Ļōmņak ko n̄an Kōkm̧anm̧anļo̧k Ekkatak Jeje Ko Rekwojarjar Am̧ Make

Erkein rej jet iaan wāween ko reļam waan n̄an kōkm̧anm̧anļo̧k ekkatak eo am̧ kōn naan eo an Anij ilo jeje ko rekwojarjar.

Pukōt M̧ool ko kōn Jisōs Kraist

Jeje ko rekwojarjar rej katakin kōj aolep men ko rej kam̧ool kōn Kraist (lale 2 Nipai 11:4; Moses 6:63), kōn menin pukōt E ilo iien ko , bwebwenato ko, im katakin ko an Bok in Mormon. Ļōmņak in jet ak kakōļļeik eoon ko me rej katakin kōn Rilo̧mo̧o̧r eo im ekōjkan ad ļoor E.

Kappukōt Naan ko im Eoon ko rej Kaim̧we

Komaron̄ lo bwe jet naan ko im eoon ko ilo jeje ko rekwojarjar rej aorōk n̄an kwe, āinwōt eļan̄n̄e raar jeje n̄an kwe eļap tata. Remaron̄ in jejjet lukkuun n̄an kwe im im̧we im kōllowetak eok. Ļōmņak in kakōļļeik er ilo jeje ko rekwojarjar am̧ ak jei ilo jōnōļ in ekkatak eo am̧.

Kappukōt M̧ool ko an Gospel eo

Jet iien m̧ool ko an gospel eo (emakijkij kar ņa etan katak ak pedped in katak ko) rej kajju kwaļo̧k, im jet iien rej kwaļo̧k kōn juon waanjon̄ak ak bwebwenato. Kajjitōkin eok make, “Ta m̧ool ko indeeo rej katakin ilo eoon kein?”

Ron̄jake Jetōb eo

Leļo̧k am̧ n̄an ļōmņak ko im en̄jake ko, jekdo̧o̧n eļan̄n̄e rejjab iookwaj ta eo kwoj riiti. Im̧we kein remaron̄ in lukkuun men ko ko Jemam̧ Ilan̄ ekōņaan bwe kwon ekkatak.

Karōkitok Jeje Ko Rekwojarjar n̄an Mour eo Am̧

Ļōmņak kōn ekōjkan an bwebwenato ko im katak ko kwoj riiti jerbal n̄an mour eo am̧. N̄an waanjon̄ak, komaron̄ kajjitōkin eok make, “Ta en̄jake ko eaar wōr ippa me rej ainļo̧k wōt ta eo ij riiti?” ak “Ekōjkan aō maron̄ ļoor waanjon̄ak eo an armej in ilo jeje ko rekwojarjar?”

Kajjitōk Kajjitōk ko ilo Am̧ Ekkatak

Ilo am̧ ekkatak jeje ko rekwojarjar, kajjitōk ko remaron̄ itok n̄an ļōmņak eo am̧. Kajjitōk kein remaron̄ iookļo̧k ta eo kwoj riiti ak n̄an mour eo am̧ eļap tata. Kejekļo̧kjeņ kōn kajjitōk kein im pukōt uwaak ko ilo am̧ wōnm̧aanļo̧k im ekkatak jeje ko rekwojarjar.

Kōjerbal Jeje Ko Rekwojarjar ilo Ekkatak Ejipan̄

N̄an bōk elōn̄ļo̧k kōļmenļo̧kjeņ ko n̄an eoon ko kwoj riiti, kōjerbal footnote ko, Topical Guide eo, Bible Dictionary eo, Unin Tōl eo n̄an Jeje ko Rekwōjarjar (scriptures.ChurchofJesusChrist.org), im ekkatak ko jet ejipan̄.

Ļōmņak kōn Meļeļe eo an Jeje Ko Rekwojarjar

Komaron̄ lo kōļmenļo̧kjeņ ko eļap meļeļeier kōn juon eoon eļan̄n̄e kwoj ļōmņak kōn meļeļe eo an—jekjek ko ak jikin eo an eoon eo. N̄an waanjon̄ak, jeļā bwebwenato eo im tōmak ko an armej ro rikanaan eo eaar kōnono n̄an er emaron̄ jipan̄ eok meļeļe jibadbad eo an naan ko an.

Je Ļōmņak ko im En̄jake ko Am̧

Elōn̄ wāween ko n̄an je en̄jake ko me rej itok ilo am̧ ekkatak. N̄an waanjon̄ak, komaron̄ kakōļļeik juon naan ak eoon eļap meļeļe in im je ļōmņak ko am̧ āinwōt juon kakeememej ilo jeje ko rekwojarjar am̧. Komaron̄ barāinwōt kōjparok juon jōnōļ in kōļmenļo̧kjeņ ko, en̄jake ko, im im̧we ko kwoj būki.

Ekkatak Naan ko an Rikanaan ro im Rijilōk ro ilo Raan-ko Āliktata

Riiti ta ko rikanaan ro im rijilōk ro ilo raan-ko āliktata raar katak kōn pedped in katak ko kwoj loi ilo jeje ko rekwojarjar (n̄an waanjon̄ak, lale conference.ChurchofJesusChrist.org im māākjin ko an Kabun̄).

Kwaļo̧k Kōļmenļo̧kjeņ ko

Ekōnono kōn kōļmenļo̧kjeņ ko jān ekkatak eo am̧ make ejjab wāween eo wōt em̧m̧an n̄an katakin ro jet, bōtaab ebarāinwōt jipan̄ kōkajoorļo̧k meļeļe eo am̧ kōn ta eo em̧ōj am̧ kar riiti.

Mour kōn Ta eo Kwoj Ekkatak

Ekkatak jeje ko rekwojarjar aikuj jab wōt im̧we eok bōtaab barāinwōt tōl kōj n̄an ukōt wāween ad mour. Ron̄jake ta eo Jetōb ej im̧we eok n̄an kōm̧m̧ane ilo am̧ riit, innām kallim̧ur n̄an jerbale im̧we ko.

Būreejtōn Russell M. Nelson eaar ba: “N̄e jej ‘bun̄ m̧aanļo̧k, kwōjkwōj ioon naan an Kraist, im niknik n̄an jem̧ļo̧kin … [jenaaj] bōk mour indeeo’ [2 Nipai 31:20].

“N̄an kwojkwoj ej meļeļein eļapļo̧k jān edjon̄. N̄an kwojkwoj ej meļeļe in m̧ōņōņō kōn nemān. Jej nemake jeje ko rekwojarjar kōn ekkatak kaki ilo juon m̧wil in laudin̄din̄ ilo loi im tiljek ilo pokake. N̄e jej kwojkwoj ioon naan ko an Kraist, rej jeje ‘ilo būruemi tebōļ kanniōk ko’ [2 Korint 3:3]. Rej erom juon m̧ōttan eaorōk an lukkuun piktokid” (“Living by Scriptural Guidance,” Ensign, Nob. 2000, 17).