li nima’ Susquehanna

8–14 febrero

Tzol’leb’ ut Sumwank 12–13; Jose Smith—Resilal 1:66–75

“Sa’ eeb’een laa’ex, ex wech moosil”

Eb’ li kok’al nakatzoleb’ jalan jalanq lix wanjikeb’ ut jalan jalanq li rajomeb’ ru. Naq yooqat chixkawresinkil aawib’, k’oxla chan ru naru nakatenq’aheb’ chi us chixtzolb’aleb’ li yaal neke’k’utman sa’ Tzol’leb’ ut Sumwank 12–13 ut Jose Smith—Resilal 1:66–75.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al xnumsihomeb’ b’ar wi’ xe’ril anihaq chi kub’eek xha’ malaj chixk’ulb’al junaq rosob’tesihom li tijonelil. Chan ru naq ke’xk’ul li tijonelil laj Jose Smith ut laj Oliver Cowdery?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzolʼlebʼ ut Sumwank 13

Laj Jwan aj Kub’sihom Ha’ kixk’ojob’ wi’chik li Tijonelil re Aaron.

Sa’ li 15 re mayo re 1829, laj Jwan aj Kub’sihom Ha’ kixk’ut rib’ chiruheb’ laj Jose Smith ut laj Oliver Cowdery, ut kixk’e reheb’ li Tijonelil re Aaron. Chan ru naq li tzolok chirix a’an naru narosob’tesiheb’ li kok’al nakatzoleb’?

Kok’ k’anjel naru chi b’aanumank

• Ye reheb’ li kok’al chan ru naq kik’ojob’aak wi’chik li Tijonelil re Aaron (chi’ilmanq Jose Smith—Resilal 1:68–70; chi’ilmanq ajwi’ “Ch’ol 6: K’eeb’il li tijonelil reheb’ laj Jose ut laj Oliver,” Eb’ li Esilal sa’ li Tzol’leb’ ut Sumwank, 26–27). Malaj ut, k’e xb’oqb’al junaq komon re li teep re naq taawulaq sa’ li tzoleb’aal ut tixwotz li seraq’ chanchan ta wi’ naq a’an laj Jwan aj Kub’sihom Ha’ ut taaril ru choq’ reheb’ li kok’al li k’a’ru kixye laj Jwan re laj Jose Smith ut laj Oliver Cowdery.

• K’uteb’ xjalam-uuch laj Jwan aj Kub’sihom Ha’ naq kixk’ub’si xha’ li Kolonel ut naq kixk’ojob’ li Tijonelil re Aaron (Hu reheb’ li Jalam-uuch re li Evangelio, 35 ut 93; chi’ilmanq ajwi’ li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ li kok’al chixwotzb’al li neke’xnaw chirix li yoo chi k’ulmank sa’eb’ li jalam-uuch (chi’ilmanq Mateo 3:13–17; Tzol’leb’ ut Sumwank 13; Jose Smith—Resilal 1:68–70).

• Tenq’aheb’ li kok’al chixb’ichankil jun li b’ich na’aatinak chirix li tijonelil, jo’ “Tz’aqal tijonelil xk’ojob’aman chi ak’il” (B’ichleb’aal choq’ reheb’ li Kok’al, 60–61). Kanab’eb’ chi b’eek sa’ li tzoleb’aal naq yooqeb’ chi b’ichank ut te’xk’e xhoonal chirib’ileb’ rib’ chixchapb’al chi kutankil li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al.

Tzolʼlebʼ ut Sumwank 13

Li tijonelil a’an lix wankilal li Dios.

Li tzolok chirix lix k’ojob’ankil wi’chik li Tijonelil re Aaron naxk’e chaab’il hoonal re xtenq’ankileb’ li kok’al chixtawb’al ru chi us li tijonelil ut chan ru naq neke’osob’tesiik xb’aan a’an.

Kok’ k’anjel naru chi b’aanumank

• K’ameb’ junjunq k’a’aq re ru sa’ li tzoleb’aal, ut ajwi’ jun li laaw. K’uteb’ li k’a’aq re ru ut k’e xb’oqb’aleb’ li kok’al chi ab’ink naq laa’at taawil ru Tzol’leb’ ut Sumwank 13, ut chixsik’b’al li k’a’aq re ru nayeeman sa’ li raqal. K’a’ru naru naqab’aanu rik’in jun li laaw? K’uteb’ xjalam-uuch li naru neke’qab’aanu sa’ xk’ab’a’ naq kik’ojob’aak wi’chik li Tijonelil re Aaron (chi’ilmanq li perel re kok’ k’anjel re li xamaan a’in; chi’ilmanq ajwi’ li Hu reheb’ li Jalam-uuch re li Evangelio, 103–104, 107–108). Ye reheb’ li kok’al chan ru naq li tijonelil narosob’tesi laa yu’am.

• Re xtenq’ankileb’ li kok’al chixtzolb’al li ch’ol aatin Li tijonelil a’an lix wankilal li Dios, kanab’eb’ chixxorb’al xsa’ li ruq’eb’ naq te’xyaab’asi chi raqal li aatin. K’ut chiruheb’ jun k’anjeleb’aal naraj ru li b’ateriiy re k’anjelak ut k’ut chiruheb’ naq, jo’eb’ ajwi’ li b’ateriiy naxk’e xmetz’ew li k’anjeleb’aal, li tijonelil naxk’e xwankil li Dios sa’ li qayu’am. Wotz lix nawom aach’ool chirixeb’ li osob’tesihom aak’ulum laa’at sa’ xk’ab’a’ li tijonelil.

Jose Smith—Resilal 1:66–75

Naru nakub’e inha’.

Laj Jose Smith ut laj Oliver Cowdery ke’tzolok chirix li kub’iha’ sa’ lix Hu laj Mormon ut ke’raj xtawb’al xkomon xna’leb’eb’ chirix a’an. Naru nakatenq’aheb’ li kok’al nakatzoleb’ chiroyb’eninkil chi saheb’ sa’ xch’ool lix kub’iha’eb’ ut chixtawb’al xkomon xna’leb’eb’ chirix li santil k’ojob’anb’il k’anjel a’an.

Kok’ k’anjel naru chi b’aanumank

• K’ut li video “La restauración del Sacerdocio Aarónico” (ChurchofJesusChrist.org). Taaxaqab’ li video jo’q’ehaq re xpatz’b’al reheb’ li kok’al k’a’aq re ru jo’eb’ a’in: “K’a’ut naq laj Jose Smith ut laj Oliver Cowdery xkoheb’ sa’ li k’iche’?” ut “K’a’ru nekek’oxla naq ke’reek’a laj Jose Smith ut laj Oliver Cowdery chirix naq ke’kub’e xha’?” Kanab’eb’ chixyeeb’al aawe k’a’ru neke’xk’oxla naq te’reek’a chirix naq te’kub’eeq xha’?

• Aatinaheb’ li kok’al chirix lix kub’iha’eb’ laj Jose Smith ut laj Oliver (chi’ilmanq Jose Smith—Resilal 1:68–74; chi’ilmanq ajwi’ “Ch’ol 6: K’eeb’il li tijonelil reheb’ laj Jose ut laj Oliver,” Eb’ li Esilal sa’ li Tzol’leb’ ut Sumwank, 26–28). Aatinan tz’aqal chirix li sahil ch’oolejil ke’reek’a laj Jose ut laj Oliver, ut aatinan rik’ineb’ li kok’al chirix laa kub’iha’ laa’at. Kanab’eb’ chixyiib’ankil xjalam-uucheb’ a’an naq yooqeb’ chi kub’eek xha’ sa’ junaq kutan.

  xkub’iha’ jun li ch’ina al

  Naru nakub’e inha’ sa’ xk’ab’a’ naq kik’ojob’aak wi’chik li tijonelil.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 13; Jose Smith—Resilal 1:66–72

Laj Jwan aj Kub’sihom Ha’ kixk’ojob’ wi’chik li Tijonelil re Aaron.

Eb’ li seraq’ chirix lix k’ojob’ankil wi’chik li Tijonelil re Aaron naru naxtenq’aheb’ li kok’al nakatzoleb’ chixtawb’al ruheb’ li aajelil ru yaal chirix li tijonelil ut eb’ li k’ojob’aak sa’ li tijonelil.

Kok’ k’anjel naru chi b’aanumank

• Ilomaq ru sa’ komonil Jose Smith—Resilal 1:66–72 ut kanab’eb’ li kok’al chixyiib’ankileb’ xjalam-uuch li neke’xch’olob’ li raqal a’an. Chirix a’an, kanab’eb’ chixyeeb’al li seraq’ rik’ineb’ lix jalam-uuch. Kanab’ jun ch’ina al chixwotzb’al junaq xnumsihom b’ar wi’ xril anihaq chi k’ojob’aak sa’ junaq opiis re li tijonelil. Chan ru naq juntaq’eet a’an rik’in chan ru naq laj Jose ut laj Oliver ke’k’ojob’aak jo’ naxye sa’ Jose Smith—Resilal 1:66–72?

• K’e xhoonaleb’ li kok’al chixyiib’ankil jun xtusulal chixjunil li neke’xnaw chirix laj Jwan aj Kub’sihom Ha’. Chirix a’an kanab’eb’ chixwotzb’al li xe’xtz’iib’a. Kanab’eb’ chixk’uub’ankileb’ rib’ sa’ ka’kab’il re naq te’ril ru jun reheb’ li raqal a’in ut te’xtz’iib’a ajwi’ sa’ li tusulal xe’xyiib’: Mateo 3:13–17; Tzol’leb’ ut Sumwank 13; Jose Smith—Resilal 1:66–72.

Tzolʼlebʼ ut Sumwank 13

Nink’ul osob’tesiik sa’ xk’ab’a’ li Tijonelil re Aaron.

Naqak’ul naab’al li osob’tesiik sa’ xk’ab’a’ li Tijonelil re Aaron. K’a’ru naru nakab’aanu re xtenq’ankileb’ li kok’al nakatzoleb’ chixtawb’al ru naq eb’ li osob’tesiik a’an neke’k’ulman sa’ xk’ab’a’ naq kik’ojob’aak wi’chik li tijonelil?

Kok’ k’anjel naru chi b’aanumank

• K’eheb’ xjalam-uuch jun kub’iha’ ut li loq’laj wa’ak sa’ jun k’uuleb’aal tz’aptz’o rik’in laaw. Aatinanqex chirix k’a’ut naq aajeleb’ ru li laaw ut kanab’eb’ li kok’al chiroksinkil li laaw re xteeb’al li k’uuleb’aal. Kanab’eb’ chirilb’al ru Tzol’leb’ ut Sumwank 13, ut chixtawb’aleb’ aatin ut ch’ol aatin li te’xk’ut chiruheb’ li osob’tesihom naqak’ul rik’in li Tijonelil re Aaron.

• K’ut li video “Las bendiciones del sacerdocio” (ChurchofJesusChrist.org) ut kanab’eb’ li kok’al chixk’eeb’al reetal chan ru naq eb’ li kristiaan sa’ li video osob’tesinb’ileb’ xb’aan li tijonelil.

Jose Smith—Resilal 1:73–74

Li Santil Musiq’ej naru nikinixtenq’a chixtawb’aleb’ ru li loq’laj hu.

Chirix naq laj Jose Smith ut laj Oliver Cowdery ke’kub’e xha’, ke’tenq’aak xb’aan li Santil Musiq’ej chixtawb’aleb’ ru chi us li loq’laj hu. A’an naru naxwaklesi xch’ooleb’ li kok’al, li neke’ch’a’ajko’ chiru xtawb’aleb’ ru li loq’laj hu.

Kok’ k’anjel naru chi b’aanumank

• K’am jun jorb’a-k’a’uxlej sa’ li tzoleb’aal ut kanab’eb’ li kok’al chixyiib’ankil. Naq yooqeb’ chixb’aanunkil a’an, patz’ reheb’ chan ru naq juntaq’eet rilb’aleb’ ru li loq’laj hu rik’in xyiib’ankil junaq jorb’a-k’a’uxlej. Ilomaq ru sa’ komonil Jose Smith—Resilal 1:73–74 ut kanab’eb’ li kok’al chixwotzb’al k’a’ru kitenq’ank reheb’ laj Jose ut laj Oliver chixtawb’aleb’ ru li loq’laj hu. K’a’ru naru naqab’aanu re xsik’b’al lix tenq’ li Santil Musiq’ej naq yooqo chixtzolb’aleb’ li loq’laj hu?

• Kanab’eb’ li kok’al chixyiib’ankil jun eetalil li naru neke’xkanab’ sa’eb’ lix loq’laj hu re naq taajultiko’q reheb’ xsik’b’al li Santil Musiq’ej naq te’ril ru li hu. Maare naru nakataw junaq li ch’ol aatin namusiq’an sa’ Jose Smith—Resilal 1:74 li naru te’xtz’iib’a chiru li eetalil te’xyiib’.

reetalil li tzolok

Xb’oqb’aleb’ chi tzolok sa’ kab’l

Wi maak’a’ li hoonal re naq eb’ li kok’al te’xtz’aqob’resi ru li perel re kok’ k’anjel sa’ li tzoleb’aal, naru te’xk’am sa’ rochocheb’ re naq te’xtz’aqob’resi ru rik’ineb’ lix junkab’al.

Xchaab’ilob’resinkil li qak’utum

Q’unaq aach’ool ut chawab’i li Musiq’ej. Moko taak’oxla ta naq tento taawoksiheb’ li na’leb’ wankeb’ sa’ li tusleb’ aatin a’in. Laa’at nakanaweb’ ru li kok’al nakatzoleb’; patz’ re li qaChoxahil Yuwa’ naq tatxb’eresi re xtawb’aleb’ chaab’il na’leb’ re xtenq’ankileb’ chixtzolb’al li tzol’leb’ re li evangelio ut chixk’ojob’ankileb’ lix paab’aal.

perel re kok’ k’anjel: li tijonelil a’an lix wankilal li Dios