laj Jose Smith ut li oxib’ chi aj yehol nawom neke’xwiq’ib’ rib’ chi tijok

15–21 febrero

Tzolʼlebʼ ut Sumwank 14–17

“Xaqliik jo’ aj yehol nawom”

Chan ru naru nakatenq’aheb’ li kok’al chi wank jo’ aj yehol nawom chirix li evangelio? Eb’ li kok’ k’anjel sa’ li tusleb’ aatin a’in naru neke’xk’e aana’leb’.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’oxla xkanab’ankileb’ junjunq li kok’al chixwotzb’al k’a’ruhaq xe’xtzol chiru li xamaan a’in, sa’ kab’l malaj li Tzoleb’aal reheb’ li Kok’al, ut li neke’xk’oxla naq yaal.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 14:1–7

Naru nintenq’a li Qaawa’ chixb’aanunkil lix k’anjel.

K’oxla chan ru naq li raatin li Qaawa’ choq’ re laj David Whitmer naru naxtenq’aheb’ li kok’al re naq te’xtaw ru chan ru naru neke’tz’aqon sa’ lix k’anjel li Dios.

Kok’ k’anjel naru chi b’aanumank

• Sa’ junpaat, wotz junjunq esil chirix li junkab’al Whitmer (chi’ilmanq Santos, 1:68–71 malaj li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Qayehaq, wotz ani laj David Whitmer ut chan ru naq a’an ut lix junkab’al ke’xtenq’a laj Jose Smith naq yoo chixjaltesinkil ru lix Hu laj Mormon.

• Tenq’aheb’ li kok’al chixtawb’al ru li xjuntaq’eetankil li k’anjelak sa’ pim rik’in li tz’aqonk sa’ “jun nim ut sachb’a-ch’oolejil k’anjel” re li Dios (raqal 1). Qayehaq, li q’olok naru nareetali xk’amb’aleb’ chaq li aamej rik’in li Kristo. Naru taak’ut xjalam-uuch jun li winq aj awinel, Naru taak’am li t’ikr naroksi, re naq eb’ li kok’al te’xk’e chirixeb’, malaj naru tex’aatinaq chirix li k’anjel naxb’aanu jun aj awinel. Ch’olob’ naq laj David Whitmer a’an jun aj awinel li kiraj xnawb’al chan ru naru tixtenq’a li Qaawa’. Yaab’asi Tzolʼlebʼ ut Sumwank 14:3–4 choq’ reheb’ li kok’al ut tenq’aheb’ chixtawb’al k’a’ru kixye li Qaawa’ re laj David Whitmer naq tixb’aanu. Chan ru naru nokotenq’an sa’ lix k’anjel li Qaawa’?

• Oksi jun maatan re aatinak rik’ineb’ li kok’al chirix li maatan re li junelik yu’am. Qayehaq, k’ut chiruheb’ li kok’al jun maatan rik’in jun li hu chi sa’ li tixye: “Junelik yu’am” (Tzolʼlebʼ ut Sumwank 14:7). Kanab’ jun li ch’ina al chixteeb’al li maatan ut taaril ru Tzolʼlebʼ ut Sumwank 14:7 chi kaw xyaab’ xkux. Ch’olob’ naq li junelik yu’am naraj naxye wank rik’in li Dios chi junelik ut wank jo’ a’an. Wotz lix nawom aach’ool chirixeb’ li osob’tesihom neke’chal rik’in xpaab’ankileb’ li taqlahom ut xk’ulb’al li junelik yu’am.

  eb’ li misioneer neke’xtzol jun junkab’al

  Li k’anjel re xjultikankil li evangelio a’an jun na’leb’ li naru naqatenq’a wi’ li Qaawa’ chixb’aanunkil lix k’anjel.

Tzolʼlebʼ ut Sumwank 15:6; 16:6

Naru nintenq’aheb’ li was wiitz’in chi nach’ok chi us rik’in li Jesukristo.

Laj John Whitmer a’an ras laj David Whitmer, ut laj Peter Whitmer, alalb’ej, a’an riitz’in. Jo’ laj David, a’aneb’ ajwi’ ke’raj xnawb’al chan ru naru neke’xtenq’a li Qaawa’. A’an kixpatz’ reheb’ naq te’xtenq’a “chixk’amb’aleb’ chaq li aamej rik’in.”

Kok’ k’anjel naru chi b’aanumank

• Kanab’eb’ li kok’al chixch’olob’ankil k’a’ruhaq aajel ru malaj nim xloq’al choq’ reheb’ a’an (jo’ jun li b’atz’uul, jun li hu, malaj jun b’atz’unk). Il ru Tzolʼlebʼ ut Sumwank 15:6 malaj 16:6, ut kanab’eb’ li kok’al chixtaqsinkil li ruq’eb’ naq te’rab’i li k’a’ru naxye li Qaawa’ naq “q’axal nim xloq’al.”

• Rik’ineb’ li kok’al, tz’iib’a chi tustu chan ru naru naq eb’ a’an naru neke’xtenq’a anihaq chixtaaqenkil li Jesukristo, jo’ wank choq’ ramiiweb’ jalaneb’ chik kristiaan, xwotzb’aleb’ li loq’laj hu rik’in junaq ramiiweb’, malaj tijok chirix anihaq wan jun rajom ru. Re xk’eeb’al xna’leb’eb’ li kok’al, naru nakak’uteb’ jalam-uuch wankeb’ sa’eb’ li kok’ hu re li Iglees malaj li Hu reheb’ li Jalam-uuch re li Evangelio. Malaj ut, eb’ li kok’al naru neke’xyiib’ xjalam-uucheb’. K’e xb’oqb’aleb’ chixyalb’al xb’aanunkil chiru li xamaan junaq reheb’ li na’leb’ xe’xtz’iib’a.

Tzolʼlebʼ ut Sumwank 17

Naru ninxaqli choq’ aj yehol nawom chirix li k’a’aq re ru xb’aanuhom li Dios choq’ we.

Laj David Whitmer kiwulak chi xaqliik jo’ jun reheb’ li oxib’ chi aj yehol nawom chirix lix Hu laj Mormon ut kaahib’ reheb’ li ras ke’wan sa’ xyanqeb’ li waqxaqib’ chi aj yehol nawom. Jo’ laj David ut eb’ li ras, li junjunq qe laa’o naru “nokoxaqli jo’ aj yehol nawom” chirix li yaal (Tzolʼlebʼ ut Sumwank 14:8).

Kok’ k’anjel naru chi b’aanumank

• Aatinaheb’ li kok’al chirixeb’ li oxib’ ut li waqxaqib’ chi aj yehol nawom (chi’ilmanq li “Ch’ol 7: Eb’ aj yehol nawom neke’rileb’ li perel ch’iich’ oor” [Eb’ li Esilal sa’ li Tzol’leb’ ut Sumwank, 31–33] malaj li video sa’ ChurchofJesusChrist.org). Kanab’eb’ li kok’al chixyiib’ankil jun xjalam-uucheb’ laj yehol nawom naq ke’rileb’ li perel ch’iich.

• Kanab’eb’ li kok’al chixb’onb’al li perel re kok’ k’anjel re li xamaan a’in ut chiroksinkil re xyeeb’al li seraq’ chirixeb’ li oxib’ chi aj yehol nawom.

• Chap chi kutankil jun lix Hu laj Mormon ut il ru lix ch’otojik Tzolʼlebʼ ut Sumwank 17:6: “Jo naq yo’yo lee Qaawa’ ut lee Dios, yaal a’an.” Ye reheb’ li kok’al chan ru naq nakanaw naq lix Hu laj Mormon tz’aqal yaal. K’e xb’oqb’aleb’ chi wulak jo’ aj yehol nawom chirix lix Hu laj Mormon rik’in rilb’al ru ut tijok re xnawb’al ma tz’aqal yaal, ut chirix a’an te’xwotz lix nawom xch’ooleb’ rik’ineb’ jalan chik kristiaan.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 14–16

Naru nintenq’a li Qaawa’ chixb’aanunkil lix k’anjel.

Naq yooqat chixtz’ilb’al rix li k’utb’esinb’il na’leb’ kixk’ul laj Whitmer ut eb’ li ras, naru nakawotz junjunq chan ru naq li Qaawa’ nokoxb’oq chiqajunjunqal re naq taqatenq’a sa’ lix k’anjel.

Kok’ k’anjel naru chi b’aanumank

• Wotzeb’ seraq’ chirix laj David Whitmer ut lix junkab’al li nakaweek’a naq naru naxmusiq’aheb’ li kok’al (chi’ilmanq Santos, 1:68–71). Chan ru naq li Qaawa’ kiroksiheb’ laj Whitmer re tenq’ank chixk’ojob’ankil li rawa’b’ejihom?

• Chiru kok’ setb’il hu, tz’iib’aheb’ kok’ patz’om ut li rajlileb’ li raqal wankeb’ sa’ Tzolʼlebʼ ut Sumwank 14–16. Qayehaq: Chan ru li raatin li Dios? (14:2). B’ar wan reheb’ lix maatan li Dios q’axal nim? (14:7) K’a’ru li q’axal nim xloq’al jo’ kixye li Qaawa’? (15:6; 16:6). Kanab’eb’ li kok’al chixsik’b’al ru jun li patz’om ut chixtawb’al xsumenkil sa’eb’ li raqal.

• Tz’iib’a wiib’ xjolomil na’leb’ sa’ li pizarron: Lix k’anjel jun aj awinel ut Lix k’anjel li Qaawa’. Tenq’aheb’ li kok’al chi sik’ok sa’ Tzolʼlebʼ ut Sumwank 14:3–4 re te’xtaw ch’ol aatin li wan rilomeb’ rik’in li k’anjel naxb’aanu jun awinel, re naq te’xtz’iib’a rub’el lix jolomil na’leb’. K’a’ru neke’xk’ut chiqu li raqal a’in chirix lix k’anjel li Dios? Tz’iib’aheb’ xsumehom li kok’al rub’el xkab’il lix jolomil na’leb’. Chan ru naru nokotenq’an sa’ lix k’anjel li Qaawa’?

Tzolʼlebʼ ut Sumwank 17

Naru ninxaqli choq’ aj yehol nawom chirix li k’a’aq re ru xb’aanuhom li Dios choq’ we.

Sa’ Tzolʼlebʼ ut Sumwank 17, li Qaawa’ kixye re laj Oliver Cowdery, laj David Whitmer, ut laj Martin Harris naq a’anaqeb’ li oxib’ chi aj yehol nawom chirix lix Hu laj Mormon. Tenq’aheb’ li kok’al chixtzolb’al chan ru naq a’aneb’ ajwi’ naru neke’xaqli choq’ aj yehol nawom chirix li yaal.

• K’e xb’oqb’al jun ch’ina al chi chalk chi kawresinb’il re tixwotz li seraq’ chirixeb’ li oxib’ chi aj yehol nawom (chi’ilmanq “Ch’ol 7: Eb’ aj yehol nawom neke’rileb’ li perel ch’iich oor” [Eb’ li Esilal sa’ li Tzol’leb’ ut Sumwank, 31–33] malaj li video sa’ ChurchofJesusChrist.org). K’a’ru naru naqatzol sa’ li seraq’ a’an chirix chan ru xaqliik jo’eb’ aj yehol nawom kaweb’ xch’ool? Naru nakawotz xcha’al li video “Un día para las eternidades” (ChurchofJesusChrist.org); li resileb’ li oxib’ chi aj yehol nawom natikla sa’ li k’asal 15:00).

• Ilomaq ru sa’ komonil lix yeechi’ihom li Qaawa’ natawman sa’ Tzolʼlebʼ ut Sumwank 17:1–3, ut tenq’aheb’ li kok’al chixtawb’al lix tz’aqob’resinkil ru sa’ “Lix Ch’olob’ahomeb’ li Oxib’ chi aj Yehol Nawom” sa’ lix Hu laj Mormon.

• Ilomaq ru sa’ komonil Tzolʼlebʼ ut Sumwank 17:3–5 re xsik’b’al k’a’ru kipatz’man reheb’ laj Oliver Cowdery, laj Martin Harris, ut laj David Whitmer naq te’xb’aanu chirix rilb’aleb’ li perel ch’iich’ oor. B’ar wan junjunqeb’ li yaal li naru naqach’olob’ xyaalal? Ye chan ru nakawotz laa’at lix nawom aach’ool rik’ineb’ aawas aawiitz’in ut kanab’eb’ li kok’al chixwotzb’al junaq xnumsihomeb’.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chi xaqliik jo’ aj yehol nawom chirix k’a’ruhaq xe’xtzol sa’ li tzoleb’aal chiru li kutan a’in. K’e xb’oqb’aleb’ chixwotzb’al chan ru naq xe’xb’aanu a’in, sa’ li tzoleb’aal sa’ li xamaan chal re.

Xchaab’ilob’resinkil li qak’utum

Kanab’eb’ li kok’al chireek’ansinkileb’ rib’. Naru nakawoksi li hoonal naq aj ajeb’ ru li kok’al re xb’oqb’aleb’ chixk’utb’esinkil jun seraq’ malaj te’reek’asi rib’ a’ yaal junaq li b’ich malaj junaq raqal sa’eb’ li loq’laj hu. (Chi’ilmanq Li k’utuk jo’ li Kolonel, 25–26).

perel re kok’ k’anjel: naru ninxaqli jo’ aj yehol nawom chirix li Dios