“ວັນທີ 1–7 ເດືອນກຸມພາ. ຄຳສອນ ແລະ ພັນທະສັນຍາ 10–11: ‘ເພື່ອເຈົ້າຈະອອກມາຢ່າງຜູ້ຊະນະ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 1–7 ເດືອນກຸມພາ. ຄຳສອນ ແລະ ພັນທະສັນຍາ 10–11,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ໃບຈຳລອງຂອງຕົ້ນສະບັບດັ້ງເດີມຂອງພຣະຄຳພີມໍມອນ.
ວັນທີ 1–7 ເດືອນກຸມພາ
ຄຳສອນ ແລະ ພັນທະສັນຍາ 10–11
“ເພື່ອເຈົ້າຈະອອກມາຢ່າງຜູ້ຊະນະ”
ການບັນທຶກຄວາມປະທັບໃຈລະຫວ່າງການອ່ານພຣະຄຳພີ ກໍຄືກັນກັບການເພາະປູກເມັດພືດ; ແມ່ນແຕ່ຄວາມປະທັບໃຈອັນເລັກນ້ອຍ ກໍສາມາດນຳໄປສູ່ການເປີດເຜີຍສ່ວນຕົວທີ່ມີຄວາມໝາຍໄດ້.
ບັນທຶກຄວາມປະທັບໃຈຂອງທ່ານ
ຂະນະທີ່ການແປພຣະຄຳພີມໍມອນດຳເນີນໄປໜ້າ, ກໍມີຄຳຖາມໜຶ່ງເກີດຂຶ້ນຕາມທຳມະຊາດວ່າ: ໂຈເຊັບ ສະມິດ ແລະ ອໍລີເວີ ຄາວເດີຣີ ຄວນເຮັດຫຍັງກ່ຽວກັບການແປທີ່ສູນເສຍໄປນັ້ນ? ສິ່ງທີ່ຖືກຕ້ອງອາດເປັນການກັບຄືນໄປແປພາກສ່ວນນັ້ນຄືນໃໝ່, ແຕ່ພຣະຜູ້ເປັນເຈົ້າສາມາດເຫັນບາງສິ່ງທີ່ພວກເພິ່ນບໍ່ສາມາດເຫັນໄດ້—ກຸ່ມຜູ້ຊາຍທີ່ຊົ່ວຮ້າຍໄດ້ວາງແຜນທີ່ຈະດັດແປງຖ້ອຍຄຳຢູ່ໃນພາກສ່ວນນັ້ນ ເພື່ອສ້າງຄວາມສົງໄສໃຫ້ແກ່ວຽກງານທີ່ໄດ້ຮັບການດົນໃຈຂອງໂຈເຊັບ. ພຣະເຈົ້າໄດ້ວາງແຜນທີ່ຈະຂັດຂວາງຄວາມພະຍາຍາມຂອງຊາຕານ ແລະ ຊົດເຊີຍສິ່ງທີ່ໄດ້ສູນເສຍໄປ. ແຜນນີ້ໄດ້ເລີ່ມຕົ້ນເມື່ອຫລາຍພັນປີກ່ອນ ຕອນສາດສະດານີໄຟຮູ້ສຶກໄດ້ຮັບການດົນໃຈ ທີ່ຈະເຮັດບັນທຶກອັນທີສອງ ທີ່ກ່າວເຖິງຊ່ວງເວລາດຽວກັນ. ຫລັງຈາກນັ້ນ, ມໍມອນໄດ້ຖືກດົນໃຈໃຫ້ລວມບັນທຶກນີ້ໄວ້ຢູ່ໃນພຣະຄຳພີມໍມອນ “ເພື່ອຈຸດປະສົງອັນສະຫລາດ” ທີ່ພຣະຜູ້ເປັນເຈົ້າຮູ້ຈັກ (ເບິ່ງ ຄຳຂອງມໍມອນ 1:3–7).
“ຄວາມສະຫລຽວສະຫລາດຂອງເຮົາ,” ພຣະຜູ້ເປັນເຈົ້າກ່າວກັບໂຈເຊັບ, “ແມ່ນຍິ່ງໃຫຍ່ກວ່າເລ່ຫລ່ຽມຂອງມານ” (ຄຳສອນ ແລະ ພັນທະສັນຍາ 10:43). ນັ້ນຄືຂ່າວສານທີ່ໃຫ້ຄວາມໝັ້ນໃຈໃນວັນເວລາທີ່ຄືກັນກັບວັນເວລາຂອງເຮົາ, ເມື່ອຜູ້ປໍລະປັກກຳລັງພະຍາຍາມຢ່າງໜັກເພື່ອເຮັດໃຫ້ສັດທາອ່ອນແອລົງ. ຄືກັນກັບໂຈເຊັບ, ເຮົາສາມາດເປັນຄົນ “ສື່ຊັດ ແລະ ສືບຕໍ່” ເຮັດວຽກງານຂອງພຣະເຈົ້າ ທີ່ໄດ້ເອີ້ນເຮົາໃຫ້ເຮັດ (ຂໍ້ທີ 3). ແລ້ວເຮົາຈະພົບເຫັນວ່າ ພຣະອົງໄດ້ຈັດຫາວິທີທາງໃຫ້ເຮົາແລ້ວ ເພື່ອວ່າ “ປະຕູນະລົກຈະເອົາຊະນະ [ເຮົາ] ບໍ່ໄດ້” (ຂໍ້ທີ 69).
ເບິ່ງ Saints, 1:51–61.
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນ ແລະ ພັນທະສັນຍາ 10:1–33
ຊາຕານສະແຫວງຫາທີ່ຈະທຳລາຍວຽກງານຂອງພຣະເຈົ້າ.
ຊາຕານຢາກໃຫ້ເຮົາລືມວ່າມີມັນຢູ່—ຫລື ຢ່າງໜ້ອຍມັນຢາກໃຫ້ເຮົາບໍ່ຮູ້ວ່າ ມັນພະຍາຍາມທີ່ຈະມີອິດທິພົນເໜືອເຮົາ (ເບິ່ງ 2 ນີໄຟ 28:22–23). ແຕ່ພຣະຄຳຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 10 ເປີດເຜີຍວ່າ ຊາຕານຕໍ່ຕ້ານວຽກງານຂອງພຣະເຈົ້າຢ່າງບໍ່ລົດລະ ແລະ ບໍ່ຢູ່ບໍ່ເຊົາ. ຂະນະທີ່ທ່ານອ່ານ ຂໍ້ທີ 1–33, ໃຫ້ຊີ້ບອກວິທີທີ່ຊາຕານສະແຫວງຫາ ທີ່ຈະທຳລາຍວຽກງານຂອງພຣະເຈົ້າ ໃນວັນເວລາຂອງໂຈເຊັບ ສະມິດແນວໃດ (ເບິ່ງ ຂໍ້ທີ 62–63 ນຳອີກ). ມີຄວາມຄ້າຍຄືກັນຢ່າງໃດແດ່ ທີ່ທ່ານເຫັນວິທີທີ່ຊາຕານທຳງານໃນທຸກວັນນີ້? ທ່ານສາມາດທູນຂໍໃຫ້ພຣະຜູ້ເປັນເຈົ້າຊ່ວຍທ່ານໃຫ້ເຫັນວິທີທີ່ຊາຕານພະຍາຍາມລໍ້ລວງທ່ານ. ທ່ານຮຽນຮູ້ຫຍັງແດ່ຈາກ ພາກທີ 10 ທີ່ສາມາດຊ່ວຍທ່ານຕໍ່ຕ້ານຄວາມພະຍາຍາມຂອງຊາຕານ?
ຄຳສອນ ແລະ ພັນທະສັນຍາ 10:34–52
“ຄວາມສະຫລຽວສະຫລາດຂອງ [ພຣະຜູ້ເປັນເຈົ້າ] ແມ່ນຍິ່ງໃຫຍ່ກວ່າເລ່ຫລ່ຽມຂອງມານ.”
ຫລາຍກວ່າ 2,400 ປີກ່ອນໜ້ານັ້ນ, ພຣະຜູ້ເປັນເຈົ້າໄດ້ກະກຽມທີ່ຈະຊົດເຊີຍພາກສ່ວນທີ່ສູນເສຍໄປຂອງພຣະຄຳພີມໍມອນ (ເບິ່ງ 1 ນີໄຟ 9). ທ່ານຮຽນຮູ້ຫຍັງແດ່ກ່ຽວກັບພຣະຜູ້ເປັນເຈົ້າຈາກ ຄຳສອນ ແລະ ພັນທະສັນຍາ 10:34–52? ມີຫລັກຖານຢ່າງໃດແດ່ເຖິງຄວາມສະຫລຽວສະຫລາດ ແລະ ຄວາມຮູ້ລ່ວງໜ້າຂອງພຣະຜູ້ເປັນເຈົ້າ ທີ່ທ່ານໄດ້ເຫັນໃນຊີວິດຂອງທ່ານ?
ບັນທຶກທີ່ພຣະເຈົ້າໄດ້ກະກຽມໄວ້ ເພື່ອຊົດເຊີຍຕົ້ນສະບັບທີ່ສູນເສຍໄປນັ້ນ ເວລານີ້ມີຢູ່ໃນ 1 ນີໄຟ ເຖິງ ອອມໄນ. ເລື່ອງເລົ່າ ແລະ ຄຳສອນຢູ່ໃນບັນທຶກນີ້ ໄດ້ຊ່ວຍທ່ານ “[ໃຫ້] ມີຄວາມເຂົ້າໃຈຫລາຍຂຶ້ນກ່ຽວກັບພຣະກິດຕິຄຸນ” ແນວໃດ? (ຄຳສອນ ແລະ ພັນທະສັນຍາ 10:45).
ມໍມອນຫຍໍ້ແຜ່ນຈາລຶກຄຳ, ໂດຍ ທອມ ໂລແວວ
ຖ້າຫາກເຮົາທູນຂໍຈາກພຣະເຈົ້າ, ເຮົາຈະໄດ້ຮັບ.
ຫລາຍຄົນໃນຄອບຄົວຂອງໂຈເຊັບ ສະມິດ ໄດ້ຂໍໃຫ້ເພິ່ນທູນຖາມເບິ່ງພຣະປະສົງຂອງພຣະຜູ້ເປັນເຈົ້າ ແທນເຂົາເຈົ້າ. ໂຈເຊັບໄດ້ເຕັມໃຈທີ່ຈະເຮັດ, ແຕ່ພຣະຜູ້ເປັນເຈົ້າກໍເຕັມພຣະໄທທີ່ຈະມອບການເປີດເຜີຍສ່ວນຕົວໃຫ້ເຂົາເຈົ້າ. ໃນ ຄຳສອນ ແລະ ພັນທະສັນຍາ 11, ການເປີດເຜີຍທີ່ໂຈເຊັບໄດ້ຮັບສຳລັບໄຮຣຳ ອ້າຍຂອງເພິ່ນ, ພຣະຜູ້ເປັນເຈົ້າໄດ້ກ່າວວ່າ, “ເຮົາຈະໃຫ້ພຣະວິນຍານສ່ວນໜຶ່ງແກ່ເຈົ້າ, … ແລະ ແລ້ວເຈົ້າຈະຮູ້ … ທຸກສິ່ງອັນໃດກໍຕາມທີ່ເຈົ້າປາດຖະໜາຈາກເຮົາ” (ຄຳສອນ ແລະ ພັນທະສັນຍາ 11:13–14).
ພຣະຜູ້ເປັນເຈົ້າໄດ້ກ່າວວ່າ ພຣະຄຳຂອງພຣະອົງແມ່ນສຳລັບ “ທຸກຄົນທີ່ມີຄວາມປາດຖະໜາດີ, ແລະ ໄດ້ເດ່ກ່ຽວຂອງເຂົາອອກໄປ ເພື່ອຈະເກັບກ່ຽວ” (ຂໍ້ທີ 27). ໃນ ຄຳສອນ ແລະ ພັນທະສັນຍາ 11, ແມ່ນຫຍັງທີ່ພຣະຜູ້ເປັນເຈົ້າພະຍາຍາມບອກທ່ານກ່ຽວກັບການເປີດເຜີຍສ່ວນຕົວ? ກ່ຽວກັບການມີສ່ວນຮ່ວມໃນວຽກງານຂອງພຣະເຈົ້າ? ມີຂ່າວສານຢ່າງອື່ນໃດແດ່ທີ່ພຣະອົງມີໃຫ້ສຳລັບທ່ານ?
ຄຳສອນ ແລະ ພັນທະສັນຍາ 11:15–26
ເມື່ອເຮົາສະແຫວງ “ຫາພຣະຄຳ [ຂອງພຣະເຈົ້າ],” ເຮົາຈະໄດ້ຮັບພຣະວິນຍານ ແລະ ອຳນາດຂອງພຣະອົງ.
ແມ່ນແຕ່ກ່ອນພຣະຄຳພີມໍມອນໄດ້ຖືກແປຮຽບຮ້ອຍ, ໄຮຣຳ ສະມິດ ກໍຕື່ນເຕັ້ນທີ່ຈະສັ່ງສອນພຣະກິດຕິຄຸນກ່ອນແລ້ວ. ຂະນະທີ່ທ່ານອ່ານຄຳຕອບຂອງພຣະຜູ້ເປັນເຈົ້າ ເຖິງພຣະປະສົງຂອງພຣະອົງ, ໃຫ້ພິຈາລະນາວ່າ ມັນມີຄວາມໝາຍແນວໃດຕໍ່ທ່ານ ທີ່ຈະ “ຫາພຣະຄຳ [ຂອງພຣະເຈົ້າ]” (ຂໍ້ທີ 21). ການຫາພຣະຄຳຂອງພຣະເຈົ້າຊ່ວຍທ່ານຮັບໃຊ້ຢູ່ໃນສາດສະໜາຈັກແນວໃດ? ມັນໄດ້ນຳອຳນາດຂອງພຣະເຈົ້າມາສູ່ຊີວິດຂອງທ່ານແນວໃດ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 10:5.ເຮົາຮຽນຮູ້ຫຍັງແດ່ໃນຂໍ້ນີ້ກ່ຽວກັບພະລັງຂອງການອະທິຖານ? ເຮົາຈະ “ອະທິຖານສະເໝີ” ແນວໃດ? (ສຳລັບແນວຄິດເພີ່ມເຕີມ, ໃຫ້ເບິ່ງ David A. Bednar, “Pray Always,” Ensign ຫລື Liahona, Nov. 2008, 41–44.)
-
ຄຳສອນ ແລະ ພັນທະສັນຍາ 10:38–46.ເພື່ອຊ່ວຍຄອບຄົວຂອງທ່ານໃຫ້ສົນທະນາເຖິງວິທີທີ່ພຣະຜູ້ເປັນເຈົ້າຊົດເຊີຍພາກສ່ວນການແປທີ່ສູນເສຍໄປຂອງພຣະຄຳພີມໍມອນ, ບາງທີສະມາຊິກໃນຄອບຄົວສາມາດເວົ້າລົມກັນກ່ຽວກັບບາງສິ່ງທີ່ເຂົາເຈົ້າຫາກໍໄດ້ເຮັດເສຍ. ເຂົາເຈົ້າຮູ້ສຶກແນວໃດ ເມື່ອເຂົາເຈົ້າເສຍມັນໄປແລ້ວ? ເຂົາເຈົ້າຮູ້ສຶກແນວໃດ ເມື່ອເຂົາເຈົ້າຊອກພົບເຫັນມັນ? ເຖິງແມ່ນວ່າສ່ວນທີ່ສູນເສຍໄປຂອງພຣະຄຳພີມໍມອນບໍ່ໄດ້ຖືກພົບເຫັນ, ແຕ່ພຣະຜູ້ເປັນເຈົ້າໄດ້ຊົດເຊີຍສ່ວນທີ່ສູນເສຍໄປນັ້ນແນວໃດ, ອີງຕາມ ຄຳສອນ ແລະ ພັນທະສັນຍາ 10:38–46?
-
ຄຳສອນ ແລະ ພັນທະສັນຍາ 10:55–70.ຊັກຊວນສະມາຊິກໃນຄອບຄົວໃຫ້ຊອກຫາ ຫລື ໝາຍສຳນວນທີ່ເລີ່ມຕົ້ນດ້ວຍຄຳວ່າ “ເຮົາຄື” ຫລື “ເຮົາຈະ.” ເຮົາຮຽນຮູ້ຫຍັງແດ່ຈາກສຳນວນ “ເຮົາຄື” ທີ່ກ່ຽວກັບຜູ້ທີ່ພຣະເຢຊູຄຣິດເປັນ ແລະ ສິ່ງທີ່ພຣະອົງເປັນເໝືອນ? ເຮົາຮຽນຮູ້ຫຍັງແດ່ຈາກສຳນວນ “ເຮົາຈະ” ທີ່ກ່ຽວກັບສິ່ງທີ່ພຣະອົງກະທຳ? ຊຸກຍູ້ສະມາຊິກໃນຄອບຄົວໃຫ້ແບ່ງປັນວິທີທີ່ຄວາມຈິງເຫລົ່ານີ້ ເພີ່ມຄວາມເຂັ້ມແຂງໃຫ້ແກ່ສັດທາຂອງເຂົາເຈົ້າໃນພຣະເຢຊູຄຣິດແນວໃດ.
-
ຄຳສອນ ແລະ ພັນທະສັນຍາ 11:12–14.ການອ່ານຂໍ້ເຫລົ່ານີ້ສາມາດຊ່ວຍສະມາຊິກໃນຄອບຄົວຂອງທ່ານ ໃຫ້ຮັບຮູ້ເວລາທີ່ພຣະວິນຍານສື່ສານກັບເຂົາເຈົ້າ. ທ່ານສາມາດເຍືອງໄຟສາຍໃສ່ພື້ນຫ້ອງ ແລະ ຊັກຊວນຄົນໜຶ່ງໃນຄອບຄົວໃຫ້ຍ້າຍໄປຫາບ່ອນທີ່ໄຟສາຍເຍືອງໃສ່. ສິ່ງນີ້ເປັນຄືກັນກັບການເຮັດຕາມການຊີ້ນຳຂອງພຣະວິນຍານບໍລິສຸດແນວໃດ? ມີປະສົບການສ່ວນຕົວຢ່າງໃດແດ່ທີ່ທ່ານສາມາດແບ່ງປັນ?
-
ຄຳສອນ ແລະ ພັນທະສັນຍາ 11:15–30.ໃຫ້ຄິດທີ່ຈະຂຽນສິ່ງທີ່ພຣະຜູ້ເປັນເຈົ້າໄດ້ບອກໄຮຣຳ ສະມິດ ໃຫ້ເຮັດ ເພື່ອວ່າເພິ່ນຈະກະກຽມເພື່ອແບ່ງປັນພຣະກິດຕິຄຸນ. ເຮົາຄວນພະຍາຍາມໃນເລື່ອງໃດເປັນຄອບຄົວ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ພຣະວິນຍານພຣະເຈົ້າ,” ເພງສວດ ແລະ ເພງຂອງເດັກນ້ອຍ, 30; ເບິ່ງ “ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ.”
ການປັບປຸງການສິດສອນຂອງເຮົາ
ນຳໃຊ້ພຣະຄຳພີໃນຊີວິດຂອງທ່ານ. ຫລັງຈາກໄດ້ອ່ານຂ່າວສານຈາກພຣະຄຳພີແລ້ວ, ໃຫ້ຂໍໃຫ້ສະມາຊິກໃນຄອບຄົວແບ່ງປັນຂ່າວສານທີ່ເຂົາເຈົ້ານຳໃຊ້ໃນຊີວິດຂອງເຂົາເຈົ້າ. ຍົກຕົວຢ່າງ, ເຂົາເຈົ້າສາມາດແບ່ງປັນວິທີທີ່ພຣະວິນຍານໄດ້ເປັນອິດທິພົນຕໍ່ເຂົາເຈົ້າ ໃນວິທີທີ່ບັນຍາຍຢູ່ໃນ ຄຳສອນ ແລະ ພັນທະສັນຍາ 11:12–13.
ໂຈເຊັບ ແລະ ໄຮຣຳ ສະມິດ, ໂດຍ ເຄັນ ຄໍແບັດ