baam̧le eo ej ekkatak jeje ko rekwojarjar

Ļōmņak ko n̄an Kōkm̧anm̧anļo̧k Ekkatak Jeje Ko Rekwojarjar an Baam̧le eo Am̧

Iien ekkatak jeje ko rekwojarjar an baam̧le ej juon wāween ekajoor n̄an jipan̄ baam̧le eo am̧ katak gospel eo. Ewi jon̄an im ewi aitokan am̧ riit āinwōt juon baam̧le ejjab juon men aorōk āinwōt an jab bōjrak ilo kijejeto ko am̧. Ilo am̧ kōm̧m̧an bwe ekkatak jeje ko rekwojarjar juon m̧ōttan mour eo an baam̧le eo am̧ eaorōk, kwonaaj jipan̄ ro uwaan baam̧le eo am̧ epaakeļo̧k Jisōs Kraist im kalōk naan in kam̧ool ko aer ioon pedped in naan eo An.

Ļōmņak kōn kajjitōk kein:

• Ekōjkan am̧ kōketak ro uwaan baam̧le eo am̧ n̄an ekkatak jeje ko rekwojarjar kōn er make?

• Ta eo komaron̄ kōm̧m̧ane n̄an kōketak ro uwaan baam̧le eo am̧ n̄an kwaļo̧k ta eo rej ekkatak?

• Ekōjkan am̧ maron̄ kōmejajaik pedped in katak ko kwoj ekkatak ilo Bok in Mormon ilo iien katakin ko aolep raan?

Keememej bwe m̧weo ej jikin eo em̧m̧an n̄an ekkatak gospel eo. Komaron̄ ekkatak im katain gospel eo ilo m̧weo ilo wāween ko me rejjab maron̄ kōm̧m̧an ilo juon kūlaj. Kwon im̧we n̄e kwoj ļōmņak kōn wāween ko n̄an jipan̄ baam̧le eo am̧ katak jān jeje ko rekwojarjar. Ļōmņak kōn jet iaan ļōmņak kein n̄an kōkm̧anm̧anļo̧k ekkatak jeje ko rekwojarjar an baam̧le eo am̧.

Kōjerbal Al

Al al ko me rej kōkajoorļo̧k pedped in katak ko kar katakin ilo jeje ko rekwojarjar. Appendix D ilo kein jipan̄ in ekoba al ko reiookļo̧k katak ko ilo kajjojo unin tōl wiik otemjeļo̧k.

juon em̧m̧aan im juon leddik rej ekkatak jeje ko rekwojarjar

Kwaļo̧k Jeje Ko Rekwojarjar Reļļap Meļeļeier

Leļo̧k n̄an ro uwaan baam̧le eo eiien n̄an kwaļo̧k eoon in jeje ko rekwojarjar me raar loi eļap meļeļeier ilo iien ekkatak jeje ko rekwojarjar aer make.

Kōjerbal Naan ko Am̧ Make

Kūr ro uwaan baam̧le eo n̄an ba ilo tukadu in ilo naan ko aer make ta eo rej ekkatak jān jeje ko rekwojarjar rej ekkatak.

Kōjerbale Jeje ko Rekwojarjar n̄an Mour eo Am̧

Ālkin riiti juon eoon in jeje ko rekwojarjar, kajjitōk ippān ro uwaan baam̧le eo n̄an kwaļo̧k wāween ko eoon eo ej jerbal n̄an mour ko aer.

Kajjitōk juon Kajjitōk

Kūr ro uwaan baam̧le eo n̄an kajjitōk juon kajjtōk kōn gospel eo, innām joļo̧k iien kappukōt eoon ko me remaron̄ jipan̄ uwaake kajjitōk eo.

Kwaļo̧k juon Jeje Ko Rekwojarjar

Kāālet juon eoon kwoj lo eļap meļeļe in, im likūt ijo ro uwaan baam̧le eo naaj emakijkij aer loe. Kūr ro jet uwaan baam̧le eo n̄an bōk iien kāālet juon eoon n̄an kwaļo̧ke.

Kōm̧m̧ane juon Laajrak in Jeje Ko Rekwojarjar

Āinwōt juon baam̧le, kāālet jet eoon ko me kwoj kōņaan ekōnono kaki ilo wiik eo ej itok.

Kakilōklōk Jeje Ko Rekwojarjar

Kāālet juon eoon in jeje ko rekwojarjar me eļap meļeļein n̄an baam̧le eo am̧, im kūr ro uwaan baam̧le eo n̄an kakilōklōk e jān āliji raan otemjej ak kōm̧m̧ane juon ikkure in kakilōklōke.

Kwaļo̧k Mennin Katak ko

Pukōt men ko me rej iookļo̧k jepta ko im eoon ko me kwoj riit kaki āinwōt baam̧le. Kūr ro uwaan baam̧le eo n̄an kōnono kōn ekōjkan an kajjojo men ko reiookļo̧k katakin ko ilo eoon ko.

Kāālet juon Unin Kōnono

Kōm̧m̧an bwe ro uwaan baam̧le eo ren bōk iien kāālet juon unin kōnono me baam̧le eo enaaj ekkatak kake ippān doon. Kōjerbal Topical Guide, Bible Dictionary eo, ak Unin Tōl eo n̄an Jeje Ko Rekwōjarjar (scriptures.ChurchofJesusChrist.org) n̄an pukōt eoon ko an jeje ko rekwojarjar kōn unin kōnono eo.

Jin̄aik juon Pija

Riiti jet eoon ko āinwōt juon baam̧le, innām leļo̧k iien n̄an ro uwaan baam̧le n̄an jin̄aik juon men me eiookļo̧k ta eo kom̧ij riiti. Joļo̧k iien ekōnono kōn jin̄a ko an doon.

Ikkure Kōn Bwebwenato eo

Ālkin riiti juon bwebwenato, kūr ro uwaan baam̧le eo n̄an ikkure kake. Ālkin wōt, kōnono kōn ekōjkan an bwebwenato eo iookļo̧k men ko me kom̧ij en̄jaki āinwōt juon baam̧le.

Elder David A. Bednar: “Kajjojo jar an baamle, kajjojo pijan an baamle ekkatak jeje ko rekwōjarjar, im kajjojo nokon in jota an baam̧le ej juon jipan̄ kōn wōn kōj. Ejjeļo̧k juon emaroñ alikar an lukkuun bwilōñ ak ememlokjen. Ak āinwōt ilo an ialo im gold im būro̧un annañin uno ko kaibojooj doon im kwaļo̧k juon jerbal elikio eaibojooj, im jej wōnm̧aanļo̧k wōt ñan kōm̧m̧ane men eo edik emaroñ tōl ļo̧k ñan juon jetōb em̧m̧an āliktata” (“More Diligent and Concerned at Home,” Ensign ak Liahona, Nob. 2009, 19–20).