“Januwari 4–10. Joseph Smith—uMlando 1:1–26: ‘Ngabona iNsika yokuKhanya,’” Wozani, Ngilandeleni—Okomuntu Ngamunye Nemindeni: IMfundiso neziVumelwano 2021 (2020)
“Januwari 4–10. Joseph Smith—uMlando 1:1–26,” Wozani, Ngilandeleni—Okomuntu Ngamunye Nemindeni: 2021
isiXhobo seMithi esiNgcwele, nguGreg K. Olsen
Januwari 4–10
Joseph Smith—uMlando 1:1–26
“Ngabona iNsika yokuKhanya”
Ngesikhathi ufunda uJoseph Smith—uMlando 1:1–26, yimiphi imiyalezo oyitholayo ngempilo yakho? Yikuphi okuyigugu kakhulu kuwe nomndeni wakho?
Bhala Okufika Emqondweni Wakho
IMfundiso neziVumelwano incwadi yezimpendulo zemithandazo: iningi lezambulo ezingcwele kulencwadi zifike ngenxa yemibuzo. Ngakho–ke kuhle ukuqala ukufunda IMfundiso neziVumelwano ngokungalibali umbuzo owaqala ukunethisa isambulo ezinsukwini zokugcina—lowo mbuzo uJoseph Smith awubuza ezixhobeni zemithi ngo–1820. “Impi yamazwi nokuxokozela kwemibono” (Joseph Smith—uMlando 1:10) kwashiya uJoseph edidekile ngenkolo nesimo somphefumulo wakhe; mhlawumbe nawe uyasazi lesi simo. Miningi imibono ephikisanayo kanye namazwi ahehayo ezinsukwini zethu, uma sifuna ukucwaninga leyo mlayezo futhi sithole neqiniso, singenza lokhu uJoseph akwenza. Singabuza imibuzo, sifunde imibhalo engcwele, sijule ngemicabango, kuthi ekugcineni sibuze uNkulunkulu. Ekuphenduleni umkhuleko kaJoseph Smith, insika yokukhanya yehla ivela ezulwini; uBaba uNkulunkulu kanye noJesu Kristu baziveza futhi baphendula imibuzo yakhe. Ubufakazi bukaJoseph ngalesehlakalo esiyisimangaliso buqinisekisa ukuthi noma ngubani “[oswela] ukuhlakanipha angacela kuNkulunkulu, futhi akuthole” (Joseph Smith—uMlando 1:1–26). Sonke singakuthola, uma kungekona ukuboniswa okuvela ezulwini, ukuboniswa okucacisayo, okukhanyiswe ukukhanya kwasezulwini.
Amasu Okuzifundela Imibhalo Engcwele
UJoseph Smith unguMphrofethi wokuBuyiselwa kweVangeli.
Injongo yomlando kaJoseph Smith ukusibeka esimweni “sokuthola amaqiniso” ngoba iqiniso ngoJoseph Smith livamise ukushintshwa (Joseph Smith—uMlando 1:1). Ngesikhathi ufunda uJoseph Smith—uMlando 1:1–26, yikuphi okuqinisa ubufakazi bakho ngokuthi ubizo lwakhe luvela phezulu na? Bhala ubufakazi obutholayo obuveza ukuthi iNkosi yamulungiselela uJoseph Smith ukuze enze umsebenzi wakhe wobuphrofethi. Ngesikhathi ufunda, ungabhala imicabango kanye nemizwa yakho ngoJoseph Smith kanye nobufakazi bakhe.
Uma ngicela ngokukholwa, uNkulunkulu uzophendula.
Wake “waswela ukuhlakanipha” noma wazizwa udidekile ngesinqumo owawudinga ukusenza? (Joseph Smith—Umlando 1:13). Ufundani ngalokho uJoseph Smith adlula kukho kulamavesi 5–20? Cabanga ngesakho isidingo solwazi kanye nokuqondisisa , uphinde ucabange ukuthi uzolifuna kanjani iqiniso.
Bheka futhi u-1 Nefi 10:17–19; 15:6–11; kuRussell M. Nelson, “Revelation for the Church, Revelation for Our Lives,” kwi-Ensign noma iLiyahona yangoMeyi 2018, 93–96.
Singabuza uNkulunkulu imibuzo yethu ngomkhuleko.
Kungani kunemibhalo eminingi ngoMbono wokuQala na?
Ngesikhathi esaphila, uJoseph Smith wabhala okwenzeka esiXhobeni seMithi esiNgcwele kwaze kwaba kane noma ngaphezulu, ejwayele ukusebenzisa umbhali. Ngaphezu kwalokho, kukhona imibhalo eyabhalwa abantu abezwa uJoseph Smith ekhuluma ngombono wakhe. Noma lemibhalo yehluka ngeminingwane ethile, kuya ngabalaleli nezindawo, izwakala ivumelana. Futhi umbhalo ngamunye usinikeza imininingwane esisiza siqondisise kangcono okwenzeka kuJoseph Smith, njengoba izincwadi zeVangeli ezine zisisiza sazi kabanzi ngentshumayelo yoMsindisi.
Yini oyifundayo ekufundeni yonke lemibhalo?
UMbono wokuQala waqala ukuBuyiselwa kwevangeli likaJesu Kristu.
UJoseph Smith wathemba ukuthi uNkulunkulu wayezowuphendula umkhuleko wakhe, kodwa wayengayilindele indlela leyo mpendulo eyayizoshintsha ngayo impilo yakhe—kanye nomhlaba wonke. Ngesikhathi ufunda ngokwenzeka kuJoseph, cabanga ukuthi uMbono wokuQala usuyishintshe kanjani impilo yakho. Isibonelo, ungaqedela lomusho ngezindlela ezihlukahlukene: “Ngoba uMbono wokuQala wenzeka, ngiyazi ukuthi…” Ubusiseke ngayiphi indlela ngenxa yoMbono wokuQala?
Bheka futhi kuRussell M. Nelson, “Hear Him,” kwi-Ensign noma iLiyahona, yangoMeyi 2020, 88–92.
Ngingahlala ngibambelele kulokho engikwaziyo, noma kungukuthi abanye bayangenqaba.
Okunye okuyisibusiso ngemibhalo engcwele ukuthi iqukethe izibonelo ezikhuthazayo zabesilisa nabesimame ababenogqozi futhi ababhekana nezinkinga ngokholo kuJesu Kristu. Ngesikhathi uJoseph Smith ebhekene nokuphikiswa ngenxa yombono wakhe, wazibona efana noMphostoli uPawulu, naye owahlushwa ngenxa yokuthi wayebone umbono. Ngesikhathi ufunda indaba kaJoseph Smith, yikuphi okukukhuthazayo ukuba ubambelele kubufakazi bakho? Yiziphi ezinye izibonelo—emibhalweni engcwele noma kubantu obaziyo—ezikunikeza isibindi sokuhlala ubambelele kulokho okwenzeke kuwe ngokomoya na?
Amasu Okufunda Imibhalo Engcwele Ningumndeni Nangobusuku Bomndeni
-
Joseph Smith—Umlando 1:6.Singabhekana kanjani nokungaboni ngaso-linye ngaphandle kokubanga njengalabantu okukhulunywa ngabo kulelivesi?
-
Joseph Smith—uMlando 1:11—13.Ukufunda lamavesi kungakhuthaza amalungu omndeni ukuba axoxe ngokwenzeke ezimpilweni zabo ngezikhathi lapho umbhalo ongcwele uthinte izinhliziyo zabo wabakhuthuza ukuba benze okuthile.
-
uJoseph Smith—Umlando 1:16–20.Ngesikhathi umndeni wakho ufunda lamavesi, cabanga ukuveza isithombe esihambisana nalesi sifundo noma esinye isithombe soMbono wokuQala (mhlawumbe umndeni wakho ungakuthokozela ukuzidwebela isithombe sawo). Umuntu ngamunye angakha uhla lwamaqiniso esiwafundayo kulombono, emva kwalokho ningabe senabelana ngalokho enikubhalile. Lesi kungaba isikhathi esihle sokuba amalungu omndeni abelane ngokuthi wona abuthola kanjani ubufakazi ngoMbono wokuQala kaJoseph Smith.
-
uJoseph Smith—Umlando 1:17.Ngesikhathi uNkulunkulu eziveza kuJoseph Smith, wamubiza ngegama uJoseph. Yinini lapho amalungu omndeni wakho ezwa ukuthi uNkulunkulu uyabazi ngempela?
-
uJoseph Smith—Umlando 1:21–26.Singaphendula sithini lapho abantu begxeka khona ubufakazi bethu?
Ukuthola amanye amasu okufundisa abantwana, bheka uhlelo lalelisonto ku Come, Follow Me—For Primary.
Iculo elingaculwa: “Joseph Smith’s First Prayer,” Hymns, no. 26.
Amazwi Okubuyiselwa Kwevangeli
UMndeni kaJoseph Smith
Siyathinteka kakhulu ngalokho okwenzeka emndenini wethu kanti noJoseph Smith wayengahlukile kulokho. Ukholo lwabazali bakhe lwatshala imbewu eyenza ukuBuyiselwa kwevangeli kwenzeke. Incwadi kaJoseph ibhalwe lokhu: ‘Amagama nolimi akwanele ukuveza ukubonga enginakho kuNkulunkulu ngokuba angiphe abazali abaqotho kangaka.”1
Lokhu okulandelayo okucashunwe kokushiwo ngunina, uLucy Mack Smith; umfowabo uWilliam Smith; noMphrofethi uqobo lwakhe kusinikeza isithombe somthelela inkolo eyaba nawo ekhaya lakwaSmith.
Umndeni wakwaSmith, nguDan Baxter
uLucy Mack Smith
“[Ngabo-1802], ngagula. … Ngazitshela ukuthi, angikulungele ukufa ngoba angizazi izindlela zikaKristu, futhi kwaba sengathi kwakukhona umgodi omnyama futhi onesizungu phakathi kwami noKristu engangingeke ngilinge ngiwuwele. …
“Ngabheka eNkosini ngayincenga futhi ngayinxusa ukuba ingiphe ukuphila ukuze ngikhulise abantwana bami futhi ngiduduze inhliziyo yomyeni wami; ngakho-ke ngalala kanjalo ubusuku bonke. … Ngenza isivumelwano noNkulunkulu [ukuthi] uma engangidedela ngiphile, ngingazimisela ukuba ngithole leyo nkolo ezongisiza ngimusebenzele ngendlela elungile, noma ngabe iseBhayibhelini noma kuphi lapho engatholakala khona, ngisho noma yayitholakala ezulwini ngomkhuleko nokholo. Ekugcineni izwi lakhuluma nami lathi, ‘Funa, khona uzakufumana, ngqongqotha, khona uzovulelwa. Inhliziyo yakho mayiduduzeke. Kholwa kuNkulunkulu, kholwa kimi futhi.’ …
“Kusukela ngaleso sikhathi ngathola amandla nsuku zonke. Kuncane engangikukhuluma mayelana nenkolo nakuba yayisengqondweni yami sonke isikhathi, nganquma ukuthi ngangizokwenza yonke imizamo uma sengikwazi ukuba ngithole ikholwa elaziyo ngezindlela zikaNkulunkulu ukuba lingazise ngezinto zaseZulwini.”2
uWilliam Smith
“Umama, owaye ngumuntu wesifazane oyikholwa futhi owayethanda ukunakekela abantwana bakhe, khona lapha nakwelizayo, wayesebenzisa lonke uthando lwakhe njengomzali ukuthi limholele, ukuba asingenise ekutholeni insindiso yomphefumulo wethu, noma (indlela okwakubekwa ngayo ngalezo zikhathi) ‘ekutholeni inkolo.’ Wayesikhuthaza ukuba sihambe imihlangano, wagcina wonke umndeni uluthanda lolu daba, futhi saba ngabafuna iqiniso.”3
“Ngiyakhumbula ukuthi, kusukula kudala sasihlezi sikhuleka singumndeni. Ngikhumbula kahle ubaba wayephatha izibuko zakhe ekhukhwini lehembe lakhe, … futhi kwakuthi uma thina bafana simbona edonsa izibuko zakhe, sasazi ukuthi lokho kwakusho ukuthi silungele umkhuleko, futhi kwakuthi uma singanakanga umama wayethi, ‘William,’’ noma abize noma yimuphi owayenganakile, ‘lungela umkhuleko.’ Emuva komkhuleko sasineculo esasilicula.”4
UJoseph oMdala noLucy Mack Smith bafundisa umndeni wabo ukufunda imibhalo engcwele.
uJoseph Smith
“Ngiyasho manje , ukuthi [ubaba] akakaze enze into embi empilweni yakhe, engaveza ukuthi waye ngenaso isihe. Ngangimuthanda ubaba nalokho engikukhumbulayo ngaye, inkumbulo yezenzo zakhe eziqotho, ngizindla njalo ngakho emqondweni wami; futhi amazwi akhe amnene nawomzali awakhuluma kimi, abhalwe enhliziyweni yami. Ingcwele imicabango enginayo ngomlando wempilo yakhe, ebilokhu isengqondweni yami yaze yatshaleka khona, ngokunaka kwami selokhu ngazalwa. … Umama naye wayengunkosikazi oqotho, futhi olungile phakathi kwabesifazane.”5
Umbono Wokuqala Wokubuyiselwa Kwevangeli nguMichael Bedard