Stap Yusum Kam Folem Mi—Blong Wanwan Man, Woman mo Famli

?Buk Ia Hem I blong Huia?

Buk ia i blong wanwan man, woman mo famli insaed long Jos. Oli raetem blong helpem yumi lanem gospel i gud moa—yumiwan, o wetem famli blong yumi. Sapos yu no bin stap stadi long gospel oltaem bifo, buk ia i save helpem yu blong statem. Sapos yu gat finis wan gudfala evri dei fasin blong stadi long gospel, buk ia i save helpem yu blong gat ol eksperiens we oli gat moa mining.

?Olsem Wanem Mi Save Yusum Buk Ia?

Yusum buk ia long eni wei we i save helpem yu. Maet bae yu faenem i isi olsem wan gaed o wan help blong mekem skripja stadi blong yuwan mo wetem famli. Yu save yusum hemia tu long famli haos naet. Ol aotlaen oli haelaetem ol impoten prinsipol we oli stap long Buk blong Momon; hem i givim sam stadi aedia mo aktiviti blong wanwan man, woman mo famli, mo i givim wan ples we yu save raetemdaon ol filing blong yu long hem.

Maet yu mo famli blong yu, i stap stadi gospel oltaem finis. Eksampol. Maet yu stap ridim ol skripja we oli no Buk blong Momon blong wan seminari o institiut klas. Kam Folem Mi—Blong Wanwan Man, Woman mo Famli, oli no minim blong riplesem o kompit wetem ol gudfala samting we yu stap mekem. Bae i gat ol wei blong lanem samting aot long Buk blong Momon oltaem oltaem, mo stil mekem wanem yu nidim blong mekem wetem ol nara gol blong skripja stadi. Eksampol, yu save ridim wan buk blong skripja blong skripja stadi blong yuwan mo ridim Buk blong Momon wetem famli blong yu (o nara wei raon). Folem spirit blong i gaedem yu blong luksave olsem wanem yu save mekem stadi blong yuwan long toktok blong God.

?Olsem Wanem Nao Buk Ia I Go Wetem Wanem I Stap Hapen long Jos?

Ol aotlaen blong buk ia, oli oganaesem folem wan riding taemtebol blong wik. Kam Folem Mi—Blong Praemeri mo Kam Folem Mi—Blong Sandei Skul oli stap folem semfala taemtebol. Blong sapotem ol hadwok blong yu blong lanem mo laef folem gospel ia insaed long hom blong yu, ol tija blong yu, long Jos, bae oli givim janis long yu blong save serem ol eksperiens, ol tingting, mo ol kwestin blong yu abaot ol skripja we yu bin stap stadi long hem long hom.

From se oli stap tijim Sandei Skul tu taem nomo long wan manis, bae ol tija blong Sandei Skul oli save jusum blong skipim wan lesen, o blong joenem tu aotlaen blong save folem gud wik taemtebol we i stap. Yu mas fil fri blong stretem ol taemtebol blong yu taem i no gat ol nomol miting blong Jos long Sandei. Eksampol, taem i gat wod o stek konfrens, o taem i gat tempol dedikesen. Long ol wik ia we i gat ol nara samting, mifala i stap invaetem yufala blong gohed blong stadi long Buk blong Momon long hom.

?Mi Mi Nidim blong Folem Taemtebol Ia?

Taemtebol ia bambae i helpem yu blong ridim finisim Buk blong Momon taem i stap kam long en blong yia. Antap long hemia, taem yu stap folem sem taemtebol olsem ol narawan long wod blong yu, bae i save lidim yu blong gat ol eksperiens we oli gat mining long Jos. Yu no mas filim se taemtebol ia i fosem yu; hem i wan gaed blong helpem yu blong kipim spid blong yu. Impoten samting i we yu stap lanem gospel yuwan mo wetem famli.