Ol Promes blong Profet

Taem yu stap stadi long Buk blong Momon, bae hemia i jenisim yu. Bae i jenisim famli blong yu. Ol profet blong ol lata-dei oli bin mekem ol promes abaot paoa blong Buk blong Momon stat long taem we oli putumbak Jos blong Jisas Kraes blong Ol Lata-dei Sent long wol ia. Tingting hevi long ol toktok ia, mo luklukbak long olgeta oltaem. ?Wijwan long ol blesing ia nao yu wantem blong kasem? Taem yu stap ridim Buk blong Momon, tingting blong raetemdaon mo serem wetem ol narafalawan, olsem wanem olgeta promes ia oli kamtru insaed long laef blong yu.

Profet Josef Smit:“Mi bin talem long ol brata se Buk blong Momon i moa stret long eni narafala buk long wol, mo i ki ston blong relijin blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk” (Teachings of Presidents of the Church: Joseph Smith [2007], 64).

Presiden Esra Taf Benson: “I no se Buk blong Momon i stap tijim yumi trutok, nomata hem i mekem hemia nao. I no se Buk blong Momon i stap testifae abaot Kraes, nomata hem i mekem hemia tu. Be i gat wan moa samting. I gat wan paoa insaed long buk ia we bae i stat blong ron i kam insaed long laef blong yu stat long taem we yu tinghevi blong stadi long buk ia. Bae yu faenem bigfala paoa blong no foldaon long temtesen. Bae yu faenem paoa blong stap longwe long ol samting we bae i mekem yu harem nogud. Bae yu faenem paoa blong stap long rod ia we i stret mo i no isi. Oli stap singaotem ol skripja, ‘ol toktok blong laef’ (D&K 84:85) mo i no gat wan buk we hemia i tru be wetem Buk blong Momon nomo. Taem yu stat blong hanggri, mo tosta from ol toktok ia, bae yu faenem laef i kam moa gud” (Teachings of Presidents of the Church: Ezra Taft Benson [2014], 141).

Presiden Gordon B. Hinckley: “Ol brata mo sista. I no gat samting i holemtaet mi blong promesem yufala se, sapos yu ridim Buk blong Momon wetem prea, i nomata hamas taem yufala i bin ridim buk ia bifo, bae insaed long hat blong yufala, bae i gat wan moa mak blong Spirit blong Lod i kam antap long wanem i stap. Bae yufala i gat wan moa strong tingting blong wokbaot wetem fasin blong stap obei long ol komanmen blong Hem, mo bae yufala i gat wan moa strong testemoni se, i tru, Pikinini blong God i stap laef mo i ril” (Teachings of Presidents of the Church: Gordon B. Hinckley [2016], 233).

Presiden Russell M. Nelson: “Ol dia brata mo sista blong mi. Mi promesem yufala se taem yufala i stap stadi long Buk blong Momon wetem prea, evri dei, bambae yufala i save mekem ol moa gud desisen—evri dei. Mi promesem yufala se taem yufala i stap tingting hevi long wanem yu stap stadi long Buk blong Momon, bambae ol windo blong heven oli open, mo bae yu kasem ol ansa blong kwestin blong yu, mo bae Hem i soem rod blong laef blong yu. Mi promes se, taem we, evri dei, yu draonem yuwan long Buk blong Momon, bae yu gat proteksen long ol ivel blong tedei, iven strong fos blong ponografi, mo ol nara adiksen we i mekem maen i nomo wok.” (“Buk blong Momon:?Bae Laef blong Yu I Olsem Wanem Sapos Yu No Gat Buk Ia?” Ensign o Liahona, Nov. 2017, https://www.ChurchofJesusChrist.org/general-conference/2017/10/the-book-of-mormon-what-would-your-life-be-like-without-it?lang=bis).