Sam Aedia blong Kam Antap long Skripja Stadi blong Yuwan

Hemia sam simpol wei blong kam antap long stadi blong yu long toktok blong God we i stap long ol skripja.

Lukaotem Ol Trutok abaot Jisas Kraes

Ol skripja oli tijim yumi se evri samting i stap testifae abaot Kraes (luk long 2 Nifae 11:4; Moses 6:63), so i gud blong lukaotem Hem insaed long samting we oli bin hapen, long ol stori mo ol tijing insaed long Buk blong Momon. Tingting blong notem daon, o makem olgeta ves we oli stap tij abaot Sevya mo olsem wanem blong folem Hem.

Lukaotem Ol Toktok mo Ol Sentens we Oli Givim Insperesen

Maet bae yu faenem se samfala toktok mo sentens insaed long ol skripja oli mekem yu sapraes, olsem se oli raetem ia nao blong yu. Maet bae yuwan yu filim se i stret long yu mo i givim insperesen mo i pusum yu blong mekem samting. Tingting blong makem olgeta insaed long skripja blong yu, o raetemdaon ol samting ia long stadi jenol blong yu.

Lukaotem Ol Trutok blong Gospel

Samtaem ol trutok blong gospel (plante taem yumi singaotem doktrin o prinsipol), oli talemaot klia, mo samtaem oli kamkamaot tru long wan eksampol o wan stori. Askem yuwan: “?Wanem trutok we i no save finis nao oli stap tijim insaed long ol ves ia?”

Lisin long Spirit

Luklukgud long ol tingting mo filing blong yu, iven sapos yu luk se oli no go wetem wanem we yu stap ridim. Olgeta tingting mo filing ia, maet oli ol stret samting ia we Papa blong yu long Heven i wantem yu blong lanem.

Yusum Ol Skripja Ia long Laef blong Yu

Tingting long hao nao ol stori mo ol tijing blong ol skripja, oli go stret wetem laef blong yu. Eksampol. Yu save askem yuwan: “?Wanem eksperiens nao mi bin gat we oli semmak long wanem mi stap ridim?” o “?Olsem wanem nao mi save folem eksampol blong man o woman ia insaed long ol skripja?”

Askem Ol Kwestin Taem Yu Stap Stadi I Go

Taem yu stap stadi long ol skripja, bae i gat sam kwestin i kam long maen blong yu. Olgeta kwestin ia, maet oli go wetem wanem yu stap ridim, o i go wetem laef blong yu. Tingting hevi long ol kwestin ia mo lukaotem ol ansa taem yu stap gohed blong ridim ol skripja.

Yusum Ol Skripja Stadi Help Tul

Blong gat moa tingting long ol ves we yu stap ridim, yusum ol futnot, Topical Guide, Bible Dictionary, Gaed long Ol Skripja (scriptures.ChurchofJesusChrist.org), mo ol nara stadi help tul.

Tingting long Taem we Ol Samting oli Hapen insaed long Ol Skripja

Yu save faenem sam niu tingting we i gat mining abaot wan skripja taem yu tekem situesen blong wan taem we samting ia i hapen—we oli tokbaot insaed long skripja. Eksampol. Blong save bakgraon mo ol bilif blong ol pipol we wan profet i toktok long olgeta, i save mekem yu andastanem moa tingting biaen long ol toktok blong profet ia.

Raetemdaon Ol Tingting mo Filing blong Yu

I gat plante wei blong raetemdaon ol filing we yu kasem taem yu stap stadi. Eksampol. Yu save makem wan toktok, o sentens we i gat mining long yu, mo raetemdaon ol tingting blong yu olsem wan not insaed long ol skripja blong yu. Mo tu, yu save kipim wan jenol we yu raetem ol niu tingting, ol filing, mo ol samting we i kam long maen blong yu.

Stadi long Ol Toktok blong Ol Lata-dei Profet mo Aposol

Ridim wanem ol lata-dei profet mo aposol oli bin tijim abaot ol prinsipol we yu faenem insaed long ol skripja (eksampol, yu save luk long www.ChurchofJesusChrist.org/general-conference/conferences?lang=bis mo insaed long ol magasin blong Jos).

Serem Sam Niu Tingting

Blong toktok raon long ol niu tingting blong yu we yu bin gat aot long stadi blong yuwan, i no wan gud wei nomo blong tijim ol narawan, be tu, i wan wei blong help blong mekem andastaning blong yu i kam strong moa long wanem yu bin ridim.

Laef Folem Wanem Yu Stap Lanem

Skripja stadi bae i givim insperesen long yumi, be tu, bae i lidim yumi blong jenisim wei we yumi stap laef long hem. Lisin long wanem Spirit i talem long yu blong mekem taem yu stap rid, mo afta, mekem komitmen blong tekem aksen folem ol kwaet toktok ia.

Presiden Russel M. Nelson i talem: “From samting ia, sapos yufala i gohed strong, kakae gud long toktok blong Kraes, mo stap strong kasem en, … Bae yufala i kasem laef we i no save finis” [2 Nifae 31:20].

“Blong kakae gud, i moa bitim blong testem. Blong kakae gud i minim blong laekem blong kakae. Yumi laekem blong kakae ol skripja taem yumi stadi long olgeta wetem wan spirit we i glad blong faenem niu samting, mo wetem spirit blong stap fetful blong obei. Taem yumi kakae gud long ol toktok blong Kraes, nao yumi ‘raetem long tingting blong [yumi]’ [2 Korin 3:3]. Oli kam pat fulwan blong fasin blong yumi” (“Living by Scriptural Guidance,” Ensign, Nov. 2000, 17).