Stap Tijim Ol Yang Pikinini

Sapos yu gat ol yang pikinini insaed long famli blong yu, hemia samfala aktiviti we i save helpem olgeta blong lanem samting:

• Singsing. Hymns mo ol singsing insaed long Children’s Songbook mo Singsing Tabu mo Singsing blong Ol Pikinini, oli tijim doktrin wetem paoa. Yusum topics index (indeks blong ol topik) long en blong buk ia, Children’s Songbook blong faenem ol singsing we oli go wetem ol prinsipol blong gospel we yu stap tijim. Helpem ol pikinini blong yu blong luk olsem wanem ol singsing ia oli go wetem wanem i stap hapen insaed long laef blong olgeta. Eksampol. Yu save askem abaot ol toktok, o ol sentens insaed long ol toktok blong singsing ia. Antap long singsing, ol pikinini blong yu oli save mekem ol aksen we oli go wetem ol singsing, o lisin long ol singsing olsem bakgraon miusik long semtaem we oli stap mekem sam nara aktiviti.

• Lisin, o aktem wan stori. Ol yang pikinini oli lavem tumas ol stori—blong ol skripja, blong laef blong yu, blong histri blong Jos, o ol stori we oli stap long ol magasin blong Jos. Lukaotem sam wei blong yusum olgeta blong talem stori. Oli save holem ol pikja, o sam samting; oli save dro ol pikja blong wanem oli stap harem, oli save aktem stori, o iven help blong talem stori. Helpem ol pikinini blong yu blong luksave ol trutok blong gospel insaed long ol stori we yu stap serem.

• Ridim wan skripja. Ol yang pikinini, maet oli no save rid tumas, be yu save yusum olgeta blong lanem samting aot long ol skripja. Yu save lukluk nomo long wan ves ia nomo, wan ki sentens, o ki toktok. Maet bae oli save lanem ol sot sentens we i kamaot long ol skripja baehat, sapos oli stap ripitim olgeta plante taem. Taem oli stap harem toktok blong God, bae oli filim Spirit.

• Luk long wan pikja o lukluk wan vidio. Taem yu soem wan pikja o vidio long ol pikinini blong yu we i go wetem wan prinsipol blong gospel, o wan skripja stori, askem ol kwestin we i stap helpem olgeta blong lanem samting aot long wanem oli stap luk. Eksampol. Yu save askem: “?Wanem i stap hapen long pikja ia o long vidio ia? ?I mekem yu harem olsem wanem? Gospel Laebri ap, medialibrary.ChurchofJesusChrist.org, mo children.ChurchofJesusChrist.org, oli ol gudfala ples blong lukaotem ol pikja mo ol vidio.

• Krietem samting. Ol pikinini oli save bildim samting, droem, o kalarem samting we i go wetem stori o prinsipol we oli stap lanem.

• Tekpat long ol lesen we oli yusum samting long hem. Wan simpol lesen we i yusum samting i save helpem ol pikinini blong yu blong i andastanem wan prinsipol blong gospel we i had blong andastanem. Taem yu stap yusum ol lesen we oli yusum samting, faenem ol wei blong letem ol pikinini blong yu oli tekpat. Bambae oli lanem moa aot long wan eksperiens we oli tekpat long hem, bitim wan we oli jes stap lukluk nomo wan samting.

• Rolplei Taem ol pikinini oli rolplei long wan situesen we bae oli save fesem long ril laef, bae oli save andastanem moa olsem wanem blong yusum wan gospel prinsipol long laef blong olgeta.

• Ripitim ol aktiviti Ol yang pikinini oli nidim blong harem sam tingting plante taem blong save andastanem olgeta. Yu no fraet blong ripitim ol stori ia, o ol aktiviti ia, plante taem. Eksampol. Maet bae yu serem wan skripja stori plante taem long plante defren wei—olsem ridim stori aot long ol skripja, blong talem sot long toktok blong yuwan, soem wan vidio, letem ol pikinini oli help blong talem stori, invaetem olgeta blong aktem wan stori, mo sam narafala moa.