“ວັນທີ 9–15 ເດືອນພະຈິກ. ອີເທີ 1–5: ‘ເປີດມ່ານຂອງຄວາມບໍ່ເຊື່ອຖື,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)
“ວັນທີ 9–15 ເດືອນພະຈິກ. ອີເທີ 1–5,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020
The Jaredites Leaving Babel [ຊາວຢາເຣັດໜີຈາກບາເບນ], ໂດຍ ອາບິນ ເວແຊວກາ
ວັນທີ 9–15 ເດືອນພະຈິກ
ອີເທີ 1–5
“ເປີດມ່ານຂອງຄວາມບໍ່ເຊື່ອຖື”
ໜັງສືອີເທີເປັນບັນທຶກຂອງຊາວຢາເຣັດ, ຜູ້ໄດ້ໄປເຖິງແຜ່ນດິນແຫ່ງຄຳສັນຍາ ຫລາຍສັດຕະວັດກ່ອນຊາວນີໄຟ. ພຣະເຈົ້າໄດ້ດົນໃຈໂມໂຣໄນໃຫ້ລວມບັນທຶກອີເທີໄວ້ໃນພຣະຄຳພີມໍມອນ ເພາະມັນກ່ຽວຂ້ອງກັບວັນເວລາຂອງເຮົາ. ທ່ານຮູ້ສຶກວ່າມັນກ່ຽວຂ້ອງກັບຊີວິດຂອງທ່ານແນວໃດ?
ບັນທຶກຄວາມປະທັບໃຈຂອງທ່ານ
ເຖິງແມ່ນມັນເປັນຄວາມຈິງທີ່ວ່າ ວິທີຂອງພຣະເຈົ້າແມ່ນສູງກວ່າວິທີຂອງເຮົາ, ແລະ ເຮົາຄວນຍອມຕໍ່ພຣະປະສົງຂອງພຣະອົງສະເໝີ, ແຕ່ພຣະອົງກໍຍັງຊຸກຍູ້ໃຫ້ເຮົາຄິດ ແລະ ກະທຳເພື່ອຕົວເອງ. ນັ້ນຄືບົດຮຽນຢ່າງໜຶ່ງທີ່ຢາເຣັດ ແລະ ນ້ອງຊາຍຂອງລາວໄດ້ຮຽນຮູ້. ຍົກຕົວຢ່າງ, ແນວຄິດທີ່ຈະເດີນທາງໄປຫາແຜ່ນດິນໃໝ່ “ທີ່ປະເສີດເລີດລ້ຳກວ່າແຜ່ນດິນອື່ນໃດໃນໂລກ” ເບິ່ງຄືໄດ້ເລີ່ມຕົ້ນຢູ່ໃນຄວາມຄິດຂອງຢາເຣັດ, ແລະ ພຣະຜູ້ເປັນເຈົ້າ “ມີຄວາມເມດຕາປານີ” ແລະ ໄດ້ສັນຍາວ່າຈະປະທານໃຫ້ຕາມຄຳອ້ອນວອນ, ໂດຍກ່າວວ່າ, “ເຮົາຈະໃຫ້ເຈົ້າດັ່ງນີ້ຍ້ອນວ່າເຈົ້າໄດ້ຂໍເຮົາເປັນເວລາອັນຍາວນານ” (ເບິ່ງ ອີເທີ 1:38–43). ແລະ ເມື່ອນ້ອງຊາຍຂອງຢາເຣັດຍອມຮັບວ່າຂ້າງໃນຂອງເຮືອທີ່ຈະພາເຂົາເຈົ້າໄປຫາແຜ່ນດິນແຫ່ງຄຳສັນຍານັ້ນຈະດຳມືດຫລາຍຂະໜາດໃດ, ພຣະຜູ້ເປັນເຈົ້າໄດ້ເຊື້ອເຊີນລາວໃຫ້ແນະນຳສິ່ງແກ້ໄຂ, ໂດຍທີ່ໄດ້ຖາມຄຳຖາມທີ່ຕາມປົກກະຕິແລ້ວ ເຮົາ ຈະຖາມ ພຣະອົງ: “[ພຣະອົງ] ຢາກໃຫ້ [ຂ້ານ້ອຍ] ເຮັດສິ່ງໃດໃຫ້ [ພຣະອົງ]?” (ອີເທີ 2:23). ຂ່າວສານເບິ່ງຄືວ່າ ເຮົາບໍ່ຄວນຄາດໝາຍໃຫ້ພຣະເຈົ້າບັນຊາເຮົາໃນທຸກສິ່ງ. ເຮົາສາມາດແບ່ງປັນຄວາມຄິດ ແລະ ປັນຍາຂອງເຮົາເອງກັບພຣະອົງ, ແລະ ພຣະອົງຈະຮັບຟັງ ແລະ ໃຫ້ການຢືນຢັນ ຫລືບໍ່ກໍໃຫ້ຄຳແນະນຳແກ່ເຮົາ. ບາງເທື່ອສິ່ງດຽວທີ່ແຍກເຮົາຈາກພອນທີ່ເຮົາສະແຫວງຫາ ແມ່ນ “ມ່ານຂອງຄວາມບໍ່ເຊື່ອຖື,” ຂອງເຮົາເອງ ແລະ ຖ້າຫາກເຮົາສາມາດ “ເປີດມ່ານນັ້ນ” (ອີເທີ 4:15), ເຮົາອາດປະຫລາດໃຈກັບສິ່ງທີ່ພຣະຜູ້ເປັນເຈົ້າເຕັມພຣະໄທທີ່ຈະກະທຳເພື່ອເຮົາ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຂະນະທີ່ເຮົາເອີ້ນຫາພຣະຜູ້ເປັນເຈົ້າ, ພຣະອົງຈະມີຄວາມເມດຕາປານີເຮົາ.
ອີເທີ 1:33–43 ບອກເຖິງການອະທິຖານສາມເທື່ອຂອງນ້ອງຊາຍຂອງຢາເຣັດ. ທ່ານຮຽນຮູ້ຫຍັງແດ່ຈາກຄຳຕອບຂອງພຣະຜູ້ເປັນເຈົ້າຕໍ່ການອະທິຖານແຕ່ລະເທື່ອເຫລົ່ານີ້? ໃຫ້ຄິດກ່ຽວກັບເວລາຕອນທີ່ທ່ານໄດ້ປະສົບກັບຄວາມເມດຕາປານີຂອງພຣະຜູ້ເປັນເຈົ້າ ເມື່ອທ່ານເອີ້ນຫາພຣະອົງໃນຄຳອະທິຖານ. ທ່ານອາດຢາກບັນທຶກປະສົບການນີ້ໄວ້ ແລະ ແບ່ງປັນມັນກັບບາງຄົນທີ່ອາດຢາກໄດ້ຍິນປະຈັກພະຍານຂອງທ່ານ.
ເຮົາສາມາດໄດ້ຮັບການເປີດເຜີຍສຳລັບຊີວິດຂອງເຮົາ.
ປະທານຣະໂຊ ເອັມ ແນວສັນ ໄດ້ກ່າວວ່າ, “ຂ້າພະເຈົ້າຂໍໃຫ້ທ່ານຈົ່ງຂະຫຍາຍຄວາມສາມາດທາງວິນຍານຂອງທ່ານ ເພື່ອຈະໄດ້ຮັບການເປີດເຜີຍ. … ໃນການເລືອກທີ່ຈະເຮັດສິ່ງທີ່ເປັນທາງວິນຍານ ທ່ານຈະຊື່ນຊົມກັບຂອງປະທານແຫ່ງພຣະວິນຍານບໍລິສຸດ ແລະ ໄດ້ຍິນສຸລະສຽງຂອງພຣະວິນຍານຫລາຍກວ່າເກົ່າ ແລະ ແຈ່ມແຈ້ງກວ່າເກົ່າ” (“Revelation for the Church, Revelation for Our Lives,” Ensign ຫລື Liahona, May 2018, 96).
ຂະນະທີ່ທ່ານສຶກສາ ອີເທີ 2; 3:1–6; ແລະ 4:7–15, ທ່ານພົບເຫັນຄວາມຈິງໃດແດ່ທີ່ຊ່ວຍທ່ານໃຫ້ເຂົ້າໃຈວິທີທີ່ຈະສະແຫວງຫາການເປີດເຜີຍສ່ວນຕົວ? ທ່ານສາມາດໝາຍຄຳຖາມ ຫລື ຄວາມເປັນຫ່ວງຂອງນ້ອງຊາຍຂອງຢາເຣັດ ແລະ ເຖິງສິ່ງທີ່ລາວໄດ້ເຮັດກ່ຽວກັບມັນໃນສີໜຶ່ງ, ແລະ ໃນອີກສີໜຶ່ງ ທ່ານສາມາດໃຊ້ເພື່ອໝາຍວິທີທີ່ພຣະຜູ້ເປັນເຈົ້າໄດ້ຊ່ວຍລາວ ແລະ ໃຫ້ລາວເຫັນພຣະປະສົງຂອງພຣະອົງ. ແມ່ນຫຍັງທີ່ປະທັບໃຈທ່ານກ່ຽວກັບວິທີທີ່ນ້ອງຊາຍຂອງຢາເຣັດ ສົນທະນາກັບພຣະຜູ້ເປັນເຈົ້າ, ແລະ ທ່ານຮຽນຮູ້ຫຍັງແດ່ຈາກເລື່ອງນີ້ກ່ຽວກັບວິທີທີ່ໄດ້ຮັບການເປີດເຜີຍຫລາຍກວ່າເກົ່າໃນຊີວິດຂອງທ່ານ?
ພຣະຜູ້ເປັນເຈົ້າຈະຕຽມເຮົາໃຫ້ຂ້າມ “ຄວາມເລິກອັນກວ້າງໃຫຍ່” ຂອງເຮົາ.
ກ່ອນຈະໄປເຖິງແຜ່ນດິນແຫ່ງຄຳສັນຍາ, ຊາວຢາເຣັດໄດ້ປະເຊີນກັບອຸປະສັກອັນໃຫຍ່ໂຕ: ການຂ້າມ “ຄວາມເລິກອັນກວ້າງໃຫຍ່” (ອີເທີ 2:25). ຄຳວ່າ “ຄວາມເລິກອັນກວ້າງໃຫຍ່” ສາມາດໃຊ້ເປັນຄຳບັນຍາຍກັບການທົດລອງ ແລະ ການທ້າທາຍ ທີ່ເຮົາຮູ້ສຶກໃນບາງຄັ້ງ. ແລະ ບາງເທື່ອ, ຄືກັນກັບໃນກໍລະນີຂອງຊາວຢາເຣັດ, ການຂ້າມ “ຄວາມເລິກອັນກວ້າງໃຫຍ່” ຂອງເຮົາເອງ ອາດເປັນວິທີດຽວເທົ່ານັ້ນໃນການບັນລຸພຣະປະສົງຂອງພຣະເຈົ້າສຳລັບເຮົາ. ທ່ານເຫັນສິ່ງທີ່ຄ້າຍຄືກັນກັບຊີວິດຂອງທ່ານບໍ່ ຢູ່ໃນ ອີເທີ 2:16–25? ພຣະຜູ້ເປັນເຈົ້າໄດ້ຕຽມທ່ານສຳລັບການທ້າທາຍຂອງທ່ານແນວໃດ? ພຣະອົງອາດຂໍໃຫ້ທ່ານເຮັດຫຍັງແດ່ໃນເວລານີ້ ເພື່ອກະກຽມສຳລັບສິ່ງທີ່ພຣະອົງຢາກໃຫ້ທ່ານເຮັດໃນອະນາຄົດ?
ເຮົາຖືກສ້າງຕາມຮູບຮ່າງລັກສະນະຂອງພຣະເຈົ້າ.
ຢູ່ເທິງພູເຊເລັມ, ນ້ອງຊາຍຂອງຢາເຣັດໄດ້ຮຽນຮູ້ກ່ຽວກັບພຣະເຈົ້າ ແລະ ກ່ຽວກັບຕົວລາວເອງ. ທ່ານຮຽນຮູ້ຫຍັງແດ່ຈາກ ອີເທີ 3 ກ່ຽວກັບສະພາບທາງວິນຍານ ແລະ ທາງຮ່າງກາຍຂອງພຣະເຈົ້າ? ຄວາມຈິງເຫລົ່ານີ້ຊ່ວຍທ່ານໃຫ້ເຂົ້າໃຈເອກະລັກ ແລະ ສັກກະຍະພາບແຫ່ງສະຫວັນຂອງທ່ານແນວໃດ?
ເຮົາທຸກຄົນເປັນລູກຂອງພຣະເຈົ້າ.
ນ້ອງຊາຍຂອງຢາເຣັດເປັນຜູ້ທຳອິດທີ່ໄດ້ເຫັນພຣະຜູ້ເປັນເຈົ້າບໍ?
ພຣະເຈົ້າໄດ້ສະແດງພຣະອົງຕໍ່ສາດສະດາຄົນອື່ນໆກ່ອນນ້ອງຊາຍຂອງຢາເຣັດ (ຍົກຕົວຢ່າງ, ເບິ່ງ ໂມເຊ 7:4, 59), ສະນັ້ນເປັນຫຍັງພຣະຜູ້ເປັນເຈົ້າຈຶ່ງກ່າວກັບລາວວ່າ, “ເຮົາບໍ່ເຄີຍປະກົດຕົວແກ່ມະນຸດ”? (ອີເທີ 3:15). ແອວເດີ ແຈັບຟະຣີ ອາ ຮໍແລນ ໄດ້ໃຫ້ຄຳອະທິບາຍທີ່ເປັນໄປໄດ້ດັ່ງນີ້: “ພຣະຄຣິດໄດ້ກ່າວກັບນ້ອງຊາຍຂອງຢາເຣັດວ່າ, ‘ເຮົາບໍ່ເຄີຍປະກົດຕົວແກ່ມະນຸດ ໃນທາງນີ້, ໂດຍທີ່ບໍ່ໄດ້ຕັ້ງໃຈ, ພຽງແຕ່ໂດຍສັດທາຂອງຜູ້ທີ່ຫລຽວເບິ່ງ’” (Christ and the New Covenant [1997], 23).
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.
ອີເທີ 1:34–37
ເຮົາຮຽນຮູ້ຫຍັງແດ່ ຈາກຂໍ້ພຣະຄຳພີເຫລົ່ານີ້ ກ່ຽວກັບການອະທິຖານເພື່ອຄົນອື່ນ? ມີຄວາມຈິງໃດແດ່ກ່ຽວກັບການອະທິຖານທີ່ຂໍ້ເຫລົ່ານີ້ສະແດງໃຫ້ເຫັນ?
ອີເທີ 2:16–3:6
ຕົວຢ່າງຂອງນ້ອງຊາຍຂອງຢາເຣັດສິດສອນເຮົາຫຍັງແດ່ກ່ຽວກັບວິທີທີ່ຈະຊອກຫາຄຳຕອບໃຫ້ແກ່ບັນຫາ ແລະ ຄຳຖາມຂອງເຮົາ? ບາງທີສະມາຊິກໃນຄອບຄົວສາມາດແບ່ງປັນປະສົບການຕອນທີ່ເຂົາເຈົ້າໄດ້ສະແຫວງຫາ ແລະ ໄດ້ຮັບຄຳຕອບຈາກພຣະຜູ້ເປັນເຈົ້າ.
ອີເທີ 4:11–12
ຫລັງຈາກການອ່ານຂໍ້ເຫລົ່ານີ້, ສະມາຊິກໃນຄອບຄົວສາມາດຂຽນບາງສິ່ງໃນປະຈຳວັນທີ່ມີອິດທິພົນຕໍ່ຄອບຄົວຂອງທ່ານ (ດັ່ງເຊັ່ນ ໜັງ, ເພງ, ເກມ, ຫລື ຜູ້ຄົນ) ໄວ້ໃນເຈ້ຍນ້ອຍ ແລະ ເອົາມັນໃສ່ໄວ້ໃນຖ້ວຍ. ແລ້ວເຂົາເຈົ້າສາມາດປ່ຽນຜຽນກັນເລືອກເອົາໃບໜຶ່ງ ແລະ ສົນທະນາວ່າມັນ “ຊັກຊວນ [ເຂົາເຈົ້າ] ໃຫ້ສ້າງຄວາມດີ” ຫລືບໍ່ (ອີເທີ 4:12). ມີສິ່ງໃດແດ່ທີ່ຄອບຄົວຂອງທ່ານຖືກດົນໃຈໃຫ້ປ່ຽນແປງ?
ອີເທີ 5
ທ່ານສາມາດເຊື່ອງສິ່ງຂອງ ຫລື ຂອງກິນຫລິ້ນໄວ້ໃນກັບ ແລະ ເຊື້ອເຊີນສະມາຊິກໃນຄອບຄົວຄົນໜຶ່ງໃຫ້ຫລຽວເບິ່ງ ແລະ ບອກຮ່ອງຮອຍແກ່ຄົນອື່ນໆໃນຄອບຄົວ ເພື່ອໃຫ້ເຂົາເຈົ້າເດົາເບິ່ງວ່າສິ່ງນັ້ນແມ່ນຫຍັງ. ຂະນະທີ່ພວກທ່ານອ່ານ ອີເທີ 5 ນຳກັນ, ໃຫ້ສົນທະນາເຖິງຄວາມສຳຄັນທີ່ພຣະຜູ້ເປັນເຈົ້າຕ້ອງມີພະຍານໃນວຽກງານຂອງພຣະອົງ. ເຮົາຈະສາມາດແບ່ງປັນພະຍານຂອງເຮົາເຖິງພຣະຄຳພີມໍມອນກັບຄົນອື່ນໄດ້ແນວໃດ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ການປັບປຸງການສິດສອນຂອງເຮົາ
ພ້ອມຢູ່ສະເໝີ. “ຊ່ວງເວລາແຫ່ງການສິດສອນແມ່ນຜ່ານໄປຢ່າງໄວ, ສະນັ້ນ ຕ້ອງສວຍໂອກາດ ເມື່ອໄດ້ຈັງຫວະ. … ຍົກຕົວຢ່າງ, ຄົນໄວລຸ້ນທີ່ມີບັນຫາກັບການຕັດສິນໃຈ ອາດພ້ອມແລ້ວທີ່ຈະຮຽນຮູ້ກ່ຽວກັບວິທີທີ່ຈະໄດ້ຮັບການເປີດເຜີຍສ່ວນຕົວ” (Teaching in the Savior’s Way, 16).
Sawest Thou More Than This? [ເຈົ້າເຫັນຫລາຍກວ່ານີ້ບໍ່?] ໂດຍ ມາກັສ ອາລານ ວິນເຊັນ