“ວັນທີ 22–28 ເດືອນກຸມພາ. ຄຳສອນ ແລະ ພັນທະສັນຍາ 18–19: ‘ຄຸນຄ່າຂອງຈິດວິນຍານແມ່ນຍິ່ງໃຫຍ່,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 22–28 ເດືອນກຸມພາ. ຄຳສອນ ແລະ ພັນທະສັນຍາ 18–19,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ໄຮ່ຂອງມາຕິນ ແຮຣິສ, ໂດຍ ອາລ໌ ຣາວສ໌

ວັນທີ 22–28 ເດືອນກຸມພາ

ຄຳສອນ ແລະ ພັນທະສັນຍາ 18–19

“ຄຸນຄ່າຂອງຈິດວິນຍານແມ່ນຍິ່ງໃຫຍ່”

ການເປີດເຜີຍຢູ່ໃນ ຄຳສອນ ແລະ ພັນທະສັນຍາ ໄດ້ຖືກມອບໃຫ້ ເພື່ອເປັນການຕອບຕໍ່ສະຖານະການໃດໜຶ່ງໂດຍສະເພາະ ເກືອບເຖິງ 200 ປີ ມາແລ້ວ, ແຕ່ຫລັກທຳທີ່ມັນສິດສອນ ແມ່ນບໍ່ມີກຳນົດເວລາ. ໃຫ້ຊອກຫາຫລັກທຳເຫລົ່ານັ້ນ ຂະນະທີ່ທ່ານອ່ານ, ແລະ ໃຫ້ພິຈາລະນາວິທີທີ່ມັນກ່ຽວຂ້ອງກັບທ່ານແນວໃດ.

ບັນທຶກຄວາມປະທັບໃຈຂອງທ່ານ

ມາຕິນ ແລະ ນາງລູສີ ແຮຣິສ ໄດ້ມີໄຮ່ທີ່ດີທີ່ສຸດ ຢູ່ໃນເມືອງພາໄມຣາ, ລັດນິວຢອກ. ເຂົາເຈົ້າໄດ້ໃຊ້ເວລາຫລາຍປີ ກ່ອນຈະມີມັນ, ແລະ ມັນໄດ້ຊ່ວຍເຂົາເຈົ້າລ້ຽງດູຄອບຄົວ, ແລະ ໄດ້ໃຫ້ເຂົາເຈົ້າມີຖານະດີຢູ່ໃນຊຸມຊົນ. ແຕ່ໃນປີ 1829 ເຫັນໄດ້ຢ່າງແຈ້ງຊັດວ່າ ພຣະຄຳພີມໍມອນສາມາດຖືກຈັດພິມໄດ້ ພຽງແຕ່ເມື່ອມາຕິນຕ້ອງເອົາໄຮ່ຂອງລາວໄປມັດຈຳ ເພື່ອຈ່າຍຜູ້ພິມເທົ່ານັ້ນ. ມາຕິນມີປະຈັກພະຍານເຖິງພຣະຄຳພີມໍມອນ, ແຕ່ນາງລູສີບໍ່ມີ. ຖ້າຫາກມາຕິນເອົາໄຮ່ໄປມັດຈຳ ແລະ ພຣະຄຳພີມໍມອນຂາຍບໍ່ອອກ, ແລ້ວເຂົາເຈົ້າຈະສູນເສຍໄຮ່ຂອງຕົນໄປ ແລະ ຈະສ້າງບັນຫາໃຫ້ແກ່ການແຕ່ງງານຂອງລາວ. ບໍ່ວ່າໃນເວລາໃດ ກໍຈະເປັນໃນເວລາໜຶ່ງ ທີ່ເຮົາທຸກຄົນຈະປະເຊີນກັບຄຳຖາມ ທີ່ຄືກັນກັບທີ່ມາຕິນມີ ທີ່ວ່າ: ພຣະກິດຕິຄຸນຂອງພຣະເຢຊູຄຣິດມີຄ່າຕໍ່ເຮົາຫລາຍປານໃດ? ເຮົາຈະເຕັມໃຈເສຍສະລະຫຍັງແດ່ ເພື່ອຊ່ວຍສ້າງສາອານາຈັກຂອງພຣະເຈົ້າ? ມັນອາດຊ່ວຍເຮົາໄດ້ ທີ່ຈະຈື່ຈຳວ່າ ບໍ່ມີໃຜທີ່ເຄີຍເສຍສະລະ ເພື່ອເປັນພອນໃຫ້ແກ່ລູກໆຂອງພຣະເຈົ້າ ຫລາຍໄປກວ່າພຣະເຢຊູຄຣິດ, “ຜູ້ຍິ່ງໃຫຍ່ທີ່ສຸດ” (ຄຳສອນ ແລະ ພັນທະສັນຍາ 19:18).

ມາຕິນໄດ້ຕັດສິນໃຈເອົາໄຮ່ຂອງລາວໄປມັດຈຳ. ການເສຍສະລະຂອງລາວໄດ້ຈ່າຍຄ່າພິມ ພຣະຄຳພີຈຳນວນ 5,000 ເຫລັ້ມ. ແລະ ປະຈຸບັນນີ້, ຫລາຍກວ່າ 190 ລ້ານເຫລັ້ມໄດ້ຖືກພິມ, ຫລາຍລ້ານຄົນຕະຫລອດທົ່ວໂລກໄດ້ຮັບພອນ.

ສຳລັບລາຍລະອຽດເພີ່ມເຕີມກ່ຽວກັບການຈັດພິມພຣະຄຳພີມໍມອນ, ໃຫ້ເບິ່ງ Saints, 1:76–84.

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 18:10–16

ພຣະຜູ້ເປັນເຈົ້າຊື່ນຊົມເມື່ອເຮົາກັບໃຈ.

ໃຫ້ສັງເກດເບິ່ງ ຄຳວ່າ ກັບໃຈ ແລະ ການກັບໃຈ ຖືກໃຊ້ຈັກເທື່ອ ຕະຫລອດທົ່ວ ຄຳສອນ ແລະ ພັນທະສັນຍາ 18 ແລະ 19, ແລະ ໄຕ່ຕອງກ່ຽວກັບສິ່ງທີ່ທ່ານໄດ້ຮຽນຮູ້ ຈາກຖ້ອຍຄຳເຫລົ່ານີ້ ທຸກເທື່ອທີ່ມັນຖືກໃຊ້. ໃຫ້ພິຈາລະນາ ໂດຍສະເພາະ ຄຳສອນ ແລະ ພັນທະສັນຍາ 18:10–16; ເຖິງວິທີທີ່ຂໍ້ເຫລົ່ານີ້ ມີຜົນກະທົບຕໍ່ຄວາມຮູ້ສຶກຂອງທ່ານກ່ຽວກັບການກັບໃຈ—ການກັບໃຈຂອງທ່ານເອງ ແລະ ໜ້າທີ່ ທີ່ຈະເຊື້ອເຊີນຄົນອື່ນໃຫ້ກັບໃຈແນວໃດ?

ເບິ່ງ ແອວມາ 36:18–21; Dale G. Renlund, “Repentance: A Joyful Choice,” Ensign ຫລື Liahona, Nov. 2016, 121–24 ນຳອີກ.

ຄຳສອນ ແລະ ພັນທະສັນຍາ 18:34–36

ເຮົາສາມາດໄດ້ຍິນສຸລະສຽງຂອງພຣະຜູ້ເປັນເຈົ້າ ໃນຄຳສອນ ແລະ ພັນທະສັນຍາ.

ຖ້າຫາກມີຄົນຖາມທ່ານວ່າ ສຸລະສຽງຂອງພຣະຜູ້ເປັນເຈົ້າເປັນແບບໃດ, ທ່ານຊິວ່າແນວໃດ? ໃຫ້ຄິດກ່ຽວກັບຄຳຖາມຂໍ້ນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 18:34–36. ທ່ານໄດ້ຮຽນຮູ້ຫຍັງແດ່ກ່ຽວກັບສຸລະສຽງຂອງພຣະຜູ້ເປັນເຈົ້າ ຈາກການອ່ານຄຳສອນ ແລະ ພັນທະສັນຍາ? ທ່ານສາມາດເຮັດຫຍັງໄດ້ແດ່ ເພື່ອຈະໄດ້ຍິນສຸລະສຽງຂອງພຣະອົງຢ່າງແຈ່ມແຈ້ງຫລາຍກວ່າເກົ່າ?

ຄຳສອນ ແລະ ພັນທະສັນຍາ 19:15–20

ພຣະເຢຊູຄຣິດໄດ້ຮັບທຸກທໍລະມານ ເພື່ອວ່າເຮົາຈະສາມາດກັບໃຈ ແລະ ມາຫາພຣະອົງ.

ພຣະຄຳພີໃໝ່ບັນຍາຍເຖິງການຮັບທຸກທໍລະມານຂອງພຣະຜູ້ຊ່ວຍໃຫ້ລອດ ຢູ່ໃນເຄັດເຊມາເນ ຈາກມຸມມອງຂອງຜູ້ທີ່ໄດ້ສັງເກດເບິ່ງ. ໃນ ຄຳສອນ ແລະ ພັນທະສັນຍາ 19:15–20, ພຣະເຢຊູຄຣິດໄດ້ບອກເຖິງການຮັບທຸກທໍລະມານຂອງພຣະອົງ ໃນພຣະຄຳຂອງພຣະອົງເອງ. ຂະນະທີ່ທ່ານອ່ານເລື່ອງລາວທີ່ສັກສິດ ແລະ ເປັນສ່ວນຕົວນີ້, ໃຫ້ຊອກຫາຖ້ອຍຄຳ ແລະ ສຳນວນທີ່ບັນຍາຍເຖິງການຮັບທຸກທໍລະມານຂອງພຣະຜູ້ຊ່ວຍໃຫ້ລອດ. ໃຫ້ພິຈາລະນາສິ່ງທີ່ແຕ່ລະຄຳ ຫລື ແຕ່ລະສຳນວນສິດສອນທ່ານຫຍັງແດ່. ເປັນຫຍັງພຣະຜູ້ຊ່ວຍໃຫ້ລອດຈຶ່ງເຕັມພຣະໄທທີ່ຈະຮັບທຸກທໍລະມານ? ໃຫ້ຄິດທີ່ຈະບັນທຶກຄວາມຮູ້ສຶກຂອງທ່ານກ່ຽວກັບພຣະເຢຊູຄຣິດ ແລະ ການເສຍສະລະຂອງພຣະອົງເພື່ອທ່ານ.

ເບິ່ງ ໂຢຮັນ 15:13; ໂມໄຊຢາ 3:7; ແອວມາ 7:11–12; ຄຳສອນ ແລະ ພັນທະສັນຍາ 18:10–13.

ພຣະເຢຊູອູ້ມເດັກນ້ອຍຜູ້ຊາຍ — ຄຸນຄ່າຂອງຈິດວິນຍານ, ໂດຍ ລີສ໌ ລີມັນ ສະວິນໂດ

ຄຳສອນ ແລະ ພັນທະສັນຍາ 19:26–27, 34–41

ພອນຂອງພຣະເຈົ້າແມ່ນຍິ່ງໃຫຍ່ກວ່າຊັບສົມບັດຂອງແຜ່ນດິນໂລກ.

ພຣະຄຳພີມໍມອນບໍ່ໄດ້ຂາຍດີປານໃດຢູ່ເມືອງພາໄມຣາ, ແລະ ເພາະດ້ວຍເຫດນີ້, ມາຕິນຈຶ່ງໄດ້ຂາຍທີ່ດິນຕອນໃຫຍ່ຂອງໄຮ່ລາວ ເພື່ອຈ່າຍຄ່າໜີ້ (ເບິ່ງ “The Contributions of Martin Harris,” Revelations in Context, 7–8). ໃຫ້ໄຕ່ຕອງກ່ຽວກັບການເສຍສະລະນັ້ນ—ແລະ ພອນທີ່ທ່ານໄດ້ຮັບ ເພາະການເສຍສະລະ—ຂະນະທີ່ທ່ານອ່ານຂໍ້ເຫລົ່ານີ້. ທ່ານກໍຍັງສາມາດຄິດກ່ຽວກັບສິ່ງທີ່ພຣະຜູ້ເປັນເຈົ້າໄດ້ຂໍໃຫ້ທ່ານເສຍສະລະນຳອີກ. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ດົນໃຈທ່ານໃຫ້ເຮັດການເສຍສະລະເຫລົ່ານີ້ ດ້ວຍ “ຄວາມປິຕິຍິນດີ” ແລະ “ເຊີດຊູໃຈ”? (ເບິ່ງ ຂໍ້ທີ 15–20 ນຳອີກ).

ຄຳສອນ ແລະ ພັນທະສັນຍາ 19:23

ຄວາມສະຫງົບມາເຖິງຈາກການຮຽນຮູ້ຈາກພຣະເຢຊູຄຣິດ ແລະ ຈາກການຕິດຕາມພຣະອົງ.

ໃຫ້ພິຈາລະນາຄຳເຊື້ອເຊີນຂອງພຣະຜູ້ຊ່ວຍໃຫ້ລອດ ທີ່ວ່າ “ຈົ່ງຮຽນຮູ້ຈາກເຮົາ.” ທ່ານຮຽນຮູ້ຫຍັງແດ່ກ່ຽວກັບພຣະເຢຊູຄຣິດ ຢູ່ໃນ ຄຳສອນ ແລະ ພັນທະສັນຍາ 19? ໃຫ້ບັນທຶກຄວາມຄິດຂອງທ່ານ, ແລະ ໄຕ່ຕອງວ່າຄວາມຈິງເຫລົ່ານີ້ກ່ຽວກັບພຣະຜູ້ຊ່ວຍໃຫ້ລອດ ຊ່ວຍທ່ານພົບຄວາມສະຫງົບແນວໃດ. ຄຳວ່າ “ຈົ່ງເດີນໄປໃນຄວາມອ່ອນໂຍນແຫ່ງພຣະວິນຍານ [ຂອງພຣະອົງ]” ມີຄວາມໝາຍແນວໃດຕໍ່ທ່ານ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 18:1–5.ບາງທີສະມາຊິກໃນຄອບຄົວສາມາດເລົ່າກ່ຽວກັບ “ຫລາຍຄັ້ງ” (ຂໍ້ທີ 2) ທີ່ພຣະວິນຍານໄດ້ເປັນພະຍານຕໍ່ເຂົາເຈົ້າວ່າ ພຣະຄຳພີແມ່ນຈິງແທ້, ດັ່ງທີ່ພຣະອົງໄດ້ເປັນພະຍານຕໍ່ອໍລີເວີ ຄາວເດີຣີ. ຄອບຄົວຂອງທ່ານຈະສາມາດ “ໄວ້ວາງໃຈເລື່ອງທີ່ຖືກຂຽນໄວ້” (ຂໍ້ທີ 3) ຢູ່ໃນພຣະຄຳພີແນວໃດ? ທ່ານຈະສາມາດສ້າງພື້ນຖານຂອງຄອບຄົວທ່ານ ຢູ່ເທິງ “ດານຫີນ” (ຂໍ້ທີ 4) ຂອງພຣະກິດຕິຄຸນໄດ້ແນວໃດ?

ຄຳສອນ ແລະ ພັນທະສັນຍາ 18:10–13; 19:16–19.ສະມາຊິກໃນຄອບຄົວແຕ່ລະຄົນສາມາດອ່ານ ຄຳສອນ ແລະ ພັນທະສັນຍາ 18:10–13 ແລະ ເອົາຊື່ຂອງຕົນໄປໃສ່ແທນຄຳວ່າ “ຈິດວິນຍານ,” ແລະ “ມະນຸດທັງປວງ.” ແລ້ວພວກທ່ານສາມາດສົນທະນາເຖິງວິທີທີ່ຂໍ້ເຫລົ່ານີ້ຊ່ວຍເຮົາ ໃຫ້ເຂົ້າໃຈຄຸນຄ່າຂອງເຮົາຕໍ່ພຣະບິດາ ແລະ ພຣະບຸດແນວໃດ (ເບິ່ງ ຄຳສອນ ແລະ ພັນທະສັນຍາ 19:16–19).

ຄຳສອນ ແລະ ພັນທະສັນຍາ 18:21–25.ຊື່ຂອງສະມາຊິກໃນຄອບຄົວຂອງທ່ານມີຄວາມໝາຍພິເສດແນວໃດ? ບາງທີພວກທ່ານສາມາດເວົ້າລົມກ່ຽວກັບວ່າ ເປັນຫຍັງຊື່ຈຶ່ງສຳຄັນ ແລະ ການຮັບເອົາພຣະນາມຂອງພຣະເຢຊູ ໝາຍຄວາມວ່າແນວໃດ (ເບິ່ງ ໂມໄຊຢາ 5:7). ນີ້ອາດເປັນໂອກາດທີ່ດີ ທີ່ຈະຊ່ວຍສະມາຊິກໃນຄອບຄົວໃຫ້ກະກຽມທີ່ຈະຮັບເອົາພຣະນາມຂອງພຣະຄຣິດ ເວລາເຂົາເຈົ້າຮັບບັບຕິສະມາ.

ຄຳສອນ ແລະ ພັນທະສັນຍາ 19:15–20.ເພື່ອຊ່ວຍຄອບຄົວຂອງທ່ານໃຫ້ມີປະສົບການທີ່ມີຄວາມໝາຍກັບຂໍ້ເຫລົ່ານີ້, ບາງທີທ່ານຄວນອ່ານມັນ ຂະນະທີ່ສະແດງຮູບພຣະເຢຊູຄຣິດ (ໃບທີ່ມາກັບ ໂຄງຮ່າງນີ້). ແລ້ວສະມາຊິກໃນຄອບຄົວສາມາດບອກເຖິງຄວາມຮູ້ສຶກຂອງເຂົາເຈົ້າກ່ຽວກັບພຣະຜູ້ຊ່ວຍໃຫ້ລອດ. ເພງສວດທີ່ມັກຊອບກ່ຽວກັບພຣະຜູ້ຊ່ວຍໃຫ້ລອດ ກໍສາມາດເຊື້ອເຊີນພຣະວິນຍານໃຫ້ມາສະຖິດຢູ່ນຳຄືກັນ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ຂ້າເຝົ້າພິສະຫວົງ,” ເພງສວດ ແລະ ເພງຂອງເດັກນ້ອຍ, ເລກທີ 24.

ການປັບປຸງການສຶກສາສ່ວນຕົວ

ຖາມຄຳຖາມ. ຄຳສອນ ແລະ ພັນທະສັນຍາ ເປັນຫລັກຖານວ່າ ຄຳຖາມນຳພາໄປສູ່ການເປີດເຜີຍ. ຂະນະທີ່ທ່ານສຶກສາພຣະຄຳພີ, ໃຫ້ບັນທຶກຄຳຖາມທີ່ທ່ານມີ. ແລ້ວໃຫ້ໄຕ່ຕອງ ແລະ ອະທິຖານ ເພື່ອສະແຫວງຫາຄຳຕອບ.

ພຣະຄຣິດອະທິຖານຢູ່ໃນສວນເຄັດເຊມາເນ, ໂດຍ ເຮີແມນ ຄະລີເມັ້ນສ໌