“ວັນທີ 8–14 ເດືອນກຸມພາ. ຄຳສອນ ແລະ ພັນທະສັນຍາ 12–13; ໂຈເຊັບ ສະມິດ—ປະຫວັດ 1:66–75: ‘ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 8–14 ເດືອນກຸມພາ. ຄຳສອນ ແລະ ພັນທະສັນຍາ 12–13; ໂຈເຊັບ ສະມິດ—ປະຫວັດ 1:66–75,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ວັນທີ 8–14 ເດືອນກຸມພາ
ຄຳສອນ ແລະ ພັນທະສັນຍາ 12–13; ໂຈເຊັບ ສະມິດ—ປະຫວັດ 1:66–75
“ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ”
ໂຈເຊັບ ສະມິດ ແລະ ອໍລີເວີ ຄາວເດີຣີ ໄດ້ຮັບຄວາມຮູ້ເພີ່ມເຕີມ ຂະນະທີ່ພວກເພິ່ນໄດ້ອະທິຖານກ່ຽວກັບຄວາມຈິງທີ່ພວກເພິ່ນໄດ້ຮັບໃນພຣະຄຳພີ (ເບິ່ງ ໂຈເຊັບ ສະມິດ—ປະຫວັດ 1:68). ທ່ານຈະເຮັດຕາມຕົວຢ່າງຂອງພວກເພິ່ນແນວໃດ?
ບັນທຶກຄວາມປະທັບໃຈຂອງທ່ານ
ຜູ້ຄົນສ່ວນຫລາຍຕະຫລອດທົ່ວໂລກອາດບໍ່ເຄີຍໄດ້ຍິນກ່ຽວກັບສະຖານທີ່ແຫ່ງໜຶ່ງ ທີ່ເອີ້ນວ່າເມືອງຮາມໂມນີ, ລັດເພັນໂຊເວເນຍ. ແຕ່ພຣະຜູ້ເປັນເຈົ້າມັກເລືອກສະຖານທີ່ ທີ່ຜູ້ຄົນບໍ່ຮູ້ຈັກ ສຳລັບເຫດການທີ່ສຳຄັນທີ່ສຸດ ໃນອານາຈັກຂອງພຣະອົງ. ຢູ່ໃນປ່າແຫ່ງໜຶ່ງ ໃກ້ເມືອງຮາມໂມນີ ໃນວັນທີ 15 ເດືອນພຶດສະພາ, 1829, ໂຢຮັນບັບຕິສະໂຕໄດ້ມາປະກົດໃນລັກສະນະຜູ້ທີ່ໄດ້ຟື້ນຄືນຊີວິດແລ້ວ ຕໍ່ໂຈເຊັບ ສະມິດ ແລະ ອໍລີເວີ ຄາວເດີຣີ. ເພິ່ນໄດ້ວາງມືໃສ່ເທິງຫົວຂອງພວກເພິ່ນ ແລະ ໄດ້ມອບຖານະປະໂລຫິດແຫ່ງອາໂຣນໃຫ້ພວກເພິ່ນ, ໂດຍການເອີ້ນພວກເພິ່ນວ່າເປັນ “ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ” (ຄຳສອນ ແລະ ພັນທະສັນຍາ 13:1).
ການທີ່ຖືກນັບຖືວ່າເປັນເພື່ອນຜູ້ຮັບໃຊ້ຮ່ວມກັບໂຢຮັນບັບຕິສະໂຕ, ຜູ້ໄດ້ໃຫ້ບັບຕິສະມາແກ່ພຣະຜູ້ຊ່ວຍໃຫ້ລອດ ແລະ ໄດ້ຕຽມທາງສຳລັບການສະເດັດມາຂອງພຣະອົງ (ເບິ່ງ ມັດທາຍ 3:1–6, 13–17), ຄົງເຮັດໃຫ້ຊາຍທັງສອງ ຜູ້ມີອາຍຸຊາວປາຍປີ ຖ່ອມຕົວ ແລະ ປາບປື້ມທີ່ສຸດ. ໃນເວລານັ້ນ, ໂຈເຊັບ ແລະ ອໍລີເວີເປັນບຸກຄົນທີ່ຜູ້ຄົນສ່ວນຫລາຍບໍ່ຮູ້ຈັກ, ຄືກັນກັບເມືອງຮາມໂມນີ ທີ່ບໍ່ມີຫລາຍຄົນຮູ້ຈັກ. ແຕ່ການຮັບໃຊ້ໃນວຽກງານຂອງພຣະເຈົ້າ ແມ່ນກ່ຽວກັບ ວິທີ ທີ່ເຮົາຮັບໃຊ້ສະເໝີມາ, ບໍ່ແມ່ນກ່ຽວກັບວ່າ ຢາກໃຫ້ຜູ້ຄົນເຫັນເຮົາເຮັດ. ເຖິງແມ່ນວ່າການມີສ່ວນຮ່ວມຂອງທ່ານບາງເທື່ອອາດເບິ່ງຄືວ່າເລັກນ້ອຍ ຫລື ບໍ່ມີໃຜເຫັນກໍຕາມ, ແຕ່ທ່ານກໍເປັນເພື່ອນຜູ້ຮັບໃຊ້ໃນວຽກງານອັນຍິ່ງໃຫຍ່ຂອງພຣະຜູ້ເປັນເຈົ້າຄືກັນ.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະຜູ້ເປັນເຈົ້າປະສົງໃຫ້ເຮົາຊ່ວຍສະຖາປະນາອຸດົມການຂອງຊີໂອນ.
ໂຈເຊັບ ໄນ້ ຜູ້ພໍ່ ແລະ ນາງພໍລີ ພັນລະຍາຂອງເພິ່ນ, ໄດ້ພົບກັບໂຈເຊັບ ສະມິດ ຜູ້ມີອາຍຸໄດ້ 20 ປີ, ຕອນເພິ່ນໄດ້ເລີ່ມທຳງານຢູ່ໃນໄຮ່ຂອງພວກເພິ່ນ ຢູ່ເມືອງໂຄນສະວຽວ, ລັດນິວຢອກ. ໂຈເຊັບ ໄນ້ ໄດ້ບັນຍາຍກ່ຽວກັບເພິ່ນ ວ່າເປັນພະນັກງານທີ່ດີທີ່ສຸດ ທີ່ເຄີຍມີ. ເພິ່ນເຊື່ອປະຈັກພະຍານຂອງໂຈເຊັບ ສະມິດ ກ່ຽວກັບແຜ່ນຈາລຶກຄຳ ແລະ ໄດ້ພານາງພໍລີໄປຢ້ຽມຢາມໂຈເຊັບ ສະມິດ ຂະນະທີ່ເພິ່ນແປພຣະຄຳພີມໍມອນ ຢູ່ທີ່ບ້ານຂອງເພິ່ນ ຢູ່ເມືອງຮາມໂມນີ, ລັດເພັນໂຊເວເນຍ. ນາງກໍໄດ້ເຊື່ອທັນທີ. ຕະຫລອດຊີວິດຂອງພວກເພິ່ນ, ໂຈເຊັບ ແລະ ນາງພໍລີ ໄດ້ຊື່ສັດຕໍ່ພຣະກິດຕິຄຸນທີ່ຟື້ນຟູ. ສະມາຊິກຫລາຍກວ່າ 60 ຄົນ ຂອງຕະກຸນໄນ້ ໄດ້ເຂົ້າຮ່ວມ ແລະ ຊ່ວຍສະຖາປະນາສາດສະໜາຈັກ ຢູ່ລັດນິວຢອກ, ລັດໂອໄຮໂອ, ລັດມີເຊີຣີ, ເມືອງນາວູ, ແລະ ໃນທີ່ສຸດ ເມືອງເຊົາເລັກ.
ໂຈເຊັບ ໄນ້ ຢາກຮູ້ວ່າ ເພິ່ນຈະຊ່ວຍຫຍັງໄດ້ແດ່ ໃນວຽກງານຂອງພຣະຜູ້ເປັນເຈົ້າ. ຄຳຕອບຂອງພຣະຜູ້ເປັນເຈົ້າ (ປະຈຸບັນແມ່ນ ຄຳສອນ ແລະ ພັນທະສັນຍາ 12) ກ່ຽວຂ້ອງກັບ “ທຸກຄົນຜູ້ປາດຖະໜາທີ່ຈະນຳວຽກງານນີ້ອອກມາ ແລະ ສະຖາປະນາມັນຂຶ້ນ” (ຂໍ້ທີ 7)—ຮ່ວມທັງຕົວທ່ານ. ຄຳວ່າ “ທີ່ຈະນຳອອກມາ ແລະ ສະຖາປະນາອຸດົມການຂອງຊີໂອນ” ໝາຍຄວາມວ່າແນວໃດສຳລັບທ່ານ? (ຂໍ້ທີ 6). ຫລັກທຳ ແລະ ຄຸນສົມບັດໃດແດ່ ຢູ່ໃນ ຂໍ້ທີ 7–9 ຊ່ວຍທ່ານໃຫ້ເຮັດສິ່ງນີ້?
ເບິ່ງ “The Knight and Whitmer Families,” Revelations in Context, 20–24 ນຳອີກ.
ຖານະປະໂລຫິດແຫ່ງອາໂຣນໄດ້ຖືກຟື້ນຟູ ໂດຍໂຢຮັນບັບຕິສະໂຕ.
ໃນພຽງປະໂຫຍກດຽວ, ໂຢຮັນບັບຕິສະໂຕໄດ້ເປີດເຜີຍຄວາມຈິງຫລາຍຢ່າງກ່ຽວກັບຖານະປະໂລຫິດແຫ່ງອາໂຣນ. ໃຫ້ຄິດທີ່ຈະຂຽນທຸກສິ່ງທີ່ທ່ານໄດ້ຮຽນຮູ້ ຈາກພາກນີ້ໄວ້ (ຮ່ວມທັງຈາກຫົວຂໍ້ພາກ). ມັນອາດເປັນປະໂຫຍດ ທີ່ທ່ານຈະສຶກສາບາງສຳນວນທີ່ທ່ານພົບເຫັນ. ຕໍ່ໄປນີ້ແມ່ນຕົວຢ່າງຈຳນວນໜຶ່ງ ເພື່ອຊ່ວຍທ່ານເລີ່ມຕົ້ນ:
-
“ຂໍກະແຈຂອງການປະຕິບັດຂອງເຫລົ່າທູດ”: 2 ນີໄຟ 32:2–3; ໂມໂຣໄນ 7:29–32; Jeffrey R. Holland, “The Ministry of Angels,” Ensign ຫລື Liahona, Nov. 2008, 29–31; ຄູ່ມືພຣະຄຳພີ, “ເຫລົ່າທູດ,” scriptures.ChurchofJesusChrist.org
-
“ຂໍກະແຈ … ຂອງພຣະກິດຕິຄຸນແຫ່ງການກັບໃຈ”: 3 ນີໄຟ 27:16–22; ຄຳສອນ ແລະ ພັນທະສັນຍາ 84:26–27; Dale G. Renlund, “The Priesthood and the Savior’s Atoning Power,” Ensign ຫລື Liahona, Nov. 2017, 64–67
-
“ພວກລູກຊາຍຂອງເລວີ”: ຈົດບັນຊີ 3:5–13; ຄຳສອນ ແລະ ພັນທະສັນຍາ 84:31–34; ຄູ່ມືພຣະຄຳພີ, “ຖານະປະໂລຫິດແຫ່ງອາໂຣນ,” “ເລວີ,” scriptures.ChurchofJesusChrist.org
ພອນຢ່າງໃດແດ່ທີ່ທ່ານໄດ້ຮັບ ຜ່ານທາງພິທີການຂອງຖານະປະໂລຫິດແຫ່ງອາໂຣນ?
ໂຈເຊັບ ສະມິດ ໃຫ້ບັບຕິສະມາແກ່ອໍລີເວີ ຄາວເດີຣີ, ໂດຍ ແດວ ພາສັນ
ພິທີການຕ່າງໆຊ່ວຍເຮົາໃຫ້ເຂົ້າເຖິງອຳນາດຂອງພຣະເຈົ້າ.
ຊິດສະເຕີ ແຄໂຣ ເອັມ ສະຕີບເຟັນ, ອະດີດທີ່ປຶກສາໃນຝ່າຍປະທານສະມາຄົມສະຕີສົງເຄາະສາມັນ, ໄດ້ສອນວ່າ: “ພິທີການ ແລະ ພັນທະສັນຍາຂອງຖານະປະໂລຫິດຊ່ວຍເຮົາໃຫ້ໄດ້ຮັບພອນອັນບໍລິບູນ ທີ່ພຣະເຈົ້າໄດ້ສັນຍາໄວ້, ຊຶ່ງຖືກເຮັດໃຫ້ເປັນໄປໄດ້ ໂດຍການຊົດໃຊ້ຂອງພຣະຜູ້ຊ່ວຍໃຫ້ລອດ. ມັນຈະຈັດຕຽມບຸດ ແລະ ທິດາຂອງພຣະເຈົ້າດ້ວຍອຳນາດ, ອຳນາດຂອງພຣະເຈົ້າ, ແລະ ໃຫ້ເຮົາມີໂອກາດທີ່ຈະໄດ້ຮັບຊີວິດນິລັນດອນ” (“Do We Know What We Have?” Ensign ຫລື Liahona, Nov. 2013, 12.
ຂະນະທີ່ທ່ານອ່ານ ໂຈເຊັບ ສະມິດ—ປະຫວັດ 1:66–75, ຮ່ວມທັງໝາຍເຫດຢູ່ໃນທ້າຍຂອງ ຂໍ້ທີ 71, ໃຫ້ຄິດເຖິງສິ່ງທີ່ໄດ້ດົນໃຈໂຈເຊັບ ແລະ ອໍລີເວີໃຫ້ທູນຖາມກ່ຽວກັບການບັບຕິສະມາ, ແລະ ໃຫ້ສັງເກດເບິ່ງພອນທີ່ມາສູ່ພວກເພິ່ນ ຫລັງຈາກໄດ້ມີພາກສ່ວນໃນພິທີການຂອງຖານະປະໂລຫິດ. ໃຫ້ຄິດທີ່ຈະອ່ານປຶ້ມບັນທຶກສ່ວນຕົວ ທີ່ທ່ານອາດໄດ້ຂຽນໄວ້ ຫລັງຈາກທີ່ໄດ້ຮັບພິທີການ ຫລື ໄດ້ບັນທຶກຄວາມຊົງຈຳຂອງວາລະໂອກາດເຫລົ່ານັ້ນ. ພອນຢ່າງໃດແດ່ທີ່ທ່ານໄດ້ຮັບ ຜ່ານທາງພິທີການຂອງຖານະປະໂລຫິດ?
ເບິ່ງ ຄຳສອນ ແລະ ພັນທະສັນຍາ 84:20–22; Saints, 1:65–68 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 12:8.ເປັນຫຍັງບຸກຄະລິກລັກສະນະທີ່ລະບຸໄວ້ຢູ່ໃນຂໍ້ນີ້ ຈຶ່ງຈຳເປັນເມື່ອເຮົາເຮັດວຽກງານຂອງພຣະຜູ້ເປັນເຈົ້າ?
-
ຄຳສອນ ແລະ ພັນທະສັນຍາ 13.ແມ່ນຫຍັງຄືສິ່ງທີ່ສ້າງສັດທາໃຫ້ຄອບຄົວຂອງທ່ານ ໃນການຟື້ນຟູຖານປະໂລຫິດແຫ່ງອາໂຣນ? ຮູບພາບທີ່ມາກັບໂຄງຮ່າງນີ້ ສາມາດຊ່ວຍຄອບຄົວຂອງທ່ານ ໃຫ້ວາດພາບເຫັນການຟື້ນຟູຖານະປະໂລຫິດແຫ່ງອາໂຣນໄດ້. ເຂົາເຈົ້າຢາກແຕ້ມຮູບກ່ຽວກັບເຫດການນັ້ນບໍ່, ອີງຕາມສິ່ງທີ່ເຂົາເຈົ້າໄດ້ອ່ານ ຢູ່ໃນ ໂຈເຊັບ ສະມິດ—ປະຫວັດ 1:68–74? ເຂົາເຈົ້າກໍສາມາດແບ່ງປັນປະສົບການຂອງເຂົາເຈົ້ານຳອີກ ກ່ຽວກັບອຳນາດຂອງຖານະປະໂລຫິດ ໃນຊີວິດຂອງເຂົາເຈົ້າ.
-
ໂຈເຊັບ ສະມິດ—ປະຫວັດ 1:68.ເຮົາຈະເຮັດຕາມຕົວຢ່າງຂອງໂຈເຊັບ ສະມິດ ແລະ ອໍລີເວີ ຄາວເດີຣີ ແນວໃດ ເພື່ອຊອກຫາຄຳຕອບໃຫ້ແກ່ຄຳຖາມຂອງເຮົາ? ບາງທີ ຂະນະທີ່ພວກທ່ານອ່ານນຳກັນ, ພວກທ່ານສາມາດເຮັດເປັນນິໄສ ທີ່ຈະຢຸດ ແລະ ຖາມຖ້າຫາກວ່າ ມີຜູ້ໃດມີຄຳຖາມບໍ ກ່ຽວກັບສິ່ງທີ່ເຂົາເຈົ້າກຳລັງອ່ານ.
-
ໂຈເຊັບ ສະມິດ—ປະຫວັດ 1:71, ໝາຍເຫດ.ແມ່ນຫຍັງທີ່ປະທັບໃຈສະມາຊິກໃນຄອບຄົວຂອງທ່ານ ກ່ຽວກັບຖ້ອຍຄຳຂອງອໍລີເວີ ຄາວເດີຣີ? ແມ່ນຫຍັງຄື “ວັນທີ່ບໍ່ສາມາດລືມ” ບາງຢ່າງ ສຳລັບຄອບຄົວຂອງທ່ານ?
-
ໂຈເຊັບ ສະມິດ—ປະຫວັດ 1:73–74.ພຣະວິນຍານບໍລິສຸດ ມີຜົນກະທົບຫຍັງແດ່ຕໍ່ໂຈເຊັບ ແລະ ອໍລີເວີ? ເວລາໃດທີ່ພຣະວິນຍານໄດ້ຊ່ວຍຄອບຄົວຂອງທ່ານ ໃຫ້ເຂົ້າໃຈພຣະຄຳພີ ແລະ ປິຕິຍິນດີໃນພຣະຜູ້ເປັນເຈົ້າ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພື້ນໝັ້ນຄົງໜັກໜາ,” ເພງສວດ ແລະ ເພງຂອງເດັກນ້ອຍ, 6.
ການປັບປຸງການສິດສອນຂອງເຮົາ
ສຶກສາຫົວຂໍ້ໜຶ່ງ. ພ້ອມກັນເປັນຄອບຄົວ, ໃຫ້ເລືອກຫົວຂໍ້ໜຶ່ງທີ່ພວກທ່ານມັກສຶກສາຢ່າງລະອຽດ. ຍົກຕົວຢ່າງ, ອາທິດນີ້ ທ່ານອາດໃຊ້ ຄູ່ມືຫົວຂໍ້ ຫລື ຄູ່ມືພຣະຄຳພີ (scriptures.ChurchofJesusChrist.org) ເພື່ອຊອກຫາຂໍ້ພຣະຄຳພີກ່ຽວກັບຖານະປະໂລຫິດແຫ່ງອາໂຣນ.
ແກ່ພວກທ່ານ ເພື່ອນຜູ້ຮັບໃຊ້ຮ່ວມກັບຂ້າພະເຈົ້າ, ໂດຍ ລິນດາ ເຄີລີ ຄຣິສເຕັນເຊັນ