“Kōjerbal Itok, Ļoor Eō—N̄an Kajjojo Armej im Baam̧le ko,” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Kōjerbal Itok, Ļoor Eō—N̄an Kajjojo Armej im Baam̧le ko,” Itok, Ļoor Eō—N̄an Kajjojo Armej im Baam̧le ko: 2020
Kōjerbal Itok, Ļoor Eō—N̄an Kajjojo Armej im Baam̧le ko
Wōn Eo Kein Jipan̄ In Ej N̄ane?
Kein jipan̄ in ej n̄an aolep kajjojo armej im baam̧ļe ilo Kabun̄ in. Kar kōm̧m̧ane n̄an jipan̄ eok ekkatak gospel eo—men̄e kōn kwe make ak ippān baam̧ļe eo am̧. Eļan̄n̄e kwoj jan̄in kar ekkatak gospel eo raan otemjej m̧oktaļo̧k, kein jipan̄ in emaron̄ jipan̄ eok ijjino. Eļan̄n̄e em̧ōj an wōr kadede am̧ juon iminene em̧m̧an kōn ekkatak gospel eo, kein jipan̄ in emaron̄ jipan̄ eok kōm̧m̧an bwe en ļapļo̧k am̧ meļeļe en̄jake ko am̧.
Ewi Wāween Aō Kōjerbal Kein Jipan̄ In?
Kōjerbal kein jipan̄ in ilo jabdewōt wāween me ejipan̄ eok. Komaron̄ loe ejipan̄ āinwōt juon unin tōl ak jipan̄ n̄an ekkatak jeje ko rekwojarjar n̄an kwe make ak baam̧le eo. Komaron̄ barāinwōt kōjerbale n̄an nokon in jota an baam̧le. Unin tōl ko rej kalikkar pedped in katak ko raorōk kar loi ilo Bok in Mormon, ļōmņak ko n̄an ekkatak im m̧akūtkūt ko elmakoti n̄an kajjojo armej im baam̧le ko, im letok jikin ko n̄an je im̧we ko am̧.
Kwe im baam̧le eo am̧ em̧ōj ami bōlen kadede ekkatak gospel eo raan otemjej. N̄an waanjon̄ak, bōlen kwoj riiti jejej ko rekwojarjar jet ijello̧kin Bok in Mormon n̄an juon kūlaj in jemenere ak institute.. Itok, Ļoor Eō—N̄an Kajjojo Armej im Baam̧le ko ejjab meļeļein n̄an bōk jikin ak jiāe ippān men ko rem̧m̧an kwoj kōm̧m̧ani. Ewōr bōlen wāween ko n̄an ekkatak jān Bok in Mormon raan otemjej im kōtōprake wōt kōttōpar ko am̧ jet n̄an ekkatak jeje ko rekwojarjar. N̄an waanjon̄ak, komaron̄ riiti juon bok in jeje ko rekwojarjar n̄an ekkatak jeje ko rekwojarjar am̧ make im riiti Bok in Mormon ippān baam̧le eo am̧ (ak jekjek eo juon). Ļoor tōl eo an Jetōb n̄an kōmlet ekōjkan am̧ kōm̧m̧ane ekkatak eo am̧ make kōn naan an Anij.
Ekōjkan an Kein Jipan̄ in Ekkejel n̄an Ta eo ej Waļo̧k ilo Kabun̄ in?
Kōllaajrak ko ilo kein jipan̄ in rej ellaajrak ekkar n̄an juon jikejuuļ in riit wiik otemjej. Itok, Ļoor Eō—N̄an Būraimere im Itok, Ļoor Eō—N̄an Jabōt Jikuuļ rej ļoor ejja jikejuuļ eo wōt. N̄an rejtake kijejeto ko am̧ n̄an ekkatak im mour kōn gospel eo ilo m̧weo, rūkaki ro am̧ ilo m̧ōn jar eo renaaj lewaj n̄an eok iien ko rem̧m̧an n̄an kwaļo̧k en̄jake ko am̧, ļōmņak ko, im kajjitōk ko kōn eoon ko an jeje ko rekwojarjar me em̧ōj am̧ kar ekkatak kaki ilo m̧weo.
Kōnke Jabōt Jikuuļ ej katakin ruo wōt alen juon allōn̄, rūkaki ro an Jabōt Jikuuļ remaron̄ kāālet n̄an kejekdoon ak kobaik unin tōl ko n̄an ekkejeļ wōt ippān jikejuuļ eo an wiik otemjej. Menin emaron̄ barāinwōt menin aikuj ilo wiik ko n̄e kweilo̧k ko an Kabun̄ in ekkā rejjab kōm̧m̧an kōnke kōn kweilo̧k an stake ak un ko jet. Ilo wiik kein kar kajjitōk ippam̧ n̄an wōnm̧aanļo̧k wōt n̄an ekkatak Bok in Mormon ilo m̧weo.
Ij ke Aikuj in Ļoor Jikejuuļ eo?
Jikejuuļ eo enaaj jipan̄ eok kadedeļo̧k riiti Bok in Mormon eo ilo jem̧ļo̧k in iiō eo. Ilo kakobaba, ļoor ejja jikejuuļ eo wōt āinwōt ro jet ilo ward eo am̧ maron̄ tōlļo̧k n̄an en̄jake ko eļap meļeļeier ilo m̧ōn jar eo. Bōtaab jab ļoor jikejuuļ eo, ej baj juon unin tōl n̄an jipan̄ eok kōm̧m̧ane jon̄an am̧ iiūm̧. Men eo eaorōk ej bwe kwoj ekkatak gospel eo kwe make im āinwōt juon baam̧le.