Kallim̧ur ko Kanaan Kaki

Ekkatak Bok in Mormon enaaj ukōt eok. Enaaj ukōt baam̧le eo am̧. Rikanaan ro ilo raan-ko āliktata emōj aer kōm̧m̧ani kallim̧ur ko kōn kajoor eo an Bok in Mormon jān ke Kabun̄ eo an Jisōs Kraist im Armej ro Rekwōjarjar ilo Raan ko Āliktata eaar bar jepļaaktok. Kejōkļo̧kjeņ kōn enaan kein, im etali aolep iien. Ewi wōt kallim̧ur kein kwoj kōņaan būki? Ilo am̧ riiti Bok in Mormon, ļōmņak in je im kwaļo̧k ippān ro jet ekōjkan an kallim̧ur kein rej kūrm̧ool ilo mour eo am̧.

Rikanaan Josep Smith: “Iaar jiron̄ em̧m̧aan ro jeiū im jatū bwe Bok in Mormon eaar bok eo ejim̧we tata jān bok otemjej ioon laļ, im bwe ej dekā in jabōn em̧ n̄an tōmak in ad, im juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet” (Teachings of Presidents of the Church: Joseph Smith [2007], 64).

Būreejtōn Ezra Taft Benson: “Ejjab wōt Bok in Mormon eo ej katakin kōj m̧ool eo, ijo wōt ke ej ilo m̧ool ej kōm̧m̧ane. Ejjab wōt bwe Bok in Mormon ej kwaļo̧k kam̧ool kōn Kraist, ijo wōt ke ej ilo m̧ool kōm̧m̧an menin barāinwōt. Bōtaab ewōr juon men eļapļo̧k. Ewōr juon kajoor ilo bok eo enaaj jino iwōj n̄an mour ko ami iien eo kwoj jino m̧ool in katak jen bok eo. Kom̧ naaj lo eļapļo̧k kajoor n̄an jum̧ae kapo. Kom̧ naaj lo eļapļo̧k kajoor n̄an kōjekdo̧o̧n m̧on. Kom̧ naaj lo kajoor eo n̄an pād wōt ilo iaļ in erānin̄ im eaidik. Jeje ko rekwojarjar rej ņa etan ‘naan ko in mour’ (KB 84:85), im ejjeļo̧k jikin me eļapļo̧k m̧ool jān ilo Bok in Mormon. N̄e kwoj jino kole im maro ālkin naan kein, kwonaaj lo mour ilo eļapļo̧k im eļapļo̧k jeraam̧m̧an” (Teachings of Presidents of the Church: Ezra Taft Benson [2014], 141).

Būreejtōn Gordon B. Hinckley: “Ro jeiū im jatū, kōn ejjeļo̧k pere ij kallim̧uri kom̧ bwe eļan̄n̄e kom̧ naaj jar ilo riiti Bok in Mormon, jekdo̧o̧n jete kōttan ami kar riiti im̧aanļo̧k, enaaj itok n̄an būruwōmi juon jon̄an eļapļo̧k kōn Jetōb eo an Irooj. Enaaj itok juon kijejeto in kōkajoorļo̧k n̄an etetal ilo pokake n̄an kien ko An, im enaaj itok juon naan in kam̧ool ekajoorļo̧k kōn m̧ool eo kōn Nejin Anij emour ” (Teachings of Presidents of the Church: Gordon B. Hinckley [2016], 233).

Būreejtōn Russell M. Nelson: “Ro jeiū im jatū, ij kallim̧ur bwe ilo ami lukkuun ekkatak Bok in Mormon eo aolep raan, kom̧ naaj kōm̧m̧ani kālet ko rem̧m̧an—aolep raan. Ij kallim̧ur bwe ilo ami kejōkļo̧kjeņ kōn ta eo kwoj ekkatak, wintō in lan̄ enaaj peļļo̧k, im kom̧ naaj bōk uwaak ko n̄an kajjitōk ko ami im tōl n̄an mour eo ami make. Ij kallim̧ur bwe ilo am̧ leļo̧k eok make aolep raan n̄an Bok in Mormon eo, kom̧ maron̄ lo kōjparok ņae men ko renana an raan kein, aaet ibebtok in pija ko retonoon im an̄ūrlep ko rej kakkure jetōb ko ad” (“Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” Ensign ak Liaona, Nob. 2017, 62–63).