“ວັນທີ 16–22 ເດືອນພະຈິກ. ອີເທີ 6–11: ‘ເພື່ອຄວາມຊົ່ວຕ່າງໆຈະໄດ້ໝົດໄປ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີມໍມອນ 2020 (2020)

“ວັນທີ 16–22 ເດືອນພະຈິກ. ອີເທີ 6–11,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2020

ຮູບພາບ

ເຮືອຂອງຊາວຢາເຮັດຢູ່ໃນທະເລ

I Will Bring You up Again out of the Depths [ເຮົາຈະເອົາເຈົ້າຂຶ້ນມາອີກຈາກຄວາມເລິກຂອງທະເລ], ໂດຍ ຈອນນາຕັນ ອາເຕີ ຄະລາກ

ວັນທີ 16–22 ເດືອນພະຈິກ

ອີເທີ 6–11

“ເພື່ອຄວາມຊົ່ວຕ່າງໆຈະໄດ້ໝົດໄປ”

ເມື່ອກ່າວເຖິງບັນທຶກຂອງຊາວຢາເຣັດ, ມໍມອນໄດ້ໃຫ້ຄວາມຄິດເຫັນວ່າ “ມັນສົມຄວນທີ່ຜູ້ຄົນທັງປວງຄວນຮູ້ເລື່ອງຊຶ່ງມີຂຽນຢູ່ໃນເລື່ອງນັ້ນ” (ໂມໄຊຢາ 28:19). ໃຫ້ຈື່ຈຳສິ່ງນີ້ໄວ້ໃນໃຈຂະນະທີ່ທ່ານອ່ານ ອີເທີ 6–11. ເປັນຫຍັງສິ່ງເຫລົ່ານີ້ຈຶ່ງສົມຄວນ—ຫລື ເປັນປະໂຫຍດ—ຕໍ່ທ່ານ ແລະ ຕໍ່ຄົນທີ່ທ່ານຮັກ?

ບັນທຶກຄວາມປະທັບໃຈຂອງທ່ານ

ຫລາຍຮ້ອຍປີຫລັງຈາກທີ່ຊາວຢາເຣັດໄດ້ຖືກທຳລາຍ, ຊາວນີໄຟໄດ້ຄົ້ນພົບເມືອງຮ້າງບູຮານຂອງເຂົາເຈົ້າ. ໃນບັນດາເມືອງຮ້າງເຫລົ່ານັ້ນ ມີບັນທຶກລຶກລັບສະບັບໜຶ່ງ—ເປັນບັນທຶກທີ່ເຮັດດ້ວຍ “ຄຳສົດ” ຊຶ່ງ “ເຕັມໄປດ້ວຍຕົວອັກຂະລະ” (ໂມໄຊຢາ 8:9). ລິມໄຮ ກະສັດຂອງຊາວນີໄຟຮູ້ສຶກວ່າບັນທຶກນີ້ສຳຄັນ: “ຄວາມລຶກລັບອັນຍິ່ງໃຫຍ່ມີຢູ່ໃນແຜ່ນຈາລຶກເຫລົ່ານີ້,” ເພິ່ນກ່າວ (ໂມໄຊຢາ 8:19). ທຸກວັນນີ້ທ່ານມີເລື່ອງຫຍໍ້ຂອງບັນທຶກນີ້, ຖືກແປເປັນພາສາຂອງທ່ານ, ແລະ ມັນມີຊື່ວ່າ ໜັງສືອີເທີ. ມັນມາຈາກບັນທຶກອັນດຽວກັນນັ້ນທີ່ຊາວນີໄຟ “ປາດຖະໜາເກີນກວ່າຈະວັດແທກໄດ້” ທີ່ຈະອ່ານ, ແລະ ເມື່ອພວກເຂົາໄດ້ອ່ານ, “ພວກເຂົາເຕັມໄປດ້ວຍຄວາມເສົ້າສະຫລົດໃຈ; ເຖິງຢ່າງໃດກໍຕາມ ມັນໄດ້ໃຫ້ຄວາມຮູ້ແກ່ພວກເຂົາຢ່າງຫລວງຫລາຍ, ຊຶ່ງໃນນັ້ນເຮັດໃຫ້ພວກເຂົາມີຄວາມປິຕິຍິນດີ” (ໂມໄຊຢາ 28:12, 18). ຂະນະທີ່ທ່ານອ່ານກ່ຽວກັບຄວາມຈະເລີນ ແລະ ຄວາມເສື່ອມໂຊມຂອງຊາວຢາເຣັດ, ທ່ານຈະພົບເຫັນຊ່ວງໄລຍະທີ່ໂສກເສົ້າຂອງພວກເຂົາ. ແຕ່ຢ່າມອງຂ້າມຄວາມສຸກຂອງການຮຽນຮູ້ຈາກປະຫວັດສາດນີ້. ເຖິງແນວໃດ, ດັ່ງທີ່ໂມໂຣໄນໄດ້ຂຽນ, “ມັນແມ່ນຄວາມສະຫລຽວສະຫລາດຂອງພຣະເຈົ້າທີ່ຈະໃຫ້ສິ່ງເຫລົ່ານີ້ເປັນທີ່ຮູ້ຈັກແກ່ທ່ານ” (ອີເທີ 8:23), ເພາະຖ້າຫາກເຮົາສາມາດຮຽນຮູ້ຈາກຄວາມລົ້ມເຫລວ ແລະ ຄວາມສຳເລັດຜົນຂອງຊາວຢາເຣັດ, “ຄວາມຊົ່ວຕ່າງໆຈະໄດ້ໝົດໄປ, ແລະ … ເວລາຈະມາຮອດ ຊຶ່ງຊາຕານຈະບໍ່ມີອຳນາດເໜືອໃຈຂອງລູກຫລານມະນຸດ” (ອີເທີ 8:26).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ອີເທີ 6:1–12

ພຣະຜູ້ເປັນເຈົ້າຈະນຳພາເຮົາໄປຫາແຜ່ນດິນແຫ່ງຄຳສັນຍາ.

ທ່ານອາດໄດ້ຄວາມຮູ້ທາງວິນຍານ ຖ້າຫາກທ່ານປຽບທຽບການເດີນທາງຂ້າມທະເລຂອງຊາວຢາເຣັດໃສ່ກັບການເດີນທາງໃນຊ່ວງມະຕະຂອງທ່ານ. ຍົກຕົວຢ່າງ, ພຣະຜູ້ເປັນເຈົ້າໄດ້ຈັດຫາຫຍັງໃຫ້ທ່ານເພື່ອເປັນແສງສະຫວ່າງ ທີ່ຄືກັນກັບກ້ອນຫີນຢູ່ໃນເຮືອຂອງຊາວຢາເຣັດ? ເຮືອເຫລົ່ານັ້ນ, ຫລື ລົມທີ່ “ພັດໄປທາງແຜ່ນດິນແຫ່ງຄຳສັນຍາ” ເປັນຕົວແທນໃຫ້ສິ່ງໃດ? (ອີເທີ 6:8). ທ່ານຮຽນຮູ້ຫຍັງແດ່ຈາກການກະທຳຂອງຊາວຢາເຣັດ ກ່ອນ, ລະຫວ່າງ, ແລະ ຫລັງຈາກການເດີນທາງ? ພຣະຜູ້ເປັນເຈົ້າກຳລັງນຳພາທ່ານໄປຫາແຜ່ນດິນແຫ່ງຄຳສັນຍາແນວໃດ?

ມິເນີວາ ເຄ ໄທເກີດ (1888–1976), Journey of the Jaredites across Asia [ການເດີນທາງຂອງຊາວຢາເຣັດຂ້າມອາຊີ], 1935, ສີນ້ຳມັນເທິງແຜ່ນໄມ້ອັດ, 35 x 48 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລບຣິກຳ ຢັງ.

ອີເທີ 6:5–18, 30; 9:28–35; 10:1–2

ພຣະຜູ້ເປັນເຈົ້າອວຍພອນເຮົາ ເມື່ອເຮົາຖ່ອມຕົວ.

ເຖິງແມ່ນວ່າຄວາມທະນົງຕົວ ແລະ ຄວາມຊົ່ວຮ້າຍເບິ່ງຄືວ່າ ເຕັມຢູ່ໃນປະຫວັດສາດຂອງຊາວຢາເຣັດ, ແຕ່ກໍຍັງມີຕົວຢ່າງຂອງຄວາມຖ່ອມຕົວຢູ່ໃນບົດເຫລົ່ານີ້—ໂດຍສະເພາະ ຢູ່ໃນ ອີເທີ 6:5–18, 30; 9:28–35; ແລະ 10:1–2. ການໄຕ່ຕອງຄຳຖາມດັ່ງຕໍ່ໄປນີ້ ສາມາດຊ່ວຍທ່ານຮຽນຮູ້ຈາກຕົວຢ່າງເຫລົ່ານີ້: ເປັນຫຍັງຊາວຢາເຣັດຈຶ່ງຖ່ອມຕົວລົງໃນສະຖານະການເຫລົ່ານີ້? ພວກເຂົາໄດ້ເຮັດຫຍັງເພື່ອສະແດງຄວາມຖ່ອມຕົວຂອງເຂົາເຈົ້າ? ເຂົາເຈົ້າໄດ້ຮັບພອນແນວໃດ ຈາກການຖ່ອມຕົວນັ້ນ? ໃຫ້ສັງເກດເບິ່ງບາງກໍລະນີ, ຜູ້ຄົນຖືກກົດດັນໃຫ້ຖ່ອມຕົວອີງຕາມສະຖານະການ. ໃຫ້ພິຈາລະນາສິ່ງທີ່ທ່ານສາມາດເຮັດ ເພື່ອ “ເດີນໄປຢ່າງຖ່ອມຕົວຕໍ່ພຣະພັກຂອງພຣະຜູ້ເປັນເຈົ້າ” ດ້ວຍຄວາມເຕັມໃຈ (ອີເທີ 6:17) ແທນທີ່ເພາະການກົດດັນໃຫ້ຖ່ອມຕົວ (ເບິ່ງ ໂມໄຊຢາ 4:11–12; ແອວມາ 32:14–18).

ເບິ່ງ “Humility,” Gospel Topics, topics.ChurchofJesusChrist.org ນຳອີກ.

ອີເທີ 7–11

ຜູ້ນຳທີ່ຊອບທຳເປັນພອນໃຫ້ແກ່ຜູ້ຄົນທີ່ພວກເພິ່ນນຳພາ.

ບົດທີ 7–11 ຂອງອີເທີ ສຳລວມຢ່າງໜ້ອຍ 28 ລຸ້ນຄົນ. ເຖິງແມ່ນວ່າບໍ່ສາມາດໃຫ້ລາຍລະອຽດຢ່າງຫລວງຫລາຍໄວ້ໃນຊ່ອງວ່າງຈຳນວນໜ້ອຍນັ້ນ, ແຕ່ແບບແຜນໄດ້ເລີ່ມຕົ້ນປະກົດຂຶ້ນ: ການເປັນຜູ້ນຳທີ່ຊອບທຳ ຈະນຳພາໄປສູ່ພອນ ແລະ ຄວາມຈະເລີນຮຸ່ງເຮືອງ, ຂະນະທີ່ຜູ້ນຳທີ່ຊົ່ວຮ້າຍຈະພາໄປສູ່ຄວາມເປັນທາດ ແລະ ຄວາມພິນາດ.

ຂ້າງລຸ່ມນີ້ແມ່ນບັນດາກະສັດຈຳນວນໜ້ອຍໜຶ່ງທີ່ຖືກກ່າວເຖິງຢູ່ໃນບົດເຫລົ່ານີ້. ໃຫ້ອ່ານຂໍ້ທີ່ກ່ຽວຂ້ອງ, ແລະ ເບິ່ງວ່າທ່ານຮຽນຮູ້ຫຍັງແດ່ຈາກຕົວຢ່າງຂອງພວກເພິ່ນ—ທາງບວກ ແລະ ທາງລົບ—ກ່ຽວກັບການເປັນຜູ້ນຳ. ເມື່ອທ່ານເຮັດແນວນັ້ນ, ໃຫ້ຄິດກ່ຽວກັບໂອກາດທີ່ທ່ານມີ ໃນການນຳພາ ຫລື ເປັນອິດທິພົນຕໍ່ຄົນອື່ນຢູ່ໃນບ້ານເຮືອນຂອງທ່ານ, ໃນຊຸມຊົນຂອງທ່ານ, ແລະ ໃນການເອີ້ນໃນສາດສະໜາຈັກຂອງທ່ານ, ແລະ ອື່ນໆ.

ໂອໄຣຮາ—ອີເທີ 6:30–7:1
ຊູນ—ອີເທີ 7:23–27
ຢາເຣັດ—ອີເທີ 8:1–7, 11–15
ອີເມີ ແລະ ໂຄຣິອານທຳ—ອີເທີ 9:21–23
ເຫັດ—ອີເທີ 9:26–30
ເຊັດ—ອີເທີ 10:1–2
ຣິບລາຄິດ—ອີເທີ 10:5–8
ໂມຣິອານທັນ—ອີເທີ 10:10–11
ລິບ—ອີເທີ 10:19–28
ອີເທັມ—ອີເທີ 11:11–13

ອີເທີ 8:7–26

ການມົ້ວສຸມລັບຄືຫຍັງ?

ເມື່ອສອງຄົນ ຫລື ຫລາຍກວ່ານັ້ນສົມຮູ້ຮ່ວມຄິດທີ່ຈະຮັກສາຄວາມຊົ່ວຮ້າຍຂອງຕົນໄວ້ເປັນຄວາມລັບ, ພວກເຂົາມີສ່ວນຮ່ວມໃນການມົ້ວສຸມລັບ. ພວກເຂົາຖືກຈູງໃຈໂດຍຄວາມປາດຖະໜາທີ່ຈະມີອຳນາດ ແລະ ຄວາມຮັ່ງມີ. ນອກເໜືອໄປຈາກການມົ້ວສຸມລັບທີ່ບັນຍາຍຢູ່ໃນ ອີເທີ 8:7–18, ຕົວຢ່າງອື່ນໆກໍມີຢູ່ໃນ ຮີລາມັນ 1:9–12; 2:2–11; 6:16–30; ແລະ ໂມເຊ 5:29–33. ໃນ ອີເທີ 8:18–26, ໂມໂຣໄນໄດ້ບັນຍາຍຜົນສະທ້ອນຂອງການມົ້ວສຸມລັບ (ເບິ່ງ ອີເທີ 9:4–12 ນຳອີກ) ແລະ ເຕືອນເຮົາບໍ່ໃຫ້ສະໜັບສະໜູນມັນ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຂະນະທີ່ທ່ານອ່ານພຣະຄຳພີກັບຄອບຄົວຂອງທ່ານ, ພຣະວິນຍານສາມາດຊ່ວຍທ່ານໃຫ້ຮູ້ຈັກວ່າ ຫລັກທຳຂໍ້ໃດທີ່ຄວນເນັ້ນ ແລະ ຄວນສົນທະນາ ເພື່ອສະໜອງຄວາມຕ້ອງການຂອງຄອບຄົວຂອງທ່ານ. ຕໍ່ໄປນີ້ແມ່ນແນວຄິດບາງຢ່າງ.

ອີເທີ 6:2–12

ຄອບຄົວຂອງທ່ານຈະມ່ວນຊື່ນກັບການສະແດງຕາມເລື່ອງການເດີນທາງຂອງຊາວຢາເຣັດໄປຫາແຜ່ນດິນແຫ່ງຄຳສັນຍາບໍ? ບາງທີພວກທ່ານສາມາດໃຊ້ຫ້ອງມືດເປັນເຮືອ ແລະ ໃຊ້ໄຟສາຍເປັນຕົວແທນໃຫ້ແກ່ກ້ອນຫີນທີ່ຮຸ່ງເຫລື້ອມ. ພວກທ່ານສາມາດເວົ້າລົມກັນກ່ຽວກັບສັດທາທີ່ຊາວຢາເຣັດໄດ້ສະແດງໃນພຣະຜູ້ເປັນເຈົ້າ ໂດຍການເຂົ້າໄປໃນເຮືອ, ເຖິງແມ່ນບໍ່ຮູ້ວ່າ ພວກເຂົາຈະ “ຖືກຝັງຢູ່ໃນຄວາມເລິກຂອງທະເລ” ຫລືບໍ່ (ອີເທີ 6:6). ຫລັງຈາກການອ່ານ ຂໍ້ທີ 9, ສະມາຊິກໃນຄອບຄົວສາມາດແບ່ງປັນເພງສວດກ່ຽວກັບການສັນລະເສີນທີ່ຕົນມັກ ແລະ ຮ້ອງມັນນຳກັນ. ບ້ານເຮືອນຂອງເຮົາສາມາດປຽບທຽບໃສ່ກັບເຮືອຂອງຊາວຢາເຣັດແນວໃດ? ແຜ່ນດິນແຫ່ງຄຳສັນຍາບ່ອນໃດທີ່ພຣະຜູ້ເປັນເຈົ້າກຳລັງນຳພາຄອບຄົວຂອງເຮົາໄປຫາ?

ອີເທີ 6:22–23

ຕະຫລອດອາທິດນີ້, ຄອບຄົວຂອງທ່ານສາມາດຊອມເບິ່ງວິທີທີ່ຄຳທຳນາຍຂອງນ້ອງຊາຍຂອງຢາເຣັດກ່ຽວກັບຄວາມເປັນທາດໄດ້ເກີດເປັນຈິງແນວໃດ. ຜູ້ນຳຂອງສາດສະໜາຈັກໄດ້ເຕືອນເຮົາແນວໃດແດ່? ການບໍ່ເອົາໃຈໃສ່ຕໍ່ຄຳເຕືອນຂອງພວກເພິ່ນຈະພາໄປສູ່ຄວາມເປັນທາດແນວໃດ?

ອີເທີ 8:23–26

ອີງຕາມຂໍ້ເຫລົ່ານີ້, ເປັນຫຍັງໂມໂຣໄນຈຶ່ງຖືກບັນຊາໃຫ້ຂຽນ “ສິ່ງເຫລົ່ານີ້” ກ່ຽວກັບການມົ້ວສຸມລັບ? (ອີເທີ 8:23). ເຮົາຮຽນຮູ້ຫຍັງແດ່ຈາກໜັງສືອີເທີ ທີ່ສາມາດຊ່ວຍເຮົາໃຫ້ໄດ້ຮັບພອນທີ່ບັນຍາຍຢູ່ໃນ ຂໍ້ທີ 26?

ອີເທີ 9:11

ຄວາມປາດຖະໜາຂອງເຮົາມີຜົນກະທົບຕໍ່ການເລືອກຂອງເຮົາແນວໃດ? ເຮົາສາມາດເຮັດຫຍັງໄດ້ແດ່ເປັນຄອບຄົວ ເພື່ອໃຫ້ແນ່ໃຈວ່າ ເຮົາປາດຖະໜາສິ່ງທີ່ເປັນຂອງພຣະເຈົ້າ?

ອີເທີ 11:8

ເພື່ອຮຽນຮູ້ກ່ຽວກັບຄວາມເມດຕາຂອງພຣະຜູ້ເປັນເຈົ້າຕໍ່ຜູ້ທີ່ກັບໃຈ, ພວກທ່ານສາມາດອ່ານ ໂມໄຊຢາ 26:29–30; 29:18–20; ແອວມາ 34:14–16; ຫລື ໂມໂຣໄນ 6:8. ບາງທີສະມາຊິກໃນຄອບຄົວສາມາດແບ່ງປັນຕົວຢ່າງກ່ຽວກັບຄວາມເມດຕາຂອງພຣະເຈົ້າຈາກພຣະຄຳພີ ຫລື ຈາກຊີວິດຂອງເຂົາເຈົ້າເອງ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ການປັບປຸງການສຶກສາສ່ວນຕົວ

ກະທຳຕາມສິ່ງທີ່ທ່ານຮຽນຮູ້. ການຮຽນຮູ້ພຣະກິດຕິຄຸນແມ່ນເກີນກວ່າພຽງແຕ່ອ່ານ ແລະ ໄຕ່ຕອງເທົ່ານັ້ນ. ສ່ວນຫລາຍເຮົາຮຽນຮູ້ຫລາຍທີ່ສຸດ ໂດຍການກະທຳຕາມຄວາມຈິງໃນພຣະຄຳພີ (ເບິ່ງ ໂຢຮັນ 7:17). ພວກທ່ານຈະເຮັດສິ່ງໃດເພື່ອນຳໃຊ້ສິ່ງທີ່ພວກທ່ານອ່ານຢູ່ໃນ ອີເທີ 6–11?