famli we i stap stadi long skripja

Sam Aedia blong Kam Antap long Famli Skripja Stadi

Famli skripja stadi i wan wei we i gat moa paoa blong helpem famli blong yu blong lanem gospel. Hamas japta mo hamas minit yu stap rid olsem wan famli i no impoten, be wanem i impoten, i we yu stap mekem oltaem. Taem yu mekem skripja stadi i kam wan impoten pat blong famli laef blong yu, bae yu stap helpem ol memba blong famli blong yu blong kam kolosap moa long Jisas Kraes mo yu stap helpem olgeta blong bildimap testemoni blong olgeta antap long fandesen we i toktok blong Hem.

Tingting long olgeta kwestin ia:

• ?Olsem wanem nao yu save leftemap tingting blong ol memba blong famli blong stadi long ol skripja olgetawan?

• ?Wanem nao yu save mekem blong leftemap tingting blong ol memba blong famli blong oli serem wanem we oli stap lanem?

• ?Olsem wanem nao yu save tokbaot moa ol prinsipol we yu stap lanem insaed long Buk blong Momon long evri dei, taem yu gat wan taem blong tij?

Tingbaot se hom i nambawan ples blong lanem gospel. Yu save lanem mo tijim gospel long hom long sam wei we i no posibol blong mekem insaed long wan klas long Jos. Yusum tingting blong yu blong krietem wan wei we yu save helpem famli blong yu blong lanem samting aot long ol skripja. Tingting long sam long ol aedia ia blong mekem famli skripja stadi blong yu i kam gud moa.

Yusum Miusik

Singsing ol singsing we oli kam sapotem ol prinsipol we oli stap tijim insaed long ol skripja. Apendiks E long buk ia, i gat ol miusik we oli go wetem ol doktrin long wanwan aotlaen blong wik.

wan man mo wan gel i stap stadi skripja

Serem Ol Skripja we Oli Gat Mining

Givim taem long ol memba blong famli blong oli serem ol ples long ol skripja, we oli bin stadi olgetawan, we oli faenem se i gat mining long olgeta.

Yusum Toktok blong Yuwan

Invaetem ol memba blong famli blong yusum toktok blong olgetawan, mo talemsot wanem oli lanem aot long ol skripja we yufala i stap stadi long olgeta.

Yusum Ol Skripja Ia long Laef blong Yu

Afta we yu ridim wan skripja, askem ol memba blong famli blong serem ol wei we skripja ia i go wetem laef blong olgeta.

Askem Wan Kwestin

Invaetem ol memba blong famli blong askem wan kwestin blong gospel, mo afta, spendem taem blong lukaotem ol ves we i gat ansa long kwestin ia.

Hangem Wan Skripja

Jusum wan ves we yu luk se i gat mining long yu, mo raetem mo hangem long wan ples we ol memba blong famli bae oli luk plante taem. Invaetem ol nara memba blong famli blong oli gat wanwan taem blong jusum wan skripja blong hangem.

Mekem Wan Lis blong Ol Skripja

Olsem wan famli, jusum plante defren ves we bae yu wantem toktok raon long hem long wik ia.

Lanem Ol Skripja Baehat

Jusum wan skripja we i gat mining long famli blong yu, mo invaetem ol memba blong famli blong lanem skripja ia baehat; yufala i mekem hemia taem yufala i ripitim skripja ia evri dei, o taem yufala i stap plei wan memori gem.

Ol Lesen we Oli Yusum Samting long Hem

Faenem sam samting we i go wetem ol japta mo ol ves we yufala i stap ridim olsem wan famli. Invaetem ol memba blong famli blong tokbaot olsem wanem wanwan samting we yu karem, i go wetem ol tijing insaed long ol skripja.

Jusum Wan Topik

Bae ol memba blong famli oli gat wanwan taem blong jusum wan topik we famli bae i stadi long hem tugeta. Yusum Topical Guide, o Bible Dictionary, o Gaed long Ol Skripja (scriptures.ChurchofJesusChrist.org) blong faenem skripja we i go wetem topik.

Droem Wan Pikja

Ridim sam ves olsem wan famli, mo afta, givim taem blong ol memba blong famli oli droem wan samting we i go wetem wanem yufala i stap ridim. Spenem taem blong toktok raon long wanwan droing.

Aktem Wan Stori

Afta we yu stap ridim wan stori, invaetem ol memba blong famli blong oli aktem stori ia. Afta long hemia, tokbaot olsem wanem stori i go wetem wanem wanwan i stap gotru long hem hemwan, mo wetem wanem yufala i stap gotru long hem olsem wan famli.

Elda Deved A. Bedna i talem: “Evri famli prea, evri taem blong skripja stadi, mo evri famli haos naet i olsem taem yu pentem wan mak long kaliko blong sol blong yu. Smol taem ia we yu pentem mak ia, bae i no naes tumas, o bae yu no tingbaot. Be semmak olsem yelo mo gol peint i kam komplitim tufala, mo mekem wan naesfala peinting, taem yumi mekem oltaem ol smol samting, i save lidim yumi long ol bigfala risal long saed blong spirit” (“More Diligent and Concerned at Home,” Ensign o Liahona, Nov. 2009, 19–20).