8–14 febrero

Tzol’leb’ ut Sumwank 12–13; Jose Smith—Resilal 1:66–75

“Sa’ eeb’een laa’ex, ex wech moosil”

Laj Jose Smith ut laj Oliver Cowdery ke’xk’ul xkomon chik li na’leb’ naq ke’tijok chirixeb’ li yaalil na’leb’ li ke’xtzol sa’eb’ li loq’laj hu (chi’ilmanq Jose Smith—Resilal 1:68). Chan ru taataaqeheb’ lix b’aanuhom?

Tz’iib’a li nakak’oxla

Lix k’ihaleb’ li tenamit chiru li ruchich’och’ maajun wa rab’ihomeb’ resil li na’ajej Harmony, Pennsylvania. A’b’an li Qaawa’ kok’ aj sa’ naxsik’eb’ li na’ajej moko nawb’ileb’ ta ru choq’ reheb’ li k’anjel k’a’jo’ xnimaleb’ ru sa’ li rawa’b’ejihom. Sa’ jun k’iche’ nach’ rik’in Harmony, sa’ li 15 xb’e li po mayo, 1829, laj Jwan aj Kub’sihom Ha’, chi waklesinb’il chi yo’yo, kixk’ut rib’ chiru laj Jose Smith ut laj Oliver Cowdery. A’an kixk’eheb’ li ruq’ sa’ xb’een lix jolomeb’ ut kixk’ojob’ sa’ xb’eeneb’ li Tijonelil re Aaron, rik’in li aatin “ex wech moosil” (Tzol’leb’ ut Sumwank 13:1).

Rik’in rab’inkil naq a’aneb’ rech moosil laj Jwan ak Kub’sihom Ha’, li kikub’sin xha’ li Kolonel ut kixkawresi li b’e choq’ re lix k’ulunik (chi’ilmanq Mateo 3:1–6, 13–17), maare ke’sach xch’ool ut tuulan ke’reek’a li wiib’ chi saaj winq a’in. Sa’ li hoonal a’an, moko nawb’il ta ru laj Jose chi moko laj Oliver, jo’ chanru li tenamit Harmony. A’b’an, relik chi yaal naq li k’a’ru nim xwankil sa’ k’anjelak chiru li Dios sa’ xk’anjel, a’an chan ru naq nokok’anjelak, ink’a’ ani naxk’e reetal. Us ta ka’ch’in malaj moko ilb’il ta li nakab’aanu, laa’at ajwi’ jun ech aj moos sa’ lix nimla k’anjel li Qaawa’.

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 12

Li Qaawa’ naraj naq tintenq’anq chixxaqab’ankil li k’anjel re Sion.

Laj Joseph Knight, yuwa’b’ej, ut li xPolly, li rixaqil, ke’xnaw ru laj Jose Smith naq ki’ok chi trab’ajik sa’ xch’och’eb’ aran Colesville, Nueva York naq jun may chihab’ xyu’am. Laj Joseph Knight kixye naq sa’ xyanq chixjunileb’ aj trab’aaj ke’k’anjelak chiru, laj Jose a’an li q’axal nim xchaab’ilal. A’an kixpaab’ li raatin laj Jose Smith chirixeb’ li perel ch’iich’ oor ut rochb’een li rixaqil, li xPolly, kirula’ani laj Jose Smith naq yoo chixjaltesinkil ru lix Hu laj Mormon sa’ rochoch aran Harmony, Pennsylvania. Li xPolly kixpaab’ sa’ junpaat. Chiru chixjunil lix yu’ameb’, laj Joseph ut li xPolly ke’kana chi tiik sa’ xpaab’ankil li evangelio li k’ojob’anb’il wi’chik. Numenaq 60 reheb’ li junkab’al Knight ke’xjunaji rib’ rik’in li Iglees ut ke’tenq’an chixxaqab’ankil sa’ Nueva York, Ohio, Missouri, Nauvoo, ut moqon sa’ Lago Salado.

Laj Joseph Knight kiraj xnawb’al chan ru taaruuq taatenq’anq sa’ xk’anjel li Qaawa’. Lix sumehom li Qaawa’ (anajwan Tzol’leb’ ut Sumwank 12) wan rilom rik’in “chixjunil li wankeb’ rajom xk’eeb’al chi k’utmank ut xxaqab’ankil li k’anjel a’in” (raqal 7)—jo’ ajwi’ laa’at. K’a’ru xyaalalil choq’ aawe li ch’ol aatin “xk’eeb’al chi k’utmank ut xxaqab’ankil xwankil Sion”? (raqal 6). Chan ru naq eb’ li na’leb’ sa’eb’ li raqal 7–9 te’ruuq chatenq’ankil chixb’aanunkil a’in?

Chi’ilmanq ajwi’ “Las familias Knight y Whitmer,” Revelaciones en contexto, 22–26.

Tzolʼlebʼ ut Sumwank 13

Li Tijonelil re Aaron kik’ojob’aak wi’chik xb’aan laj Jwan aj Kub’sihom Ha’.

Sa’ yal jun raqal chi aatin, laj Jwan aj Kub’sihom Ha’ kixk’utb’esi naab’aleb’ li na’leb’ chirix li Tijonelil re Aaron. Taaruuq taatz’iib’a chi tustu chixjunil li nakatzol sa’ li tasal a’in (jo’ ajwi’ sa’ li aatin sa’ xtiklajik li tasal). Maare chaab’ilaq choq’ aawe xtz’ilb’aleb’ rix junjunqeb’ li ch’ol aatin nakataw. Wahe’ junjunqeb’ re aatenq’ankil chixtikib’ankil:

• “Eb’ li laaw re lix k’anjeleb’ li anjel”: 2 Nefi 32:2–3; Moroni 7:29–32; Jeffrey R. Holland, “El ministerio de ángeles,” Liahona, noviembre 2008, 29–31; K’utul Raqal reheb’ li Loq’laj Hu, “Anjel”

• “Eb’ li laaw … re li evangelio re jalb’a-k’a’uxlej”: 3 Nefi 27:16–22; Tzol’leb’ ut Sumwank 84:26–27; Dale G. Renlund, “Li tijonelil ut lix wankil aj tojol-ix li Kolonel,” Jolomil ch’utub’aj-ib’ re noviembre 2017

• “Eb’ li ralal laj Levi”: Numeros 3:5–13; Tzol’leb’ ut Sumwank 84:31–34; K’utul Raqal reheb’ li Loq’laj Hu, “Tijonelil re Aaron,” “Levi”

K’a’ru li xat-osob’tesiik wi’ xb’aaneb’ li k’ojob’anb’il k’anjel re li Tijonelil re Aaron?

Laj Jose Smith naxkub’si xha’ laj Oliver Cowdery, xb’aan laj Del Parson

Jose Smith—Resilal 1:66–75

Eb’ li k’ojob’anb’il k’anjel nikine’xkanab’ chixk’ulb’al lix wankilal li Dios.

Li Hermana Carole M. Stephens, li kik’anjelak jo’ tenq’ aj k’ehol na’leb’ sa’ li Jolomil Awa’b’ejil re li Komonil re Tenq’ank, kixk’ut: “Eb’ li k’ojob’anb’il k’anjel ut sumwank neke’xte chiqu lix tz’aqalileb’ li osob’tesink yeechi’inb’ileb’ qe xb’aan li Dios, li neke’ru chi k’ule’k xb’aan lix tojb’al rix li maak kixb’aanu li Kolonel. Neke’xtiqib’eb’ li ralal xk’ajol li Dios rik’in wankilal, a’ lix wankilal li Dios, ut nokohe’xtenq’a re naq tooruuq chixk’ulb’al li yu’am chi junelik” (“¿Sabemos lo que poseemos?” Liahona, noviembre 2013, 12).

Naq yookat chirilb’al ru Jose Smith—Resilal 1:66–75, jo’ ajwi’ li ch’ina tz’iib’ahom wan sa’ xraqik li raqal 71, k’oxla k’a’ru li kixmusiq’aheb’ laj Jose ut laj Oliver chi patz’ok chirix li kub’iha’, ut k’e reetaleb’ li osob’tesink li ke’chal rik’ineb’ chirix naq ke’tz’aqon sa’eb’ li k’ojob’anb’il k’anjel re li tijonelil. Naru taak’oxla rilb’al ru wi xatz’iib’a resil sa’ jun hu chirix naq xak’ul jun k’ojob’anb’il k’anjel, malaj taaruuq taatz’iib’a resil li nanaq sa’ aach’ool chirixeb’ li hoonal a’an. K’a’ruheb’ li osob’tesink xak’ul rik’ineb’ li k’ojob’anb’il k’anjel re li tijonelil?

Chi’ilmanq ajwi’ Tzol’leb’ ut Sumwank 84:20–22; Santos, 1:65–68.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 12:8.K’a’ut naq aajeleb’ ru li na’leb’ li tz’iib’anb’ileb’ sa’ li raqal a’in naq yooko chixb’aanunkil lix k’anjel li Qaawa’?

Tzolʼlebʼ ut Sumwank 13.K’a’ru taaruuq tixnimob’resi lix paab’aal laa junkab’al chirix naq k’ojob’anb’il wi’chik li Tijonelil re Aaron? Li video “La restauración del Sacerdocio Aarónico” (ChurchofJesusChrist.org) malaj li jalam-uuch wan sa’ li tusleb’ aatin a’in taaruuq tixtenq’a laa junkab’al chixk’eeb’al reetal chi us lix k’ojob’ankil wi’chik li Tijonelil re Aaron. Ma taawulaq raj chiruheb’ xyiib’ankil xjalam-uuch li hoonal a’an, a’ yaal li xe’ril ru sa’ Jose Smith—Resilal 1:68–74? Te’ruuq ajwi’ chixwotzb’al xnawomeb’ xch’ool chirix lix wankilal li tijonelil sa’ xyu’ameb’.

Chi’ilmanq ajwi’ “Priesthood Restoration Site” sa’ history.ChurchofJesusChrist.org.

Jose Smith—Resilal 1:68.Chan ru naru taqab’aanu li ke’xb’aanu laj Jose Smith ut laj Oliver Cowdery re xtawb’al lix sumenkileb’ li qapatz’om? Maare naq yookex chi ilok ru hu sa’ komonil, texruuq chi xaqliik chi kok’ aj xsa’ re xpatz’b’al ma wan xpatz’om anihaq chirix li yoo chirilb’al ru.

Chi’ilmanq Jose Smith—Resilal 1:71, li aatin chi rub’el.K’a’ru nawulak chiruheb’ li komon sa’ laa junkab’al chirix li raatin laj Oliver Cowdery? K’a’ruheb’ junjunq “li kutan li maajo’q’e te’sachmanq sa’ xch’ool” laa junkab’al?

Jose Smith—Resilal 1:73–74.Chan ru naq li Santil Musiq’ej kireek’asiheb’ xch’ool laj Jose ut laj Oliver? Jo’q’e xtenq’aak laa junkab’al xb’aan li Musiq’ej chixtawb’aleb’ ru li loq’laj hu ut chi saho’k sa’ xch’ooleb’ rik’in li Qaawa’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tz’aqal tijonelil xk’ojob’aman chi ak’il,” B’ichleb’aal choq’ reheb’ li Kok’al, 60.

Xchaab’ilob’resinkil li qak’utum

Tzolomaq jun na’leb’. Jo’ junkab’al, sik’omaq ru jun na’leb’ teeraj raj xtz’ilb’al rix. Qayehaq, chiru li xamaan a’in texruuq chiroksinkil li K’utul Raqal reheb’ li Loq’laj Hu re xtawb’aleb’ li raqal sa’eb’ li loq’laj hu chirix li Tijonelil re Aaron.

Sa’ eeb’een laa’ex, ex wech moosil, xb’aan li xLinda Curley Christensen