຊື່ອໝັ້ນຂອງເພິ່ນວ່າ ການກັບໃຈຄືວິທີທີ່ຈະໄດ້ຮັບມັນ. ແລະ ເຖິງແມ່ນວ່າຜູ້ຄົນຂອງມໍມອນເອງໄດ້ປະຕິເສດຄຳອ້ອນວອນຂອງເພິ່ນໃຫ້ກັບໃຈ, ແຕ່ເພິ່ນຮູ້ວ່າເພິ່ນມີຜູ້ຄົນກຸ່ມໃຫຍ່ກວ່ານັ້ນທີ່ຈະຊັກຊວນ. “ຈົ່ງເບິ່ງ,” ເພິ່ນໄດ້ປະກາດ, “ຂ້າພະເຈົ້າຂຽນຫາທີ່ສຸດຂອງແຜ່ນດິນໂລກ.” ໃນອີກຄຳໜຶ່ງ, ເພິ່ນໄດ້ຂຽນຫາ ທ່ານ (ເບິ່ງ ມໍມອນ 3:17–20). ແລະ ຂ່າວສານຂອງເພິ່ນຕໍ່ທ່ານ, ໃນທຸກວັນນີ້, ກໍເປັນຂ່າວສານອັນດຽວກັນນັ້ນ ທີ່ອາດຊ່ວຍຊີວິດຂອງຊາວນີໄຟໄວ້ໄດ້ໃນວັນເວລາຂອງພວກເຂົາ ທີ່ວ່າ: “ຈົ່ງເຊື່ອໃນພຣະກິດຕິຄຸນຂອງພຣະເຢຊູຄຣິດ. … ກັບໃຈ ແລະ ຕຽມຕົວເພື່ອຢືນຢູ່ຕໍ່ໜ້າບັນລັງພິພາກສາຂອງພຣະຄຣິດ” (ມໍມອນ 3:21–22).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມໍມອນ 1

ເຮົາສາມາດດຳລົງຊີວິດຢ່າງຊອບທຳເຖິງແມ່ນຈະມີຄວາມຊົ່ວຮ້າຍຢູ່ອ້ອມຮອບເຮົາ.

ເລີ່ມຕົ້ນໃນບົດທຳອິດຂອງມໍມອນ, ທ່ານຈະສັງເກດເຫັນຄວາມແຕກຕ່າງຢ່າງຫລວງຫລາຍລະຫວ່າງມໍມອນ ແລະ ຜູ້ຄົນທີ່ຢູ່ອ້ອມຮອບເພິ່ນ. ຂະນະທີ່ທ່ານອ່ານ ມໍມອນ 1, ໃຫ້ຄິດທີ່ຈະປຽບທຽບຄຸນສົມບັດ ແລະ ຄວາມປາດຖະໜາຂອງມໍມອນ ໃສ່ກັບຜູ້ຄົນຂອງເພິ່ນ. ໃຫ້ສັງເກດເບິ່ງຜົນສະທ້ອນທີ່ມາສູ່ເພິ່ນ ແລະ ພວກເຂົາ (ທ່ານຈະເຫັນຕົວຢ່າງໜຶ່ງຢູ່ໃນຂໍ້ທີ 14–15). ທ່ານຮຽນຮູ້ຫຍັງແດ່ທີ່ດົນໃຈທ່ານໃຫ້ດຳລົງຊີວິດຢ່າງຊອບທຳຢູ່ໃນໂລກທີ່ຊົ່ວຮ້າຍ?

ຂະນະທີ່ທ່ານອ່ານ ມໍມອນ 2–6, ໃຫ້ສືບຕໍ່ຊອກຫາວິທີທີ່ມໍມອນໄດ້ສະແດງສັດທາຂອງເພິ່ນໃນພຣະບິດາເທິງສະຫວັນ ແລະ ພຣະເຢຊູຄຣິດ ເຖິງແມ່ນຈະມີອິດທິພົນທີ່ຊົ່ວຮ້າຍຢູ່ອ້ອມຮອບເພິ່ນກໍຕາມ.

ມໍມອນ 2:10–15

ຄວາມທຸກໃຈຕາມຢ່າງຊອບພຣະໄທພຣະເຈົ້າ ຈະພາໄປສູ່ການປ່ຽນແປງທີ່ແທ້ຈິງ ແລະ ຍືນຍົງ.

ເມື່ອມໍມອນໄດ້ເຫັນຄວາມເສົ້າສະຫລົດໃຈຂອງຜູ້ຄົນຂອງເພິ່ນ, ເພິ່ນຫວັງວ່າພວກເຂົາຈະກັບໃຈ. ແຕ່ “ຄວາມເສົ້າສະຫລົດໃຈຂອງພວກເຂົາບໍ່ແມ່ນເພື່ອການກັບໃຈ” (ມໍມອນ 2:13)—ມັນບໍ່ໄດ້ເປັນຄວາມທຸກໃຈຕາມຢ່າງຊອບພຣະໄທພຣະເຈົ້າ ທີ່ພາໄປສູ່ການປ່ຽນແປງທີ່ແທ້ຈິງ (ເບິ່ງ 2 ໂກຣິນໂທ 7:8–11). ແຕ່ຊາວນີໄຟໄດ້ຮູ້ສຶກມີຄວາມທຸກໃຈຕາມຢ່າງໂລກ (ເບິ່ງ ມໍມອນ 2:10–11). ເພື່ອຈະເຂົ້າໃຈຄວາມແຕກຕ່າງລະຫວ່າງ ຄວາມທຸກໃຈຕາມຢ່າງຊອບພຣະໄທພຣະເຈົ້າ ແລະ ຄວາມທຸກໃຈຕາມຢ່າງໂລກ, ໃຫ້ຄິດທີ່ຈະເຮັດແຜນຜັງ ອັນທີ່ທ່ານສາມາດບັນທຶກສິ່ງທີ່ທ່ານຮຽນຮູ້ຈາກ ມໍມອນ 2:10–15 ກ່ຽວກັບຄວາມເສົ້າສະຫລົດໃຈສອງຢ່າງນີ້. ແຜນຜັງຂອງທ່ານອາດເບິ່ງເປັນແບບນີ້:

ຄວາມທຸກໃຈຕາມຢ່າງຊອບພຣະໄທພຣະເຈົ້າ	ຄວາມທຸກໃຈຕາມຢ່າງໂລກ
ຄວາມທຸກໃຈຕາມຢ່າງຊອບພຣະໄທພຣະເຈົ້າ ມາຫາພຣະເຢຊູ (ຂໍ້ທີ 14)	ຄວາມທຸກໃຈຕາມຢ່າງໂລກ ສາບແຊ່ງພຣະເຈົ້າ (ຂໍ້ທີ 14)
ຄວາມທຸກໃຈຕາມຢ່າງຊອບພຣະໄທພຣະເຈົ້າ	ຄວາມທຸກໃຈຕາມຢ່າງໂລກ
ຄວາມທຸກໃຈຕາມຢ່າງຊອບພຣະໄທພຣະເຈົ້າ	ຄວາມທຸກໃຈຕາມຢ່າງໂລກ

ຂະນະທີ່ທ່ານສະທ້ອນຄິດກ່ຽວກັບສິ່ງທີ່ທ່ານຮຽນຮູ້, ໃຫ້ພິຈາລະນາເຖິງວິທີທີ່ຄວາມພະຍາຍາມຂອງທ່ານທີ່ຈະເອົາຊະນະບາບ ແລະ ກາຍເປັນເໝືອນດັ່ງພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຫລາຍກວ່າເກົ່າແນວໃດ.

ເບິ່ງ Dieter F. Uchtdorf, “You Can Do It Now!” Ensign ຫລື Liahona, Nov. 2013, 55–57 ນຳອີກ.

ມໍມອນ 3:3, 9

ເຮົາຄວນຮັບຮູ້ພຣະຫັດຂອງພຣະເຈົ້າຢູ່ໃນຊີວິດຂອງເຮົາສະເໝີ.

ມໍມອນໄດ້ບັນທຶກຄວາມອ່ອນແອທີ່ເພິ່ນໄດ້ເຫັນຢູ່ໃນຊາວນີໄຟ: ພວກເຂົາບໍ່ຮັບຮູ້ວິທີທີ່ພຣະຜູ້ເປັນເຈົ້າໄດ້ໃຫ້ພອນແກ່ພວກເຂົາ. ປະທານເຮັນຣີ ບີ ໄອຣິງ ໄດ້ຊັກຊວນເຮົາໃຫ້ “ຫາວິທີທີ່ຈະຮັບຮູ້ ແລະ ຈື່ຈຳຄວາມເມດຕາຂອງພຣະເຈົ້າ. … ຈົ່ງອະທິຖານ ແລະ ໄຕ່ຕອງ, ໂດຍຖາມວ່າ: ພຣະເຈົ້າໄດ້ສົ່ງຂ່າວສານມາໃຫ້ເຮົາໂດຍສະເພາະບໍ? ເຮົາເຫັນພຣະຫັດຂອງພຣະອົງຢູ່ໃນຊີວິດຂອງເຮົາບໍ ຫລື ໃນຊີວິດຂອງລູກໆຂອງເຮົາບໍ? … ຂ້າພະເຈົ້າເປັນພະຍານວ່າ ພຣະອົງຮັກເຮົາ ແລະ ໃຫ້ພອນເຮົາ, ຫລາຍກວ່າທີ່ເຮົາສ່ວນຫລາຍໄດ້ຮັບຮູ້” (“O Remember, Remember,” Ensign ຫລື Liahona, Nov. 2007, 67, 69).

ຂະນະທີ່ທ່ານອ່ານ ມໍມອນ 3:3, 9, ທ່ານອາດຢາກໄຕ່ຕອງວິທີທີ່ທ່ານຮັບຮູ້ອິດທິພົນຂອງພຣະເຈົ້າໃນຊີວິດຂອງທ່ານແນວໃດ. ພອນຢ່າງໃດແດ່ໄດ້ມາເຖິງ ເມື່ອທ່ານຮັບຮູ້ອິດທິພົນຂອງພຣະອົງ? ແມ່ນຫຍັງຄືຜົນສະທ້ອນຂອງການບໍ່ຮັບຮູ້ພຣະອົງ? (ເບິ່ງ ມໍມອນ 2:26).

ມໍມອນ 5:8–24; 6:16–22

ພຣະເຢຊູຄຣິດຢືນວາແຂນຮັບເອົາທ່ານຢູ່.

ຊາວນີໄຟໄດ້ປະຕິເສດການສິດສອນຂອງມໍມອນ, ແຕ່ເພິ່ນມີຄວາມຫວັງວ່າ ບັນທຶກຂອງເພິ່ນຈະມີອິດທິພົນຕໍ່ທ່ານ. ຂະນະທີ່ທ່ານອ່ານ ມໍມອນ 5:8–24 ແລະ 6:16–22, ທ່ານຮຽນຮູ້ຫຍັງແດ່ກ່ຽວກັບຜົນສະທ້ອນຂອງບາບ? ທ່ານຮຽນຮູ້ຫຍັງແດ່ຈາກຂ່າວສານເຫລົ່ານີ້ກ່ຽວກັບຄວາມຮູ້ສຶກຂອງພຣະບິດາເທິງສະຫວັນ ແລະ ພຣະເຢຊູຄຣິດທີ່ມີຕໍ່ທ່ານ, ແມ່ນແຕ່ຕອນທີ່ທ່ານເຮັດບາບ? ທ່ານຮູ້ສຶກວ່າພຣະເຢຊູຄຣິດໄດ້ເອື້ອມພຣະຫັດເປີດແຂນອອກມາຫາທ່ານແນວໃດ? ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດ ຕາມຜົນສະທ້ອນ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ມໍມອນ 1:2

ການ “ຮູ້ຈັກສັງເກດ” ໝາຍຄວາມວ່າແນວໃດ? ທ່ານສາມາດຊອກຫາຄວາມຮູ້ຢູ່ໃນບົດຄວາມຂອງແອວເດີ ເດວິດ ເອ ແບ໊ດນາ “Quick to Observe” (Ensign, Dec. 2006, 30–36). ການຮູ້ຈັກສັງເກດເປັນພອນໃຫ້ແກ່ມໍມອນແນວໃດ? ມັນສາມາດເປັນພອນໃຫ້ແກ່ເຮົາແນວໃດ?

ມໍມອນ 1:1–6, 15; 2:1–2

ເດັກນ້ອຍຢູ່ໃນຄອບຄົວຂອງທ່ານເຂົ້າໃຈບໍວ່າ ພວກເຂົາສາມາດພັດທະນາຄຸນສົມບັດ ແລະ ພະລັງທາງວິນຍານໄດ້ ເຖິງແມ່ນພວກເຂົາຍັງນ້ອຍຢູ່ກໍຕາມ? ຕົວຢ່າງຂອງມໍມອນສາມາດຊ່ວຍພວກເຂົາ. ໃຫ້ຄິດທີ່ຈະເຮັດເສັ້ນເວລາຕອນມໍມອນຍັງນ້ອຍ ແລະ ເປັນໄວລຸ້ນ, ໂດຍການໃຊ້ອາຍຸ ແລະ ເຫດການຢູ່ໃນ ມໍມອນ 1:1–6, 15 ແລະ 2:1–2. ຂະນະທີ່ທ່ານສົນທະນາກັນກ່ຽວກັບຄຸນສົມບັດ ແລະ ປະສົບການຂອງມໍມອນ, ໃຫ້ຊີ້ບອກຄຸນສົມບັດທີ່ລູກໆຂອງທ່ານມີ ທີ່ດົນໃຈທ່ານ ແລະ ຄົນອື່ນໆທີ່ຢູ່ອ້ອມຮອບພວກເຂົາ.

ມໍມອນ 2:18–19

ມໍມອນໄດ້ໃຊ້ຄຳໃດເພື່ອບັນຍາຍເຖິງໂລກທີ່ເພິ່ນອາໄສຢູ່? ເພິ່ນຍັງມີຄວາມຫວັງຢູ່ຄືເກົ່າໄດ້ແນວໃດ ເຖິງແມ່ນມັນມີຄວາມຊົ່ວຮ້າຍຢູ່ອ້ອມຮອບເພິ່ນ? ຄອບຄົວຂອງເຮົາຈະເຮັດແບບນັ້ນໄດ້ແນວໃດ?

ມໍມອນ 3:12

ມໍມອນຮູ້ສຶກແນວໃດກ່ຽວກັບຜູ້ຄົນທີ່ຢູ່ອ້ອມຮອບເພິ່ນ, ເຖິງແມ່ນພວກເຂົາຊົ່ວຮ້າຍ? ເຮົາສາມາດເຮັດຫຍັງໄດ້ແດ່ ເພື່ອພັດທະນາຄວາມຮັກຄືກັນກັບທີ່ເພິ່ນມີ?

ມໍມອນ 5:2

ເປັນຫຍັງເຮົາຈຶ່ງລັງເລໃຈທີ່ຈະເອີ້ນຫາພຣະບິດາເທິງສະຫວັນ ຕອນເຮົາດີ້ນລົນ? ເຮົາຈະເຮັດສິ່ງໃດ ເພື່ອເພິ່ງອາໄສພຣະບິດາເທິງສະຫວັນຫລາຍກວ່າເກົ່າ?

ມໍມອນ 5:16–18

ເພື່ອຊ່ວຍຄອບຄົວຂອງທ່ານວາດພາບເຫັນຄວາມໝາຍຂອງການ “ຖືກຂັບໄລ່ໄປມາຄືກັນກັບຂີ້ແກບຢູ່ຕໍ່ໜ້າລົມ” (ຂໍ້ທີ 16), ໃຫ້ຈີກເຈ້ຍແຜ່ນໜຶ່ງເປັນຕ່ອນນ້ອຍໆ ແລະ ໃຫ້ສະມາຊິກໃນຄອບຄົວຂອງທ່ານເປົ່າມັນໃຫ້ປິວໄປມາ. ໃຫ້ອະທິບາຍວ່າ ຂີ້ແກບແມ່ນເປືອກຂອງເມັດເຂົ້າ, ແລະ ມັນເບົາພໍທີ່ຈະປິວໄປມາໄດ້. ການ “ປາດສະຈາກພຣະຄຣິດ ແລະ ພຣະເຈົ້າຢູ່ໃນໂລກນີ້” (ຂໍ້ທີ 16) ຄືກັນກັບຂີ້ແກບຢູ່ຕໍ່ໜ້າລົມແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສິດສອນຂອງເຮົາ

ສິດສອນຄຳສອນທີ່ແຈ່ມແຈ້ງ ແລະ ລຽບງ່າຍ. ພຣະກິດຕິຄຸນຂອງພຣະຜູ້ເປັນເຈົ້າແມ່ນງົດງາມ ໃນຄວາມລຽບງ່າຍຂອງມັນ (ເບິ່ງ ຄຳສອນ ແລະ ພັນທະສັນຍາ 133:57). ແທນທີ່ຈະພະຍາຍາມສິດສອນຄອບຄົວດ້ວຍບົດຮຽນທີ່ເກີນຂອບເຂດ, ໃຫ້ທ່ານແນ່ໃຈວ່າສິ່ງທີ່ທ່ານສິດສອນແມ່ນເນັ້ນໃສ່ຄວາມບໍລິສຸດ ແລະ ຄວາມລຽບງ່າຍຂອງຄຳສອນ.