ໜັງສືອີເທີ
ບັນທຶກຂອງຊາວຢາເຣັດທີ່ໄດ້ມາຈາກແຜ່ນຈາລຶກຊາວສີ່ແຜ່ນ ຊຶ່ງຜູ້ຄົນຂອງລິມໄຮໄດ້ພົບເຫັນໃນວັນເວລາຂອງກະສັດໂມໄຊຢາ.
ບົດທີ 1
ໂມໂຣໄນຫຍໍ້ການບັນທຶກຂອງອີເທີເຂົ້າກັນ—ລຳດັບການສືບເຊື້ອສາຍຂອງອີເທີ—ພາສາຂອງຊາວຢາເຣັດບໍ່ໄດ້ສັບສົນໃນສະໄໝຂອງຫໍຄອຍເມືອງບາເບນ—ພຣະຜູ້ເປັນເຈົ້າສັນຍາວ່າຈະນຳພວກເຂົາໄປຫາແຜ່ນດິນທີ່ເລືອກໄວ້ ແລະ ເຮັດໃຫ້ພວກເຂົາເປັນປະຊາຊາດທີ່ຍິ່ງໃຫຍ່.
1 ແລະ ບັດນີ້ຂ້າພະເຈົ້າ ໂມໂຣໄນໃຫ້ເລື່ອງລາວຂອງຜູ້ອາໄສຢູ່ໃນສະໄໝກ່ອນ ຊຶ່ງໄດ້ຖືກທຳລາຍໄປແລ້ວໃນຜືນແຜ່ນດິນທາງເໜືອນີ້ ໂດຍ ພຣະຫັດຂອງພຣະຜູ້ເປັນເຈົ້າ.
2 ແລະ ຂ້າພະເຈົ້າຈະເຮັດບັນທຶກຂອງຂ້າພະເຈົ້າຈາກແຜ່ນຈາລຶກ ຊາວສີ່ແຜ່ນ ຊຶ່ງຜູ້ຄົນຂອງລິມໄຮໄດ້ພົບເຫັນ, ຊຶ່ງມີຊື່ວ່າ ໜັງສືອີເທີ.
3 ແລະ ຄືກັນກັບທີ່ຂ້າພະເຈົ້າຄິດໄວ້ແລ້ວວ່າ, ໃນພາກທຳອິດຂອງບັນທຶກນີ້ ມີຢູ່ແລ້ວໃນບັນດາຊາວຢິວ ຊຶ່ງເວົ້າກ່ຽວກັບການສ້າງໂລກ ແລະ ກ່ຽວກັບອາດາມນຳອີກ ແລະ ເລື່ອງລາວນັບຕັ້ງແຕ່ເວລາຂອງອາດາມຈົນມາຮອດເວລາຂອງ ຫໍຄອຍສູງໃຫຍ່ນັ້ນ, ແລະ ເລື່ອງອັນໃດກໍຕາມຊຶ່ງເກີດຂຶ້ນໃນບັນດາລູກຫລານມະນຸດຈົນຮອດເວລານັ້ນ—
4 ສະນັ້ນ ຂ້າພະເຈົ້າຈຶ່ງບໍ່ໄດ້ຂຽນເລື່ອງເຫລົ່ານັ້ນ ຊຶ່ງໄດ້ເກີດຂຶ້ນນັບຕັ້ງແຕ່ ເວລາຂອງອາດາມຈົນມາຮອດເວລານັ້ນ; ເພາະມັນມີຢູ່ແລ້ວໃນແຜ່ນຈາລຶກ; ແລະ ຜູ້ໃດກໍຕາມທີ່ພົບພໍ້ແຜ່ນຈາລຶກ, ຜູ້ນັ້ນຈະມີອຳນາດເພາະວ່າເຂົາຈະໄດ້ເລື່ອງລາວໂດຍຄົບຖ້ວນ.
5 ແຕ່ຈົ່ງເບິ່ງ, ຂ້າພະເຈົ້າບໍ່ໄດ້ໃຫ້ເລື່ອງລາວໂດຍຄົບຖ້ວນ, ແຕ່ວ່າຂ້າພະເຈົ້າໄດ້ໃຫ້ໄວ້ພຽງສ່ວນໜຶ່ງຂອງເລື່ອງລາວນັບຕັ້ງແຕ່ຫໍຄອຍຈົນກະທັ້ງພວກເຂົາເຫລົ່ານັ້ນຖືກທຳລາຍໝົດ.
6 ແລະ ຂ້າພະເຈົ້າໃຫ້ເລື່ອງລາວໄວ້ຕາມນີ້. ຜູ້ທີ່ຂຽນບັນທຶກນີ້ມີຊື່ວ່າ ອີເທີ, ແລະ ລາວເປັນຜູ້ສືບຕະກຸນຂອງໂຄຣິອານທໍ.
7 ໂຄຣິອານທໍເປັນລູກຊາຍຂອງໂມຣັນ.
8 ແລະ ໂມຣັນເປັນລູກຊາຍຂອງອີເທັມ.
9 ແລະ ອີເທັມເປັນລູກຊາຍຂອງເອຫາ.
10 ແລະ ເອຫາເປັນລູກຊາຍຂອງເຊດ.
11 ແລະ ເຊດເປັນລູກຊາຍຂອງຊິບລັນ.
12 ແລະ ຊິບລັນເປັນລູກຊາຍຂອງຄອມ.
13 ແລະ ຄອມເປັນລູກຊາຍຂອງໂຄຣິອານທຳ.
14 ແລະ ໂຄຣິອານທຳເປັນລູກຊາຍຂອງອາມນີແກດາ.
15 ແລະ ອາມນີແກດາເປັນລູກຊາຍຂອງອາໂຣນ.
16 ແລະ ອາໂຣນເປັນຜູ້ສືບຕະກຸນຂອງເຫັດ, ຜູ້ເປັນລູກຊາຍຂອງຮີອາທຳ.
17 ແລະ ຮີອາທຳເປັນລູກຊາຍຂອງລິບ.
18 ແລະ ລິບເປັນລູກຊາຍຂອງກີເຊ.
19 ແລະ ກີເຊເປັນລູກຊາຍຂອງໂຄຣຳ.
20 ແລະ ໂຄຣຳເປັນລູກຊາຍຂອງເລວີ.
21 ແລະ ເລວີເປັນລູກຊາຍຂອງຄິມ.
22 ແລະ ຄິມເປັນລູກຊາຍຂອງໂມຣິອານທັນ.
23 ແລະ ໂມຣິອານທັນເປັນຜູ້ສືບຕະກຸນຂອງຣິບລາຄິດ.
24 ແລະ ຣິບລາຄິດເປັນລູກຊາຍຂອງເຊັດ.
25 ແລະ ເຊັດເປັນລູກຊາຍຂອງເຫັດ.
26 ແລະ ເຫັດເປັນລູກຊາຍຂອງຄອມ.
27 ແລະ ຄອມເປັນລູກຊາຍຂອງໂຄຣິອານທຳ.
28 ແລະ ໂຄຣິອານທຳເປັນລູກຊາຍຂອງອີເມີ.
29 ແລະ ອີເມີເປັນລູກຊາຍຂອງໂອເມ.
30 ແລະ ໂອເມເປັນລູກຊາຍຂອງຊູນ.
31 ແລະ ຊູນເປັນລູກຊາຍຂອງຄີບ.
32 ແລະ ຄີບເປັນລູກຊາຍຂອງໂອໄຣຮາ, ຜູ້ເປັນລູກຊາຍຂອງຢາເຣັດ;
33 ຢາເຣັດຜູ້ນີ້ແຫລະຄືຜູ້ທີ່ມາຈາກຫໍສູງໃຫຍ່ພ້ອມດ້ວຍນ້ອງຊາຍ ແລະ ຄອບຄົວຂອງພວກເຂົາ, ພ້ອມທັງຜູ້ອື່ນ ແລະ ຄອບຄົວຂອງພວກເຂົາ, ໃນວັນເວລາທີ່ພຣະຜູ້ເປັນເຈົ້າເຮັດໃຫ້ພາສາຂອງມະນຸດ ສັບສົນກັນ, ແລະ ສາບານໃນພຣະພິໂລດຂອງພຣະອົງວ່າ ຜູ້ຄົນທັງຫລາຍຈະກະຈັດກະຈາຍໄປຕາມ ຜືນແຜ່ນດິນໂລກ; ແລະ ຕາມພຣະຄຳຂອງພຣະຜູ້ເປັນເຈົ້າມະນຸດຈຶ່ງກະຈັດກະຈາຍໄປ.
34 ແລະ ນ້ອງຊາຍຂອງຢາເຣັດ ໂດຍທີ່ເປັນຄົນຮ່າງໃຫຍ່ສູງ ແລະ ມີກຳລັງຫລາຍ, ແລະ ໂດຍທີ່ເປັນຜູ້ໂປດປານທີ່ສຸດຂອງພຣະຜູ້ເປັນເຈົ້າ, ຢາເຣັດ ຜູ້ເປັນອ້າຍຈຶ່ງເວົ້າກັບລາວວ່າ: ຈົ່ງຮ້ອງທູນຕໍ່ພຣະຜູ້ເປັນເຈົ້າເຖີດ, ເພື່ອພຣະອົງຈະບໍ່ເຮັດໃຫ້ພາສາຂອງພວກເຮົາສັບສົນຈົນວ່າພວກເຮົາເວົ້າບໍ່ເຂົ້າໃຈກັນ.
35 ແລະ ເຫດການໄດ້ບັງເກີດຂຶ້ນຄື ນ້ອງຊາຍຂອງຢາເຣັດໄດ້ຮ້ອງທູນຕໍ່ພຣະຜູ້ເປັນເຈົ້າ, ແລະ ພຣະຜູ້ເປັນເຈົ້າມີຄວາມເມດຕາສົງສານຕໍ່ຢາເຣັດ; ສະນັ້ນ ພຣະອົງຈຶ່ງບໍ່ໄດ້ເຮັດໃຫ້ພາສາຂອງຢາເຣັດສັບສົນ; ແລະ ຢາເຣັດກັບນ້ອງຊາຍຂອງລາວກໍບໍ່ໄດ້ສັບສົນ.
36 ຈາກນັ້ນ ຢາເຣັດໄດ້ເວົ້າກັບນ້ອງຊາຍຂອງລາວວ່າ: ຈົ່ງຮ້ອງທູນຂໍພຣະຜູ້ເປັນເຈົ້າອີກ, ເພື່ອບາງທີພຣະອົງຈະຫັນເອົາພຣະພິໂລດຂອງພຣະອົງໄປຈາກໝູ່ເພື່ອນຂອງພວກເຮົາ, ເພື່ອພຣະອົງຈະບໍ່ເຮັດໃຫ້ພາສາຂອງພວກເຂົາສັບສົນ.
37 ແລະ ເຫດການໄດ້ບັງເກີດຂຶ້ນຄື ນ້ອງຊາຍຂອງຢາເຣັດໄດ້ຮ້ອງທູນຕໍ່ພຣະຜູ້ເປັນເຈົ້າ, ແລະ ພຣະອົງມີຄວາມເມດຕາປານີຕໍ່ໝູ່ເພື່ອນຂອງພວກເຂົາ, ພ້ອມທັງຄອບຄົວຂອງພວກເຂົານຳອີກ, ຄືພາສາຂອງພວກເຂົາບໍ່ໄດ້ສັບສົນ.
38 ແລະ ເຫດການໄດ້ບັງເກີດຂຶ້ນຄື ຢາເຣັດໄດ້ເວົ້າກັບນ້ອງຊາຍຂອງລາວອີກ, ມີຄວາມວ່າ: ຈົ່ງໄປທູນຖາມພຣະຜູ້ເປັນເຈົ້າວ່າ ພຣະອົງຈະຂັບໄລ່ພວກເຮົາອອກຈາກແຜ່ນດິນບໍ່ ແລະ ຖ້າຫາກພຣະອົງຈະຂັບໄລ່ພວກເຮົາອອກຈາກແຜ່ນດິນໄປ ຈົ່ງຮ້ອງທູນຕໍ່ພຣະອົງວ່າ ພວກເຮົາຈະໄປຫາບ່ອນໃດ? ແລະ ເພື່ອບາງທີພຣະຜູ້ເປັນເຈົ້າຈະໄດ້ນຳພາພວກເຮົາໄປຫາແຜ່ນດິນທີ່ ປະເສີດເລີດລ້ຳກວ່າແຜ່ນດິນອື່ນໃດໃນໂລກນີ້? ແລະ ຖ້າຫາກມັນເປັນເຊັ່ນນັ້ນກໍຂໍໃຫ້ພວກເຮົາຊື່ສັດຕໍ່ພຣະຜູ້ເປັນເຈົ້າ ເພື່ອຈະໄດ້ຮັບແຜ່ນດິນນັ້ນມາເປັນມູນມໍລະດົກຂອງພວກເຮົາ.
39 ແລະ ເຫດການໄດ້ບັງເກີດຂຶ້ນຄື ນ້ອງຊາຍຂອງຢາເຣັດກໍໄດ້ຮ້ອງທູນຕໍ່ພຣະຜູ້ເປັນເຈົ້າຕາມທີ່ໄດ້ເວົ້າໄວ້ດ້ວຍປາກຂອງຢາເຣັດ.
40 ແລະ ເຫດການໄດ້ບັງເກີດຂຶ້ນຄື ພຣະຜູ້ເປັນເຈົ້າໄດ້ຍິນນ້ອງຊາຍຂອງຢາເຣັດ, ແລະ ມີຄວາມເມດຕາປານີຕໍ່ລາວ, ແລະ ໄດ້ກ່າວກັບລາວວ່າ:
41 ຈົ່ງໄປເຕົ້າໂຮມຝູງສັດລ້ຽງຂອງເຈົ້າທັງໂຕຜູ້ ແລະ ໂຕແມ່ທຸກຊະນິດ, ແລະ ເມັດພືດເຄື່ອງປູກຂອງຝັງ ທຸກໆຊະນິດນຳອີກ; ພ້ອມທັງ ຄອບຄົວຂອງເຈົ້າ; ແລະ ຢາເຣັດອ້າຍຂອງເຈົ້າພ້ອມທັງຄອບຄົວຂອງລາວອີກ; ແລະ ໝູ່ເພື່ອນຂອງເຈົ້າພ້ອມທັງຄອບຄົວຂອງພວກເຂົາ; ແລະ ໝູ່ເພື່ອນຂອງຢາເຣັດພ້ອມທັງຄອບຄົວຂອງພວກເຂົາ.
42 ແລະ ເວລາເຈົ້າເຮັດຕາມນີ້ແລ້ວ ເຈົ້າຈົ່ງ ນຳໜ້າພວກເຂົາລົງໄປຫາຮ່ອມພູທາງເໜືອ. ແລະ ເຮົາຈະພົບກັບເຈົ້າຢູ່ບ່ອນນັ້ນ, ແລະ ເຮົາຈະ ນຳທາງເຈົ້າໄປຫາແຜ່ນດິນອັນ ປະເສີດເລີດລ້ຳກວ່າແຜ່ນດິນທັງໝົດໃນໂລກ.
43 ແລະ ບ່ອນນັ້ນເຮົາຈະໃຫ້ພອນແກ່ເຈົ້າ ແລະ ລູກຫລານຂອງເຈົ້າ, ແລະ ສະຖາປະນາປະຊາຊາດທີ່ຍິ່ງໃຫຍ່ນັ້ນໄວ້ໃຫ້ເຮົາຈາກລູກຫລານຂອງເຈົ້າ, ແລະ ຈາກລູກຫລານຂອງອ້າຍຂອງເຈົ້າ, ແລະ ຜູ້ທີ່ຈະໄປພ້ອມກັບເຈົ້າ, ແລະ ຈະບໍ່ມີປະຊາຊາດໃດໆໃນຜືນແຜ່ນດິນໂລກນີ້ທີ່ຈະຍິ່ງໃຫຍ່ກວ່າປະຊາຊາດ ຊຶ່ງເຮົາຈະສະຖາປະນາໃຫ້ຕົວເຮົາເອງ, ຈາກລູກຫລານຂອງເຈົ້າ. ແລະ ເຮົາຈະໃຫ້ເຈົ້າດັ່ງນີ້ຍ້ອນວ່າເຈົ້າໄດ້ຂໍເຮົາເປັນເວລາອັນຍາວນານ.